 |
|
|
Admin yuxudan qalxıb üzünü yumağa macal tapmamış sayta "vacib" xəbər yerləşdirib: "Günay villasında bağbanlıq etdi".
Aydın məsələdir ki, söhbət müğənni Günay İbrahimlidən gedir. Azərbaycanda adının qarşısında müğənni sözü olmayan bir qadının villa sahibi olması müşkül məsələdir.
Mənim heç bir müğənni ilə, o cümlədən Günayla hər hansı ədavətim yoxdur. Günay İbrahimli büdcə oğrusu deyil ki, onunla mübarizə aparım. Görüntüləri sosial şəbəkələrdə viral olan dəbədəbəli villasını indiyə kimi 3 dəfə dağılan Bakı-Quba yolunun tikintisindən çırpışdırılan pullarla almadığına adım kimi əminəm. Siz Ziya Məmmədovun bu gün 40 dərəcə istidə Ucarın Qazıqumlaq kəndində üzüm qorası kimi bişməyinə baxmayın, nazir olanda yol-körpü tikintisindən 1 manat çırpışdırmaq istəyən adamın iki gözünü bir deşikdən çıxarırdı. turbo az mercedes
Günay İbrahimli heç şəhid ailələrinə, müharibə əlillərinə, Qarabağ veteranlarına ayrılan pullara da əl uzatmayıb. Bizim qazdan ayıq məmurlarımız bu hərəkətinə görə onun əlini kəsərdilər. Günayın xəstəxana, klub tikintisindən 5-3 manat oğurlaması da real deyil. Dünyanın ən məşhur fırıldaqçılarını Bakıda qaz kimi yolub geri göndərirlər. Büdcə vəsaiti deyib üstündə tir-tir əsdiyimiz pullardan Günaya 1 qara qəpik də çatmayıb. Ona ən yaxşı halda oxuduğu toylarda süfrəyə gətirilən aşın qazmağı çata bilər. Çünki qonaqlar həmin vaxt yeyib doymuş olur, müğənninin nə yeməsi onları maraqlandırmır...
Dağı, dərəni dolaşandan sonra gəlib çıxdıq mətləbə. Söhbət Günayın dəbədəbəli villasına verilən mənfi reaksiyadan gedir. Tam səmimiyyətimlə soruşuram: Əgər Günay büdcəni talamayıbsa, yetim-yesirə çatacaq pullara əl uzatmayıbsa, onun villasının olması sadə insanları niyə qıcıqlandırır?
Bu sualı dost tanışa ünvanlayanda tutuquşu kimi hamı eyni cavabı verir: "Müğənnilər o villaları bizim pullarımızla alıblar".
Burada söhbət toylarda müğənnilərə verilən qonorardan gedir. Düşünürəm ki, bir qədər ədalətsiz yanaşmadır. Manaf, Günay, Əlikram, Vasif Məhərrəmli heç kimə yalvarmır ki, məni övladının toyuna apar. Aygün və Röyanın adını qəsdən yazmadım. Çünki övladlarının toyunda oxuması üçün camaat onlara yalvarır. Üstəlik, toya gələn müğənniyə kabab yediyinə görə pul verilmir. Oxuyur, oynayır, əziyyət çəkir, tər tökür, sonra da pulunu alıb gedir. Məşhur filmdəki xəbərdarlıqdan sonra, Azərbaycanda heç kim artistə əvvəlcədən pul vermir.
Demək istədiyim odur ki, bizim haqqımızı yeyib üstündən su içən Günay və həmkarları deyil. Haqqımızı yeyib, üstündən də su içənlərin birini dünən işdən çıxardılar. Ağdaşın ötən gün istefaya göndərilən icra başçısının təkcə Bakı şəhərində 21 villası və mənzili var. Günayın bayaqdan iki-üç dəfə dəbdəbəli deyə təqdim etdiyim bağ evi keçmiş başçının villalarının yanında toyuq damına oxşayır.
Deyirlər, toyuq belə su içəndən sonra başını qaldırıb Allaha baxır. Kiminsə arxasınca danışanda gərək başımızın üstündəki Allahı unutmayaq...
Seymur VERDİZADƏ - Yenisabah.Az