Klubun qızlardan və oğlanlardan ibarət komandalari ölkə birinciliyinin qalibi oldu
Azərbaycan cüdosu hazırda dinamik inkişaf edir: artıq ilin əvvəlindən idmançılarımız mötəbər beynəlxalq yarışlarda uğurla çıxış edir, nailiyyətləri artırırlar. Ölkəmizdə cüdonun populyarlaşmasına və inkişafına öz töhfəsini verən idman klubları arasında “Judo Club 2012”nin özünəməxsus sanballı payı vardır. Ötən ili 117 medalla başa çatdıran klubun idmançıları yeni mövsümə də iddialı başlayıblar.
Bu günlərdə klubun üzvləri 21 yaşadək gənclər arasında ölkə birinciliyinin fərdi və komanda yarışlarında uğurlu nəticəyə nail olublar. Belə ki, fərdi yarışlarda 2 qızıl, 4 gümüş və 5 bürünc medal qazanan “Judo Club 2012” klubu oğlanlar arasında birinci, ümumi komanda hesabında isə ikinci yeri tutub. Klub həmçinin medalların sayına görə (11 medal) ilk pillədə qərarlaşıb. Fərdi yarışlarda qızıl medalları Mehdi Cəfərov (-73 kq) və Əli Qazımaqomedov (-90 kq) qazanıb. Aliyə İsmayılzadə (-48 kq), Fəqan Məmmədli (-73 kq), Tuncay Şamil (-90 kq) və Vidad Əliyev (-100 kq) ölkə birinciliyinin gümüş medallarına sahib olublar. Bürünc medallara isə Xumar Qasımzadə (-48 kq), Leyla Əliyeva (-52 kq), Leyla Atayeva (-63 kq), Süleyman Əliyev (-81 kq) və Şamil Qasımov (-100 kq) layiq görülüb.

Fevralın 3-də Fövqəladə Hallar Nazirliyinin (FHN) İdman Sağlamlıq Mərkəzində keçirilən cüdo üzrə U-21 gənclər komandalarının ölkə birinciliydə “Judo Club 2012”nin həm qızlardan, həm də oğlanlardan ibarət komandaları qızıl medallara və kuboka sahib çıxıblar.
Beləliklə, klubun təmsilçiləri ötən ilin dekabr ayından bu günə qədər keçirilən ölkədaxili yarışlarda ardıcıl üçüncü dəfədir ki, oğlanlar və kişilər arasında komanda yarışlarının qalibi adını qazanırlar. Qızlardan ibarət komandalar isə bu il ardıcıl ikinci yarışdır ki, liderliyi qoruyub saxlaya bilirlər.
Xatırladaq ki, ötən ilin sonunda böyüklər arasında cüdo üzrə Azərbaycan çempionatının fərdi yarışlarında uğur qazanan klubun üzvləri kişilərin komanda yarışında birinci, qadınların mübarizəsində isə üçüncü yeri tutmuşdular.

Yeni mövsümə uğurla başlayan “Judo Club 2012”nin üzvləri, həmçinin, ilin ilk sınağı olan U-18 yeniyetmələr arasında ölkə birinciliyinin fərdi yarışlarında 9 medala layiq görülüblər. Klubun yetirmələri bu yaş qrupu üzrə həm qızlar, həm də oğlanlar arasında komanda yarışlarında çempionluğu qazanıblar. Bu möhtəşəm qələbənin ardını isə 21 yaşa qədər gənclər arasında Bakı şəhər birinciliyində 4 qızıl, 3 gümüş və 1 bürünc medal qazanan klubun gənc cüdoçuları davam etdirib. “Judo Club 2012”nin üzvləri 15 yaşa qədər kiçik yaşlı yeniyetmə cüdoçular arasında Bakı şəhər birinciliyində 2 qızıl və 1 gümüş, Belçika açıq cüdo turnirində isə iki bürünc medala sahib olublar.
Göründüyü kimi, klub nailiyyətlərini artırır, yeni çempionlar nəslinin yetirişdirilməsində fəal iştirak edir. Əlbəttə, qazanılan uğurların təməlində ölkə rəhbərliyinin idmana və idmançılara diqqət və qayğısı, Azərbaycan Cüdo Federasiyasının (ACF) kluba dəstəyi mühüm rol oynayır. Klubun dinamik, davamlı inkişafında onun təsisçisi, ACF İcraiyyə Komitəsinin üzvü, Azərbaycan Cüdo Veteranları Assosiasiyasının prezidenti, cüdo üzrə veteranlar arasında dünya və Avropa çempionatlarının dəfələrlə qalibi və mükafatçısı Azər Əsgərovun xüsusi xidmətləri vardır. Onun təşəbbüsü ilə klubun cüdo üzrə məşqçilər heyətinə adlı-sanlı tanınmış idmançılar İlqar Müşkiyev və Kifayət Qasımovanın cəlb edilməsi təqdirəlayiq haldır. Bundan başqa, klubun üzvü Zelim Kotsoyevin ötən il həm dünya, həm də Olimpiya çempionu olması burada cüdonun sirlərini öyrənən uşaqlar və yeniyetmələr üçün təsirli motivasiya mənbəyidir. Artıq klubun üzvləri iştirak etdikləri hər bir yarışda favorit qismində göstərilir və yüksək hədəflər uğrunda mübarizə aparırlar.

Gələcəkdə daha böyük uğurlara imza atmağı hədəfləyən klub rəhbərliyi yeni idmançıların yetişdirilməsi, beynəlxalq arenada Azərbaycanı təmsil edəcək çempionların hazırlanması və cüdonun daha da inkişaf etdirilməsi üçün bütün zəruri tədbirləri görür. İnanırıq ki, peşəkar rəhbərlik və məşqçi kollektivinin gərgin səyi nəticəsində klubun üzvləri bu il də çempionluq imicinə sadiqliyini nümayiş etdirərək, ölkə idmanının inkişafına öz töhfələrini daha artıracaqlar.

Böyük Britaniyanın məşhur idman portalı GiveMeSport planetin ən çox maaş alan futbolçularının reytinqini təqdim edib.

Siyahıdakı ilk nömrə Səudiyyə Ərəbistanının "Əl-Nəsr" klubunun portuqaliyalı hücumçusu Kriştiano Ronaldodur. Onun maaşı həftədə 3,231,230 funt sterlinqdir.

İkinci yeri həftədə 1 milyon 607 min 211 funt sterlinq maaşla Səudiyyə Ərəbistanının "Əl-İttihad" klubunda oynayan fransız Kərim Benzema tutur.

İlk üçlüyü İspaniyanın "Barselona" komandasının polşalı hücumçusu Robert Levandovski tamamlayır - həftədə 538,484 funt sterlinq.

4-cü yerdə norveçli hücumçu Erlinq Haaland (həftədə 525.000 funt sterlinq), fransalı Kilian Mbappe isə 5-ci yerdədir (həftədə 502.253 funt sterlinq). /Lent.az

Məqaləyə dair fotomateriallar:

milli.az

Asiya Çempionlar Liqasının Qərb qrupunda 7-ci turun oyunları keçirilir.

Oxu.Az xəbər verir ki, Səudiyyə Ərəbistanının "Ən-Nəsr" klubu doğma meydanda Birləşmiş Ərəb Əmirliklərinin (BƏƏ) "Əl-Vəsl" komandasını qəbul edib.

Meydan sahibləri qonaqların qapısından 4 cavabsız top keçiriblər - 4:0.

39 yaşlı Kriştianu Ronaldu dubla imza ataraq komandasının qələbəsində böyük pay sahibi olub.

Hazırda Səudiyyə klubu 16 xalla qrup 3-südür. BƏƏ təmsilçisi isə 11 xalla 5-ci sırada qərarlaşıb.

Türkiyə Super Liqasında XXII tura yekun vurulub.

Apasport.az xəbər verir ki, Lider “Qalatasaray” səfərdə “Qaziantepspor”un qonağı olub.

Görüşün taleyini bir qol həll edib. 5-ci dəqiqədə “sarı-qırmızılılar”ın yeni transferi Ahmed Kutucu fərqlənib.

“Cimbom” səfərdə minimalhesablı qələbə qazanaraq ən yaxın izləyicisi "Fənərbaxça" ilə 6 xallıq fərqi qoruyub.

Türkiyə Super Liqası
XXII tur
21:00. “Qaziantepspor” – “Qalatasaray” – 0:1
Qol: Ahmed Kutucu, 5

Transfer dövrləri azarkeşlərin futbolda ən çox sevdiyi zaman kəsimidir. Üstəlik, son on ildə məbləğlər o qədər artıb ki, bu rəqabəti izləmək getdikcə daha maraqlı olur. Lakin son zamanlar İngiltərə klubları, ərəb milyarderlər və Səudiyyə Ərəbistanı klublarının "həddi aşması" UEFA, xüsusilə Premyer Liqa rəhbərliyinin maliyyə tənzimləmələrini sərtləşdirməsi ilə nəticələnib. Mütəxəssislər hesab edirlər ki, bu, yaxın gələcəkdə klubların transfer fəaliyyətində daha təmkinli davranmasına səbəb olacaq. Artıq indidən təsirlər hiss olunur. Bu qış transfer pəncərəsi zamanı böyük transferlər çox azdır. Gələcəkdə bunun davam edəcəyi gözlənilir.

TEREF "Kaspi" qəzetinin mövzuya dair məqaləsini təqdim edir.

Vəziyyət bu həddə necə çatdı?

Əsrin əvvəllərində futbol sənayesinə böyük maliyyə axını ilə transfer qiymətləri də artdı. Təməlini "Real Madrid"in qoyduğu irihəcmli oyunçu alışlarını daha sonra "Çelsi", "Mançester Siti", PSJ, Çin klubları və son olaraq Səudiyyə Ərəbistanı təmsilçiləri davam etdirdi. Beynəlxalq İdman Araşdırmaları Mərkəzinin (CIES) araşdırmasına görə, 2015-ci ildə transferlərə 5.88 milyard avro xərclənibsə, 2024-cü ildə bu rəqəm az qala iki dəfə çox - 10.98 milyard avro olub. Rekord 2023-cü ildə qeydə alınıb - 12.24 milyard avro.

Azarkeş və mütəxəssislərin bir çoxu rəqəmlərin şişirdildiyi qənaətindədir. Transfer bazarında şişirdilmiş rəqəmlər dedikdə isə ağla ilk olaraq Premyer Liqa gəlir. İngiltərə bazarı tam başqa bir dünyadır. Orada yarım mövsüm ortabab performans sərgiləyən hər hansı oyunçu üçün 50 milyon avronun ödənilməsi çoxdan adiləşib. İngiltərə klubları son on ildə transferlərə 23 milyard avro xərcləyiblər. Premyer Liqanın ən yaxın izləyicisi İtaliya A Seriyasında bu rəqəm on milyard avrodur. Bu, ingilislərin bazarda necə bir hegemonluq qurduğunun əyani göstəricisidir.

Ədalətli rəqabət cəhdləri

Yalnız pulu çox olanın qalib gəldiyi futbolda haqsız rəqabətin qarşısını almaq üçün UEFA maliyyə "feyr-pley"i qaydalarının tətbiqinə başladı. Lakin bu qaydalar komandalara görə dəyişdiyi üçün ədalətin bərpası mümkün olmadı. Son illərdə milyardlar xərcləyən böyük klublar bu qaydalara ilişməsələr də, nisbətən kiçik komandalar cəzalarla üzləşdilər.

UEFA-nın tədbirlərinin işə yaramaması liqaların özlərinin tənzimləmələr həyata keçirməsini labüdləşdirib. İngiltərə Premyer Liqası rəhbərliyi xərclərin həddən artıq qalxması səbəbindən maliyyə "feyr-pley"i qaydalarına oxşayan nizamlamalarla vəziyyəti yoluna qoymağa çalışır. Bu, UEFA-nın qaydalarından daha sərtdir, sərhədləri daha dar və konkretdir. Qaydalara görə, klublar hər il gəlir və zərərlərini açıqlamaq məcburiyyətindədirlər. Ümumilikdə üç il ərzində maliyyə itkiləri maksimim 105 milyon funt sterlinq ola bilər.

Ən əsası, bu qaydalar yalnız kağız üzərində qalmır, tətbiqinə diqqət edilir. Məsələn, "Everton" zərərinin limitdən çox olması səbəbindən keçən mövsüm altı xalının silinməsi ilə üzləşmişdi. "Nottingem Forest" transfer fəaliyyətindəki uyğunsuzluqlara görə dörd xalından olmuşdu. İndi də "Mançester Siti" və "Çelsi" ittihamlarla üz-üzədir. Hər iki klubun son illərdə çox böyük məbləğlər xərcləməsi diqqətləri onlara yönəldib. Görünür, bu qaydalar transfer bazarında böyük dəyişikliklərə səbəb olacaq.

Bazar sakitləşir

Son on ildə transferlərə ən çox pul xərcləyən on klubun altısı İngiltərə təmsilçiləridir. Lakin indi ingilis klubları əvvəlki qədər pul xərcləyə bilməyəcəklər. Bu isə ümumilikdə transfer bazarına təsir göstərəcək. Qaydaların sərt tətbiq olunmağa başlandığı 2023/24 mövsümündən etibarən xərclərdə azalma müşahidə olunur. Bu mövsüm iki milyarda yaxın maliyyə xərclənib. Üstəlik transfer əməliyyatlarının sayında da eniş var. Qış transfer pəncərəsi ümumiyyətlə sakit keçir. Xviça Kvaratsxeliyanın "Napoli"dən PSJ-yə, Omar Marmuşun "Ayntraxt"dan "Mançester Siti"yə keçidləri istisna olmaqla böyük ödənişli keçidlər, demək olar ki yoxdur. Bu gedişlə əvvəlki fantastik transfer əməliyyatlarına qayıdışın olmayacağı gözlənilir. Yəni, hələ uzun illər Neymarın 222 milyon avroya "Barselona"dan PSJ-yə transfer rekordu qırılmayacaq.

İngiltərə ilə yanaşı, digər liqalar da qaydaları sərtləşdirirlər. Məsələn, İspaniya La Liqasında tətbiq olunan tənzimləmələr "Barselona"nın Messinin gedişinə göz yumması ilə nəticələnmişdi. Katalonlar hələ də oyunçu qeydiyyatı prosesində problemlərlə üzləşirlər. Fransada son illərdə bir çox klub çətinlik yaşayır. "Bordo" müflis olub, "Lion" aşağı liqaya düşmək təhlükəsi ilə üz-üzədir. Xərclərin artdığı yeganə liqa İtaliya A Seriyasıdır. Lakin orada da iki il əvvəl transfer əməliyyatlarındakı uyğunsuzluqlar səbəbindən "Yuventus" cəzalara məruz qalmışdı.

Klublar artıq birdəfəlik transferlər əvəzində icarə variantlarına üstünlük verirlər. Eyni zamanda, azad agentlərə yönəlmələr artıb. Hətta "Real Madrid" Mbappe üçün PSJ-yə ödəniş etmək əvəzinə onu azad agent kimi cəlb etmək üçün səbirlə gözləməyi üstün tutmuşdu. Klublar artıq daha gənc oyunçulara və akademiya yetirmələrinə yönəlirlər. Yaşlı oyunçular üçün isə ümumiyyətlə böyük məbləğlər ödənməməsinə diqqət yetirilir. Çünki onlardan qazanc əldə etmək ehtimalı aşağıdır. İndi nəinki strategiyanı gənc istedadları üzə çıxarmaq üzərində quranlar, hətta böyük klublar da irihəcmli transferlərdənsə gənc oyunçuları tapıb daha aşağı məvaciblə cəlb etməyə yönəlirlər. Transfer strategiyaları dəyişməkdədir, xərclərdə böyük eniş müşahidə olunur və bu, yaxın gələcəkdə ümumən futbolu dəyişəcək.

Aleksandr Dyukov yenidən Rusiya Futbol İttifaqının (RFU) prezidenti seçilib.

“Qafqazinfo” xəbər verir ki, seçkilər təşkilatın Moskvada keçirilən konfransında baş tutub.

Dyukov seçkilərdə yeganə namizəd olub və o, yekdilliklə yenidən rəhbər seçilib.

Qeyd edək ki, 57 yaşlı Dyukov RFS prezidenti vəzifəsini 2019-cu il fevralın 22-dən icra edir.

Niderland Erediviziyasının 21-ci turunda keçirilən “Herenven” - “Fortuna” (2:2) matçında maraqlı hadisə baş verib.

“Qafqazinfo” xəbər verir ki, qarşılaşmanın son dəqiqələrində texniki səhv ucbatından qonaqların heyətində 12 futbolçu olub.

Qonaq komandanın matçı 12 nəfərlə davam etdirməsi qarşılaşmanın baş hakiminin gözündən qaçıb və “Fortuna” qol vuraraq hesabı bərabərləşdirib.

Niderland Futbol Federasiyasının qarşılaşma ilə bağlı hansı qərarı verəcəyi maraqla gözlənilir.

Məşhur britaniyalı ağır çəkili boksçu Derek Çisora ​​əmindir ki, Tayson Fyuri böyük boksa qayıdacaq.

O, Taysonun hazırkı vəziyyətindən də danışıb.

“Fyuri indi ot çəkir, tək qalmaq istəyir. Dayandıqda nə olacağını bilirsinizmi? O, karyerasını davam etdirəcək və yenidən mübarizə aparacaq. İndi Tayson sadəcə həyatından həzz alır, içki içir. O, atalıqdan həzz alır”, – Çisora deyib.

Daha əvvəl Tayson Fyuri təqaüdə çıxacağını açıqlamışdı. Fyuri əvvəllər bir neçə dəfə, ən son 2022-ci ilin avqustunda təqaüdə çıxıb. Bundan sonra boksçu qayıdıb və dörd döyüş keçirib: iki dəfə WBC çempionluq kəmərini qoruyub, bundan sonra daha iki dəfə Aleksandr Usikə uduzub.

Azərbaycan cüdoçusu Ruslan Paşayev (66 kq) fransalı rəqibinə qalib gələrək “Böyük Dəbilqə” turnirinin qalibi olub.

Gununsesi.info xəbər verir ki, bu barədə Azərbaycan Cüdo Federasiyası məlumat yayıb.

Bildirilib ki, Fransanın paytaxtı Paris şəhərində keçirilən turnirin ilk günündə R.Paşayev qızıl medal qazanıb.

O, final görüşündə Daikii Boubanı məğlub edib.