Norveçli qrossmeyster Maqnus Karlsen ABŞ-nin Nyu York şəhərində keçirilən rapid üzrə dünya çempionatından qovulub.

Buna səbəb onun cins şalvar geyinməsi olub.

Belə ki, Beynəlxalq Şahmat Federasiyası yarış üçün geyim forması müəyyənləşdirib. M.Karlsen isə buna əməl etməyib.

Əvvəlcə məşhur şahmatçıya geyimini dəyişməsi və cərimə ödəyərək geri dönməsi təklif edilib. Lakin norveçli qrossmeyster bundan imtina edib. Nəticədə o, yarışdan qovulub.

Lionel Messi və Kriştiano Ronaldo XXI əsrin ən yaxşı futbolçuları olmaqla yanaşı, dünyanın ən yüksək maaş alan futbolçuları sırasında yer alırlar. Lakin bir futbolçunun sərvəti onların ümumi sərvətindən 12 dəfə çoxdur.

Bu barədə "Mirror" yazıb.

37 yaşlı Messi "Barselona", PSJ və "İnter Mayami" ilə saysız-hesabsız kuboklar qazanıb. Ronaldo isə "Real Madrid", "Mançester Yunayted", "Yuventus" və "Əl-Nəsr" klublarındakı uğurları ilə parlayıb.

Sərvətlərinin müqayisəsi

"Celebrity Net Worth" məlumatına əsasən, Messinin sərvəti təxminən 850 milyon dollar dəyərindədir. Ronaldo isə təxminən 800 milyon dollar sərvətə malikdir.

Onların ümumi sərvəti 1,66 milyard dollar təşkil edir. 26 yaşlı Faiq Bolkiahın isə 20 milyard dollar sərvəti var.

Faiq Bolkiah haqqında nə məlumdur?

Bruney Sultanının qardaşı oğlu və 250 milyard dollarlıq sərvətə sahib ailənin varislərindən biri olan Bolkiah Los-Ancelesdə doğulub. O, futbol karyerasına "Nyuberi" klubunun gənclər komandasında başlayıb, daha sonra "Sauthempton", "Çelsi" və "Lester Siti" akademiyalarında futbolun sirrlərini öyrənib. Lakin Premyer Liqada oyunlara çıxmaq ona nəsib olmayıb.

2020-ci ildə sol cinah oyunçusu "Maritimu" ilə ilk peşəkar müqaviləsini imzalayıb. Buna baxmayaraq, o, əsas komandada çıxış etməyib və yalnız U-23 komandasının tərkibində bir oyunda iştirak edib. Son olaraq Taulandın "Ratchaburi" klubunda top qovub.

Həm Amerika, həm də Bruney vətəndaşı olan Bolkiah beynəlxalq arenada Bruneyi altı dəfə təmsil edib və bir qol vurub. Oyun bacarığı ilə Premyer Liqada yer ala bilməsə də, "Çelsi"nin gənclər komandasında zənginliyi ilə diqqət çəkib.

Komanda yoldaşlarından biri onun haqqında belə deyib:

"Onun kral ailəsindən olduğunu düşünməzdiniz. O, sadə və çalışqan bir gənc idi. Biz zarafatla deyirdik ki, futbol oynamasına ehtiyac yoxdur, amma o, futbola olan sevgisi üçün oynayırdı". \\Qaynarinfo.Az

Azərbaycan Premyer Liqasında bazar dəyəri ən yüksək olan futbolçuların siyahısı yenilənib.

Oxu.Az xəbər verir ki, bu barədə "Transfermarkt" onlayn portalı məlumat yayıb.

"10-luq"un ilk 8 pilləsində "Qarabağ"ın üzvləri yer alıblar. Leandro Andrade və Olavio Juninyo 2 milyon avro ilə 1-2-ci pillələri bölüşdürürlər.

Azərbaycan millisinin üzvü Nəriman Axundzadənin qiyməti 1,8 milyon avroya yüksəlib. O, Ağdam təmsilçisindəki komanda yoldaşı Aleksey Kaşukla birlikdə 3-4-cü sıralardadır. Ölkə çempionunun qapıçısı Mateuş Koxalski 1,5 milyon avro ilə beşincidir.

Emmanuel Addai və Toral Bayramovun da bazar dəyəri qalxıb. Onlar Yassin Benzia ilə birlikdə 1,2 milyon avro qiymətləndiriliblər və müvafiq olaraq 6, 7 və 8-ci yerdədirlər.

"Sabah"dan Pavol Safranko 1 milyon avro ilə doqquzuncudur. "Neftçi"də çıxış edən və qiyməti düşən Yuri Matiasın da bazar dəyəri 1 milyon avro göstərilib.

İngiltərə Premyer Liqasının 18-ci turuda "Vulverhempton" "Mançester Yunayted"i qəbul edib.

Oxu.Az xəbər verir ki, qarşılaşma 2:0 hesabı ilə "Vulverhempton"un xeyrinə başa çatıb.

47-ci dəqiqədə "Mançester Yunayted"in yarımmüdafiəçisi Bruno Fernandes qırmızı vərəqə alıb. 58-ci dəqiqədə "Vulverhempton"un hücumçusu Mateus Kunya küncdən birbaşa zərbə ilə fərqlənərək matçda hesabı açıb. 90+9-cu dəqiqədə hücumçu Hvanq Hee Çan meydan sahiblərinin üstünlüyünü artırıb.

Hazırda "Vulverhempton" İngiltərə çempionatının turnir cədvəlində 17-ci yerdədir. Komanda 18 görüşdə 15 xal toplayıb. "Mançester Yunayted" isə 18 oyundan sonra 22 xalla 14-cü yerdədir.

Bu gün ilin idman yekunlarına həsr olunan mərasim keçirilib.

Ajans.az xəbər verir ki, Azərbaycan Prezidenti, Milli Olimpiya Komitəsinin Prezidenti İlham Əliyev mərasimdə iştirak edib.

Tədbirdə dövlət başçısı ölkəmizdə idmanın inkişafında xidmətlərinə görə Natiq Bağırova, Rauf Bunyatəliyevə, Cavanşir Qurbanova və Sadıq Sadıqova Prezidentin fəxri fərmanlarını təqdim edib.

Bundan başqa, Azərbaycanda idmanın inkişafında xüsusi xidmətlərinə və yüksək peşəkarlığına görə Nəriman Abdullayev və Rövşən Umudov “Əməkdar bədən tərbiyəsi və idman xadimi” fəxri adları ilə təltif olunublar.

Prezident İlham Əliyev ölkəmizdə idmanın inkişafında xidmətlərinə görə Zərqələm Abbasovaya, İqrar Cəfərova, Fərhad Əliyevə, Musa Mamedova, Nəsimi Musayevə, Aydın Məmmədova, Rəşad Rəsulluya, Tahir Tahirova və Vüqar Verdiyevə “Tərəqqi” medallarını təqdim edib.

Dövlət başçısı 2024-cü ildə yüksək nailiyyətlər qazanmış bir qrup idmançıya və idman mütəxəssisinə - Anna Skidan, Vüqar Əzimov, Aynur Rzayeva, Sərxan Əliyev, Hidayət Heydərov, Zelim Kotsoyev, Vladimir Şulikin, Əliabbas Rzazadə, Rövşən Hacıyev, Rəna Həsənova, Könül Mikayılova, Qaşım Maqomedov, Sabir Həsənov, Vadim Kutukov, Anar Süleymanov, Elgiz Əlizadə, Şahin Xudaverdiyev, Ceyhun Hüseynov, Anar Məmmədov, İmaməddin Xəlilov və Ərkan Sağdıç yeni mənzillərin orderlərini təqdim edib.

İngiltərənin "Mançester Yunayted" klubu qapıçısı Altay Bayındırla yollarını ayırmaq qərarına gəlib.

"Report" xəbər verir ki, bu barədə "The Sun" nəşri məlumat yayıb.

"Qırmızı şeytanlar" qış transfer dönəmində 26 yaşlı qolkiper üçün gələcək təklifləri nəzərdən keçirəcək. Klub kamerunlu Andre Onana ilə rəqabət apara biləcək oyunçu almaq niyyətindədir.

Qeyd edək ki, 2023-cü ildə "Mançester Yunayted"ə keçən türkiyəli qapıçı komandanın heyətində üç oyunda meydana çıxıb.

İngiltərənin "Arsenal" klubu Premyer Liqada yeni rekord müəyyənləşdirib.

"32gun.az" xəbər verir ki, "topçular" buna XVII turda "Kristal Pelas"ı 5:1 hesabı ilə məğlub etməklə nail olub.

2024-cü ildə Mikel Artetanın baş məşqçisi olduğu kollektiv bütün yarışlarda altı səfər matçında 5 və daha çox qol vurub.

Bu, bir təqvim ilində Premyer Liqa klubları üçün rekorddur.

Qeyd edək ki, London təmsilçisi hazırda 33 xalla üçüncü pillədə qərarlaşıb.