 |
|
|
“Evdən “Sehrli xalat” filmində çəkilməyə icazə vermirdilər. Çünki dərslərim var idi, onlardan kənar qalırdım. Sınaq çəkilişləri yay tətilində olduğu üçün icazə vermişdilər. Sonra dayım dedi ki, uşaqdır, gedib çəkilsin, yadigar qalar. Yaxşı ki, çəkildim. Rəşidlə mən baş rol idik deyə iri planda çəkilirdik. Yay vaxtı idi, hava çox isti idi. Biz də uşaq idik, qaçırdıq, oynayırdıq, tərləyirdik. Yadımdadır, çəkiliş başlayan kimi bizim tərimizi qurudurdular. Əlbəttə ki, bizim üçün çəkilişlərdə iştirak etmək çətin idi, amma oradakı aktyorlardan sözün əsl mənasında valideyn münasibəti görmüşük”
Bunu Moderator.az-a açıqlamasında “Sehrli xalat” filminin Zərifəsi Solmaz Hətəmova deyib. O daha sonra əlavə edib.
“Filmdə polis rolunu oynayan aktyorumuz Tələt Rəhmanov mənim həyat yoldaşımın qohumudur. O vaxt bizə elçi gələndə məni görüb dedi ki, sən burada neynirsən?! (gülür). Bilmirdi ki, mənim üçün elçi gəlib. Tələt Rəhmanovun yoldaşı mənim qaynanamın qohumudur. Dedi ki, “Zərifə, mən heç bilməzdim ki, nə vaxtsa sənin üçün elçi gələcəyəm”. Üstündən illər keçməsinə baxmayaraq o məni unutmamışdı. Tələt Rəhmanov həm də filmdə operator köməkçisi işləyirdi. Çox zəhmətkeş insan idi” deyə sənətçi bildirib.
Solmaz Hətəmova bugünki fəaliyyətindən də danışıb.
“Həkim olmaq istəyirdim, amma alınmadı. Atam da həkim idi. Anamın istəyi ilə sənədlərimi ADNA-ya verdim. İqtisadiyyat fakültəsinin axşam şöbəsinə daxil oldum. Pedaqoji fəaliyyətlə məşğul idim. Uzun müddət Rabitə kollecində dərs demişəm. İndi artıq dərs demirəm. Evdə oluram. Nəvələrimlə vaxt keçirirəm. Xoşbəxt ailəm var” deyə Solmaz Hətəmova bildirib.
Solmaz Hətəmova bu gün uşaq filmlərinin çəkilməməsindən də gileylənib.
“Yoxdur, çəkilmir. Bəlkə çəkilir mən görmürəm? Amma çəkilsəydi ən azından xəbərim olardı. Kino təbliğatdır. Uşaq filmləri isə uşaqlara daha çox lazımdır, vacibdir. Bu gün uşaqlara üçün nə verilişlər var, nə də ki, filmlər. Uşaq məcburdur ki, böyüklər üçün olan filmləri izləsin. Uşaqlar saf olur, onların hər şey yaddaşında qalır. Məsələn, mənim övladlarım bu filmə baxmışdılar. Filmdə hər deyilən sözü yadlarında qalmışdı. Uşaqlarım balaca olanda, onlara hirslənəndə mənə deyirdilər ki, “Zərifə gülümsə”. İşıq sönəndə isə deyirdilər ki, “qorxmayın, məndə fənər var” (gülür). Böyük oğlum 5 yaşı olanda filmi izləmişdi. Ondan soruşmuşdum ki, necə oynamışam? Demişdi ki, “daha təbii oynaya bilərdin” deyə müsahibimiz bildirib.