"Rəqib komanda standart vəziyyətlərə çox yaxşı hazırlaşmışdı".

Oxu.Az xəbər verir ki, bunu "Qarabağ"ın baş məşqçisi Qurban Qurbanov Bakıda Rumıniya təmsilçisi FKSB-yə qarşı keçirdikləri UEFA Avropa Liqasının oyunundan sonra mətbuat konfransında deyib.

"Öncəliklə azarkeşlərimizə təşəkkür etmək istəyirəm. Bu mövsüm Avropa Liqasının bütün ev oyunlarında bizimlə bərabər oldular. FKSB ilə matçda da sona qədər bizə inandılar və güvəndilər. Düşünürəm ki, azarkeşlərin buna haqqı çatırdı. Təəssüf ki, bu mövsümkü çıxışlarımız uğurlu alınmadı. Bir oyunda 3 dəfə künc zərbəsindən qol buraxmaq insana ağır gəlir. Belə hallar futbolun xoşagəlməz tərəfləridir. Bir neçə qol şansı yaratdıq. Rəqib komanda standart vəziyyətlərə çox yaxşı hazırlaşmışdı. Bakıdakı son oyunumuzda qələbə qazanmaq istəyirdik. Hər bir halda pozitiv olmalı, qarşıdakı oyunlara baxmalıyıq.

Koxalski zədəli olduğu üçün Buntiçə şans vermişdim. Buna görə peşman deyiləm. Qolların təkrarına baxdım. Düşünürəm ki, çətin toplar idi, Buntiçi günahlandırmaq istəməzdim".

Qeyd edək ki, "Qarabağ" UEFA Avropa Liqasının Liqa mərhələsinin VII turunda FKSB klubuna 2:3 hesabı ilə məğlub olub.

İran azərbaycanlıları arasında böyük populyarlığa sahib olan Traktor futbol komandasının bir neçə üzvü 18 yanvar tarixində Təbrizdəki Mərdaniazər xəstəxanasında xərçəng xəstəsi olan uşaqlarla görüşüb və onlara hədiyyələr təqdim edib.

İran mediasının məlumatına görə, futbolçular uşaqlarla bir müddət vaxt keçirərək, onların xərçəng xəstəliyinə qarşı mübarizəsində ruh yüksəkliyini artırmağa və gələcəyə ümidlərini gücləndirməyə çalışıblar.

Görüşdə Traktor klubunun baş direktoru Səid Müzəffərizadə ilə yanaşı, Tomislav Ştrkali və İqor Postonjski, Əlirza Beyranvənd, Əmirhüseyn Hüseynzadə kimi futbolçular da iştirak edib.

Traktor klubu azərbaycanlı iş adamı Məhəmmədrza Zunuzinin rəhbərliyi ilə xeyriyyə və mədəni fəaliyyətlər həyata keçirir. Daha əvvəl klub xərçəng xəstələrinə dəstək məqsədilə Azərbaycanın Vərni naxışları ilə bəzədilmiş yasəmən rəngli ikinci formalarını təqdim edib. Bu təşəbbüs ictimaiyyətin diqqətini cəlb etmişdi.

Ərdəbil, Zəncan, Şərqi Azərbaycan və Qərbi Azərbaycan İranda xərçəng xəstəliyinin ən çox yayıldığı altı vilayəti arasında yer alır. Bu baxımdan İran Azərbaycanının vilayətləri ölkədə ən yüksək xəstəlik göstəricilərinə malikdir.

Hazırda Traktor komandası İran Premyer Liqasının turnir cədvəlində liderliyini qoruyur, lakin İsfahanın Sepahan komandası ilə çox yaxın rəqabətdədir.

Türkiyə təmsilçisi "Beşiktaş" qapıçısı Mert Günokla müqavilə müddətini artırıb.

Bu barədə klubun mətbuat xidməti məlumat yayıb.

35 yaşlı qolkiperlə "2+1" illik yeni sözləşmə imzalanıb.

Qeyd edək ki, "Beşiktaş" bu gün norveçli baş məşqçi Ule-Qunnar Sulşerlə anlaşdığını açıqlayıb.

"Rafael Ağayev Azərbaycan Karate Federasiyasının (AKF) deyil, "Azərbaycan Milli Karate Federasiyası" İctimai Birliyinin vitse-prezidentidir".

Bu sözləri Publika.az-a açıqlamasında Azərbaycan Karate Federasiyasının (AKF) vitse-prezidenti Füzuli Musayev tanınmış karateçi Rafael Ağayevin ötən gün mətbuata verdiyi açıqlaması barədə danışarkən deyib. Musayev Ağayevin sözlərinə də aydınlıq gətirib:

"O qeyd edib ki, əvvəllər Azərbaycanda çoxsaylı federasiyalar var idi. Son illər Gənclər və İdman Nazirliyinin apardığı idman siyasəti və eyni zamanda “Bədən tərbiyəsi və idman haqqında” Azərbaycan Respublikasının qanununa görə bir idman növü üzrə yalnız bir federasiya akkreditasiyadan keçə bilər. Karate üzrə də Azərbaycanda akkreditasiyadan keçmiş tək qurum Azərbaycan Karate Federasiyasıdır.

1992-ci ildə biz - Füzuli Musayev, Ülvi Quliyev, Əhməd Hətəmov, Mirəli Seyidov, Yaşar Bəşirov və digərləri ilə Azərbaycan Karate-Do Federasiyasını yaratdıq. 1997-ci ildə federasiyaların sayının artmasından sonra vahid Azərbaycan Karate Federasiyalar Assosisasiyası formalaşdı. Bura çoxsaylı federasiyalar daxil idi. Qanunda isə hər idman növü üzrə 1 federasiya nəzərdə tutulurdu. İndi də bu tətbiq olunub. Ədliyyə Nazirliyindən qeydiyyatdan keçən çoxsaylı federasiyalar var, amma onların heç biri Gənclər və İdman Nazirliyi tərəfindən akkreditasiyadan keçməyib. Ona görə də rəsmi faəliyyət göstərə bilməzlər”.

Füzuli Musayev bildirib ki, Azərbaycan Karate Federasiyasının tərkibində 6 keçmiş federasiya üslub kimi fəaliyyət göstərir:

“Onlardan biri də "Azərbaycan Milli Karate Federasiyası" İctimai Birliyidir. Amma o da digər status almamış federasiyalar kimi bizdə üslub olaraq (idman karatesi) qeydə alınıb. Həmin ictimai birliyə də Yaşar Bəşirov rəhbərlik edir.

Bizim çox hörmətli idmançımız, fəxrimiz, mənim tələbəm Rafael Ağayev çıxışlarında karyerasını bitirəcəyini və federasiyada çalışmaq istədiyini bildirdi. Ona baş məşqçi kimi fəaliyyət göstərmək təklif edildi, ancaq müəyyən səbəblərdən istəmədi. Ona "Milli Karate Federasiyası" İB -də vitse-prezident kimi qalmaq təklif edildikdə qəbul etdi. Həmin İctimai Birlik bu gün bizim tərkibimizdədir. Onun rəhbəri Yaşar Bəşirov iclas keçirəndə Rafael Ağayevi çağırar, ya çağırmaz, ona biz heçnə edə bilmərik. Rafael Ağayev bizim öz federasiyamızın tədbirlərinə dəvət edilir. İclaslarımızda isə ancaq rəhbərlik və üzvlərimiz iştirak edir. Buraya heç kim dəvətlə çağırılmır, ümumi elan olunur və hamı iştirak edir. Rafael Ağayev istefa vermək istəyirsə, bu, şəxsi qərarıdır. Amma mən heç vaxt onun ayrılmasını istəməzdim. Biz danışanda dedim ki, "Rafael, görüşərik". Mən düşünürəm ki, Rafael kimi idmançını, karatemizin simasını heç kim itirmək istəməz. Çünki Rafael dünyada tanınmış idmançıdır. Onun hər zaman yanımızda yeri var, düşünürəm ki, bunların hamısı düzələcək. Biz Allahın köməkliyi ilə ondan faydalı istifadə edəcək, Azərbaycanın gələcək karateçilərini də Rafaellə birgə yetişdirəcəyik”.

İngiltərə Premyer Liqasında 21-ci turun daha bir matçı başa çatıb.

Oxu.Az xəbər verir ki, turnir cədvəlinin şəriksiz lideri "Liverpul" bu dəfə "Nottingem"in qonağı olub.

Oyunda hesabı ilk hissədə meydan sahibləri açsalar da, "Liverpul" ikinci hissədə oyuna tarazlıq gətirib. Qarşılaşmada başqa qol olmadığından oyunda qalibi müəyyən etmək mümkün olmayıb - 1:1.

Beləliklə də, hazırda "Liverpul" 47 xalla turnir cədvəlinin zirvəsində yer alır. Ondan bir oyun çox keçirən, lakin 6 xal geri qalan "Nottingem" isə 2-ci yerdə qərarlaşıb.

Paris Olimpiadasının iştirakçıları 100-dən çox qüsurlu medalı geri qaytarıblar.

Bu barədə “La Lettre” nəşri məlumat yayıb.
Fransız nəşri yazıb ki, buna səbəb Paris Sikkəxanasının mükafatların hazırlanmasında istifadə etdiyi keyfiyyətsiz lakdır.
Qeyd edilib ki, daha əvvəl Oyunlarda mükafat alan bəzi idmançılar sosial şəbəkələrdə medallarının üst qatının silinməsindən şikayət edirdilər.

Xatırladaq ki, ötən il iyulun 26-da star götürən olimpiada avqustun 11-də başa çatıb.

“Rəhbərlikdən də deyirlər ki, məsələ sonluğa doğru gedir. Dünən və bu gün rəhbərlikdən heç kimi görməmişik. Ona görə də bir söz deyə bilməyəcəm. Hər şey tamamlanmağa doğru gedir”.

“Qafqazinfo” xəbər verir ki, bu sözləri “Zirə” (4:2) ilə yoxlama görüşündən sonra “Qarabağ”ın baş məşqçisi Qurban Qurbanov futbolçusu futbolçusu Olavio Juninyonun transfer məsələsindən danışarkən deyib.

Təcrübəli mütəxəssis bildirib ki, Juninyonun “Sevilya”ya getməsini istəsə də, futbolçu Braziliya klubunu seçib:

“İstəyərdim ki, Juninyo “Sevilya”ya getsin. Amma Juninyo tərəfdən baxsaq, bəlkə də düzgün qərar qəbul edir. Çünki özü həm braziliyalıdır. Braziliyanın ən böyük klublarından birinə gedir. Rəhbərlik də orada dəyişib. “Flamenqo”nun baş məşqçisi futbolçu kimi çox böyük uğurlar əldə etmiş biri olub. Birbaşa özü ilə təmasda olublar və ona bəzi fikirləri çatdırıblar. Burada söhbət tam finansdan getmir. Braziliya mentaliteti rol oynayır. Braziliyadan da ona diqqət çox idi. Bəzi amillər var, hansı ki, onu mən bilmirəm. Ola bilər ki, braziliyalı olması “Flamenqo” seçiminə təsir edib”.