 |
|
|
"Avropalı tərəfdaşlar ölkədə keçirilən seçkiləri legitim hesab etmirlər".
Bizimxeber.az bildirir ki, bunu Gürcüstanın baş naziri İrakli Kobaxidze deyib.
Hökumət başçısı bildirib ki, Avropa ilə ünsiyyətə başlamaq üçün bu ilkin şərt hesab oluna bilər. “Biz hər bir ölkənin seçkilərin legitimliyini tanımasını gözləyəcəyik və təbii ki, bu, bizə ikitərəfli münasibətləri aktivləşdirməyə imkan verəcək. Bu, prinsipial olaraq vacibdir – hər kəs ATƏT/DTİHB-nin rəyini qəbul etməlidir. Biz belə bir tanınmanı gözləyəcəyik və bundan sonra təbii ki, istənilən ölkə ilə fəal \məkdaşlıqda olacağıq”, - Gürcüstanın baş naziri İrakli Kobaxidze bildirib.
Mərkəzi Seçki Komissiyası noyabrın 16-da oktyabrın 26-da keçirilmiş seçkilərin nəticələrinə yekun vurub. MSK-nın məlumatına görə, “Gürcü arzusu” 11-ci çağırış parlamentdəki 150 mandatdan 89-na, müxalifət platformalarından isə 4-ü, cəmi 61 mandata malikdir.
Müxalifət, qeyri-hökumət sektoru və prezident isə 26 oktyabr seçkilərini saxtakarlıq hesab edir. Artıq 1 hədtədir ki, Gürcüstanda dayanmayan etiraz aksiyaları davam edir.
Gürcüstan Prezidenti Salome Zurabişvili İctimai Televiziyaya müsahibəsində parlament seçkilərindən sonra dediyi sözlərə aydınlıq gətirib.
Bu barədə “Report” xarici mətbuata istinadən xəbər verir.
Qeyd edək ki, o, daha əvvəl “Associated Press” agentliyinə müsahibəsində qalmaqala səbəb olan “erməni karuselindən” istifadə etdiyini açıqlayıb.
"Mən demək istəyirəm ki, milliyyətcə ermənilər (Gürcüstan vətəndaşları) və Rusiya təbliğatının da fəal olduğu (qonşu ölkədəki-red)ermənilər. Bu "erməni karuselində" etnik çalar yox idi”, - Zurabişvili qeyd edib.
Gürcüstan Prezidentinin sözlərinə görə, o, bu “konserti” ilk dəfə Eduard Şevardnadzenin dövründə Gürcüstana qayıdanda eşidib. Zurabişvili iddia edib ki, eyni üsuldan Mixeil Saakaşvilinin dövründə də istifadə olunub.
“Səhv etmirəmsə, Ermənistanda buna “gürcü karuseli” deyirlər, onda heç bir milliyyət çaları yoxdur”, - o əlavə edib.
Sankt-Peterburqun Primorski Rayon Məhkəməsinin qərarı ilə publisist Aleksandr Nevzorovun qayınanası Nataliya Kolesnikovanın Lisiy Nos qəsəbəsində yerləşən evi və torpaq sahəsi dövlət xeyrinə müsadirə edilib.
Bu barədə “İnsider” məlumat yayıb.
Avqustun 8-də Nevzorovun həyat yoldaşı Lidiya ilə anası arasında bu əmlakın alqı-satqısı ilə bağlı müqavilə bağlanıb, məhkəmə müqaviləni etibarsız hesab edib. Hazırda torpaq sahəsi və ev Dövlət Əmlakının İdarə Edilməsi üzrə Federal Agentliyin balansındadır.
Bundan əlavə, noyabr ayında məhkəmə qərarı ilə Nataliya Kolesnikovanın mənzilinin üzərinə həbs qoyulub. Bu əmlakı da qızı onun adına keçirib. İstintaqın fikrincə, sövdələşmə uydurma əqd olub.
Xatırladaq ki, 2024-cü ilin iyulunda Nevzorov və həyat yoldaşı “ekstremist birlik” (Rusiya praktikasında ailənin belə status alması ilə bağlı ilk hal) və onların torpaq sahələri, yaşayış evi, avtomobili və “Piter-Texnoproyekt-novıye resursı” şirkətindəki payı dövlət mülkiyyətinə keçib. Sankt-Peterburq məhkəmələrinin mətbuat xidmətinin bəyanatına görə, bu, “ekstremist fəaliyyətin həyata keçirilməsi üçün” istifadə olunduğuna görə edilib.
Publisist Aleksandr Nevzorov Rusiyada “xarici agent” elan edilib, həmçinin Rusiya ordusu haqqında “saxta” məlumat yaydığına görə qiyabi olaraq 8 il müddətinə azadlıqdan məhrum edilib.
Britaniyanın Milli Cinayətə Qarşı Mübarizə Agentliyi (NCA) böyük bir beynəlxalq araşdırma nəticəsində dünyada fəaliyyət göstərən Rusiyaya aid cinayət şəbəkəsinin ifşa olunduğunu və zərərsizləşdirildiyini açıqlayıb.
Qaynarinfo xəbər verir ki, təhqiqat məlumatlarına görə, şəbəkənin əsasını Smart və TGR Group təşkil edirdi. Şəbəkə əsasən, Britaniyada, Yaxın Şərq və Cənubi Amerikada və eləcə də Rusiyada cinayətkar qruplaşmaların çirkli pullarının yuyulması ilə məşğul olurdu.
Açığa çıxarılan şəbəkənin fəaliyyət sahələri arasında narkotik ticarəti, pul tələbi üçün proqramların hazırlanması və istehsalı və casusluq da mövcud idi.
NCA-nın məlumatına görə, araşdırma nəticəsində müxtəlif ölkələrdə 84 nəfər həbs olunub.
Rus şəbəkəsinin zərərsizləşdirilməsi əməliyyatı beynəlxalq kəşfiyyat orqanları tərəfindən Operation Destabilise adı ilə sənədlərdə qeyd olunub.
«İlk dəfədir ki, biz Rusiyanın elitası, kibercinayətkarların gizli varlıqları və Britaniyanın küçələrində fəaliyyət göstərən narkotik ticarətçiləri arasında əlaqələri müəyyən edirik. Onları birləşdirən bağ Smart və TGR-nin gücləri oldu ki, bu əlaqə hələlik görünməz idi», – NCA-nın xüsusi əməliyyatlar üzrə baş direktoru Rob Cons bildirib.
Araşdırma əsasən 2022–2023-cü illər ərzində aparılıb, amma ABŞ-ın hakimiyyət orqanları ilə razılaşdırılaraq nəticələr yalnız indi açıqlanıb. Bu, ABŞ Maliyyə Nazirliyinin Xarici Aktivlərin Nəzarət Bürosu (OFAC) tərəfindən cinayət şəbəkəsinin başında duran bir qrup rusiyalı və bir neçə şirkətə qarşı sanksiyaların elan edildiyi gündür.
ABŞ-ın Terrorizm və Maliyyə Kəşfiyyat üzrə müvəqqəti müavin katibi Bredli Smit çərşənbə günü bildirdi ki, «TGR Group vasitəsilə, Rusiya elitası, xüsusən ABŞ dolları ilə təmin olunan sabit kriptovalyutalar istifadə edərək, ABŞ və beynəlxalq sanksiyaları ötüb, özlərini və Kremlə sərvət artırırdılar».
O, ABŞ-ın, müttəfiqlərinin və tərəfdaşlarının Rusiya tərəfindən qeyri-qanuni maliyyə sxemləri ilə qanunsuz gəlirlərin yığılmasını, saxlanmasını və ötürülməsini dayandırmağa davam edəcəyinə əmin olduğunu vurğulayıb.
Cinayət şəbəkəsinin başçıları…
Operation Destabilise çərçivəsində ABŞ sanksiyalarına məruz qalan fiziki şəxslər arasında aşağıdakılar var:
Ceyc Rosi — Rusiyada doğulub, Ukrayna vətəndaşıdır. Araşdırma məlumatlarına görə, TGR Group-un tam nəzarəti altındadır və o, həmçinin TGR Group-a daxil olan TGR Partners şirkətinin təsisçisidir. Rosi, həmçinin, Rusiyada fəaliyyət göstərən və OFAC tərəfindən sanksiyaya məruz qalan Garantex OU adlı kriptovalyuta birjası vasitəsilə stəblkoin əməliyyatlarını idarə edir.
Yelena Çikinyan — Rusiya vətəndaşıdır və Rosiyə birbaşa tabe olaraq TGR Group-da qərar qəbuletmə funksiyasını yerinə yetirir. 2023-cü ildə o, Rusiyadan maliyyə vəsaitlərinin çıxarılması əməliyyatında iştirak edib, bu vəsaitlərin, ehtimal ki, Böyük Britaniyada yerləşən və Britaniya sanksiyalarına məruz qalan rus medianın fəaliyyətini dəstəkləmək üçün istifadə ediləcəyi müəyyən edilib. Həmçinin, Çikinyan kriptovalyuta ilə bağlı saxtakarlıqda və mülkiyyət almağa yönəldilmiş gəlir mənbələrinin gizlədilməsi ilə bağlı sxemlər təşkil etməkdə ittiham olunur.
Andreyş Bradenş — Latviya vətəndaşıdır və TGR Group-a daxil olan bir çox şirkətin fəaliyyəti ilə əlaqələndirilir. Bu şirkətlərdən biri olan Ullman Global Vayominq ştatında yerləşir və tamamilə Bradenşə aiddir.
Yekaterina Jdanova — Smart şirkətinin rəhbəri, onun köməkçiləri Hacı-Murad Maqomedov və Nikita Krasnov ilə birlikdə TGR Group-un paralel maliyyə yuyulması və pulun ötürülməsi şəbəkəsini təmsil edir. Üçünün də vətəndaqlıqları NCA-nın hesabatında göstərilmir.
Araşdırma zamanı Jdanova, Maqomedov və Krasnov-un əsasən Böyük Britaniyada fəaliyyət göstərdikləri müəyyən edilib. NCA-nın fəaliyyət miqyasını göstərmək üçün təqdim etdiyi nümunəyə görə, bu qrup dörd ay ərzində İngiltərə, Şotlandiya, Uels və La-Manş boğazı adalarında yerləşən 55 məntəqədə böyük məbləğdə nağd pul ötürülməsini təşkil edib.
Həmçinin, “hüquqi şəxslər və şirkətlər”, ABŞ sanksiya siyahısına daxil olanlar arasında Rusiyada, Böyük Britaniyada, ABŞ-da, BƏƏ və Taylandda yerləşən və Avropa və Asiyanın digər ölkələrində filialları olan şirkətlər vardır.
Əməliyyat çərçivəsində dünyada onlarla şəxs həbs edilib. Bundan əlavə, 20 milyon funt sterlinqdən çox nağd pul və kriptovalyuta müsadirə edilib.
Maxinasiyaların sxemi: Bu əməliyyat, əsasən, maliyyə vəsaitlərinin yuyulması, narkotik ticarəti və qeyri-qanuni maliyyə sxemlərinin həyata keçirilməsi məqsədini güdüb, bu da beynəlxalq hüquq-mühafizə orqanları tərəfindən aşkarlanıb.
Smart və TGR Group Böyük Britaniya və dünya üzrə narkotik və atəşli silahların qanunsuz dövriyyəsi ilə məşğul olan bir neçə beynəlxalq cinayətkar sindikatına pul yuyulması xidmətləri təqdim edib, – NCA-nın hesabatında bildirilir.
Sxemin mahiyyəti budur ki, şəbəkə bir ölkədə pul alır və onu başqa bir ölkədə ekvivalent olaraq verir, çox vaxt kriptovalyutaları nağd pula çevirərək pul axınlarını optimallaşdırır və valyutanı yuyur. Beynəlxalq araşdırma iştirakçılarının sözlərinə görə, onlar böyük məbləğdə nağd pulun müxtəlif şəhərlərdə küçələrdə ötürülməsini və dərhal sonra eyni həcmdə kriptovalyutanın hərəkətini müşahidə ediblər.
NCA-nın bildirdiyinə görə, Rusiya şəbəkəsi müştərilərinə Rusiya vətəndaşlarının Britaniyaya qanunsuz şəkildə pul keçirmə sanksiyalarını aşmağa kömək edib. 2022-ci ilin sonlarından 2023-cü ilin yayına qədər Smart şəbəkəsi, Böyük Britaniyada Rusiya casusluq əməliyyatlarını maliyyələşdirmək üçün istifadə olunub.
Operation Destabilise əvvəlcədən beynəlxalq hüquq-mühafizə orqanları və tənzimləyici orqanlar tərəfindən məlum olmayan milyardlarla dolların yuyulması sxemlərini üzə çıxarıb, – NCA-nın xüsusi əməliyyatlar şöbəsinin rəhbəri Rob Cones bildirib.
Rusiyada dərin köklər: Smart və TGR Group-un Rusiyanın maliyyə sektoru ilə güclü əlaqələri olduğu müəyyən edilib. Pul axınları tez-tez yaxın Şərq vasitəsilə Rusiyaya və ya Rusiyadan yönəldilib, şəbəkə isə ümumilikdə 30-dan çox ölkədə fəaliyyət göstərib.
Bundan əlavə, Smart və TGR-nin kriptovalyuta ünvanlarının Garantex adlı kriptovalyuta mübadilə xidməti ilə müntəzəm olaraq əlaqə qurduğu aşkar edilib. Garantex 2022-ci ildə Böyük Britaniya və ABŞ tərəfindən sanksiya tətbiq edilən bir xidmət olub və Rusiya tərəfindən Ukraynada istifadə olunan silah komponentləri üçün ödənişlərlə əlaqələndirilib.
NCA-nın xüsusi əməliyyatlar şöbəsinin direktoru Rob Cones öz qurumunun və tərəfdaşlarının bu cinayətkar xidmətin bütün səviyyələrini dağıdaraq, yuxarı səviyyədəki rusiyalı şəxsləri üzə çıxardığını bildirib.
FETÖ lideri Fətullah Gülənin Ankarada yerləşən malikanəsində Türkiyə bayrağı qaldırılıb.
7News.Az Türk mediasına istinadən xəbər verir ki, qaçaq FETÖ maliyyəçisi Akın İpekə məxsus Koza-İpek Holdinq də daxil olmaqla 12 şirkət və Ankaradakı dəbdəbəli malikanə Sərvət Fonduna verilib.
Transferdən sonra dəbdəbəli malikanədə Türkiyə bayrağı qaldırılıb.
Qeyd edək ki, FETÖ tərəfindən "Gülənin sözdə xilafət sarayı" adlandırılan malikanəsi 2013-cü ildə tikilərkən 30 milyon TL-yə başa gəlib. Ankaranın prestijli ərazilərindən birində minlərlə kvadrat metrlik ərazidə inşa edilən malikanə 24 saat təhlükəsizlik kameraları və mühafizəçilər tərəfindən qorunub. 2024-cü ilin avqustunda Prezident Tayyib Ərdoğanın imzası ilə Əmanətlərin Sığortalanması Fondundan 12 şirkət, daşınar və daşınmaz əmlak Türkiyə Sərvət Fonduna təhvil verilib. Bu malikanə də köçürülənlər arasında olub.
Bermud üçbucağında gəmilərin və təyyarələrin yoxa çıxdığı məlumdur. Bununla belə, alimlər dünyanın başqa yerlərində də oxşar sirli bölgələrin olduğunu aşkar ediblər.
Bəs, Bermud üçbucağından daha təhlükəli yer ola bilərmi?
"DogruXeber.az" bu barədə maraqlı məlumat təqdim edir.
Ötən əsrdə Bermud üçbucağında yüzə yaxın gəmi və təyyarə yoxa çıxıb. Bu bölgə Floridanın Bermud adalarından Puerto Rikoya qədər uzanır və təxminən 805.000 kvadrat kilometr ərazini əhatə edir.
Bu sirli ərazidə təkcə gəmilər deyil, təyyarələr də yoxa çıxır. 1945-ci ildə ABŞ Hərbi Dəniz Qüvvələrinə məxsus beş torpedo bombardmançı adi təlim zamanı qəflətən yoxa çıxıb.
Beş təyyarənin eyni anda sıradan çıxması ehtimalı az idi və hamısı uçuşdan əvvəl diqqətlə sınaqdan keçirilmişdi.
Daha maraqlısı 1970-ci ildə “Beechcraft Bonanza” təyyarəsinin başına gələnlər idi. Təyyarə Baham adalarının Andros adasından havaya qalxaraq Floridaya istiqamət alıb.
Lakin uçuş zamanı qəribə silindrik buludla qarşılaşıb və onun içindən keçməli olub. İçəri girən kimi təyyarədəki bütün elektron qurğular nasazlayıb və pilot qısa müddət ərzində çəkisizlik hissi keçirib.
Təyyarə Mayamiyə həmişəkindən daha qısa müddətdə çatıb və çox az yanacaq sərf edib. Həmin gün təyyarədə olan heç kim onların necə bu qədər tez gəldiyini başa düşə bilməyib.
Alimlər Bermud üçbucağının sirrini açmağa çalışarkən Yer kürəsində daha təhlükəli bir bölgənin - Avstraliyanın qərb sahilinin mövcudluğunu aşkar etdilər.
Bu yer o qədər çox gəmi qəzasına ev sahibliyi edir ki, yerli sakinlər bu sularda ruhların gəzdiyini deyirlər.
Hətta Maqnit adasında üzən və şəkil çəkdirən turistlər də fotolarında qorxulu detallara diqqət yetirirlər.
Avstraliyanın qərb sahilləri yaxınlığındakı sular 1600-ə yaxın batmış gəmi ilə doludur və itkin düşən dənizçilərin cəsədləri hələ də bu ərazidə tapılır.
Yerli əfsanələr və qəribə hadisələr buranın Bermud üçbucağından daha təhlükəli bölgə olduğunu deməyə əsas verir.
Dünyanın ən ucqar adasındakı insanlar necə yaşayır?Kellyn Green ailəsi dünyanın ən təcrid olunmuş məskunlaşmış arxipelaqlarından birində həyatın necə keçməsindən danışıb.
TEREF-in Lent.az-a istinadən xəbərinə görə, dünyanın ən təcrid olunmuş məskunlaşmış arxipelaqlarından biri olan Tristan da Cunha qeyri-adi həyatlarını sosial mediada paylaşan Kelli Qrin ailəsi sayəsində məşhurlaşıb.
Cənubi Atlantik Okeanında yerləşən bu vulkanik ada Cənubi Afrikanın Keyptaun şəhərindən 1732 mil və Argentinanın Mar del Plata şəhərindən 2454 mil məsafədədir. Bu adaya yalnız dəniz yolu ilə, 7-8 gün ərzində çatmaq olar.
Ailəsi ilə birlikdə adada yaşayan Kelli TikTok platformasında həyatından anları aktiv şəkildə paylaşır. Onun yüklə dolu gəminin gəlişini və Milad bayramı üçün 6 ay əvvəldən malların necə sifariş edildiyini göstərən videolarından biri 1,8 milyondan çox baxışla viral olub.
Tristan da Cunha, təxminən 250 nəfər əhalisi olan Britaniyanın xaricdəki ərazisidir. Rahat liman yoxdur, dağlıq ərazi və tez-tez yağan yağışlar ağır yaşayış şəraiti yaradır. Bununla belə, ada sakinləri Kellinin izləyiciləri arasında heyranlıq və maraq doğuran rahat həyat tərzi keçirirlər. Bir çoxları bu yer haqqında ilk dəfə onun videosu sayəsində öyrəndiklərini etiraf edir və aktiv şəkildə şərhlər yazırlar: "Fırtınalardan necə sağ çıxırsan?" və ya "Ada həyatı haqqında daha çox film çəkməlisən!"
Tristan da Cunhanın tarixi 1816-cı ildə Fransız təhlükəsindən qorunmaq üçün qurulan İngilis qarnizonu ilə başladı. Zaman keçdikcə kiçik sakinlər icması Britaniya ilə əlaqə saxladı və tam təcrid şəraitində inkişaf etməyi öyrəndi. Bu gün ada dözümlülük və ekstremal şəraitə uyğunlaşma nümunəsi olaraq qalır və onun sakinlərinin həyatı "dünyanın sonunu" yaşamağa imkan verən müasir texnologiyalar sayəsində dünyanı valeh etməkdə davam edir.
Gürcüstan Daxili İşlər Nazirliyinin nümayəndələri müxalif “Axali” partiyasının rəhbəri Nika Qvaramiyanı həbs ediblər.
Bu barədə Gürcüstan telekanalı “Mtavari Arkhi” məlumat yayıb.
Qvaramiya hüquq-mühafizə orqanlarının əməkdaşları onun partiyasının ofisində axtarış apardıqdan sonra saxlanılıb.
Axtarışlardan sonra Qvaramiya hüquq-mühafizə orqanlarının əməkdaşlarının üstünə qışqırmağa başlayıb və onlar onu dəfələrlə qaydaya çağırıblar. O, onlara tabe olmaqdan imtina edib, bundan sonra əlbəyaxa dava düşüb. Polislər onu zorla maşına mindirərək naməlum istiqamətə aparıblar.
“Panama sənədləri”, “Pandora sənədləri” kimi səs-küylü ifşaları ilə tanınan Mütəşəkkil Cinayətkarlıq və Korrupsiya Hesabatı Layihəsi (OCCRP) əsasən ABŞ və bir sıra Avropa ölkələrinin hökumətləri tərəfindən maliyyələşdirilib.
“Report” xəbər verir ki, bu barədə Fransanın “Mediapart”, İtaliyanın “Il Fatto Quotidiano”, Yunanıstanın “Drop Site” və “Reporters United” nəşrlərinin birgə genişmiqyaslı araşdırmasında bildirilir. Araşdırma əvvəllər OCCRP ilə əməkdaşlıq etmiş Almaniyanın NDR ictimai teleradio şirkəti tərəfindən başladılıb.
Araşdırmaya görə, 2014-2023-cü illərdə ABŞ federal hökuməti OCCRP-nin xərclədiyi vəsaitin 52 %-ni təmin edib. O cümlədən OCCRP-nin yaradıldığı 2008-ci ildən indiyədək ABŞ hökuməti müstəqil qeyri-kommersiya redaksiyasına azı 47 milyon dollar ayırıb və əlavə 12 milyon dollar ayırmağı öhdəsinə götürüb. Eyni zamanda, digər Qərb hökumətləri - Böyük Britaniya, Fransa, İsveç, Danimarka və Niderland son 10 ildə azı 15 milyon dollar məbləğində vəsait ödəyiblər. OCCRP-nin Direktorlar Şurası bu araşdırmanı birgə dərc edən nəşrlər üçün verdiyi açıqlamada ABŞ-nin onların əsas sponsoru olduğunu təsdiqləyib.
“Başa düşürük ki, ağıllı insanlar bunu pis ideya hesab edə bilərlər, xüsusilə ona görə ki, bu, ABŞ jurnalistikasında adi hal deyil (hərçənd Avropada və digər ölkələrdə jurnalistikaya dövlət dəstəyi geniş yayılmış haldır). Bu məsələ illər əvvəl OCCRP-nin yaradılması zamanı ətraflı müzakirə edilmişdi. O zamankı Direktorlar Şurası – o cümlədən Şurada qalan, jurnalist və rəhbər kimi şəxsi reputasiyası qüsursuz olan bir neçəmiz OCCRP-nin bu maliyyə dəstəyi ilə apara biləcəyi jurnalist araşdırmaları naminə bu məsələdə güzəştə getməyin mümkünlüyünə qərar vermişdik. Əminik ki, nə hökumət, nə də donorlar OCCRP-nin reportajlarına redaksiya nəzarəti həyata keçirib”, - Direktorlar Şurası qeyd edib.
Üstəlik, müstəqil statusunu təsdiq etmək üçün OCCRP hətta ABŞ-nin milli maraqlarına zidd olan müstəqil araşdırmalar da aparıb, o cümlədən Pentaqonun Suriya üsyançılarını silahlandırmaq üçün şübhəli silah tacirlərinə necə etibar etdiyinə dair araşdırma aparıb, həmçinin ABŞ-nin narkotik siyasəti və miqrasiya siyasəti ilə bağlı materiallar toplayıb.
Araşdırmanın nəticələrinə görə, OCCRP-nin yaradılması üçün ilkin maliyyə 2008-ci ildə Beynəlxalq Narkotiklərlə Mübarizə və Hüquq-Mühafizə İşləri Bürosu (INL, ABŞ Dövlət Departamentinin bir hissəsi) tərəfindən daxil olub. Eyni zamanda bu qrantı USAID idarə edib. Hazırda da USAID əməkdaşı Şennon Maquayr OCCRP-nin əməliyyatlarını kurasiya edir.
Araşdırma nəticəsində məlum olub ki, həm Dövlət Departamenti, həm də USAID rəsmi olaraq OCCRP-nin fəaliyyətinə müdaxilə etməsə də, maliyyə müəyyən şərtlərlə təmin olunur. O cümlədən federal hökumət yüksək rütbəli işçilərin, eləcə də yüksək səviyyəli redaksiya heyətinin təyin edilməsinə, illik iş planına veto qoya bilər.
“OCCRP əsas heyəti dəyişməli olsa, məsələn, qrup rəhbəri Deyu Sallivanı dəyişmək istəsə, onlar CV ilə sorğu göndərirlər və biz onu nəzərdən keçirib razılıq veririk”, - Maquayr deyib.
Eyni zamanda OCCRP rəhbərliyi araşdırmaların bir sıra ölkələrin siyasi rejiminə təsirindən qürur duyur. “Biz yəqin ki, təxminən beş-altı ölkədə hökumət dəyişikliklərində iştirak etmişik” deyən Sallivan Bosniya və Herseqovina, Qırğızıstan, Çexiya və Monteneqronun adını çəkib.
OCCRP, həmçinin digər QHT-ləri də yeni araşdırma layihələrinə cəlb edir.
Bu cür tərəfdaşlığa misal olaraq Qlobal Antikorrupsiyaya Konsorsiumunu (GACC) – məqalələr əsasında sistematik şəkildə cinayət araşdırmaları və ya sanksiya prosedurları başlatmağa cəhd göstərərək OCCRP-nin araşdırmalarından istifadə edən proqramı göstərmək olar. GACC 2016-cı ildə, ABŞ Dövlət Departamentinin elan etdiyi və yekunda OCCRP-nin korrupsiyaya qarşı mübarizə aparan “Transparency International” QHT ilə tərəfdaşlıqla qalib gəldiyi müsabiqədən sonra yaradılıb.
GACC dörd digər hökumət və özəl donorlar tərəfindən birgə maliyyələşdirilir, lakin ABŞ hökuməti ən böyük ianəçidir: o, artıq GACC çərçivəsində OCCRP-yə 10,8 milyon dollar ödəyib, bunun 3 milyon dolları “Transparency International”ın subqrantı kimi təqdim olunub.
GACC iki fəaliyyət istiqamətinə malikdir. Birincisi, “Transparency”nin 65 ölkədə mövcud olan yerli bölmələrinin dəstəyi ilə OCCRP məqalələri əsasında məhkəmə araşdırmaları, sansksiya prosedurları və vətəndaş cəmiyyəti səfərbərliyi başlatmaqdır.
İkincisi, antikorrupsiya qanunvericiliyinin və çirkli pulların yuyulmasına qarşı qanunların daha da sərtləşdirilməsi üçün lobbiçilik etməkdir. 2024-cü ilin mayında OCCRP hökumətlər üçün Rusiyaya qarşı sanksiyalardan yan qaçmağa kömək edən vasitəçilərlə (məsələn, uydurma şəxslər, vəkillər) işləmək üçün ən yaxşı prosedurlar haqqında hesabat hazırlayıb.
Hesabat Böyük Britaniyanın analitik mərkəzi olan Kral Birləşmiş Müdafiə Araşdırmaları İnstitutu (RUSI), Böyük Britaniyanın Analitika Mərkəzi ilə tərəfdaşlıqla hazırlanıb, Xarici İşlər, Birlik və İnkişaf Nazirliyi tərəfindən ödənilmişdi. RUSİ müdafiə və təhlükəsizlik orqanları ilə sıx əlaqələyə malikdir. Onun baş vitse-prezidentlərindən biri ABŞ Mərkəzi Kəşfiyyat İdarəsinin keçmiş direktoru general Devid Petreusdur.
Jurnalist təşkilatının ABŞ-nin təşəbbüsü və pulu ilə, hətta yaxşı məqsədlə olsa belə, fəaliyyət göstərməsi ciddi etik suallar doğurur.
OCCRP və “Transparency” müstəqil fəaliyyət göstərdiklərini iddia etsələr də, Vaşinqton onların ABŞ maraqlarına zidd hərəkətinə mane olmasa da, OCCRP-nin 2021-ci il GACC qiymətləndirmə hesabatı göstərir ki, 228 real təsir nümunəsi var və onlardan yalnız 11-i “Amerika” ilə bağlıdır. Üstəlik, “Amerika” anlayışına həm də Mərkəzi və Cənubi Amerika da daxildir.
“Transparency” GACC-nin ABŞ-yə qarşı fəaliyyətindən yalnız bir konkret nümunə təqdim edib: “Pandora sənədləri” nəticəsində ortaya çıxan araşdırmalardan birində ABŞ-nin planetin ən böyük dənizaşırı mərkəzlərindən biri adlandırılmasından sonra QHT Vaşinqtonu öz daxili vergi sığınacaqlarında (məsələn, Delaver kimi) hökm sürən qeyri-şəffaflığa son qoymağa çağırıb. Lakin OCCRP bu məqalədə (Beynəlxalq Araşdırmaçı Jurnalistlər Konsorsiumu və “Washington Post” tərəfindən hazırlanmış) iştirak etməyib və “Pandora sənədləri” zamanı diqqətini prioritet sahələrinə - Rusiya, Mərkəzi Asiya və Şərqi Avropaya yönəldib.
Amma ABŞ üçün OCCRP layihəsi ayrı-ayrı hökumətlərin fəaliyyətlərini araşdırmaq baxımından demək olar nümunəvidirsə, Vaşinqtonun OCCRP ilə paralel olaraq böyüyən “Wikileaks” layihəsinə münasibətini xatırlamağa dəyər.
Araşdırmada qeyd edilir ki, “Wikileaks” 2006-cı ilin oktyabrında yaradılıb və artıq 2008-ci ilin martına qədər ABŞ Ordusu xəbər təşkilatının Ordu qüvvələrinin mühafizəsi, əks-kəşfiyyat, əməliyyat təhlükəsizliyi və informasiya təhlükəsizliyi üçün potensial təhlükə yaratdığı qənaətinə gəlib. 2010-cu ildə “Wikileaks” ABŞ-nin İraqdakı hərbi cinayətinin sübutu olan “Girov cinayəti” videosunu, daha sonra isə “Əfqan müharibə jurnalları”, “İraq müharibəsi jurnalları”, ardından noyabr ayında isə “Keyblgeyt”i – Dövlət Departamentinin minlərlə daxili kabel ismarışlarını paylaşıb.
Elə həmin zaman “Amazon”, “PayPal”, “Bank of America”, “Visa”, “Mastercard” və “Western Union” ABŞ hökumətinin təzyiqi ilə “Wikileaks”i öz xidmətlərindən ayıraraq, təşkilatı iflic vəziyyətinə salmağa çalışdı. Culian Assanj özünə sığınacaq axtarmalı oldu, nəticədə 2012-ci ildə Ekvadorun Londondakı səfirliyinə sığınmalı oldu.
“OCCRP-ni tənqid edənlər tez-tez Putinin təşkilatın Lenqlidən birbaşa əmr aldığını söylədiyi karikaturasına müraciət edirlər. Lakin bu, Amerikanın yumşaq gücünün təbiətinin yanlış anlaşılmasıdır”, - qlobal xəbər təşkilatı ilə birgə layihələr üzərində işləmiş Latın Amerikasında ən məşhur baş redaktorlardan biri “Drop Site News”a bildirib.
“OCCRP-nin ABŞ hökumətinə faydalı olması üçün onlara hər hansı məlumat təqdim etməsinə ehtiyac yoxdur. Bu, ABŞ-dən kənarda araşdırmalar aparan “təmiz əllər” ordusudur”, - o deyib, amma sponsorlar və həmkarları ilə münasibətləri qorumaq üçün anonimlik tələb edib. Anonim baş redaktorun sözlərinə görə, bu, həmişə başqa insanların korrupsiyasıdır: “Siz ABŞ hökumətindən antikorrupsiya işlərinə görə pul alırsınızsa, bilirsiniz ki, sizi təmin edən əli dişləsəniz, daha pul gəlməyəcək. Hətta ABŞ hökumətinin pulunu almaq istəməsəniz belə, ətrafınıza baxırsınız və görürsünüz ki, demək olar hər bir böyük xeyriyyə fondu hansısa təşəbbüsdə onlarla əməkdaşlıq edib və ya edir. Bu isə elə təəssürat yaradır ki, siz də belə əlaqələrlə jurnalistika üçün maliyyə vəsaiti əldə edə bilərsiniz. Amma həqiqət orasındadır ki, bəzi redaksiyalarda təsirin nə qədər güclü olduğunu bilmirik”.
Gürcüstan Konstitusiya Məhkəməsi Prezident Salome Zurabişvilinin və müxalif siyasətçilərinin oktyabrın 26-da keçirilmiş parlament seçkisinin konstitusiyaya zidd elan edilməsini tələb edən iddialarını mahiyyəti üzrə baxılmaq üçün qəbul etməyib.
Bu barədə Gürcüstanın Konstitusiya Məhkəməsinin yaydığı məlumatda deyilib.
“1848 və 1849 saylı konstitusiya iddiaları mahiyyəti üzrə baxılmaq üçün qəbul edilməyib. Hökm qətidir, işə yenidən baxıla bilməz”, – məlumatda qeyd olunub.