“Bizim sənətdə qohumluq, tanışlıq, pul keçmir. Yalnız səsin olmalıdır. Gözəlliyinlə, vücudunla bir-iki dəfə səhnəyə çıxa bilərsən, sonra əlbəttə ki, axsayacaqsan. Sənətkarı yalnız səsi xilas edə bilər. Lap deyək ki, sən toyda fanaqram oxudun, bəs teatr səhnəsindəki obrazları necə oynayacaqsan? Orada tamaşaçılarla canlı ünsiyyətdə olursan. Təkbətək qalırsan. Səhnə və sən. Sənətkarın sənəti də, istedadı da məhz bu zaman bilinir”
DİA.AZ bildirir ki, bunu Moderator.az-a açıqlamasında xalq artisti Nəzakət Teymurova deyib.
“Bütün sahələr kimi bizim sahədə də bir-birini sevən və sevməyən insanlar var. İncəsənətin digər sahələrindən fərqli olaraq biz bunlara önəm vermirik. Çalışırıq söz-söhbətlərdən uzaq qaçaq. O da nəyin üstündə yaranır? Məsələn biri deyir ki, filankəs niyə qabaqdadır? Niyə bütün konsertlərdə o çıxış edir? Bu da şəxsi münasibətdən yox, iş üstündə yaranan konfliktlərdir. Heç kim deyə bilməz ki, Nəzakət kiməsə qarşı eqoist davranıb, saymamazlıq edib. Mən sadəliyi sevən biriyəm. Bəzən olub ki, mənim haqqımda da nələrsə danışıblar. Mən onlara həmişə sənətimlə cavab vermişəm” deyə xalq artisti deyib.
Xalq artisti gənclərdən də danışıb.
“Sənətini, şəxsiyyətini uca tutan insanlara sənətkar deyirlər. Xanəndələr var ki, səs diapozonu böyük deyil, amma o qədər gözəl ifaları olub ki. Onlar öz üzərlərində çalışmırlar. Elə bir mahnı götürüb oxuyurlar ki, bu da onları arxaya atır. Bəzən iddia edirlər, amma hələ yetişməyiblər. Mənəm-mənəm deyilən yerdə sənət olmur” deyə bildirib.
Xalq artisti bildirib ki, sənətə ilk başladığı illərdə qadağalarla üz-üzə qalıb.
“Biz 10 bacı-qardaşıq, hamımızın da səsi var. Bu sənət uşaq yaşlarından bizə tanışdır. Qarabağ diyarı hər zaman xanəndələr yetişdirib. Uşaq idik, hara çıxırdıqsa görürdük ki, muğam səsi gəlir. Mən Ağdamda pioner evində ifa edirdim. 8-ci sinifi bitirəndən sonra qardaşlarım oxumağa qoymadı. Buna görə də texnikuma daxil oldum. Daha sonra sənətlə ciddi məşğul olmağa başladım və görkəmli sənətkarımız Arif Babayevin sinfinə daxil qəbul olundum. Hər zaman qarşıma məqsəd qoymuşdum ki, xanəndə olub, özümü ustadların sırasında görəcəyəm. Bu gün bu məqsədimə çatmışam” deyə xanəndə bildirib.