 |
|
|
Yaponiyada son illərdə iki dəfə gecə saatlarında içki qəbulu hökumət məmurlarının məxfi məlumatlarını itirməsinə səbəb olub.
Bu barədə CNN məlumat yayıb.
Məsələn, fevralın 6-da ölkənin Maliyyə Nazirliyinin Gömrük və Tarif Bürosunun əməkdaşı 5 saatlıq işdən sonra Tokionun cənubundakı Yokohama şəhərində həmkarı ilə doqquz stəkan pivə içib. O, müəssisədən çıxıb evə gedəndə 187 nəfərin işi ilə bağlı məxfi məlumatların olduğu çantanın itdiyini aşkar edib. Həmçinin onun özü və həmkarları haqqında məlumatları olan şəxsi noutbuku da itib.
Nazirlik hadisəyə görə üzr istəyib və lazım gələrsə, sərt tədbirlər görəcəyini vəd edib. Sənədlərin və noutbukun qanunsuz istifadə edilməsinə dair hələlik heç bir sübut yoxdur.
Məlumata görə, 2022-ci ildə daha bir dövlət işçisi restoranda sərxoş olduqdan sonra küçədə yuxuya gedərək Amaqasaki şəhərinin yarım milyona yaxın sakininin şəxsi məlumatlarını özündə əks etdirən USB fləş yaddaşını itirib. Cihazda vergi rekvizitləri, vətəndaşların bank hesablarının adları və nömrələri, habelə dövlət ödənişləri haqqında məlumatlar olub.
CNN qeyd edir ki, Yaponiya uzun müddətdir ofis işçilərinin həddindən artıq içki içməsi ilə tanınır. 2021-ci ildə ölkənin Səhiyyə Nazirliyi bunu "ciddi sosial problem" kimi tanıyıb.
Kanal əlavə edir ki, içki Yaponiyanın yorucu iş mədəniyyətini əks etdirir, bu isə işçiləri ağır şəraitdə və maaş artımı olmadan işləməyə məcbur edir. Hakimiyyət orqanlarının təzyiqləri azaltmaq cəhdləri, məsələn, dövlət qulluqçuları üçün dörd günlük iş həftəsi tətbiq etmək cəhdləri indiyədək heç bir nəticə verməyib.
İsrailin ABŞ vasitəsilə göndərdiyi xəbərdarlıqdan sonra İran sərnişin təyyarələrinin Beyrut hava limanına enişinə icazə verilməyib.
Bu barədə "France-Presse" xəbər yayıb.
ABŞ Livan hökumətinə İsrailin İran təyyarələrini vurma ehtimalı barədə xəbərdarlıq göndərib. Nəticədə, Livan hakimiyyəti bu həftə ərzində iki dəfə İran təyyarəsinin Beyrut hava limanına enməsinə icazə verməyib.
İlk dəfə bu hadisə fevralın 13-də baş verib. İsrail ABŞ vasitəsilə xəbərdarlıq edib ki, əgər İran təyyarəsi Livana enərsə, Beyrut hava limanına zərbə endiriləcək. Fevralın 14-də də bu xəbərdarlıq nəticəsində növbəti İran təyyarəsinin enişinə maneə yaradılıb.
İsrail bir neçə dəfə bəyan edib ki, İran Beyrut hava limanını Hizbullaha silah və maliyyə vəsaitlərinin göndərilməsi üçün istifadə edir.
Bir müddət öncə Ermənistan xarici işlər nazirinin müavini Paruyr Hovannisyan ABŞ ilə Ermənistan arasında strateji tərəfdaşlıq xartiyasının imzalanmasına, eləcə də Amerika sərhəd təhlükəsizliyi ekspertlərinin və gömrük mütəxəssislərinin Ermənistana göndərilməsi məsələsinə İranın münasibəti barədə jurnalistin sualını cavablandırarkən demişdi: "Ermənistan bütün məsələlər üzrə İran tərəfi ilə məşvərət edib və razılığa gəlib. Ermənistan Respublikası xarici işlər nazirinin müavini Vahan Kostanyanın bu yaxınlarda İrana səfəri və Tehranın bu məsələlərlə bağlı hər hansı narahatlığını bildirməməsi Ermənistanla İran arasında möhkəm və problemsiz əlaqələrə ən yaxşı sübutdur. İranla əlaqələrimiz indiyə qədər görünməmiş ən yüksək səviyyəyə çatıb, bunu qarşılıqlı səfərlərdən və rəsmi bəyanatlardan aydın görmək olar".
Bu barədə "Azad İran" "Youtube" kanalında yayımlanan süjetdə bəhs edilir.
Xatırladaq ki, yanvar ayının 20-də Ermənistanın XİN rəhbərinin müavini Vahan Kostanyan İrana səfər edib. Səfər çərçivəsində o, İran prezidentinin siyasi məsələlər üzrə müşaviri Mehdi Sənayi, İran XİN rəhbəri Abbas Əraqçi və onun siyasi məsələlər üzrə müavini Məcid Təxtrəvançi, eləcə də İran ali rəhbərinin müşaviri, Xarici Əlaqələr üzrə Strateji Şuranın rəhbəri Kamal Xərrazi ilə danışıqlar aparıb. O da maraqlıdır ki, Kostanyan İrana səfər etməzdən öncə, 14-16 yanvar tarixləri arasında ABŞ-da səfərdə olub.
Bütövlükdə 2025-ci ilin arxada qalan ay yarımı ərzində İranla Ermənistan arasında qarşılıqlı səfərlərin və rəsmi təmasların hədsiz intensivliyi diqqəti çəkir.
Ətraflı süjetdə:
“Demokratiya hər kəsin istədiyini danışa bilməsi anlamına da gəlmir”
Münhen Təhlükəsizlik Konfransında ABŞ-nin vitse-prezidenti Cey Di Vensin çıxışı Almaniyanın müdafiə naziri Boris Pistoriusu bərk qəzəbləndirib.
“AzPolitika” Qərb mediasına istinadla xəbər verir ki, Vens çıxışında demokratik institutların və söz azadlığının sarsıldığını bildirərək Avropa siyasətçilərini “seçkiləri ləğv etməkdə” günahlandırıb. O, Rumıniyada prezident seçkilərinin ləğvini sovet dövrü praktikası ilə müqayisə edib.
Vensin fikrincə, ən böyük təhlükə Çin və ya Rusiyadan yox, daxildən gəlir. O, kütləvi immiqrasiyanı Avropanın ən vacib problemi kimi qiymətləndirib. Vens Avropa liderlərini “sovet dövrü terminləri, məsələn, "dezinformasiya" kimi sözlərdən istifadə edərək fərqli fikirləri "boğmaqda" ittiham edib. Vitse-prezident həmçinin Böyük Britaniya hökumətini söz azadlığı qanunlarına görə sərt tənqidlər ünvanlayıb.
Almaniyanın müdafiə naziri Boris Pistorius isə cavabında deyib ki, Avropada təhlükəsizlik barədə çıxış etmək niyyətində idi, amma Vensin ittihamlarına cavab vermək məcburiyyətindədir: “Mən Transatlantik Alyansa dərin inam bəsləyirəm. Mən ABŞ-ın sadiq müttəfiqi və dostuyam. "Amerika arzusu" həmişə məni heyran edib və mənə təsir göstərib.Buna görə də, az öncə eşitdiklərimizi sadəcə görməzdən gələ bilmərəm. ABŞ-nin vitse-prezidentinin çıxışını şərh etmədən keçə bilmərəm. "Biz sizin bizə qarşı olmaq haqqınız uğrunda mübarizə aparırıq". Bu, Bundesverin şüarlarından biridir. Və o, demokratiyamızı təmsil edir. Bu demokratiya az əvvəl ABŞ-nin vitse-prezidenti tərəfindən şübhə altına alındı. Və təkcə Almaniya demokratiyası deyil, bütün Avropanın demokratiyası.
O, demokratiyanın ləğv edilməsindən danışdı. Və əgər mən onu düzgün başa düşdümsə, Avropanın mövcud vəziyyətini bəzi avtoritar rejimlərin vəziyyəti ilə müqayisə etdi. Xanımlar və cənablar, bu, qəbuledilməzdir. Bizim demokratiyamızda hər bir fikir, səs qazanır. Bu, hətta "Almaniya üçün Alternativ" kimi yarı-ekstremist partiyalara da aiddir – onlar da digər partiyalar kimi seçkilərdə iştirak edə bilirlər, çünki bu, demokratiyadır.
Əgər vitse-prezident dünən buraya gələndə televizorunu açmaq fürsətini tapsaydı, o, bu namizədlərdən birini TV efirində görə bilərdi. Biz, hətta, Rusiya təbliğatını yayan media orqanlarını belə efirə buraxırıq və federal hökumət nümayəndələri onların suallarına cavab verir. Amma bu praktikaya son qoymaq lazım ola bilər. Heç kim kənarda saxlanılmır.
Lakin demokratiya o demək deyil ki, səs-küylü azlıqlar həmişə haqlıdır və onlar həqiqətin nə olduğunu müəyyən edə bilərlər. Bu, hər kəsin istədiyini danışa bilməsi anlamına da gəlmir. Demokratiya özünü onu məhv etmək istəyən ekstremistlərdən qoruya bilməlidir.
Mən hər gün demokratiyanın daxili və xarici düşmənlərdən qorunduğu bir Avropada yaşadığım üçün xoşbəxtəm. Buna görə də, vitse-prezident Vensin irəli sürdüyü "bizim demokratiyalarımız azlıqları susdurur və boğur" fikrini açıq şəkildə təkzib etmək və ona qarşı çıxmaq istəyirəm.
Biz yalnız ölkələrimizi kimdən qoruduğumuzu deyil, həm də nə üçün qoruduğumuzu bilirik. Demokratiya, fikir azadlığı, qanunun aliliyi və hər birimizin ləyaqəti naminədir xanımlar və cənablar”.
HƏMAS gələcəkdə Qəzzanı idarə etməyi planlaşdırmır.
Bu barədə Misirin “Əl-Qahirə əl-İxbariyyə” telekanalı məlumat yayıb.
Mənbənin sözlərinə görə, radikal təşkilatın nümayəndələri təsdiqləyiblər ki, atəşkəs sazişinin hər üç mərhələsində ona əməl etmək niyyətindədirlər və gələcəkdə Qəzza zolağının idarə olunmasında iştirak etməyəcəklər:
"Misir hazırda anklavın sakinlərinə yardım göstərilməsi və onun bərpasına cavabdeh olacaq müvəqqəti komitənin yaradılması ilə bağlı intensiv danışıqlar aparır. Əlavə məlumat verilmir".
HƏMAS hələlik bu xəbərlərə münasibət bildirməyib.(Report)
Ukrayna Prezidenti Volodimir Zelenski ABŞ Prezidentinin Rusiya və Ukrayna üzrə xüsusi nümayəndəsini döyüş zonasına dəvət edib.
Globalinfo.az xəbər verir ki, bu barədə Zelenski özü açıqlama yayıb.
“Eşitmək yox, reallığı kimsənin təsirinə düşmədən öz gözlərinlə görmək lazımdır. Mən istəyirəm ki, o, hərbçilərlə, Sırski və briqada komandirləri ilə görüşsün, onun hesabatı bunların əsasında olsun. Odur ki, mən Kit Kelloqu ön cəbhəyə dəvət etdim”, — Ukrayna Prezidenti deyib.
ABŞ Prezidenti Donald Trampın Rusiya lideri Vladimir Putinlə görüşü Avropa İttifaqında reaksiyalara səbəb olub və Ukraynaya qarşı mümkün güzəştlərlə bağlı narahatlıqları artırıb.
“AzPolitika” xəbər verir ki, “Bloomberg” analitikləri Ukrayna hadisələrinin inkişafı üçün üç əsas ssenarini araşdırıblar.
Həmin ssenarilər bunlardır:
Əsas ssenari
İşğal olunmuş ərazilərin qeyri-müəyyən müddətə Rusiyanın nəzarəti altında qalacağı ehtimal edilir. Eyni zamanda, cəbhə xəttinin qismən dəyişdirilməsi, xüsusən də hazırda Ukrayna qüvvələrinin fəaliyyət göstərdiyi Kursk vilayətində ərazi mübadiləsi yolu ilə mümkün ola bilər. Ukraynaya müəyyən təhlükəsizlik zəmanətləri verilə bilər, lakin bunun nə dərəcədə effektiv olacağı danışıqların əsas mövzusu olacaq. NATO-ya üzvlük ehtimalı az olduğundan, təhlükəsizlik vədləri Vaşinqtonda gələcək siyasət qərarlarından asılı olacaq. Avropa liderləri Ağ Evlə əlaqə saxlamağa çalışacaqlar ki, Tramp Aİ-nin öz müdafiə potensialını artırmağa vaxt tapmadan Kiyevə dəstəyini dayandırmasın.
Optimist ssenari
Kiyev üçün ən müsbət variant ABŞ və Avropanın açıq təhlükəsizlik zəmanəti verməsi, o cümlədən Moskva razılaşmaları pozarsa, hərbi müdaxilənin mümkünlüyü ola bilər. Lakin NATO ilə Rusiya arasında birbaşa münaqişə riski yüksək olaraq qalır və hətta Ukraynanın ən sadiq müttəfiqlərini belə çəkindirə bilər. Kiyevin tərəfdaşları yeni aqressiv hərəkətlər olacağı təqdirdə hərbi yardımı artıracaq və Kremlə sanksiyalar təzyiqini artıracaqlarını vəd edə bilər.
Qərb ölkələri həmçinin Ukraynaya öz müdafiə sənayesini bərpa etməkdə və ordusunu gücləndirməkdə kömək edə, gələcək Rusiyanın təcavüzünə qarşı etibarlı sədd yarada bilər. Aİ bütün bu şərtləri yerinə yetirsə, o, növbəti onillikdə Ukraynanın birliyə qoşulmasını sürətləndirə, şərq cinahını gücləndirə və qonşuları üzərində real təsir göstərə bilər.
Pessimist ssenari
Ukrayna üçün ən pis ssenari ondan ibarətdir ki, Tramp hələ danışıqlar prosesi başa çatmamış münaqişəyə marağını itirir, hərbi və maliyyə yardımlarını kəsir, Avropa isə vəziyyətdən çıxış yolunu təkbaşına axtarmağa məcburdur. Tramp və Putin arasında danışıqlar sülh razılaşması ilə nəticələnsə belə, bu, Kremlin Rusiya ilə NATO arasında müharibə kimi qiymətləndirdiyi münaqişənin növbəti mərhələsinə keçməsi üçün bu, yalnız müvəqqəti möhlət olardı. Belə bir razılaşma bəlkə də Ukraynaya bərpa prosesinə başlamağa kömək edə bilər, lakin bu, Kiyevin NATO-ya üzv olma ehtimalını da azaldacaq, çünki bu, Moskvaya əhəmiyyətli ərazi qazancları verəcək.
Belə bir inkişafdan başqa bir təhlükə, Putinin imperiya strategiyasının bir hissəsi kimi görməkdə davam edən Baltikyanı ölkələr üçün artan təhlükədir. Ukraynanın itirilməsi Rusiyanın ekspansiyasının yeni mərhələsinin başlanğıcı ola bilər.
Xəbər verdiyimiz kimi, ötən gün ABŞ Prezidenti Donald Trampla rusiyalı həmkarı Vladimir Putin arasında telefon danışığı baş tutdu. Bir çox yerli və xarici ekspertlər, medialar bu danışıqları iki ölkə münasibətlərinin normallaşması kimi dəyərləndirməyə başlayıb. Putinin “məğlub lider”dən “qalib lider”ə çevrildiyini düşünənlər də var.
Bu yaxınlıq fonunda Azərbaycan və Rusiya gərginliyi ölkəmizə nə vəd verir?
Globalinfo.az-a danışan politoloq Elçin Abdullayev deyib ki, Donald Tramp səsləndirdiyi bəyanatlar, atdığı addımlarla öz şəxsi imicini rəhbərlik etdiyi dövlətin imicindən öndə tutur:
“Ona görə də Rusiya-Ukrayna müharibəsini dayandırmaq missiyasını üzərinə götürüb. Yayılan məlumatlara görə, Tramp və Rusiya Prezidenti Vladimir Putin arasında Ukrayna müharibəsinin dayandırılması istiqamətində danışıqlar aparılacaq. Tramp özünü diqqət mərkəzinə çəkib, sülh vasitəçisi olduğunu göstərmək istəyir. Ümumiyyətlə, ABŞ xarici siyasətində atılan hər bir addım birbaşa dövlət liderinin iradəsindən asılı deyil. Prezident bu qərarları ya Pentaqon şefi, ya da ABŞ-a bağlı olan xüsusi xidmət orqanlarının rəhbərləri ilə məsləhətləşir”.
Politoloq Donald Trampın Rusiya və Ukrayna arasında sülhü təmin edəcəyini düşünmür:
“2017-2021-ci illərdə Tramp hakimiyyətdə olanda bir neçə dəfə Qərb dövlətlərinin israr və təkidi ilə Rusiya və Ukrayna liderləri bir masa arxasında əyləşib, gərginliyin aradan qaldırılması üçün müzakirələr aparırdılar. Lakin nəticə göz qabağındadır. Hazırkı vəziyyətdə Putinin tezliklə sülh sazişini imzalayacağını düşünmürəm. Müvəqqəti atəşkəs, yaxud da sənəd imzalana bilər. Ukrayna heç vaxt işğal olunmuş ərazilərinin Rusiyada qalmasını qəbul etməyəcək. Rusiyanın da mövqeyi məlumdur. Həmin ərazilərin öz səlahiyyətində qalmasında maraqlıdır”.
Elçin Abdullayev qeyd edir ki, Rusiya dünyaya meydan oxuyan bir ölkə idi, hazırda isə Qərb tərəfindən ona qarşı yürüdülən siyasətin fonunda küncə sıxışdırılıb:
“Rusiyanın bu dalandan çıxıb əvvəlki gücünü bərpa etməsinə ABŞ-ı idarə edən qüvvələr imkan yaratmayacaq. Müəyyən qədər nəfəslik qoya bilərlər. Amma bu da Rusiyaya heç nə vəd etməyəcək.
Putin Azərbaycana meydan oxuya bilməyəcək. Hazırda münasibətlərin gərin olmasının səbəbi Rusiyanın rəsmi Bakının tələblərini yerinə yetirməkdən yayınmasıdır. Lakin Azərbaycanı da itirmək istəməz. Buna uyğun yanaşma nümayiş etdirməlidir.
Tramp və Putin münasibətlərinin normal olması ölkəyə mənfi, yaxud da müsbət bir şey vəd etmir. Rəsmi Bakıya münasibətdə digər ölkələr Türkiyə amilini də nəzərə alırlar”.
Azərbaycan aviaşirkəti AZAL-ın təyyarə faciəsindən Rusiya və Azərbaycan arasında münasibətləri pisləşdirmək üçün istifadə cəhdləri uğursuzluğa məhkumdur.
Teleqraf xəbər verir ki, bu barədə Rusiya Xarici İşlər Nazirliyinin rəsmi nümayəndəsi Mariya Zaxarova brifinqdə bildirib.
Diplomat qeyd edib: "Təyyarə qəzası nəticəsində həm Azərbaycan, həm də bizim vətəndaşlarımız həyatlarını itirdilər, bu faciə həm orada, həm də bizdə dərindən hiss olunur. Amma buna baxmayaraq, bəziləri bunun üzərindən öz maraqlarını güdməyə çalışırlar. Xalqlar, xüsusən də ortaq tarix və regionda ümumi məsuliyyət zonasına sahib ölkələr arasında nifaq salmaq cəhdləri uğursuz olacaq".
Rusiya Xarici İşlər Nazirliyinin Ermənistan parlamentinin ölkənin “Avropa İttifaqına qoşulma prosesinin başlanması”nı təsdiqləməsinə münasibət bildirib. Rusiya XİN rəsmi nümayəndəsi Mariya Zaxarova bu gün keçirdiyi brifinqdə məsələnin siyasi ehtiraslarda deyil, Avrasiya İqtisadi İttifaqı və Avropa İttifaqı ilə qarşılıqlı fəaliyyətin qurulduğu hüquqi-normativ bazaları və tarif sistemlərində olduğunu söyləyib. Onun sözlərinə görə, bu təşkilatların hüquqi normativ bazaları və tarif sistemləri qarşılıqlı istisna xarakteri daşıyırlar. Rusiya XİN sözçüsü söyləyib ki, əlbəttə, söhbət Ermənistanın suveren seçimindən gedir, lakin onların planlaşdırdıqları addımların bütün nəticələrini əhaliyə izah etmək məsuliyyəti Avrasiya İqtisadi İttifaqının deyil, indiki Ermənistan hakimiyyətinin üzərinə düşür. Mənzərəni tamamlamaq üçün bu cür addımların necə bitdiyinə dair yaxın tarixdən nümunələr də vermək lazımdır.
Cross Media Təhlil Mərkəzinin analitiki, siyasi şərhçi Mübariz Göyüşlü “Sherg.az”a söyləyib ki, Putin başda olmaqla Rusiya rəsmi şəxsləri Ermənistanın davranışlarına konkret münasibət bildirməlidirlər:
“Hələ ki Rusiya məsələlərə sərt müdaxilə etmir və yaxud da buna imkanları yoxdur. Sadəcə olaraq Rusiya tərəfindən “Ermənistan müəyyən şeyləri etməməlidir” şəklində bəyanatlar eşidirik. Ermənistan isə zaman-zaman Rusiyanın dediklərinin əksinə olaraq həmin şeyləri reallaşdırır. Yəni Avropa İttifaqı və Avropa ilə yaxınlaşır. Hətta fikrimcə, bu məsələlərin arxasında Ermənistanın NATO ilə yaxınlaşması da dayanır. Rusiya konkret addımlar ataraq ya hu hadisələrin qarşısını almalıdır, ya da situasiya ilə barışmalıdır. Digər tərəfdən Kremlin bəyanatları boş və manasız səslənir. Həmçinin Ermənistanın davranışlarında da anlaşılmazlıq var. Məsələn, həm Rusiyanın hegemon olduğu KTMT-də qalır, həm də Avropa İttifaqına üzv olmaqla bağlı addımlar atır, Amerika ilə strateji tərəfdaşlıq haqqında xartiya imzalayır. Yəni Ermənistan hansı cəhbəni seçdiyini elan etməlidir. Hesab edirəm ki, hər iki tərəf mövcud olan qeyri-müəyyənlikləri dəqiqləşdirməlidir. Eyni zamanda Ermənistan və Rusiya publikaya və Qərbə qarşı oyun oynaya bilər. Çünki Ermənistan ticarət sahəsində Rusiya ilə mövqeyi tamamilə fərqlidir”.