18 mayda Zəngilan rayonunun Ağalı kəndində İlham və Mehriban Əliyevalar “Ağalı” hotelinin açılışında iştirak ediblər.

Bu hotelin açılışı hələ 2022-ci ilin sonlarına planlaşdırıldı. Tikinti məlum olmayan səbəbdən 2022-ci ilin oktyabrından sonra dayanır, layihəni icra edən şirkətin sosial media hesabındakı paylaşım isə onun 2023-cü ilin oktyabrında yenidən davam etdirildiyini göstərir.

Hotelin tikintisinin birinci mərhələsinə nə qədər pul xərcləndiyi məlum olmasa da onun açılışından 2 ay əvvəl hotelin tam təchizatlı təmir və tamamlanma işləri ilə bağlı Şərqi Zəngəzur İqtisadi Rayonunda 1 saylı Bərpa, Tikinti və İdarəetmə Xidməti tender keçirir. Tenderdə “Crystal İnşaat” ASC qalib gəlir. Bunun üçün şirkətə 14 milyon 192 min manatdan artıq pul verilir.

Hotelin tikintisinin bu mərhələsini həyata keçirən “Crystal İnşaat” kimindir? İndiyədək hansı böyük tenderlərin qalibi olub? Bu şirkəti hazırda deputat olan YAP-çı ilə nə bağlayır? Araşdırmışıq!
Hotellə bağlı nə məlumdur?
Zəngilanın Ağalı kəndində yerləşən hotel tikintisi barədə ilk informasiyanı Prezident İlham Əliyevin 26 Aprel 2021-ci ildə Cəbrayıl və Zəngilan rayonlarına səfəri zamanı görmək mümkündür.

İlham Əliyevə yaradılan süni göl üzərində “Ağıllı kənd”in bütün daxili elektrik enerjisi ehtiyacını ödəyəcək “Arximed” qurğusu barədə məlumat verilərkən ərazidə hotel olacağı da sözarası deyilir.

Bundan sonra həmin hotel barədə düz 1 il sonra “Ağıllı kənd” layihəsinin birinci mərhələsi üzrə açılış mərasimində danışılır. İlham Əliyev hotelin tikintisi ilə maraqlanır və ona bildirilir ki, hotel 62 nömrədən ibarət olacaq.

2021-ci ildən tiklməkdə olan və ehtimallara görə 1 il fasilə verilən hotelin tikintisi cəmi 2 ay ərzində yekunlaşır. 2024-cü ilin 4 martında hotelin təmir və tamamlanmasına 14 milyon 192 min 628 manat 20 qəpik pul ayrılır və 18 mayda İlham Əliyevlə həyat yoldaşı hotelin açılışını edir.

Əvvəlcə 62 nömrədən ibarət olacağı deyilən hotelin açılış günü 117 otaqdan ibarət olduğu məlum olur. Hotelin həcminin necə və niyə genişləndirilməsi ilə bağlı açıq mənbələrdə məlumat yoxdur.

Yeri gəlmişkən, şirkətin Facebook hesabında hoteldə gedən tikinti işləri ilə bağlı paylaşımlarda “Crystal İnşaat”ın hoteldə təmir və tamamlanma işləri aparması yox, tikinti işi gördüyü qeyd olunur.

İndiyədək “Crystal İnşaat” nə iş görüb?

“Crystal Group” şirkətlər qrupuna aid olan “Crystal İnşaat” 2018-ci ilin dekabrında dövlət qeydiyyatına alınıb.

“Crystal İnşaat”ın indiyədək icrasında iştirak etdiyi və ya bütün tikintisini həyata keçirdiyi layihələrin bəzisi:

Zəngilan Beynəlxalq Hava Limanının tikintisində iştirak
Horadiz-Cəbrayıl-Zəngilan-Ağbənd avtomobil yolunun tikintisində iştirak
Şəki Prokurorluğunun inzibati binasının tikintisi
Kürdəmir Prokurorluğunun inzibati binasının tikintisi
Pirallahı Prokurorluğunun inzibati binasının tikintisi
Şəki, Kürdəmir və Pirallahıdakı tikintilərə görə şirkət ümumilikdə 7 milyon 610 min manatdan artıq dəyəri olan tenderin qalibi olub.

Horadiz-Cəbrayıl-Zəngilan-Ağbənd avtomobil yolunun tikintisinə isə ümumilikdə nə qədər vəsait ayrıldığı məlum deyil. Bu yolun tikintisi ilə bağlı yalnız işlərin davam etdirilməsi üçün İlham Əliyevin Avtomobil Yolları Dövlət Agentliyinə 14 milyon manat ayırdığı məlumdur.

Bu məbləğin də nə qədərinin “Crystal İnşaat”a ödənildiyi bilinmir.

“Crystal İnşaat” kimindir?

Şirkətin Müşahidə Şurasının sədri Pərviz Vəliyevdir. O, hazırda Milli Məclisin YAP-dan olan deputatı Ağalar Vəliyevin oğludur.

Ağalar Vəliyev özü də biznesmen deputat kimi tanınır.

Meydan TV-nin 2015-ci ildə yayımladığı araşdırmaya görə, Ağalar Vəliyev 1996-cı ildən “Azəraqrartikinti” Dövlət Şirkətinin rəhbəri olub. 1997-ci ildə şirkət ləğv edilərək bazasında “Azəraqrartikinti” Açıq Səhmdar Cəmiyyəti yaradılıb. Araşdırmada qeyd olunur ki, cəmiyyətin bütün mülkiyyəti Ağalar Vəliyevə “hədiyyə” edilib.

Hələ 2015-ci ildə “Azəraqrartikinti” ASC-nin 40 filialı var idi.

Satınalmalar portalında bu ASC-nin yer aldığı və qalib gəldiyi cəmi 2 tender tapa bildik. Bunların da ümumi dəyəri 12 milyon manata yaxındır.

Meydan TV-nin əldə etdiyi və 1998-2014-cü illər aralığında baş tutmuş tenderlərə əsasən, Ağalar Vəliyevin rəhbəri olduğu ASC 85 milyon 634 min manatdan çox dəyəri olan layihələri icra edib.
Müəllif: Cavid Abdullayev
mikroskopmedia.com

Rəsmi məlumatlara görə, 2019-2024-cü ilin aprel ayına qədər ümumi dəyəri 43 milyon 680 min manatdan artıq tender müqavilələri imzalayan “Caspel” MMC yarandığı gündən çoxunun əldə edə bilməyəcəyi imtiyazlarla Azərbaycan mediasında müzakirə edilən şirkətdir.

2005-ci ildə yaranması ilə təkcə kassa aparatlarının satışından rəsmi olmayan rəqəmlərə görə, 100 milyonlarla manat əldə edən “Caspel”in arxasında kimlərin dayandığı məlum olsa da Mikroskop Media ilk dəfə şirkətin gerçək sahibinin kimliyini müəyyənləşdirib.

“Caspel Holdiq”in təsisçisi 2020-ci ildəki sənədlərə görə 2023-cü ilin dekabrına qədər holdinqin idarə heyətinin sədri olan Namiq Məmmədovun həyat yoldaşı Nailə Məmmədovadır.

Mikroskop Media “Caspel”in necə bu qədər böyüdüyünü, hansı milyonluq tenderlərdə qalib gəldiyini və mütəmadi olaraq arxasında hansı məmurların dayandığını araşdırıb.
Başlanğıc: Fazil Məmmədova arxalanmaq

“Caspel” 2005-ci ilin avqust ayında yaradılıb. Şirkətin ilk qanuni təmsilçisi Namiq Məmmədov olsa da Dövlət Vergi xidmətinin reyestr məlumatlarına görə sonradan qanuni təmsilçi Ceyhun Quliyev olub.

Ceyhun Quliyev haqqında: O, keçmiş Vergilər naziri Fazil Məmmədovun kürəkəni Namiq Quliyevin qardaşıdır. Namiq Quliyev özü isə 2017-ci ilin dekabrına qədər Vergi Cinayətlərinin İbtidai Araşdırma Departamentinin birinci müavini olub.

“Caspel”in əvvəlki işləri: Şirkət öz adını ilk dəfə kassa aparatları quraşdırmaq sahəsindəki monopoliyası ilə tanıdıb. Ölkə ərazisində bir kassa üçün sahibkarlardan aparat qiyməti və quraşdırma xərci olaraq ən azı 2 500 manat alan şirkət sayəsində, həmin dövrdə Vergilər naziri olan Fazil Məmmədov və onun yaxınları mediada gedən məlumatlara görə 100 milyonlar qazanıb.

Etender-də olmayan tenderlər: Dövlət satınalmalarının vahid internet portalında “Caspel” MMC-nin qalib gəldiyi bütün tenderlər yoxdur. Mikroskop Media müxtəlif illərdə olan tenderləri Azərbaycanın onlarla mediasında axtarış apararaq müəyyənləşdirib.

2010-2021-ci illər aralığı ilə bağlı dövlət satınalmalarının vahid internet portalında olmayan və “Caspel” MMC-nin qalib gəldiyi tenderlərin ümumi məbləği 39 milyon 600 min manatdan artıqdır.
Vergi borcu ola-ola tenderdə iştirak

Vergi borcu olan şirkətlərin tenderdə iştirakı qanunsuzdur. Bu, “Dövlət Satınalmaları haqqında” Qanunun 6.2.5-ci maddəsinin tələblərinə görə mümkün deyil.

Lakin bu, “Caspel” şirkəti üçün keçərli olmayıb:

Şəxsən Prezident Əliyevlə görüş və “Tərəqqi” medalı

2010-cu ildə “Caspel” MMC-nin idarə heyətinin sədri olduğu vaxtlarda Namiq Məmmədov İlham Əliyevlə ilk dəfə yanaşı görünür. O, Oğuz-Qəbələ-Bakı su kəmərinin açılışında Əliyevə SCADA sistemi barədə məlumat verir. Bu sistem kəmərdə baş verə biləcək bütün qəzalar və sızmalar haqqında məlumatı dərhal mərkəzi aparata ötürmək imkanına malikdir.

2014-cü ildə isə İlham Əliyev Namiq Məmmədovu informasiya-kommunikasiya və kosmik sənaye sahələrinin inkişafındakı xidmətlərinə görə “Tərəqqi” medalı ilə mükafatlandırıb.

2018-ci ildə “Caspel”-in yolu yenə İlham Əliyevlə kəsişir. Bu dəfə şirkət YAP-ın yeni inzibati binasının intellektual kamera-mühafizə sistemini qurur. Bundan başqa partiyanın bütün iş proseslərini, üzvlərin qeydiyyatını idarə edən proqram təminatını və Yeni Azərbaycan Partiyasının bütün rayon təşkilatlarının vahid kommunikasiya məkanında birləşdirən sistem qurulub.

“Caspel Holdinq”-in digər şirkətləri barədə nə məlumdur?

“Caspel Holdinq” özündə 5 şirkəti birləşdirir. Bunlar:

Caspos: Kassa operatoru kimi fəaliyyət göstərən şirkət yanacaqdoldurma məntəqələri, restoran, hotel, market və digər sahibkarlıq subyektlərinə kassaların satışı və proqram təminatlarının quraşdırılmasını həyata keçirir.

Setclapp: Biznes proseslərin avtomatlaşdırılması, proqramlaşdırma, İKT konsultasiyası üzrə ixtisaslaşan şirkət, proqram həlləri, mobil tətbiqlərin və veb saytların hazırlanması, rəqəmsal marketinq xidmtlərini təklif edir.

Clip TV: Şirkət internet, kabel tv və İP TV xidmətləri təklif edir.

Telcas: Bu şirkətlə bağlı heç bir informasiya yoxdur.

Bu şirkətlərdən “Caspos” və “Setclapp” dövlət qurumlarının sifarişi ilə müxtəlif layihələr icra ediblər.

Məsələn, “Caspos” SOCAR-ın Şuşa və Ağdam da daxil olmaqla 5 şəhər və rayondakı yanacaq doldurma məntəqələrində kassa aparatı quraşdırıb.
“Setclapp” isə İqtisadiyyat Nazirliyi, Azərsu, Milli Depozit Mərkəzi üçün xidmət göstərib.
Lakin hər iki şirkətin icra etdiyi adıçəkilən layihələrlə bağlı heç bir məlumat yoxdur. Tender nə vaxt olub, icra edilən xidmətin dəyəri və s. kimi məlumatlar açıq deyil.
Araşdırmanı tamamladıqdan sonra “Caspel” MMC-nin keçmiş idarə heyətinin sədri Namiq Məmmədova azı 10 sual ünvaladıq. Lakin o, heç bir suala cavab vermədi.
Müəllif: Cavid Abdullayev
/mikroskopmedia.com/

“Nəsimi rayonu Novruzov qardaşları küçəsində(“Papanin” deyilən ərazi) “Elevan Park” yaşayış kompleksi inşa edən “Pilot-16” şirkəti nə qanunlara, nə dövlət qurumlarının tələblərinə, nə də vətəndaşların şikayətlərinə məhəl qoymur. Şirkətin qanunsuz əməlləri ilə bağlı bütün dövlət qurumlarına edilən müraciətlərə və onların da müvafiq tələblərinə baxmayaraq, “Pilot-16″ şirkəti ərazidə yaşayan sakinlərə divan tutmağa davam edir”.

Bu sözləri Editor.az-a açıqlamasında ərazidə yaşayan sakinlər deyiblər. Onun sözlərinə görə, şirkət gecənin gec saatlarında, istirahət günlərində səhər çox erkən saatlarda onlarla ailənin yaşadığı ərazidə ağır tikinti, betonlama işlərini davam etdirir: “Bu şirkətin əlindən gecə evimizdə yata bilmirik. Traktor daimi tikinti meydançasında olmasına baxmayaraq, sanki sakinlərə işgəncə vermək üçün gecə saatlarında traktor yer qazmaqla məşğuldur. Bu zamanda yaranan dəhşətli və vahiməli səs-küydən bütün ərazi lərzəyə gəlir. İsti yay ayları olduğu üçün evin pəncələrini açmaq zərurəti yaranıb. Lakin yaranmış dəhşətli səs-küydən nəinki yatmaq, hətta bizi evimizin də başımıza uçacağını gözləyirik. Evdə yuxusuzluqdan yaşlıların, körpələrin, səhər erkən saatlarda işə getməli olan hər kəsin həyat ritmi məhv olub və səhhətində ciddi problemlər yaranıb.

Bundan başqa gecə saatlarında tikinti işləri aparan fəhlələrin bir-biri ilə yüksək səslə, söyüşlə, ağır ifadələrlə danışması qəbuledilməz vəziyyət yaradıb. Sanki bu şirkət məqsədli şəkildə bizi təxribata çəkir.

Ümumiyyətlə, evlərimizin cəmi 5-10 metrliyində bu hündürmərtəbli bina tikildikdən sonra gün işığına həsrət qalmışıq. Binada işləyən fəhlələlər hündürlükdən düz evlərin içinə baxır və yüksək səslə söyüşlə danışırlar.

Bu səbəbdən isti yay aylarında və ümumiyyətlə pəncərələrimiz daima bağlı və pərdəlidir.

Ərazi əsl xarabalığı xatırladır. Bütün ərazi zibilliyə, tikinti materiallarının məzarlığına çevrilib. Ərazidə antisanitar vəziyyət isti yay günlərində dəhşətli həddə çatıb. Hər yeri üfunət iyi bürüyüb. “Yaşıl Dünya naminə həmrəylik ili”ndə qlobal COP-29 tədbiri keçirən şəhərimizə belə dəhşətli vəziyyət yaraşmır”.

Sakinlər qeyd edirlər ki, şirkətin quraşdırdığı ağır kranının altından hər gün ölüm qorxusu ilə keçməyə davam edirlər: Bununla yanaşı düzgün təşkil edilməyən tikinti meydançasından hər gün müxtəlif ağır tikinti materialları vətəndaşların, evlərin və avtomobillərin üzərinə tökülür: “Bir neçə dəfə zərərçəkənlər olub. Şirkət isə vətəndaşların həyatını görməzdən gəlir”.

“Papanin” sakinləri bildirirlər ki, son 6 ayda “Pilot-16” MMC tərəfindən yeni yaşayış kompleksinin tikildiyi ərazidə bunların hər birindən daha təhlükəli və qəribə hadisələr yaşanır. Son aylarda qeyd olunan ərazilərdə “Pilot-16″ MMC ilə danışıqlar zamanı şirkət tərəfindən təklif olunan qeyri-adekvat təkliflərlə razılaşmayaraq evlərini tərk etməyən bir neçə sakinin mənzilində və ya bu evlərə bitişik sökülməkdə olan tikililərdə müəmmalı şəkildə yanğınlar baş verib. Son 6 ayda 4 belə hal qeydə alınıb. Bu müəmmalı yanğınların konkret kim tərəfindən törədildiyi ilə bağlı əlimizdə hər hansı sübut və konkret dəlil yoxdur.
Ancaq yanğınların şirkətlə razılaşmayan mənzillərdə və ya bu evlərə bitişik sökülməkdə olan tikililərdə baş verməsi hər kəsdə, o cümlədən şirkətin qeyri-adekvat təklifləri ilə razılaşmayan bir ailə olaraq bizdə ciddi narahatçılıq yaradır.
Ərazidə evlərin bir-birinə bitişik olması səbəbindən yanğının sürətlə yayılmaq ehtimalı bütün sakinlərdə ciddi qorxu və narahatçılıq yaradıb. Evimizdə bu təhlükə səbəbindən gecə yatmır və növbə çəkirik. Həyatımıza ciddi təhlükə hiss edirik. Bununla bağlı bütün hüquq-mühafizə orqanlarına müraciət etmişik”.

“Papanin” sakinləri qeyd edir ki, son olaraq isə şirkət Novruzov qardaşları küçəsində sakinlərin və avtomobillərin istifadə etdiyi işlək yolu bağlayaraq, vətəndaşları faktiki mühasirəyə salıb: “Pilot-16″ və onun rəhbəri Aslan Quliyevin dövlət qurumlarına və vətəndaşlara hörmətsizliyinin kökündə Nəsimi rayon İcra Hakimiyyətinin başçısı Asif Əsgərov tərəfindən himayə edilməsi dayanır. Müraciət etdiyimiz qurumlar şikayətlərimizə reaksiya verib, müvafiq addımlar atıblar. Ancaq heç bir nəticə yoxdur. Şirkət öz qanunsuz və insanlıqdan kənar əməllərinə davam edir. İcra başçısı Asif Əsgərov şirkətin bütün qanunsuz əməllərinə göz yumur”.

www.yenicag.az

Parlamentdə olduğu müddətdə “susmaq qızıldır”- ifadəsini əlində bayraq edərək danışmayanlar yenidən önə keçiblər. Əslində parlament sözünün mənası danışmaq deməkdir. Elə millət vəkili də xalqın sözünü öz üzərinə götürüb parlamentdə danışan adama deyirlər. Ərəb dilindən götürülmüş “vəkil” sözü “başqasının işini görmək üçün tapşırıq almaq” anlamına gəlir. Latıncadan “advakatus” sözü isə “yardıma çağırıram” mənasını verir. Yəni istənilən halda millət vəkili adını daşımağa layiq olan şəxs, həmin secicilərinin sözünü parlamentdə deməlidir. Amma elə millət vəkillərimiz olub ki, parlamentdə olduqları müddətdə bir dəfə də olsun danışmayıblar. Belə susmağı qızıl hesab edənlərdən biri də sabiq deputat Xanlar Fətiyev olub. Sabiq deputat parlamentdə olduğu dövrdə bir dəfə də olsun danışmayıb. Əgər danışsaydı onun videogörüntüsünü ekranlarda görə bilərdik. Uzun müddət susqun qalan sabiq deputat bu illərdə öz gününə ağlamağı bacarıb. Yəni fərasət işlədərək özünə böyük biznes qurmağı bacarıb. Dördüncü çağırış Azərbaycan Respublikası Milli Məclisinin deputatı olan Xanlar Fətiyev, Milli Məclisin İctimai birliklər və dini qurumlar komitəsi sədrinin müavini, Müdafiə, təhlükəsizlik və korrupsiya ilə mübarizə komitəsinin, İntizam komissiyasının üzvü olub. Amma bu saydıqlarımız sadəcə bir görüntü olub. Xanlar Fətiyev Azərbaycan-Avstraliya və Yeni Zelandiya parlamentlərarası əlaqələr üzrə işçi qrupunun rəhbəri, Almaniya Federativ Respublikası, Belarus, Bolqarıstan, Çexiya, Çin, İraq, Koreya, Makedoniya, Moldova, Sloveniya, Tailand parlamentləri ilə əlaqələr üzrə işçi qruplarının üzvü olub. Ağıllı olan Fətiyev məhz işçi qrupunun üzvü olduğu ölkələrdə biznes qurmağı bacarıb. Sabiq deputat öz biznesini genişləndirməklə həmin dövrdə külli miqdarda vəsaiti ölkədən kənara çıxarmağı bacarıb. Fərasətli olan sabiq deputat müxtəlif ölkələri əhatə edən biznes şəbəkəsi qurub. Hələ bir neçə il öncə mühacirətdə yaşayan araşdırmaçı-jurnalist Cavanşir Həsənli Xanlar Fətiyevin Avropanın bir sıra ölkələrində qurduğu şirkətlər barəsində sənədləri açıqlayıb.

Hələ o zaman Cavanşir Həsənli Xanlar Fətiyevin biznesi ilə əlaqədar hazırladığı və özünün “Facebook” profilində yerləşdirdiyi materiallara nəzər salaq:

“Parlamentin mandatını daşıyan oliqarx, Azərbaycan-Almaniya parlamentlərarası əlaqələr üzrə işçi qrupunun rəhbəri Xanlar Fətiyev Almaniyada böyük işlər görməkdədir. Adamı zatən ora təyin ediblər ki, Almaniyada ölkəmizlə bağlı iş aparsın, ikitərəfli əlaqələrin inkişafına öz töhfəsini versin. O da əlindən gələni edir. Berlində, Ştutqartda şirkətlər açıb, nə az-nə çox 3 milyon avrodan artıq yatırım edb. Şəkillərini paylaşdığım AZ seriyalı 100 minlik avtomobillərə təkcə Berlində və Ştuttqartda deyil, Münxendə, Hamburqda, Frankfurtda, Drezdendə (aeroport terminalı) rast gələ bilərsiniz.

Bunlar kolleksiya filan deyil, Gəncə Avtomobil Zavodunun rəhbərinə məxsus avtomobillərin icarəsi ilə məşğul olan AZNUR GMBH şirkətinə məxsusdur.

Şirkət 2010-cu il iyunun 15-də Charlottenburg (Berlin) ədliyyəsində nizamnamə kapitalı 25 min avro olmaqla HRB 127288 B saylı şəhadətnamə ilə qeydiyyatdan keçib. Müxtəlif vaxtlarda Sona Osmanova, Murad Süleymanov, Fəxri Həsənov tərəfindən idarə olunub. Berlinin AUGSBURGER STR. 31 ünvanında fəaliyyət göstərən şirkətin hazırki direktoru Elvira Şahbazovadır. Elvira Şahbazova bir müddət həm də Berlində Fətiyevə məxsus, 2006-cı ilin fevralından fəaliyyət göstərən, dövriyyəsi 1 milyon avrodan yuxarı olan BRASIL GASTRO GMBH adlı şirkəti və eyni adlı restoranı idarə edib.

Xanlar Fətiyev bir müddət adıçəkilən restoranı tanıdığını və orada olduğunu etiraf etsə də, “Brasil Brasileiro”nun ona məxsus olduğunu təkzib etmişdi:

“Berlində, Kudamda yerləşir. Çox gözəl restorandır. İstəyərdim, mənim olsun, ancaq o restoran mənim deyil və mənə heç bir aiddiyəti yoxdur”.

Deputatın Almaniyadakı daha bir şirkəti 2010-cu ilin oktyabr ayında Ştuttqart şəhərində AZNUR STUTTGART GMBH adı ilə 25 min avro nizamnamə kapitalı ilə qeydiyyatdan keçib. 2016-cı ilin aprelin 20-də şirkət yenidən Charlottenburg (Berlin) ədliyyəsində HRB 176094 B saylı lisenziya ilə qeydiyyatdan keçirilib və AZNUR TRAVEL GMBH adı ilə Berlində Fətiyevin avtomobillərinin kirayəsi ilə məşğul olan AZNUR GMBH-nin ofisində, AUGSBURGER STR. 31 ünvanında fəaliyyət göstərməyə başlayıb, yeni nizamnaməyə uyğun olaraq turizm xidmətləri göstərir. 2011-ci ili 100 min avro zərərlə başa vuran bu şirkətini hazırda Berlində yaşayan Sona Osmanova idarə edir.

Almaniyanın Lübeck şəhərində, Pinassenweg 26-da isə AZNUR GMBH tərəfindən taksi parkı açılıb.

AZNUR adı altında Fətiyevin Gəncə Avtomobil Zavodundan şaxələnən biznesi Maltaya, İspaniyaya qədər uzanıb. İspaniyanln Ciudad aeroportunda da AZNUR-un kirayə avtomobilləri xidmət göstərir.

Keçək, Belarusiyaya…

Bu ölkədə Fətiyevin iki şirkəti var. Minskdə Xanlar Fətiyevə məxsus AZNUR ZTAA (Замежнае таварыства з абмежаванай адказнасцю “АЗНУР””) şirkəti də avtomobillərin icarəsi ilə məşğuldur. 2010-cu ilin sentyabrın 15-dən fəaliyyətdə olan şirkətin (qeydiyyat nömrəsi: 191431445) ofisi Belarusiya paytaxtının Sovetskaya 2/2 ünvanında yerləşir. Şirkətin bu ünvandakı avtoparkından başqa, Minskin Kirovsk küçəsi 13 ünvanındakı “Crowne Plaza” otelində də xidmət parkı var. Şirkət sürücüsüz və ya sürücülü olmaqla ümumilkdə icarəyə 32 avtomobil təqdim edir. (http://aznur.by/services/…)

Deputatın Belarusiya paytaxtındakı taksi xidməti ilə məşğul olan digər şirkəti AZNUR TAKSİ (Прыватнае ўнітарнае прадпрыемства па аказаннi паслуг “АЗНУР Таксі”) 2015-ci ilin sentyabrın 14-dən fəaliyyətə başlayıb, lakin ötən ilin martında bağlanması üçün rəsmi müraciət olunub.

Moskva və Kiyevdə də şirkətin avtomobillərin icarəsi xidməti göstərən filialları var.

Azərbaycanda AZNUR MMC ilə bağlı isə yazmağa lüzum yoxdur, zatən Binə aeroportundan tutmuş ölkənin bir sıra şəhərlərində Fətiyevin avtoparkları hər kəsə bəllidir.

Amma oliqarx deputat heç də təkcə avtomobil icarəsi, taksi xidməti və turizm sahəsində imperiya qurmayıb. Bakı şəhərində Nərimanov prospekti 205 ünvanındakı “Belaruski” supermarketi də deputata məxsusdur.

Buna qədər Xanlar Fətiyev Tiflisdə eyni ad altında 4 supermarketdən ibarət marketlər şəbəkəsi qurub.

1. Tbilisi, 10 I. Abashidze St.

2. Tbilisi, 34 Ts. Dadiani St, B. 5

3. Tbilisi, 4/2 Gulia Sq.

4. Tbilisi, Gldani, II M/D, 1 Pore Mosulishvili St.

Marketlər Fətiyevin Gürcüstandakı AZNURGEORGIA şirkəti tərəfindən idarə olunur.

AZNUR GEORGİA LLC 2016-cı il mayın 23-də Gürcüstanın Ədliyyə nazirliyində 404513941 saylı şəhadətnamə ilə qeydiyyatdan keçirilib. Qeydiyyat ünvanı Georgia, Tbilisi, Vake-Saburtalo, M.Kostava N 63/68 olaraq qeyd olunub. Şirkətin rəsmi təsisçisi Fətiyevin Azərbaycandakı AZNUR MMC (2002-ci ildən fəaliyyətdədir) şirkətidir.

Azərbaycandakı AZNUR TRADE MMC supermarketlər şəbəkəsi üçün təkcə ötən ilin yanvarında Belarusiyanın Poltava ət kombinatına (Тов Полтавський Мясокомбінат) 19950 kq ət məhsulları sifariş edib.

Bu da hamısı deyil, Fətiyev çox uzaq ölkələrin birində xüsusilə “məşhurdur”. Əməlli-başlı skandal yaradıb.

Bu barədə başqa bir vaxt…”

Göründüyü kimi “susmaq qızıldır” deyib danışmayan Fətiyev cəmi bir neçə il ərzində Avropanı fəth etməyi bacarıb. Bu gün yenidən parlamentə düşmək eşqinə düşən və bunun üçün himayədarlarından dəstək alan Fətiyev görəsən indi hansı qitəni fəth etmək eşqinə düşüb.

Artıq çoxlarına məlumdur ki, Fətiyev kimlərinsə razılığını almaqla işin yarısını həll edə bilib. Qaldı namizədliyi hakim partiya tərəfindən irəli sürüldüyü 98 saylı Bərdə – Tərtər seçki dairəsinin seçicilərinin insafına…

İndi 98 saylı Bərdə – Tərtər seçki dairəsinin seçicilərinin ona səs verəcəyi heç də inandırıcı görünmür.

Vətəninfo.az

Məlum olduğu kimi iqlim dəyişmələrinin qarşısının alınması sahəsində Azərbaycanın həyata keçirdiyi fəaliyyət beynəlxalq ictimaiyyət tərəfindən yüksək qiymətləndirilir. Məhz bu səbəbdən, iştirakçıların sayına və səviyyəsinə, müzakirəyə çıxarılan məsələlərin aktuallığına görə dünyada ən mötəbər tədbirlərdən biri hesab edilən Birləşmiş Millətlər Təşkilatının İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyası (COP29) dünya ölkələrinin yekdil qərarı ilə 2024-cü ildə Azərbaycanda keçiriləcəkdir.

COP29 konfransına ev sahibliyini Azərbaycan üçün 2024-cü ilin ən mühüm hadisəsi və ölkənin yaşıl iqtisadiyyata keçid strategiyasının məntiqi davamı kimi qiymətləndirmək olar. Bu missiyaya uyğun olaraq Azərbaycan Respublikasının Prezidenti İlham Əliyevin Sərəncamı ilə 2024-cü il Azərbaycanda “Yaşıl dünya naminə həmrəylik ili” elan edilib.

“Azərbaycan neft-qaz ölkəsi kimi bu sahədə də özünü göstərəcəkdir və dünyada hər kəs bir daha görəcək ki, bizim gündəliyimiz yaşıl enerji ilə bağlıdır. Yaşıl enerji növlərinin yaradılması və yaşıl enerjinin dünya bazarlarına nəqli hazırda bizim enerji siyasətimizin prioritetidir. Bu, reallıqdır və bütün dünya bunu bir daha görəcək”, – deyə Prezident İlham Əliyev ötən il dekabrın 15-də COP29-un ölkəmizdə keçirilməsi ilə əlaqədar müşavirədə vurğulayıb.

Aktualinfo.org bir müddət əvvəl respublikamızın hüdudlarından kənarda və respublika daxilində müasir texnika və texnologiyalardan istifadə edilməklə, ətraf mühitin mühafizəsi istiqamətində ekoloji yönümlü layihələr həyata keçirən “Ekol Mühəndislik Xidmətləri” Qapalı Səhmdar Cəmiyyətinin fəaliyyəti ilə bağlı məqalə yaymışdı.

Bir daha xatırladaq ki, “Ekol Mühəndislik Xidmətləri” QSC 2010-cu ildən başlayaraq paytaxtımızda “Bakı Ağ Şəhər” layihəsinin icrasına qoşulub. Bu nəhəng layihənin iştirakçısı olaraq QSC “Yaşıl ada” ərazisinin köhnəlmiş neft sənaye obyektlərindən neft şlamının çıxarılması, anbarlaşdırılması və ərazidəki neftlə çirklənmiş torpaqların təmizlənməsi işlərini yerinə yetirir. QSC ərazidə neftlə çirklənmiş torpağın çıxarılaraq poliqona daşınmasını, yerinə münbit torpaq doldurub yaşıllıqların salınmasını indi də təmin edir.

Qeyd edək ki, verilən məlumatlara görə sözügedən ərazilərdə neftlə çirklənmiş torpaqların təmizlənməsi işlərini “Ekol Mühəndislik Xidmətləri” QSC-nin sifarişləri əsasında müxtəlif şirkətlər həyata keçirir. Ötən il QSC-nin Ağ şəhərdə çirklənmiş torpaqların təmizlənməsini işlərini “EL-85” Məhdud Məsuliyyətli Cəmiyyəti udub. Qeyd edək ki, “Ekol Mühəndislik Xidmətləri” QSC sözügedən tenderi dövlət satınalmalarının vahid internet portalında keçirməyib.

Qeyd edək ki, MMC-nin fəaliyyət sferası barədə açıq mənbələrdə heç bir məlumat yoxdu. MMC-nin maddi texniki bazası, işçi qüvvəsi barədə də həmçinin. Yalnız Dövlət Vergi Xidmətinin hüquqi şəxslərin dövlət reyestrinə daxil edilmiş məlumatlarında “EL-85 Məhdud Məsuliyyətli Cəmiyyətinin 21.10.2022-ci il tarixdə Bakı şəhəri Lokal Gəlirlər Baş İdarəsində dövlət qeydiyyatına alındığı göstərilir. Reyestr məlumatlarında nizamnamə kapitalı 10 manat olan MMC-nin hüquqi ünvanının BAKI ŞƏHƏRİ XƏTAİ RAYONU, ƏHMƏDLİ ŞTQ, 2-Cİ ZEYTUN SOVXOZU , ev 143, m. 2, qanuni təmsilçisi kimi isə Qasımov Elqayıt Nurəddin oğlu qeyd olunub.

Redaksiyanın əldə etdiyi məlumata görə “EL-85” Məhdud Məsuliyyətli Cəmiyyəti Ağ şəhərdə çirklənmiş torpaqların təmizlənməsini işlərini heç də yüksək səviyyədə həyata keçirmir. Hazırda MMC-nin təmizləyərək üstünü torpaqla örtdüyü yerlərdən yenidən neft tullantıları çıxır ki, bu da məcburən dənizə axıdılır. Bu isə ərazidə çirklənmiş torpaqların yenidən təmizlənməsini tələb edir. Verilən məlumatlarda həmçinin bildirilir ki, “EL-85” MMC nin heç bir texnikası yoxdur. MMC ağır tonnajlı yük avtomobillərini icarəyə götürür ki, bu da artıq vəsaitin xərclənməsinə gətirib çıxarır. Bundan əlavə avtomobillər çox vaxt məqsədli şəkildə yükü az doldurur ki, bu da gün ərzində 5 reys əvəzinə 10 reys etməsinə gətirib çıxarır ki, buradan da əlavə pullar yazılır. Göründüyü kimi “Ekol Mühəndislik Xidmətləri” QSC ilə “EL-85” MMC-nin bu işbirliyinin arxasında külli miqdarda dövlət vəsaitlərinin təyinatından kənarlaşdırılması dayanır. Redaksiya bunlarla bağlı foto faktlar da təqdim etmişdi.
Redaksiyamıza yeni verilən fotofaktlarda isə “EL-85” Məhdud Məsuliyyətli Cəmiyyəti Ağ şəhərdə çirklənmiş torpaqların təmizlənməsini işlərini heç də yüksək səviyyədə həyata keçirmədiyini bir daha sübut edir. Belə olan təqdir də “Ekol Mühəndislik Xidmətləri” QSC-nin Pirallahı rayonunda 45 hektar neftlə çirklənmiş torpaqların təmizlənməsi işləri üzrə “EL-85” MMC ilə yenidən müqavilə bağlamaq istəyi başa düşülən deyil. Əgər bu MMC Ağ şəhərdə üzərinə düşən öhdəliyi layiqincə yerinə yetirə bilməyibsə belə böyük həcmili bir işi bir daha sözügedən şirkətə həvale etmək nə dərəcədə doğrudur?
Yazının başlanğıcında Azərbaycanın COP29 konfransına ev sahibliyi edəcəyini əbəs yerə vurğulamamışıq. İyulun 8-də Azərbaycan Respublikası Prezidentinin Administrasiyasının rəhbəri, Təşkilat Komitəsinin sədri Samir Nuriyev COP29-a hazırlıq prosesinin Prezident İlham Əliyevin daimi nəzarəti altında olduğunu qeyd edib. Samir Nuriyev Prezident İlham Əliyevin Liderlər Sammitinə dəvətinə cavab olaraq tədbirdə iştirak edəcək dövlət və hökumət başçılarının sayının artdığını bildirib. O, Sammitə böyük marağın ölkəmizə hörmətin, Azərbaycanın nəhəng beynəlxalq tədbirləri yüksək səviyyədə təşkil etmək qabiliyyətinə inamın və yaşıl keçidlə bağlı qəti siyasi iradəsinə etimadın göstəricisi olduğunu vurğulayıb.
Bakıda, Ağ şəhərdə, dəniz kənarında çəkilmiş bu fotolar “Ekol Mühəndislik Xidmətləri” QSC -nin sifarişi əsasında “EL-85” MMC-nin gördüyü işlərin nəticəsidir. Bu Sammitinə iştirak edəcək dövlət və hökumət başçılarında, mötəbər qonaqlarda nə kimi təəssüratlar yaradacaq, görəsən Azərbaycan Respublikası Dövlət Neft Şirkətinin rəhbərliyini heç düşündürürmü?
Aktualinfo.org
Məqaləyə dair fotomateriallar:

Azərbaycanda sentyabr ayının 1-də keçiriləcək parlament seçkilərinin təbliğat kampaniyasına rəsmən start verilməsə də, artıq bəzi icra hakimiyyətləri müəyyən namizədlərin xeyrinə görüşlər keçirir, müvafiq tapşırıqlar verirlər.

Xalqxeber.az xəbər verir ki, keçiriləcək parlament seçkiləri ilə bağlı qapalı görüş keçirən icra hakimiyyəti başçılarından biri də Naftalan şəhər icra hakimiyyətinin başçısı Vüqar Novruzov dur.

Vüqar Novruzov ötən gün İctimai Şura üzvləri ilə icra hakimiyyətində görüş keçirib.

Rəsmi xəbərlərində görüşün məqsədi ictimai şuranın fəaliyyəti ilə bağlı göstərilsə də, görüşün seçki fəallığının artırılması ilə bağlı əhali arasında təbliğatın aparılması və YAP tərəfindən namizədliyi irəli sürülmüş Bədəl Bədəlovun imza toplama kampaniyasına dəstək vermək olduğu bildirilir

Xatırladaq ki, Vüqar Novruzov 2019-cu ildən Naftalan şəhər icra hakimiyyətinin başçısı vəzifəsində çalışır.

Bu vəzifənin onun üçün tramplin olduğu deyilir.

Son günlər isə Vüqar Novruzovun paytaxtın mərkəzinə - Nəsimi rayonuna başçı təyin ediləcəyi barədə ölkə mediasında məlumatlar dərc olunmaqdadır.

Əmək və Əhalinin Sosial Müdafiəsi Nazirliyinin tabeliyində Əmək Bazarı və Sosial Müdafiə Məsələləri üzrə Milli Observatoriyada idarənin sürücüsü kimi işə başlayan Qarabağ müharibəsi veteranı, Şabran rayonu, Çölquşçu kəndində yaşayan Şərifov Elmar Vüqar oğlu şikayətçidir.
Tribunainfo.az-a şikayətini bildirən veteran məmur özbaşınalığı ilə üzləşdiyini açıqlayıb.
Elmar Şərifovun sözlərinə görə, 6 ildən artıq MAXE (Müddətdən artıq hərbi qulluqçu) kimi qüsursuz hərbi xidmət efib, Füzulinin, Cəbrayılın, Hadrutun və Şuşanın azad olunması uğrunda gedən döyüşlərdə iştirak edib.
O, xidmətdən tərxis olunduqdan sonra Əmək və Əhalinin Sosial Müdafiəsi Nazirliyinin tabeliyində Əmək Bazarı və Sosial Müdafiə Məsələləri üzrə Milli Observatoriyada idarənin sürücüsü kimi əmək fəaliyyətə başlayıb.
Şikayətçinin sözlərinə görə, işlə təmin olunmağına sevinsə də, bu sevinci uzun çəkməyib: “Açığı, müharibədə döyüşərkən, elə bilirdim ki, dövlətimizin və xalqımızın düşmənləri təkcə cəbhənin o tərəfində, önümüzdəki erməni separatçılarıdır. Lakin bu qurumda işə başladıqdan sonra anladım ki, xalqımızın əsl və ən məkrli düşmənləri elə arxa cəbhədə, mülki həyatda imiş. Belə ki, İdarənin əməkdaşlarını iş saatlarında xidməti zərurətlə bağlı DOST 5 və digər inzibati binalara aparıb-gətirmək üçün istifadəmə idarənin balansında olan Mersedes E class 90-AO-790 dövlət nömrə nişanlı avtomobil təhkim edilsə də, Milli Observatoriyanın (əslində antiMilli) İdarə Heyətinin üzvü Hasil Vasif oğlu Abbasov məni sözün həqiqi mənasında qul kimi işlətməyə, dövlətin avtomobilini və yanacağını, habelə məni şəxsi məqsədləri üçün istismar etməyə başladı. Belə ki, əmək müqaviləsinə əsasən iş vaxtım 18.30-da bitməli olduğu halda alkoqolik, yüngül və melanxolik həyat tərzi keçirən Hasil Abbasov demək olar ki, hər gün gecə saat 2-4 radələrində mənə zəng edir, içkili olduğunu, idarənin avtomobili ilə gəlib onu götürməli olduğumu deyir, mən də məcburiyyət qarşısında qalıb onu adətən barlardan, kafelərdən, restoranlardan götürməli olurdum. Bəzi hallarda isə idarənin avtomobilini özü ilə bara, kafeyə və s. apardığından, gecə saat 2-4 radələrində ictimai nəqliyyat işləmədiyindən öz vəsaitim hesabına taksi ilə onun olduğu “meyxanaya” gedib “şərab əhlini” evinə gətirməli olurdum. Gün ərzində demək olar ki, söhbət etməkdən, yutubda müxtəlif filmlərə baxmaqdan və siqaret çəkməkdən başqa heç bir iş görmədiyi halda əsassız olaraq 10 min manata yaxın maaş alan Hasil Abbasov ən azından cibindən çıxarıb heç taksi pulumu da ödəmirdi. Bəzi hallarda isə gecə saat 3-4-də restoranlarda yeyib-içib idarəyə məxsus avtomobilin açarlarını “parkovşik”ə verib, mənə zəng edib avtomobili Neftçilər ərazisindən götürməyi tapşırırdı. Beləcə gecəm gündüzə, gündüzüm gecəyə qarışmışdı. İdarəyə, dövlətə can yandırmaqdan ağız dolusu populistcəsinə danışan Hasil Abbasov dövlət idarəsinin sürücüsünü, dövlətin avtomobilini, yanacağını şəxsi məqsədləri üçün istismar edirdi”.
Müharibə veteranı bildirib ki, gecələrlə yanaşı, gündüzlər də Habil Abbasov istismarı davam etdirib: “Məni nəinki iş saatlarından sonra, iş saatlarında da müxtəlif şəxsi məqsədləri üçün (ailəsini hardansa götürmək, uşağı məktəbdən götürmək, ona aid nəyisə hardasan almaq və s.) istismar etməkdə idi. Bütün bunlarla kifayətlənməyən Habil Abbasov qeyri-iş günlərində, şənbə- bazar günləri də məni və dövlətin avtomobilini şəxsi məqsədləri üçün istismar edirdi. Həftə içi onu gecə saatlarında “meyxanalardan” götürməkdən yuxu rejimim və sağlamlığım o qədər pozulmuşdu ki, bir gün şənbə günü məhz onun tapşırığı ilə, yenə də onun şəxsi işlərini icra etmək üçün gedəndə 20 Yanvar dairəsi adlanan ərazidə yorğunluqdan qəza törətdim və H.Abbasovun tələbi ilə təxminən öz vəsaitim hesabına 400 manat xərc çəkərək avtomobili təmir etdirdim. Danışanda vicdandan pafoslu cümlələr quran H.Abbasov isə 1 qəpik də olsa mənə kömək etmədi və mən borc-xərc hesabına, maddi-məişət şəraitim (daha doğrusu şəraitsizliyimin) acınacaqlı olmasına və kirayədə yaşamağıma baxmayaraq avtomobili özüm təmir etdirməli oldum. Təbii ki, bütün bunları Habil Abbasov Milli Observatoriyanın İdarə Heyətinin sədri Səfərli Elnur Novruz oğlunun və onun himayəçisi Nazirliyin Strateji planlaşdırma şöbəsinin müdir müavini Rəşad Zalovun, həmçinin həmin şöbənin müdiri Əliyev Sadiq Cabir oğlunun himayəsi ilə edirdi. Çünki, idarənin digər sürücüsü də idarənin işlərindən daha çox Rəşad Zalovun uşağını məktəbə aparıb gətirməklə məşğul idi. Hətta bir dəfə avtomobillə DOST-5 ə idarənin işi üçün xidməti zərurətlə bağlı qurumun əməkdaşlarını aparanda, H.Abbasov məni buna görə danlamışdı.
Cidanı çuvalda gizlətmək mümkün olmadığı kimi, H.Abbasovun da bu əməllərinin bir gün aşkar olacağını, bu zaman mənim də başımın ağraya biləcəyini ona bildirdikdə mənə əminliklə demişdi ki, “Narahat olma, burada bu məsələni bilib səsini çıxara biləsi 3-4 nəfər var – Faiq Musayev (Keyfiyyətə nəzarət), Kamran Rəhimov (İqtisadiyyat şöbəsinin müdiri), Qaya Əliyev (Hüquq və daxili nəzarət departamentinin müdiri) və b. Onları da burdan hərəsini bir cür vedrə qoşub uzaqlaşdıracağıq, sən sadəcə onlarla ünsiyyətdə olma, onlardan uzaq ol”, – deyirdi. Bütün bu baş verənlərin meydana çıxmaması, ört-basdır olunması, “isti izlərin itirilməsi” üçün Hasil Abbasovun təşəbbüsü ilə Elnur Səfərli mənim əmək müqaviləmə müdddətinin başa çatması əsası ilə xitam verdi.
Hazırda aylardır ki, işsiz, qazancsız, himayə etməli olduğum valideynimin himayəsində çıxılmaz vəziyyətdə yaşamaqdayam. Məruz qaldığım bu istismar, haqsızlıq və qanunsuzluqlar nəticəsində həyata, yaşamağa bütün ümidlərimi itirdim. Başa düşdüm ki, bu uğrunda canımı, qanımı fəda etməyə hazır olduğum, dəfələrlə uğrunda ön cəbhədə ölümlə üz-üzə gəldiyim bu vətən sən demə bizim yox, Hasil Abbasov, Elnur Səfərli kimilərin imiş, onlar bu vətəndə ağa, biz isə kölə imişik.
Başa düşürəm ki, vətən qarşısında 1 illik icbari hərbi xidmətini belə etməkdən yayınmış, “dezertir” Elnur Səfərli hardan biləcəkdi oddan-alovdan keçmiş, həyatını təhlükəyə atmış bir vətən fədaisinin, müharibə veteranının dəyərini?
Görün bir məmurun qudurğanlığına, harınlığına və acgözlüyünə baxın ki, aylarla işçini, özü də müharibə veteranını onun maddi vəziyyətinin ağır olmasından və işə möhtac olmasından sui-istifadə edib aylarla gec-gündüz şəxsi keyfin, zövqün və əyyaş həyat tərzin üçün istifadə edəsən, bununla yanaşı dövlətin avtomobilini, dövlət büdcəsinin vəsaiti hesabına alınan yanacağı bu məqsədlə istismar edəsən və bütün bunlar ifşa olunarkən özünü sudan quru çıxarmaq üçün bir vətəndaşın çörəyinə, iş yerinə bais olasan”.
“Biz döyüş anında, cənab Prezidentimiz İlham Əliyevin dediyi kimi “həqiqət anında” vətəni, dövləti canımızla, qanımızla xarici düşmənlərdən qoruduq, sinəmizi sipər etdik, indi növbə dövlətimizindir, ümid edirəm ki, dövlətimiz bizi belə daxili düşmənlərdən qoruyacaq. Ümid edirəm ki, uğrunda canımızı fəda etdiyimiz bu dövlət bizi haqsızlıq, ədalətsizlik, harın məmur özbaşınalığı, yoxsulluq, işsizlik qarşısında aciz buraxmayacaq”.

Yadınızdadırsa, bir müddət əvvəl Naxçıvan MR Baş naziri Ceyhun Cəlilov barədə “dosya” yayımlamışdıq. Həmin “dosya”da iddia olunurdu ki, FETÖ qruplaşmasının üzvü olan bu Ceyhun Cəlilovun “pulyuyanı” Əli Bayramov adlı bir şəxsdir.

“Nazirliyin keçirdiyi tenderlərə qeyri-rəsmi olaraq Xəyal Talıbov nəzarət edir. Əli Bayramov Bakı şəhərində “nağdlaşdırma” işlərinə baxır. Tenderlərdə öz şirkətlərinə köçürülmüş pullar Əli tərəfindən nağdlaşdırılaraq C.Cəlilova qaytarılır”, – redaksiyamıza etibarlı mənbələrdən daxil olan məlumatda bildirilirdi.

“Dosya” Ovqat.com-da yayımlandıqdan sonra gözləyirdik ki, müvafiq dairələr bu iddianı ciddi şəkildə araşdıracaq və məlumatların nə qədər səhih olub-olmadığı barədə rəsmi açıqlama verəcək. Nə yazıq ki, bu gözləntimiz özünü doğrultmadı. İndiyədək “dosya”da adı keçən şəxslərlə bağlı hər hansı tədbirin görülməsi haqqında məlumata malik deyilik.

Naxçıvan hökumətinin “pulyuyanı”nın qələmini kim qırdı?

Bununla belə, Ovqat.com-un əldə etdiyi bəzi informasiyalar Azərbaycan hakimiyyətinin bu iddialara heç də laqeyd qalmadığını göstərir.

Bildirildiyinə görə, yazı yayımlandıqdan dərhal sonra hüquq-mühafizə orqanları hərəkətə keçib və qəhrəmanlarımızdan saxlayıb. İddialara görə, istintaqa ilk cəlb olunan da elə Naxçıvan MR Baş naziri Ceyhun Cəlilovun “pulyuyanı” Əli Bayramov olub. Onun Baş Prokurorluq yanında Korrupsiyaya qarşı Mübarizə Baş İdarəsi tərəfindən göz altına alındığı bildirilir.

“Hazırda göz altında tutulan FETÖ “pulyuyan”ının işi Baş Prokurorluqdadır. Araşdırma zamanı məlum olub ki, Əli Bayramovun mexanizmi ilə ölkə büdcəsinə astronomik sayılacaq məbləğdə (mənbəmiz konkret rəqəm açıqlasa da, biz bu barədə Prokurorluq orqanlarının rəsmi məlumatlarını gözləməyə qərar verdik – Ovqat.com) ziyan dəyib. Bu barədə ölkə başçısına kimi məruzə edilib. Ölkə başçısının iddialara reaksiyası isə çox sərt olub”, – mənbəmiz belə deyir.

İddialara inansaq, Əli Bayramov əvvəllər də bir neçə dəfə Baş Prokurorluğun Korrupsiyaya qarşı Mübarizə İdarəsi tərəfindən həbs olunub. Lakin Azərbaycansayağı məlum səbəblərdən azadlığa buraxılıb. “İndi onun rüşvətlə azadlığını satın aldığı şəxslərdən bir neçəsi işdən qovulub. Ceyhun Cəlilovun tenderlər üzrə “məsul” şəxsi Xəyal Talıbov isə həmin iş üzrə axtarışdadır”, – məlumatda qeyd olunur.

Kimdir əsl “pulyuyan” – Ceyhun Cəlilov, yoxsa Əli Bayramlı?

Maraqlıdır ki, rəsmi vəzifə daşıyan Ceyhun Cəlilovun əslində FETÖ “pulyuyan”ı Əli Bayramova xidmət etdiyinə bildirilir. İddiaya görə, Ceyhun Cəlilov 2018-ci ildən Əli Bayramovun qeyri-rəsmi maliyyə işlərini görür, ona maliyyə müşavirliyi edir. “Hazırda Ceyhun Cəlilovun istifadə etdiyi 90-CC-345 dövlət qeydiyyat nişanlı Toyota Land Cruzer markalı avtomobili belə, Əli Bayramov hədiyyə edib. Təbii ki, Naxçıvanın Baş naziri yaxşı xidmətinə görə mükafatlandırılıb”, – məlumatda iddia olunur.

Hazırda Əli Bayramovun Kürdəxanıdakı İstintaq təcridxanasında “istirahət etdiyi”, Ceyhun Cəlilovun isə müxtəlif kanallar vasitəsilə Əli Bayramovun işinə kömək etməyə çalışdığı vurğulanır. Mənbəmiz Ceyhun Cəlilovun Əli Bayramlının həbsindən niyə bu qədər narahat olduğunu isə belə izah edib: “Çünki Əli Bayramovun təsisçisi olduğu şirkətlər Ceyhun Cəlilovun əsas tender qalibləridir. Əlbəttə ki, Əli Bayramlı istintaq zamanı bülbül kimi ötməyə başlasa, Ceyhun Cəlilovun da başı ağrıyacaq”.

Ceyhun Cəlilova son tapşırıq FETÖ-nün Ərzurumdakı imamından gəlib

İddiaya görə, Ceyhun Cəlilov Baş nazir olduqdan sonra da Əli Bayramovla görüşüb və onu Naxçıvan MR-in yeni rəhbərliyi ilə də görüşdürüb: “Hüquq mühafizə orqanları Ceyhun Cəlilov və Əli Bayramov əlaqəsini daha dərindən araşdırsa, tamam başqa mətləblər də ortaya çıxacaq. Adi bir faktı nəzərinizə çatdırım ki, Ceyhun Cəlilov Əli Bayramovun qaynatasının adına olan “Value Collection” şirkətinə rəhbərlik edib. Hər iki məsləkdaşın digər maraqlı əlaqələri barədə daha ciddi məlumatları sizə yaxın günlərdə verəcəyəm”.

Mənbəmiz onu da vurğulayıb ki, Naxçıvanın Baş naziri barədə ifşaedici yazımız dərc olunduqdan sonra Ceyhun Cəlilov “FETÖ” üzvləri ilə əlaqənin hələlik dondurulması barədə tapşırıq alıb: “Tapşırıq FETÖ-nün Ərzurumdakı imamı tərəfindən verilib. FETÖ isə Azərbaycandakı olan gizli üzvləri vasitəsilə trol ordusu yaradıb sizi nüfüzdan salmağa çalışır. Ətraflarına sizin qeyri-peşəkarlığınız barədə məlumat ötürür. FETÖ ilə əlaqəsinin üzə çıxması Ceyhun Cəlilovu çox narahat edir. Bu məsələ də dərindən araşdırmalıdır”.

Ceyhun Cəlilovun gözü Fuad Nəcəflinin kreslosundadır

Mənbəmiz onu da bildirib ki, bizim Fuad Nəcəflinin fəaliyyətinə daha çox diqqət ayırmağımız Ceyhun Cəlilovu xeyli sevindirib. O, hətta yaxın ətrafına deyib ki, “qoyun başı “canişin”ə qarışsın”. Bizim səlahiyyətli nümayəndəyə daha çox diqqət ayırmağımızın Ceyhun Cəlilovu sevindirməsinin bir başqa səbəbi də var imiş. Sən demə, o, özünü Naxçıvana yeni səlahiyyətli nümayəndə kimi hazırlayırmış. Fuad Nəcəflinin ifşa olunması bu baxımdan da Baş nazirin işinə yarayırmış.

Tavan tavan içində, köhnə hamam içində

“Naxçıvanda tikilməsi nəzərdə tutulan obyektlərin tenderləri yalnız özünə yaxın ilə əlaqəli şəxslərə verilir. Ceyhun Cəlilov bütün nazirliklər və komitələrdən “Dövlət satınalmaları haqqında” qanunu kobud şəkildə pozaraq ehtimal qiymətlərinin ona verilməsini tələb edir. Bu da “Dövlət satınalmaları haqqında” qanunun kobud şəkildə pozulması deməkdir. Ehtimal qiymətlərin alınmasında məqsəd isə tenderləri yaxın adamlarına ötürmək qiymətləri əvvəlcədən bilərək gəlir əldə etməkdir. Ceyhun Cəlilov “qara kassa” adlanır”, – deyən mənbəmizin iddiasına görə, Naxçıvanın Baş naziri digər nazirləri, komitə sədrlərini, rəhbər şəxsləri “tavana” qoyub”, – deyən mənbəmiz bu barədə konkret iddialar da səsləndirib. İddiaları təsdiqləyən sənədlər olmadığından onları da hələlik yayımlamırıq.

Baş nazir həm də Ali Məclisin sədrinə qarşı

Digər bir iddiaya görə, Naxçıvan Baş naziri ilə Ali Məclisin sədri Anar İbrahimov arasında müəyyən məsələlərdə qarşıdurmalar yaşayır: “Bakıdakı əlaqələri vasitəsilə hakimyyət yüksək eşalonuna Anar İbrahimovu səriştəsiz insan kimi təqdim edir. Əvvəl maliyyə naziri Həsən Seyidovla düşmən kimi idilər. Sonradan Həsən İsmayılov Ceyhun Cəlilovun diqtəsini qədul etdikdən sonra nazir təyinatı təsdiqləndi”.

Naxçıvandakı “Dost” mərkəzinə yeni kadr seçimi başlayıb

Xatırlayırsınızsa, bundan əvvəl yayımladığımız “dosya”da adı keçənlərdən biri də Hikmət İsmayılov idi. Məlumatdda bildirilirdi ki, Ceyhun Cəlilov əvvəllər Naxçıvan Dövlət Sosial Müdafiə Fondunda işləyən, sonra isə korrupsiya əməllərinə görə Əmək Məcəlləsinin 70-ci maddəsinin “Ç” bəndinə (işçi özünün əmək funksiyasını və ya əmək müqaviləsi üzrə öhdəliklərini yerinə yetirmədikdə, yaxud bu Məcəllənin 72-ci maddəsində sadalanan hallarda əmək vəzifələrini kobud şəkildə pozduqda) uyğun olaraq işdən azad olunmuş, barəsində DTX və Prokurorluqda cinayət işləri olan İsmayılov Hikmət Nəsir oğlunun vasitəsilə Nazirlikdə və ona tabe qurumlarda bir neçə savadlı kadrı işdən uzaqlaşdırmış, bəzilərindən isə pul alaraq yüksək vəzifəyə təyin etmişdir. Ceyhun Cəlilov nazir təyin olunduqdan sonra vəzifə səlahiyyətlərindən istifadə edərək Hikmət İsmayılovun üzərində olan cinayət işlərinə xitam verdirmiş, əmək kitabçasında 70Ç bəndini götüzdürmüş, daha sonra ondan yüksək məbləğdə pul alaraq Bakıda DOST mərkəzlərinin birində şöbə müdiri vəzifəsinə düzəltmişdir”.

Mənbəmiz Hikmət İsmayılovun kimliyinə aydınlıq gətirərək bildirib ki, o, Ceyhun Cəlilovun sinif yoldaşıdır: “Qaynatası Naxçıvanın məhsur iş adamlarından biri olan Razimdir. Hikmət İsmayılov hələ DSMF-də şöbə müdiri işlədiyi vaxt qeyri-rəsmi olaraq DSMF-ni Razim idarə edirdi. Keçmiş sədr Rasim Bağırovla aralarında yaranmış konfliktə görə R.Bağırov tərəfindən aidiyyatı qurumlara şikayət olunmuşdur. Hikmət İsmayılov Ceyhun Cəlilov Naxçıvan ƏƏSMN-ə nazir təyin olunduqdan sonra ilk öncə onun üzərindəki 70Ç maddəsini götüzdürmüş (mənbəmiz bunun nəyin müqabilində edildiyini də bildirib. Amma Amerikanın Azərbaycandakı səfiri demişkən, ölkəmizdə rüşvət alınarkən bunu təsdiqləyən çek verilmədiyini nəzərə alıb səsləndirilən məbləği açıqlamırıq), ardınca isə DOST Agentliyində şöbə müdiri vəzifəsinə təyin olunmuşdur. İndi Ceyhun Cəlilov həmin Hikməti Naxçıvanda açılması nəzərdə tutulan DOST mərkəzinə direktor təyin etmək istəyir. Hikmət İsmayılov da verdiyi pulu çıxarmaq üçün indidən Naxçıvanda kadr axtarışına başlayıb”.

Ceyhun Cəlilovun Ərdoğan “sevgisi”

Mənbəmiz onu da iddia edir ki, Ceyhun Cəlilov Türkiyənin hazırkı rəhbərliyinə qarşı da aqressiv münasibətdədir: “Səbəbini geniş izah etməyə, məncə, ehtiyac yoxdur – əlbəttə ki, Ərdoğan iqtidarının FETÖ-yə qarşı kəskin mövqeyi”.

ovqat.com