 |
|
|
Ermənistanın Qarabağı Azərbaycan ərazisi kimi tanıması Xankəndidəki separatçıları əhəmiyyətli dərəcədə radikallaşdırıb. Rusiyalı politoloq İqor Korotçenko son dövrlər Qarabağdakı qanunsuz silahlı birləşmələrinin Azərbaycan Ordusuna qarşı təxribatlarını şərh edərkən bildirib ki, Qarabağda silahlı təxribatlar və terror aktları gözləntisi çoxdur. Onun sözlərinə görə, separatçıların daha da radikallaşması müxtəlif ölkələrdə erməni diasporunun Qarabağ mövzusunda siyasi səylərini artması ilə üst-üstə düşür: "Bütün bu amilləri birləşdirəndə, təxribatların baş verəcəyi kifayət qədər real görünür. Bəlkə də bu təxribatlar yaxın gələcəkdə törədiləcək”. Rusiyalı politoloq hesab edir ki, Paşinyan Qarabağ separatçıları üzərində nəzarəti itirir: “Paşinyan hakimiyyəti artıq separatçıların davranışlarına tam nəzarət edə bilmir. Qismən nəzarət qala bilər, lakin tam deyil. Unutmaq olmaz ki, Qarabağda təkcə erməni yaraqlıları yox, həm də Ermənistan Müdafiə Nazirliyinin əmri ilə hərəkət edən silahlı dəstələr var. Bununla yanaşı, Ermənistanın hərbi kəşfiyyatının nümayəndələri də Qarabağdadır". Korotçenko bildirib ki, İrəvanın nəzarəti xeyli dərəcədə azaldığı üçün artıq erməni silahlı dəstələri "müstəqil" hərəkət edirlər.
DİA.AZ-ın məlumatına görə, AĞ Partiyanın sədr müavini Əhəd Məmmədli "Şərq"ə açıqlamasında bildirib ki, Rusiya sülhməramlıları Qarabağ ərazisinə daxil olduğu gündən İrəvan separatçılara nəzarəti itirib. Analitik hesab edir ki, hazırda separatçılar və silahlı ünsürlər birbaşa Rusiyanın nəzarətindədir: "Qarabağ separatçıları İrəvana tabe olmur və bütün direktivləri Kremldən alırlar. İndiki məqamda separatçıların "cəsarətlənməsinin" arxasında Moskva durur. Ruben Vardanyan və Araik Arutyunyan Rusiyaya hər səfərlərindən sonra müharibə ritorikasından danışır, rəsmi Bakını təhdid edirlər. Separatçılar Rusiyanın əlində təsir rıçağıdır. Moskva Azərbaycan-Ermənistan arasında sülh sazişinin imzalanmasında maraqlı deyil. Çünki sülh müqaviləsinin imzalanmasından sonra Rusiyanın nə Ermənistanda, nə də Azərbaycanda mövcudluğunun mənası qalır. Moskvanın qorxusu sadəcə Rusiya sülhməramlı kontingentinin Qarabağdan çıxarılması ilə bağlı deyil, Kreml ehtiyat edir ki, sabah ermənilər də rus bazasının Gümrüdən çıxarılmasını tələb edə bilər. Bununla da Moskva Cənubi Qafqazda bütün rıçaqlarını itirmiş olar. Ona görə də hər vəchlə separatçılara silah-sursat, eyni zamanda vəd verərək, onları "ruhlandırırlar". Çalışırlar ki, separatçılar sonadək Azərbaycana müqavimət göstərsinlər, prosesi pozsunlar".
Ermənilər Azərbaycan Ordusunun mövqelərini fasilələrlə atəşə tutub.
Bu barədə Müdafiə Nazirliyindən məlumat verilib.
Bildirilib ki, iyunun 6-sı saat 11:40-dan saat 16:50-dək Ermənistan silahlı qüvvələrinin bölmələri Basarkeçər rayonunun Qaraiman yaşayış məntəqəsi istiqamətində yerləşən mövqelərindən Ordumuzun Daşkəsən rayonunun Astaf yaşayış məntəqəsi istiqamətində yerləşən mövqelərini atıcı silahlardan fasilələrlə atəşə tutub.
Bundan başqa, saat 16:25 radələrində Rusiya sülhməramlılarının müvəqqəti yerləşdiyi Azərbaycan ərazisindəki qeyri-qanuni erməni silahlı dəstələrinin üzvləri tərəfindən Azərbaycan Ordusunun Ağdam rayonu istiqamətində yerləşən mövqeləri də atəşə tutulub.
Bölmələrimiz tərəfindən qeyd olunan bütün istiqamətlərdə adekvat cavab tədbirləri görülüb.
Eyni zamanda qeyri-qanuni erməni silahlı dəstələrinin üzvləri Ordumuzun Şuşa, Xocavənd və Ağdam rayonları istiqamətlərində yerləşən mövqelərinin qarşısında uzunmüddətli fortifikasiya qurğularını quraşdırmağa cəhd göstəriblər.
Azərbaycan Ordusunun bölmələri tərəfindən görülən təxirəsalınmaz tədbirlər nəticəsində aparılan işlər dərhal dayandırılıb.
Azərbaycan Respublikasının insan hüquqları üzrə müvəkkili (ombudsman) Səbinə Əliyeva Avropa Şurası Parlament Assambleyasının (AŞPA) Monitorinq Komitəsinin həmməruzəçiləri Yan Lidel-Qreynger və Liz Kristofersen ilə görüşdə Ermənistanın mina terroru barədə məlumat verib .
Bu barədə Ombudsman Aparatından məlumat verilib.
Bildirilib ki, görüşdə S.Əliyeva ombudsmanın insan hüquq və azadlıqlarının müdafiəsi sahəsində həyata keçirdiyi fəaliyyət istiqamətləri barədə ətraflı məlumat verib. Ombudsman Konstitusiya Qanununda təsbit edilmiş mandatının mövcud müsbət beynəlxalq təcrübəyə uyğun olaraq genişləndirilməsi ilə bağlı “Azərbaycan Respublikasının İnsan hüquqları üzrə Müvəkkili (ombudsman) haqqında” Konstitusiya Qanununa təklif olunan əlavə və dəyişikliklərdən bəhs edib.
Müvəkkil Milli Preventiv Mexanizm (MPM) qrupu ilə birgə insanların öz iradəsi ilə tərk edə bilmədiyi yerlərə mütəmadi olaraq başçəkmələr həyata keçirildiyini bildirib. Eyni zamanda, MPM fəaliyyəti ilə bağlı illik hesabatların dərc olunduğu, indiyədək hazırlanmış hesabatlarda qanunvericiliyin təkmilləşdirilməsinə yönəlmiş 200-dən çox təklif və tövsiyənin öz əksini tapdığı qeyd edilib.
Ombudsman əlilliyi olan şəxslərin, ahılların, uşaqların, qaçqınların, keçmiş məcburi köçkünlərin, miqrantların və əhalinin digər həssas qruplarının hüquqlarının müdafiəsinə daim diqqətlə yanaşıldığını vurğulayıb.
S.Əliyeva Ermənistanın Birinci Qarabağ müharibəsində itkin düşmüş 4000-ə yaxın soydaşımızın taleyi barədə məlumatları bu günədək təqdim etmədiyini bildirib. Həmçinin Ermənistan tərəfindən işğal dövründə Azərbaycan torpaqlarında mina terroru həyata keçirildiyi, basdırılmış minaların azad edilmiş ərazilərimizə təhlükəsiz qayıdışı ləngitdiyi, aparılan genişmiqyaslı tikinti-quruculuq və bərpa işlərinə ciddi maneə yaratdığı diqqətə çatdırılıb.
Görüşdə qonaqların sualları cavablandırılıb, qarşılıqlı fikir mübadiləsi aparılıb.
Erməni əhali kolxoz bazarındakı tərəvəz kimi satışa çıxarılıb?
Stenford Universiteti ABŞ-da və dünyada ən nüfuzlu, reytinqli universitetlərdən biri kimi tanınır. 2021-ci ilin aprel ayına kimi 85 “Nobel” mükafatı və 29 “Turinq” mükafatı laureatı, 8 “Fields” medalçısı, “Fulbrayt” proqramı qalibi, “Marşal” və “Rods” təqaüdçüləri Stenford ilə əlaqəli (tələbələr, məzunlar, müəllimlər və ya işçilər kimi) olublar.
Bundan əlavə, Stenford tələbələri və məzunları 2021-ci ilə qədər ən azı 296 olimpiada medalı, o cümlədən 150 qızıl və 79 gümüş medal qazanıblar. Nəhayət, Stenford xüsusilə sahibkarlığı ilə tanınır və startap maliyyələşdirməsində ən uğurlu universitetlərdən biridir. Stenford məzunları 2011-ci ilə qədər illik gəliri 2,7 trilyon dollardan çox olan və 5,4 milyon iş yeri yaradan çoxsaylı şirkətlər qurublar.
Akademik aləmdə Harvard Universiteti, Yel Universiteti və Massaçusets Texnologiya İnstitutunun hazırkı prezidentləri, həmçinin Harvard və Prinston universitetlərinin prorektorları onun məzunlarıdır. Bütün bunları bir səbəbə görə sadalayıram: Məsələ burasındadır ki, son vaxtlar bir politoloq, Stenford Universitetinin doktoru Artur Xaçikyan erməni mediasında fəallıq nümayiş etdirməyə başlayıb.
Onun həqiqətən iddia etdiyi şəxs olub-olmaması hələ bilinəcək. Bircə onu qeyd edim ki, biz çoxlu erməni politoloqları görmüşük ki, onlar əslində sahib olmadıqları tamamilə fərqli reqaliyaları özlərinin adına çıxıblar. Hər halda, “Mimino” kinokomediyasının qəhrəmanlarından birinin bu adaşı, necə deyərlər, ağzına gələn elə şeylər danışır ki, dünyanın aparıcı universitetlərindən birinin statusunu açıq-aşkar biabır edir.
Belə ki, o, bu dəfə Qərbin sanksiyaları altında olan Rusiya təbliğat mediasının İrəvan şöbəsi olan “Sputnik Ermənistan”a müsahibəsində şok fikirlər səsləndirib: "Kollektiv Qərb Ermənistanı aldatdı və Azərbaycanın neft və qazına görə 120 min Dağlıq Qarabağ ermənisini satdı. Qərb platformalarında Azərbaycanla danışıqların isə bir vəzifəsi var - Bakının yeni təcavüzə təhrik etmək".
Qəribədir ki, Stenford Universitetinin bu məzunu ümumi, təkzibedilməz həqiqətləri bilmir. Məsələn, onu bilmir ki, Dağlıq Qarabağ adlı yer yoxdur, Azərbaycanın Qarabağ iqtisadi rayonu var. Ərazisində qeyri-qanuni məskunlaşan erməni icmasının sayı hələ dəqiqləşdirilməyib. Xaçikyan xatırlamalıdır ki, bütün dünya ölkələri, o cümlədən indi Ermənistan (Baş nazir Nikol Paşinyanın bəyanatından sonra) Azərbaycanın ərazi bütövlüyünü tanıyır.
Yenə qəribədir ki, Xaçikyan Azərbaycan və Ermənistanın BMT-yə Sovet sərhədləri daxilində daxil olduğunu “unudub”. Stenford Universitetinin hansısa qəribə elmlər doktorunun faktologiyanı və reallığı tanımayan, aşkar həqiqətlərdən tamamilə xəbərsiz olduğu ortaya çıxır. Belə olmasaydı, o, Ermənistanla Azərbaycanın Qarabağ iqtisadi rayonunun erməniləri arasında bərabərlik işarəsi qoymazdı.
Reallıq budur ki, Ermənistan və onun vətəndaşları, Azərbaycan və onun vətəndaşları var. Üstəlik, Azərbaycanın Qarabağ iqtisadi rayonunda Ermənistan pasportu ilə yaşayan ermənilər var. Yəni bizim ərazimizdə qeyri-qanuni məskunlaşan ermənilər. Stenford Universitetinin yerləşdiyi ABŞ-da qeyri-qanuni miqrasiyaya qarşı fəal mübarizə aparıblar və mübarizə aparırlar. Qarabağ erməniləri isə Xankəndi və onun ətrafında tamamilə qeyri-qanuni, Ermənistan vətəndaşlarının pasportları ilə yaşayırlar. Ona görə də onlara qarşı yumşaq münasibətinə, səbrinə görə rəsmi Bakıya hələ təşəkkür də etmək lazımdır.
Ümumiyyətlə, gördüyümüz kimi, Xaçikyanın çıxışları Rusiyanın federal telekanallarında təbliğat xarakterli şouların daimi iştirakçılarının səsləndirdiyi çıxışlara daha çox bənzəyir. Amerikanın aparıcı universitetlərindən birinin doktoru kollektiv Qərbi günahlandırır. Guya, bu kollektiv Qərb ermənilərin topdan və pərakəndə satışı ilə məşğuldur. Xaçikyan başa düşmür ki, bununla o, öz xalqını təhqir edir. Çünki o, Qarabağ iqtisadi rayonunun erməni əhalisini sanki kolxoz bazarında olduğu kimi satıla bilən bir kiloqram kartof və ya badımcana bərabər tutur.
Və söhbət xidmətlər üçün konkret qiymət preyskurantı olan, aşağı sosial məsuliyyətli qadınlardan getmir. Onlar sadəcə separatçılardır. Azərbaycan vətəndaşlığını qəbul edib yaşadıqları yerdə yaşamaq üçün qalıb-qalmayacağını seçmək və ya qəbul etməyərək, Ermənistana getmək hüququ olanlar. Azərbaycan getmək istəyənlər üçün nəqliyyat ayırmağa hazırdır.
O ki qaldı hərbi təcavüzə, bu, Ermənistan tərəfindəndir. Azərbaycan ərazilərinin 20%-ni dörddə bir əsrdən artıq işğal altında saxlayan o idi, əksinə yox.
Bu barədə təkcə Stenford Universitetində deyil, həm də Nikol Paşinyanın təhsilini başa vurmadığı Yerevan Dövlət Universitetində də məlumdur. Bu reallığı yalnız erməni konyakının güclü təsiri altında, böyük miqdarda istehlak edildikdə inkar etmək olar. Neft və qaza gəlincə, mən sadə cavab verəcəm: paxıllıq etməyin! Üstəlik, neft və qazın olması dövlətin avtomatik çiçəklənməsi və qüdrətlənməsi demək deyil. Elə ölkələr var ki, orada çoxlu neft və qaz var və onlar acınacaqlı mövcudluq içərisindədir. Təxminən Ermənistandakı kimi...
Müəllif: Əkbər Həsənov
ayna.az
Mövqelərimiz üzərində uçuş həyata keçirməyə cəhd göstərən kvadrokopterin fəaliyyətinin qarşısı alınıb
İyunun 4-ü saat 20:10 radələrində Rusiya sülhməramlılarının müvəqqəti yerləşdiyi Azərbaycan ərazisindəki qeyri-qanuni erməni silahlı dəstələrinin üzvlərinə məxsus kvadrokopterin ordumuzun Ağdam rayonu istiqamətində yerləşən mövqelərinin üzərində kəşfiyyat xarakterli uçuş apardığı müşahidə edilib.
Bu barədə Müdafiə Nazirliyindən bildirilib.
Azərbaycan Ordusunun bölmələri tərəfindən görülən təxirəsalınmaz tədbirlər nəticəsində mövqelərimiz üzərində uçuş həyata keçirməyə cəhd göstərən kvadrokopterin fəaliyyətinin qarşısı alınıb.
2023-cü ilin sonuna qədər Azərbaycanla Ermənistan arasında sülh sazişinin imzalanması ehtimal olunur.
APA xəbər verir ki, bu sözləri Ermənistan Təhlükəsizlik Şurasının katibi Armen Qriqoryan Ermənistanın İctimai Televizyasına müsahibəsində deyib.
"Ermənistanla Azərbaycan arasında çox intensiv danışıqlar aparılır. İntensivlik bu cür davam edərsə və beynəlxalq birliyin güclü köməyi olarsa ilin sonuna qədər sülh sazişinin imzalaması imkanı var. Biz razılaşmanı mümkün qədər tez imzalamaq əzmindəyik", - deyə Qriqoryan bildirib.
Danışıqlara, masalara baxanda açıq şəkildə görürük ki, Ermənistan-Azərbaycan münasibətləri və Qarabağ problemi bir-birindən ayrılıb. Ona görə də biz də bu problemi ayrı-ayrılıqda təhlil etməliyik.
Ermənistanla Azərbaycan arasında sülh müqaviləsinin imzalanması üçün müxtəlif ölkələr cəhd edir. Təbii ki, öz maraqları daxilində. Hər kəs divident qazanmaq üçün çabalayır. Çünki məlum dəhliz məsələsi yeni bazarlar, yeni qazanclar gətirəcək. Köhnə qazanc yollarına isə çomaq soxacaq. Ona görə də köhnə yolların ağaları yeni yoldan pay istəyir.
Faktiki olaraq Qarabağ Azərbaycanın daxilindəki problemdir. Çünki Azərbaycan ordusu Qarabağdakı qeyri-qanuni silahlıları tam mühasirədə saxlayıb. Azərbaycanda nədənsə bu sözü deyəndə bəziləri qorxurlar. Elə bilirlər ki, reallığı deyəndə ermənilərin əlinə “kozır” verəcəklər. Belə deyilsə, rəsmi Bakı niyə hər fürsətdə “Qarabağ daxili məsələmizdir” deyir? Sizin qorxaq olmağınız reallığı dəyişdirmir.
Qarabağ daxili məsələdir, ancaq həm də Rusiyanın və Ermənistanın məsələsidir. Niyə? Çünki daxilimizdə sülhməramlı adı altında rus ordusu və sayı qeyri-müəyyən olan ermənilər var. Ermənilərin olması da Ermənistanı maraqlandırır. Niyə? Biz necə İranda yaşayan soydaşlarımızın haqqı və hüququ barədə danışırıqsa, onlar da özündə bu hüququ görürlər. Qərəz, reallıqlara göz yummaqla, pafoslu çıxışlarla problem həll etmək olmur, olmaz.
Qarabağla bağlı Rusiya, Azərbaycan və Ermənistan üçlüsündə ən ciddiyə alınacaq tərəf Rusiyadır. Azərbaycanlılar mövzusunda İran Azərbaycanı nə qədər ciddiyə alırsa, Azərbaycan da erməni mövzusunda Ermənistanı o qədər ciddiyə almalıdır.
Gələk Rusiyaya.
Rusiyanın əlini digər ölkələrə baxmış güclü edən sahədə olmasıdır. Digər ölkələr dediyim də ABŞ, Fransa, ümumilikdə Avropa İttifaqıdır. Çünki regionda marağı olan ölkələrin heç biri Rusiya qədər sahədə güclü sayılmır. Rusiyanın həm Ermənistanda, həm Azərbaycanda ordusu mövcuddur. Bu, rəsmi Moskvanı əsas oyunçu edir. Azərbaycan istər Ermənistanla, istərsə də Qarabağda maraqlarının təmin olunması üçün Rusiya ilə uzlaşmaya gedə bilər. Misal üçün, Rusiya Zəngəzur dəhlizinin açılmasını təmin edərsə, rəsmi Bakı Rusiyanın Qarabağda qalmasına güzəştə gedə bilər. Bu, sülhməramlı yox, komendant sistemi ola bilər. Maraqlar uzlaşmadan problemin həll olacağını gözləmək məntiqsiz olardı. Azərbaycanlıların nə istəməsindən asılı olmayaraq, Qarabağda, ehtimal ki, müəyyən sayda erməni əhalisi qalacaq. Birdən-birə Bakının ora daxil olması və idarəçiliyi təkbaşına əlinə alması çətin görünür. Buna görə də kənar qüvvənin Qarabağda olması gözləniləndir. Bu qüvvənin də Rusiya olacağı daha realdır. Əslində, Rusiyanın olması həm də sərfəlidir. Niyə? Ən yaxşı düşmən tanıdığın düşməndir. Üstəgəl, sahədə ruslara rüşvətlə hər şeyi etdirmək mümkündür. Biz bunu ötən iki il yarımda da gördük. Detallara indiki məqamda gərək yoxdur.
Rəsmi Bakı qeyri-qanuni silahlıların ərazidən çıxarılması üçün qan yox, mülkiləşdirmə siyasətinə daha çox üstünlük verir. Əslində, məntiqli olan tərəfi də budur. Antiterror, məcburetmə əməliyyatları onsuz da daim masadadır. Əgər qansız həll ola bilirsə, ağrımaz başı ağrıtmağa da gərək yoxdur. Qarabağdakı bütün silahlıları terrorçu kimi damğalamaq da olmaz. Bu həm də məntiqsizdir. 18 yaşı tamam olub çağırışla orduya gedən cinayətkar sayıla bilməz. Rəsmi Bakı əgər qansız şəkildə prosesə nail olsa, həmin şəxslərin əfv ediləcəyi realdır. Yeri gəlmişkən, bu məsələnin olma ehtialını bir neçə həftə öncə hərbi ekspert Tərlan Eyvazovla işləmişdik. Prezident İlham Əliyev də bu ehtimalların olmasını dilə gətirdi. Tarixdə bu halların çoxlu sayda analogiyası mövcuddur. Bunun Azərbaycan tarixində də örnəkləri var. Cümhuriyyət dövründə də bu hal yaşanmışdı. Zamanında eks-prezident Əbülfəz Elçibəy də belə bir addım atmışdı. Rusiya Çeçenistan müharibəsi də örnəklərdən biridir. Dövlət idarəçiliyi bunu tələb edir. Pafos, boşboğazlıq həll yolu deyil.
Nəzərə almaq lazımdır ki, Qarabağda bir diviziyalıq silahlı var. Onlar təkcə atıcı silahlarla silahlanmayıblar. Məsələn, Qarabağdakı silahlıların kifayət qədər topu, minaatanı mövcuddur. Təsəvvür edin, total əməliyyatlara start verilir və o toplar bir neçə dəqiqəyə açılır. Nə baş verəcək? Mütləq şəkildə Laçın, Şuşa, Tərtər zərbələr alacaq. Bəziləri hətta çıxıb camaatın başının altına yastıq qoyurlar ki, bəs, müharibədən sonrakı əməliyyatlarda itki verməmişik, ona görə də total əməliyyatlar baş versə, yenə itki olmayacaq. Yalançını mənzilinə kimi qovaq. Sentyabr ayındakı sərhəd toqquşmasında verilən itki deyildi? Yoxsa “UAZ əməliyyatı”ndakı itki deyildi? Təkcə ötən ay 4 şəhid verilib. Dəxli yoxdur, son 4 şəhid əməliyyatlarda olub, yoxsa mövqe döyüşündə, əsas odur, olub. Əgər qarşı tərəfin əlində silah varsa və sən ona güllə atanda o sənə gül atmayacaq. Ona görə də rəsmi Bakı mülkiləşdirmə, qansız həll etmə yolunu tutmaqda daha maraqlı görünür.
Bunu da yazmasam, olmaz. Bir müddətdir ki, Azərbaycan mediasını məşğul edən məsələlərdən biri də rusların ermənilərə hələ də silah daşımasıdır. Bir video ortaya atılıb və idda edilir ki, ruslar yenə silah daşıyır. Sual yaranır: silah haradan daşınır? Ermənistandan gətirilir, yoxsa daxildə hansısa kənddən hansısa kəndə aparılır? Bunu o adamlar iddia edirlər ki, həm Azərbaycanın sərhəd-buraxılış məntəqəsi qoymaqla bütün məsələni həll etdiyini, həm də silah daşındığını deyirlər. Bu adamların məntiqi ilə sərhəd-buraxılış məntəqəsi müqəvvadır. Bu adamlar həm deyir, uraaa, sərhədləri tam bərpa etdik, həm də deyirlər, silah daşınır. Bu iki bir-birinə zidd fikirin hansı gerçəkdir? Mütləq şəkildə biri yalandır. Özləri cavab versinlər.
Azərbaycan ictimaiyyətini erməni informasiya maşınından daha çox, özünü ciddi sayan qeyri-ciddi adamların sərsəmləmələri çaş-baş salır. Bunda əsas günah da özünü ciddi sayan media qurumlarının belələrinə yer verməsidir.
Teref.az
Prezident İlham Əliyevin Laçında separatçıların amnistiyası barədə verdiyi mesaja ABŞ Dövlət Departamentinin müsbət yanaşması separatçı rejimdə heyrətlə qarşılanıb.
Globalinfo.az xəbər verir ki, Xankəndidəki saxta rejimin oyuncaq “xaric işlər nazirliyi” ABŞ Dövlət Departamentinin rəsmi nümayəndəsinin Prezident Əliyevin sözügedən bəyanatını alqışlamasının separatçılarda dərin məyusluq və çaşqınlıq yaratdığını açıqlayıb.
Bununla yanaşı, separatçı rejim yalvarışlı notlarla ABŞ-ın “münaqişəni” həllində müsbət rol oynamaq istəməsinə şübhə etmədiklərini bildirib.
Baş verən son proseslərin fonunda separatçılar arasında bölünmə və təşviş daha da güclənib, saxta qurumun gələcəyi barədə ümidsizlik dərinləşib.
Xatırladaq ki, Prezident Əliyev 28 mayda Laçına səfəri zamanı çıxışında Qarabağdakı erməni “məmurlar”a hansı hallarda güzəşt edilə biləcəyini elan etmişdi.
“Hər kəs yaxşı bilir ki, bu gün o bölgədə (Qarabağ – red.) istənilən əməliyyatı keçirmək üçün hər bir imkanımız var. Ona görə “parlament” buraxılmalıdır, özünü “prezident” adlandıran ünsür təslim olmalıdır, bütün “nazirlər”, “deputatlar” və digərləri öz vəzifələrini artıq kənara qoymalıdırlar. Ancaq o təqdirdə onlara güzəşt oluna bilər. Ancaq o təqdirdə hər hansı bir amnistiyadan söhbət gedə bilər”, – Prezident Əliyev vurğulamışdı.
ABŞ Dövlət Departamentinin sözçüsü Metyu Miller isə bu sözlərə bu cür reaksiya vermişdi: “Prezident Əliyevin amnistiya ilə bağlı son bəyanatlarını alqışlayırıq”.
Tamerlan Yayaqan
Babayan “artsax”da iğtişaşlar təşkil etmək, “dövlət təşkilatlarına” girişləri bloklamaq və 2018-ci ildəki inqilab ssenarisini Xankəndində təkrarlamaq istəyir.
“AzPolitika.info” xəbər verir ki, Ermənistanın “Hraparak” qəzeti Qarabağdakı separatçı hakimiyyətin belə bir məlumat aldığını yazıb.
Yazıda qeyd olunur ki, separatçıların hazırkı rəhbərliyi ilə qondarma qurumun sabiq “müdafiə naziri” Samvel Babayan arasında qarşıdurma “çevrilişlə” nəticələnə bilər.
Xatırladaq ki, 3 gün öncə Araik Arutunyan Xankəndində kütləvi aksiyalara qadağa qoyulması barədə qərar vermişdi. “Hraparak” yazır ki, bu qadağa məhz S.Babayanın hazırladığı “çevrilişə” imkan verməmək üçün tətbiq edilib.
S.Babayan bir müddət əvvəl qondarma rejimin “dövlət naziri” postuna iddiasını ortaya qoyub. Rusiyanın emissarı olan Ruben Vardanyan bu “vəzifədən” atılandan sonra həmin “postu” qondarma qurumun sabiq “prokuroru” tutub.
Ancaq Babayan “çiçəyi burnunda” yeni nazirin istefaya göndərilməsini və onun yerinə özünün təyin edilməsini Arutunyandan tələb edir. Hətta mayın 15-də bu tələblə çıxış edən Babayanın bir qrup tərəfdarı Xankəndində mitinq keçiriblər. Aksiyaçıların tələblərinə cavab verən Arutunyan qərar vermək üçün 10 gün vaxt istəyib. Ancaq həmin vaxt bitsə də, Babayanın tələbi yerinə yetirilməyib. Bundan sonra “Hraparak”-ın yazdığına görə, qondarma qurumun “müvafiq orqanları”na Babayanın iğtişaşlar və “çevriliş” hazırladığı barədə məlumat daxil olub.
Qəzet yazır ki, bunu görən Xankəndindəki Rusiya hərbi kontingentinin rəhbərliyi Arutunyana kütləvi aksiyalara qadağa qoymağı məsləhət bilib. Nəticədə Arutunyanın qadağa qərarının da məhz “sülhməramlıların” təklifi əsasında verildiyi məlum olub.
Maraqlıdır ki, erməni mətbuatı Qarabağdakı separatçıların didişməsinin sadəcə, Babayan-Arutunyan qarşıdurması olmadığını, Arutunyanın arxasında Moskvanın, Babaynın arxasında isə İrəvanın durduğunu yazır. Babayan bu iddiaları rədd etsə də, onun Paşinyan hökumətilə anlaşdığına dair məlumatlar var.
Əgər bu məlumatlara inansaq, belə çıxır ki, Paşinyan təkcə Ermənistanda yox, Qarabağ erməniləri arasında da Rusiyanın təsirini azaltmağa çalışır...
Bütün bunlarla yanaşı, belə görünür ki, separatçılar arasındakı bu didişməni və “hakimiyyət davası”nı həll edəcək yeganə qüvvə var – Azərbaycan Ordusu!
Laçın rayonunda yerləşən Həkəri çayının sahilində çimərlik ərazisi təşkil edilib.
Sözügedən çayın üzərinə suya batıb-çıxan taxtadan körpü atılıb.
Çayın çimərlik kimi istifadəsi nəzərdə tutulan hissəsinə isə qum tökülüb.
Daha ətraflı Baku TV-nin süjetində: