“Çöldə şaxta var, bunun bizim üçün nə fərqi var, onsuz da evdə deyilik”

Ukrayna Silahlı Qüvvələri (AFU) nəzarətinə götürəndən sonra qaçan Sudja sakinləri regionda müharibənin tanınması tələbi ilə Kurskda kortəbii mitinqə çıxıblar. Bu barədə Rusiyanın “7×7” nəşri yazıb.

“Harada donduğumuza əhəmiyyət vermirik. Çöldə şaxta var, bunun bizim üçün nə fərqi var, onsuz da evdə deyilik”, - qaçqınlardan biri nəşrin müxbirinə deyib.

Bundan əvvəl “Vkontakte” sosial şəbəkəsi Sudjanski rayonundan məcburi köçkünlərin mitinqini müzakirə edən postu bloklayıb.

Aksiya zamanı yerli hakimiyyət orqanları ilə qarşılıqlı əlaqə şöbəsinin müdiri Anatoli Droqan etirazçılara qarşı çıxıb. O, mitinqi “qanunsuz hərəkət” adlandırıb və qaçqınlardan kollektiv müraciətin surətini vermək, gələcəkdə əlaqə saxlamaq üçün “qrup rəhbərlərini müəyyənləşdirməyi” xahiş edib.

“Sizi qanunsuz hərəkətlərə sövq edirlər. Biz sizinlə fövqəladə rejimdə yaşayırıq. Təəssüf ki, bu hakimiyyətdən asılı deyil. Bu, müharibədir. Bu, hakimiyyət tərəfindən idarə olunmur”, –Droqan vurğulayıb.

Etirazçılar regionda müharibə olduğunu etiraf etməyi tələb ediblər və həmçinin Droqandan niyə onlarla görüşə Sudjanski rayonunun rəhbəri Aleksandr Boqaçevin deyil, məhz onun gəldiyini soruşublar. Droqan bu barədə etirazçılara heç nə deməyib.

Daha sonra meydana başqa bir məmur gəlib və çərşənbə axşamı, noyabrın 12-də qubernatorla görüş təşkil edəcəyinə söz verib. Lakin mitinqdə iştirak edən başqa bir iştirakçı “7x7”yə bildirib ki, “qubernator sakinlərlə görüşə hazır deyil” və ona görə də rayon rəhbəri görüşdə olacaq.

Bundan əvvəl Kurskda digər sərhədyanı rayon Bolşesoldatskinin sakinlərinin mitinqi keçirilib. Onlar kirayə haqqının baha olması və mənzil sertifikatlarının olmaması səbəbindən müvəqqəti mənzil kirayə götürə bilməmələrindən şikayətləniblər.

Qeyd edək ki, avqustun 6-da Ukrayna Silahlı Qüvvələri Kursk vilayətinə hücuma keçib və Ali Baş Komandan Aleksandr Sırskinin sözlərinə görə, döyüşlərin ilk həftəsində onlar təxminən 1300 kvadratmetr ərazini nəzarətə götürərək 100-ə yaxın yaşayış məntəqəsini ələ keçiriblər. Müharibənin Tədqiqi İnstitutunun (ISW) məlumatına görə, Ukrayna hərbçiləri tərəfindən ələ keçirilən ərazi təxminən 1160 kvadratkilometr olub.

Sentyabr və oktyabr aylarında rus qoşunları əks hücuma cəhd etdilər. “DeepState” analitik layihəsinə görə, oktyabrın ortalarına qədər təxminən 615 kvadratkilometr ərazi Ukrayna Silahlı Qüvvələrinin nəzarətində qalıb. Bunun fonunda Ukrayna Prezidenti Volodimir Zelenski bildirib ki, Ukrayna Kursk vilayəti ərazisində “bufer zona” yarada bilib və bu, Kiyevin strateji məqsədlərindən biridir. O, həmçinin qeyd edib ki, Ukrayna qoşunları öz mövqelərini saxlamaqda davam edirlər.

Noyabrın 6-da Kursk vilayəti üzrə insan hüquqları üzrə müvəkkilinin mətbuat xidməti Vladimir Firsov bildirib ki, regionda gedən döyüşlər nəticəsində 100-ə yaxın dinc sakin həlak olub, 350-dən çox insan yaralanıb.

Müəllif: Turan Abdulla
ayna.az