"Azərsu" Açıq Səhmdar Cəmiyyəti "Bakı şəhəri üzrə su təchizatı və kanalizasiya sisteminin bir hissəsinin yenidən qurulması işlərinin satın alınması" lotu üzrə sifarişçi olduğu satınalmaya yekun vurub.

Qlobal.az xəbər verir ki, "Azərsu" ASC-nin avqust ayının 5-də yekun vurduğu satınalmanın məbləği 5.115.050 manat, qalibi isə "Arko Təmir Tikinti Şirkəti" Məhdud Məsuliyyətli Cəmiyyəti olub.

"Arko Təmir Tikinti Şirkəti" 2011-ci ilin aprel ayında təsis edilib.

Şirkətin nizamnamə kapitalı 10 manat, qanuni təmsilçisi isə Əhmədov Rasim Qazməmməd oğludur.

"Arko Təmir Tikinti Şirkəti" MMC-nin fəaliyyət profili, maddi texniki bazası barədə açıq internet resurslarında məlumat yoxdur.

Qlobal.az-ın əldə etdiyi məlumata görə "Arko Təmir Tikinti Şirkəti" MMC-nin qanuni təmsilçisi Rasim Əhmədov Milli Məclisin deputatı Vahid Əhmədovun qardaşıdır.

Vahid Əhmədov Azərbaycan-Küveyt parlamentlərarası əlaqələr üzrə işçi qrupunun rəhbəridir. O, 1992-1994-cü illərdə Baş nazirin müavini, Baş nazirin birinci müavini vəzifələrində çalışıb.

Xatırladaq ki, Prezident İlham Əliyev ötən ilin sentyabr ayının 14-də Şəmkir və Cəlilabad rayon icra Hakimiyyətlərinin başçılarını qəbul edərkən çıxışında bəzi vəzifəli şəxslərin tenderdə yol verdikləri korrupsiya faktına toxunaraq dövlət xətti ilə aparılan layihələrin, dövlət alışlarının icrası ilə əlaqədar tenderlərdə vəzifəli şəxslərə yaxın olan şirkətlərin qalib gəldiyini bildirirdi.

Sosial.gov.az hökumət portalı çat verir
1997-ci ilin avqustun 2 – dək Qarabağ savaşı ilə bağlı əlilliyi müəyyən edilmiş şəxslərə sosial sığorta ödəmələrinin verilməsinə başlanılması ilə qaranlıq məqamların üzə çıxması da qeydə alınıb. Ən başlıca qaranlıq , 30 ilə yaxındır müharibə əlili kimi pensiya alanların heç də hamısının 30 ildir həsrətində olduqları “qanpulu”nu ala bilmədiyi barədədir. Amma ödənişlərin verilməsi tapşırılan ƏƏSMN yetkililəri indiyədək bildirirdi ki, heç bir sənədə , müraciətə ehtiyac yoxdur, bütün müharibə əlillərinin adı nazirlikdə var. İndi isə məlum olur ki, hamının adı, sənədi reyestrə salınmayıb, e-sistemdə yoxdur. Bu necə ola bilər? Bəs bu əlillərə necə pensiya, müavinət, Prezident təqaüdü ödənilir? Belə çıxır, Qarabağ müharibəsi əlillərinin xəsarət almaları haqqında sənədləri, əlillik dərəcəsinin təyin edilməsi haqqında arayışlar e-sistemdə yoxdur və ya bu sistemə salınmayıb? Ha fikirləşirsən, bu dolaşıqlığa cavab tapa bilmirsən. Axı bu sənədlərsiz heç kəs dövlətdən 30 ildir pensiya, müavinət, təqaüd ala bilməz! Tutaq ki, yaralanma haqqında arayışın verilməsini uyğun hərbi qurum təmin edir, bəs axı əlillik barədə arayışı elə ƏƏSMN özü verir! Və ƏƏSMN hərbi qurumdan uyğun tibbi şəhadətnamə almayınca nə əlillik təyin edir, nə də onun müharibə ilə bağlı səbəbini!
Ortalıq minə yaxın Qarabağ əlilinə proaktiv qaydada birdəfəlik ödəmənin verilməməsi və onlardan aidiyyatı qurumlardan e-sistemdə olmayan sənədləri alıb sistemdə elektronlaşdırmalarının tələb edilməsi sosial.gov.az elektron hökumət portalının çat verdiyini deməyə əsas verir. Onu da vurğulayaq ki, sözügedən portalın idarəediciləri elə ƏƏSMN-in məsul şəxsləridir. Niyə əlillər barəsində bilgiləri sistemdən gizlədiblər, niyə sistemə düzgün bilgiləri yerləşdirmirlər?
Birinci Qarabağ savaşının birdəfəlik ödəmə ala bilməyən əlilləri ƏƏSMN-ə hansı qurumdan, hansı sənədi təqdim etməlidirlər ki, hökumətin 30 ildir yediyi sığorta haqqını, eldə deyildiyi kimi, qanpulunu ala bilsinlər? Onu da vurğulayaq ki, sonradan dünyasını dəyişən müharibə əlillərinin varislərinə ödənişin verilməsində də problemlər yetərincədir. Onlardan istənilən sənədlər də elə ƏƏSMN-in reyestrində olmalıdır. Ən azı, ona görə ki, qanunvericiliyə əsasən, müharibə əlili dünyasını dəyişəndə ailəsi şəhid statusu əldə edir və onlara 11 min manat məbləğində ödəniş verilməsini qanun doğrulayır.
İstənilən halda qanpulunu ala bilməyənlərə, yəni adı e-sistemdə olmayanlara da imtinanın əsaslarını göstərən sms-bildiriş göndərilməlidir. Axı müharibə əlillərinin birdəfəlik ödəmələrin verilməsindən imtinadan məhkəməyə müraciət etmək hüququ var! Əlbəttə, məhkəmə olsa ..
Məğrur Bədəlsoy

Məlumdur ki, bir müddət əvvəl Dövlət Gömrük Komitəsinin bir neçə yüksək rütbəli məmuru həbs edildi.
Onlardan biri də “Azərterminalkompleks” Birliyinin direktoru vəzifəsində işləyən Ehtiram Xəlilov idi.
Bizim Ehtirama, yaxud başqa birisinə haqq qazandırmaq fikrimiz yoxdur. Əksinə onlar qanun qarşısında ən sərt formada cavab verməlidirlər. Amma...
Əmması odur ki, həmin “Azərterminalkompleks” Birliyini əslində DGK sədri Səfər Mehdiyevin qaynı Zeynal Tarquliyev idarə edirdi.
Təsəvvür edirsiniz, Zeynal Tarquliyev dəyəri 5-10 qəpik olan kağız parçasını, yəni rəngli vərəqləri gömrük bəyannamələri adı altında iş adamlarına 210 manata satırdı. Kimsə inadkarlıq edib qəbz tələb edəndə 18 manatın qəbzi verilirdi. Yəni iş adamı 210 manat ödəyib əvəzində 18 manatlıq qəbz alırdı və (210 - 18 = ) 192 manat(lar) Səfər Mehdiyevin cibinə gedirdi.
Və onu da nəzərə alın ki, Milli Məclis Gömrük Məcəlləsi qəbul edib və orada yazılıb: ”Bəyannamə elektron, yaxud da kagız üzərində verilə bilər”.
Səfər Mehdiyevin qaynı Tarquliyev isə deyirdi, nə Milli Məclis, nə Nazirlər Kabineti, mən heç birini tanımıram, mənim rəhbərim Səfər Mehdiyevdir.
Bəli, adi kağız parçasını 210 manata satmaq. Belə kağız parçaları 10 min, 100 min dəfə satılıb.
Biz bu məsələnin üzərində geniş dayanmaq istəmirik.
Əgər istintaq orqanları bu məsələni ciddi araşdırmaq istəsə, əlimizdə olan peşəkar mütəxəssis təhlillərini onlara təqdim edə bilərik.
Bütün bunlar azmış kimi, Səfər Mehdiyev uzun illər qara metal biznesində yüz milyonlar qazanıb, büdəcəyə isə sağalmaz yaralar vurub.
Belə ki, Azərbaycandan xaricə xammal şəkilində metal ixrac edəndə malın kodu dəyişdirilərək hazır məhsul kimi göstərilib. Və Səfər Mehdiyev yenə yüz milyonlara sahib olub. Yenə lazım gələrsə konkret materialları təqdim edə bilərik.
Belə faktlar yüzlərlədir.
Məsələn, iş adamları bilir ki, gömrükdə tərəzi pulu deyilən məsələ var. Təkcə tərəzidən Səfər Mehdiyevin qohumu olan şəxs milyonlar qazanıb.
Bunu uzadıb oxucunu yormaq fikrimiz yoxdur.
Amma Səfər Mehdiyev səsini başına ataraq deyirdi ki, gömrükdə rüşvət və inhisar olsa, istefa verəcəm.
Biz isə Səfər Mehdiyevə deyirk ki, sənin barəndə yazdığımız yazılardan 1 gün sonra sənə dəstək verən bəzi saytlarda tərbiyəsiz açıqlamalar verirdin, bizə hədə-qorxu gəlirdin.
“Gömrükdə rüşvət və inhisarçılıq olarsa, istefa verəcəm” deyən Dövlət Gömrük Komitəsinin sədri Səfər Mehdyev uzun illər qurumda rüşvət-korrupsiya-monopoliya sisteminin baş “prorab”ı olub. Bu gün isə gömrük sistemində korrupsiyanın-inhisarçılğın və tayfabazlığın-traybolizmin baş memarıdır.
Şübhəniz varsa, buyurun baxın:
1.Qaynı Tarquluyev İlham. DGK-da tikintilərə nəzarət edir. Saxta tenderləri “udur”.
2. Qaynı İlham Tarquliyevin kürəkəni Kamran. ER və DNBGİ-də baş inspektordur. Bütün “pullu işlərə” ancaq o baxır.
3.Köməkcisi Rəşad. Yaxın qohumudur.
4. Uşaqlıq dostu və qohumu Rəsulov Məsum. Dövlət Gömrük Komitəsinin Qacaqmalcılıq və Gömrük qaydalarının Pozulması ilə mübarizə Baş idarəsinin rəisidir. İki ilə general rütbəsi alıb. Səfər Mehdiyevdən sonra əsas söz sahibidir.
5. Qaynı Tarquluyev Zeynal. “Azterminalkompleks” İstehsalat Birliyinin rəis müavinidir. “Qara kassa”ya o nəzarət edir. Gömrük İdarələri ətrafında ofislər açaraq, “lojistik xidmətlər” göstərir. Gömrükdə hər kəs həmin “xidmətə” yönəldilir.
6. Qardaşı oğlu Məhəmməd. Avtonəqliyyat və Aksizli Mallar Baş Gömrük İdarəsində İnzibati idarəetmə şöbəsinin rəisidir.
7. Bacısı oğlu Fərman. Dövlət Gömrük Komitəsində Audit və Təhlil Baş İdarəsində Baş inspektordur. Bakı Baş Gömrük İdarəsində “Broker xidməti” acıb. İş adamlarına sövdələşmələrlə “güzəştlı” xidmət göstərir.
8. Bacısı oğlu Əli. Avtonəqliyyat və Aksizli Mallar Baş Gömrük İdarəsində Baş inspektor.
9. Bacısı oğlu Məhərrəm. Bakı Baş Gömrük İdarəsində Baş inspektor işləyir.
10. Qardaşının kürəkəni Sənan. Avtonəqliyyat və Aksizli Mallar Baş Gömrük İdarəsində Qiymətləndirmə şöbəsinin rəisidir. Respublikaya idxal edilən bütün avtomobillərə ağlına gələn qiyməti o yazdırır.
11. Baldızı oğlu Rəfail Niftəliyev. Enerji Resursları və Dəniz Nəqliyyatı Baş Gömrük İdarəsində idarə rəisidir.
12. Bacısının kürəkəni Sahib. Dövlət Gömrük Komitəsində Audit Təhlil Baş İdarəsində böyük inspektordur.
13. Bacısının kürəkəninin qardaşı Zaman. Dövlət Gömrük Komitəsinin Xocahəsən G/P inspektorudur.
14. Bacısı oğlu Rövşən. Rəsmən Dövlət Gömrük Komitəsində İşləyir. Hec vaxt işə gəlmir. Kənarda bizneslə məşguldur.
15. Bacısının kürəkəni Vilayət. Dövlət Gömrük Komitəsində baş inspektordur.
16. Bacanağı Həsən. Dövlət Gömrük Komitəsinin Hospitalında işləyir.
17. Dostu Elman. Dövlət Gömrük Komitəsinin Hospitalında Baş həkimdir. Onun qardaşı Fərman gömrük zabiti olduğu halda, saxta dərman idxalına görə DTK tərəfindən həbs edilib.
18. Bacanağı Eldar. Dövlət Gömrük Komitəsinin Tikinti İdarəsinin rəis müavinidir. Tikintidə “qara kassa”ya o nəzarət edir.
19. Bacanağı İlham. Dövlət Gömrük Komitəsinin Tikinti İdarəsində işləyir.
20. Qardaşının kürəkəni Arif. 51 yaşında komitədə işə düzəlib. “Gömrük Orqanlarında Xidmət Haqqinda” Əsasnamənin ziddinə olaraq, onu 51 yaşında işə götürüblər…
Siyahını davam etdirməyə ehtiyac görmürük. İndi isə onu qeyd edək ki, son məlumatlara görə, Səfər Mehdiyevin gömrük sistemində qazandığı pulların miqdarı MİLYARD-larla ölçülür. Səfər Mehdiyevin oğurladığı pulun miqdarı 40 000 000 000 (qırx milyard). Təsəvvür edin dövlət büdcəsi və Səfər Mehdiyevin oğurluğu.
Və bütün bu pulların mənbəyi bəlli olub.
Yeri gəlmişkən, onu da qeyd edək ki, Səfər Mehdiyev müxtəli məmurların, prokurorların, polis rəislərinin övladlarını gömrük sisteminə işə qəbul edərək, əvəzində rayonlarda böyük torpaq sahəsinə, obyektlərə, mülklərə, hətta örüş sahələrinə sahib olub.
Bütün bunlar hamısı yaxın zamanda müsadirə olunacaq.
Səfər Mehdiyev, bu yaxınlarda yaxın qohumunu səhiyyə sistemində işə düzəltmək istəmisən. Sənə deyiblər ki, limiitin bitib, Kürdəxanıda səni yükləyəcəklər.
P.S. Səfər Mehdiyev, yaxın dostun və qohumun Vüqar Səfərlinin oğluna gömrükdə elə bir meydan vermişdin ki, hər tərəfi sulayırdı. İndi deyəsən, görünmür, hara oldu? Amma sənə söz veririk ən yaxın dostun olan Əli Həsənovla səni damlamayınca yazıları dayandıran deyilik. Siz çox "qanlar" tökmüsünüz, bunların hamısının cavabını dövlət qurumları sizdən soracaq.
gundelik baki.com

“Azerlotereya” Açıq Səhmdar Cəmiyyətinin (ASC) rəhbərliyində baş verən dəyişiklilərdən sonra, müəyyən şəxslər bu sahəni tamamilə öz monopoliyalarına almağa çalışırlar. Bu haqda DİA.AZ-a məlumat verən mənbənin sözlərinə görə, hazırda ölkə üzrə lotoreya biletlərinin satışında əsas söz sahiblərindən biri “Caspian Ticket”in rəhbəri Cahangir Fərəcullayevdir.

İddia olunur ki, İqtisadiyyat naziri Mikayıl Cabbarovun yaxın dostu və onun kadrı kimi tanınan C.Fərəcullayev qeyri-rəsmi olaraq “Azerlotereya”ya nəzarət etməyə və bu sahəni tamamilə öz inhisarına almağa çalışır. O, ilk növbədə bütün keçmiş işçiləri, hətta sıradan satıcıları belə, sözügedən biznes şəbəkəsindən uzaqlaşdırmaq üçün bütün yollara əl atır. Cahangir Fərəcullayev öz niyyətinə çatmaq üçün hətta bir müddət zərərlə işləməyi də gözə alıb.

Mötəbər qaynaqlardan əldə etdiyimiz məlumata əsəsən, C.Fərəcullayevin göstərişi ilə bölgələrdə lotoreya biletləri xüsusi şəxslər tərəfindən topdansatış qiymətindən də aşağı satılır. Məsələn, Gəncədə topdansatış qiyməti 95 qəpik olan biletlərin maşınlarla 90 qəpikdən satıldığı haqda məlumatlar var. Beləliklə də, Cahangir Fərəcullayev köhnə satıcıları tamamilə sıradan çıxarmağa və öz istəyinə çatmağa çalışır.


Bu heç də hamısı deyil. DİA.AZ-a danışan mənbə olduqca ilginc faktları açıqlayıb. Bu faktlarda isə 2021-ci ildə “Azərlotereya”nı idarəetməyə götürən Türkiyənin “Demirören Holding” şirkəti ilə bağlı ilginc məqamlar açıqlanıb. Bu barədə daha geniş materialımız hazırlanır. Bizi izləməkdə davam edin. Daha dəhşətli faktlarla tanış olacaqsınız...

İddia olunanlarla bağlı dia.az olaraq bütün maraqlı tərəfləri dinləməyə hazırıq...

Bir neçə gün əvvəl Azərbaycan Respublikasının Dövlət Reklam Agentliyinin və qurumun Bakı Şəhər Reklam İdarəsinin yarıtmaz fəaliyyəti və özünə yaxın sahibkarları himayə etməsi barədə yazı dərc etmişdik. Yazıda Səbail rayonu, Bibiheybət qəsəbəsi, N.Quliyev küçəsində yerləşən “Şəfa” balıq evinə agentlik tərəfindən xüsusi imtiyazlar tanınması və bu sahibkarlıq subyektinin qonşuluğundakı “Şəfalı su” artroloji mərkəzinin hüqularının tapdanmasından söhbət gedirdi.

Xatırladaq ki, hər iki obyektin bir ortaq girişi var. 8 ildir “Şəfa” balıq evi özünün böyük ölçülü reklam lövhəsini şərikli yolun üzərinə vurub və qarşı tərəfin - “Şəfalı su” artroloji mərkəzin rəsmi etirazlarına, çoxsaylı müraciətlərinə baxmayaraq, Bakı Şəhər Reklam İdarəsinin rəhbərliyi bu qanunsuzluğu aradan qaldırmayıb, belə görünür ki, indidən sonra da qaldırmaq fikrində deyil.

Artroloji mərkəzin sahibi Rəcəb Abbasovun Dövlət Reklam Agentliyinin rəhbərliyinə rəsmi müraciətlərinə isə bir qayda olaraq başdansovdu cavablar verilib və bildirilib ki, hər iki tərəfin razılığı ilə ortaq girişin üzərinə reklam lövhələri vurula bilər. Lakin R.Abbasov Agentliyə cavab məktublarında açıq şəkildə buna razılıq vermədiyini dəflərlə bildirib. Buna baxmayaraq, Agentlik sahibkarın mövqeyini və hüquqlarını nəzərə almayaraq, “Şəfa” balıq evinə himayədarlıq etməkdə və reklam lövhəsini həmin yerdə saxlamaqda davam edir. Təqdim olunan sənəd-sübutlar ondan xəbər verir ki, “Şəfa” balıq evinin böyük ölçülü reklam lövhəsi 8 ildir bu yolun üzərində dursa da, son vaxtlara qədər həmin reklamdan dövlətin xəzinəsinə bir qəpik də ödənməyib və o, yalnız bu yaxınlarda, yəni “Şəfalı su” artroloji mərkəzi şikayət etdikdən sonra rəsmiyyətə salınıb. Bu illər ərzində “Şəfa” balıq evinin ödədiyi qeyri-rəsmi vəsaitlərin kimlərin cibinə getdiyini isə təsəvvür etmək çətin deyil.


“AzPolitika.info”-da artroloji mərkəzin sahibi Rəcəb Abbasovun şikayəti dərc olunandan sonra Azərbaycan Respublikasının Dövlət Reklam Agentliyi Bakı Şəhər Reklam İdarəsi tərəfindən sahibkara 19 iyul tarixli daha bir məktub göndərilib - yenə “köhnə hamam, köhnə tas!”. Agentlik yenə zərrə qədər qızarmadan iddia edir ki, balıq evinin ümumi girişin üzərindəki reklam lövhəsi həmin sahənin yalnız yarısını əhatə edir və qalan hissəyə də artroloji mərkəz öz reklamını vura bilər. Artroloji mərkəzin sahibi Rəcəb Abbasovun əvvəlki şikayətilərinə Reklam Agentliyi tərəfindən ünvanlanmış cavab məktubunda “Əsas girişin hər iki tərəfə məxsus olduğunu nəzərə alaraq həmin girişdə reklam daşıyıcısının yerləşdirilməsi yalnız hər iki tərəfin qarşılıqlı razılığı olarsa, icazə verilə bilər” bildirilmişdir. Artroloji mərkəzin sahibi Rəcəb Abbasov əsas girişin hər iki tərəfə məxsus olduğunu, bu səbəbdən də əsas girişdə heç bir reklam daşıyıcısının yerləşdirliməsinə razılıq vermədiyi barədə öz etirazını yazılı şəkildə Agentliyə bildirmişdir. O, qeyd etmişdir ki, hər iki tərəfə məxsus olan girişin üzərindəki “Şəfa” balıq evi tərəfindən quraşdırılmış reklam daşıyıcı sökülməlidir. Çünki həmin reklam daşıyıcısının yerləşdiyi girişin arxasında iki obyekt (Şəfalı su” artroloji mərkəz və“Şəfa” balıq evi) yerləşir və bu lövhə ona aid olan “Şəfalı su” artroloji mərkəzin “Şəfa” balıq evinə məxsus olması mənasını verir. Bu isə “Reklam haqqında” AR Qanunun tələblərinə ziddir və “Şəfalı su” artroloji mərkəzin hüquqlarının pozulması deməkdir”. Həmiçinin öz etiraz məktubunda qeyd etmişdir ki, hər iki tərəfin ümumi girişi olan əsas girişdən sonra hər iki obyektin ayrıca girişləri vardır ki, reklam daşıyıcısını hər bir tərəf əsas girişdən sonra öz şəxsi girişlərinə və ya ümumi girişdən 10-15 metr aralı yerləşdirilməsinin tərəfdarıdır.


Göründüyü kimi, Dövlət Reklam Agentliyinin rəhbərliyi ya yarıtmazlıqdan, bacarıqsızlıqdan, ya da hansısa korrupsiya maraqlarından buna göz yumur və qarşı tərəfin qanuni haqqını təmin etməyərək, balıq evinə himayədarlıq edir. Görünür, ötən 8 ilin təcrübəsi yeni rəhbərlik dövründə də “uğurla” davam etdirilir. Əvvəlki yazıda da qeyd etdiyimiz kimi, istisna deyil ki, bu dövr ərzində balıq evinin sahibi olan “Fəxrəddin-K” MMC ilə Reklam Agentliyinin hansısa yülksək çinli məmuru arasında sövdələşmə, yaxud hətta şəriklik olub və hazırda da bu sahibkarlıq subyekti həmin agentlik tərəfindən himayə olunur. Əks halda bu açıq, gözlə görünən qanunsuzluğu aradan qaldırmaq üçün Agentliyə mane olan heç nə yoxdur! Elə artroloji mərkəzin rəhbərliyi də görünür bu səbəbdən balıq evi ilə “bacarmayan” agentlik rəhbərliyinə ümumiyyətlə giriş qapısına reklam vurulmasına razı olmadığını bildirib və heç bir subyektin oraya reklam vurmamasını tələb edib. Agentlik özü də cavab məktublarının birində ümumi giriş qapısına reklamın yalnız tərəflərin razılığı əsasında vurula biləcəyini qeyd edib. Məntiqlə və qanunla tərflərin biri razı deyilsə, deməli reklam ümumiyyətlə vurulmamalıdır. Ancaq göründüyü kimi, Agentlik yenə saxta bəhanələrlə balıq evinin ümumi girişdəki lövhənin üzərinə reklam vurmasına “yaşıl işıq” yandırır və açıq-aşkar qanunsuzluq, özbaşınalıq edir, sahibkarlıq subyektinin hüquqlarını kobud şəkildə pozur.

Belə görünür ki, bu ölkədə gömrük, vergi, icra hakimiyyəti, hüquq-mühafizə orqanları səviyyəsində sahibkarlara qarşı qanunsuzluqların qarşısının alınması istiqamətində işlər aparılsa da, bunların Reklam Agentliyinə aidiyyatı və bu quruma “gözün üstə qaşın var” deyən yoxdur.

Redaksiyamıza müraciət edən artroloji mərkəzin rəhbərliyi bir daha öz qanuni hüquqlarından istifadə edərək, Agentlikdən ümumiyyətlə, iki müəssisəyə aid olan əsas giriş qapısından “Fəxrəddin-k” MMC-yə aid bütün reklam daşıyıcılarının sökülməsini və ortaq girişə reklam vurulmamasını tələb edir. Əgər Agentlik rəhbərliyi ilə “Fəxrəddin-K” MMC arasında ya sövdələşmə, ya da şəriklik yoxdursa, bu qanuni tələb dərhal yerinə yetirilməlidir. Əks halda, belə çıxır ki, Reklam Agentliyi ölkəni dərəbəylik sayır, özünü isə bütün qanunlardan və dövlət orqanlarından üstün tutur...

“AzPolitika.info”