Əməkdar artist Bəhram Bağırzadə aparıcılarla bağlı qalmaqallı açıqlama verib. Axşam.az xəbər verir ki, aktyor bu haqda "Künc-bucaq" yutub layihəsində deyib. O, aparıcıları savadsız adlandırıb:
"Aparıcılar məni qane etmir. Aytən Səfərova danışdı, tənqid etdi. Deyir ki, aparıcıların günahı yoxdur. Onları efirə buraxanlar günahkardır. Bunu mən 10 il əvvəl demişəm. Veriliş aparan aparıcı mənə nə məlumat verə bilər? Aparıcıların IQ-sü çox aşağı səviyyədədir. İstəyirəm ki, məndən yüksən olan insan dinləyim, ondan nəsə götürüm. Primitiv çayxanada olan söhbəti, ləhcəsi ilə mənə nə verəcək? Maraqlı olan insanları verilişə dəvət etmirlər".
Bəhram Bağırzadənin sözlərində həqiqətlərin olduğunu deyən tanınmış teletənqidçi, BDU-nun "Multimedia və elektron kommunikasiya” kafedrasının rəhbəri Qulu Məhərrəmli “Sherg.az”a bildirib ki, efirə çıxardılanların əksəriyyətinin savadı, dünyagörüşü və hazırlıqları yoxdur:
"Əslində, bu cəmiyyətin ən böyük problemlərindən biridir. Məsələn, alim, tarixçi, fizikin iddia etdiyi bir çox hədəflər var, lakin onun dünyagörüşü, savadı yüksək səviyyədə deyil. Bu tendensiya televiziyada da bu cür davam edir. Xəbər, veriliş aparıcılarının bir çoxunun predment haqqında bilgisi və ümumi ictimai baxışı zəifdir. Efirə bu cür adamlar çıxardıldıqda izləyicilər məyus olurlar. Təbii ki, efirə dəvət olunan intellektual adam istəyir ki, qarşısındakı aparıcı ona yaxşı suallar verməyi bacarsın. Səhər proqramında çalışan vaxtlar qoyduğumuz əsas tələblərdən biri aparıcıların intellektual səviyyəsinin yüksəkliyi idi. Onlar da bunun öhdəsindən layiqincə gəlirdilər. Məsələn, Mikayıl Abdullayev, Rafael Hüseynov, Nəsibə Zeynalova kimi sənətkarlarla müsahibələr çox səviyyəli alınırdı. Çünki Esmira Çərkəzqızı, İlhamiyyə Rzayeva, Zöhrə Əliyeva, Sevil Nuriyeva, Roza Tağıyeva kimi yüksək intellektual aparıcılar var idi. Lakin hər kəsə savadsız kimi baxmaq da olmaz".
Professor vurğulayıb ki, tənqid olunan şou aparıcıları arasında yüksək intellektli şəxslər də var:
"Məsələn, ATV-də fəaliyyət göstərən Zaur Bəxşəliyev predmenti dəqiq bilən, səviyyəli, televiziyadan xəbəri olan maraqlı biridir. Apardığı verlişin məzmununu kənara qoymaq lazımdır. Həmçinin, Lalə Azərtaş. O, uzunmüddət səhər proqramında yanımda çalışıb. Fikrimcə, Lalə də çox biliklidir. Amma televiziyanın onlara hansı status və mövqe verməsi müzakirə ediləcək mövzudur. Ona görə də xarici görkəmlə efirə aparıcı seçmək hər şeyi həll etmir. Dünyada aparıcılar bilikləri, səviyyələri ilə ad qazanır. Bu səbəblə də televiziyalarımızın intellektual göstəricisi yüksəldilməlidir. Aparıcılar fəaliyyət göstərdikləri televiziyanın təmsilçiləri sayılır. Bunun üçün də prodüserlər, televiziya rəhbərləri həmin nüanslara xüsusi diqqət etməlidir ki, tamaşaçı kanaldan və aparıcıdan üz döndərməsin".