"İl yarımdan sonra Qarabağ öz qapılarını dünyanın hər yerindən gələn turistlərin üzünə açacaq".
DİA.AZ qeyd edir ki, bunu Dövlət Turizm Agentliyinin (DTA) sədri Fuad Nağıyev “news.ru” nəşrinə müsahibəsində deyib. O qeyd edib ki, "Azərbaycanlılar özləri Qarabağda turizmin inkişafına sərmayə qoyurlar, onlar ölkəsi üçün faydalı iş görmək istəyirlər. Azərbaycan hökuməti investorlar üçün müəyyən güzəştlər nəzərdə tutan sənədlər paketi hazırlayır”.
Onun sözlərinə görə, işğaldan azad olunmuş ərazilərin böyük turizm potensialı var:
"Artıq bir neçə yerdə turizm infrastrukturunun yaradılması istiqamətində işlər aparılır. Bundan əlavə, biz başqa ölkələrdən investorları cəlb etmək üçün investisiya şəraiti yaradırıq. Ancaq başa düşmək lazımdır ki, müharibə bir müddət əvvəl başa çatıb və o ərazilərdə hələ də minalardan təmizləmə prosesi gedir.
Biz vətəndaşların tam təhlükəsizliyini təmin etmək üçün bir sıra dövlət qurumları ilə işləyirik. Bu ilin sonuna kimi Tərtər rayonu, Suqovuşanda turizm infrastrukturunu istifadəyə verməyi planlaşdırırıq. Orda su anbarı var ki, onun ətrafında turizm zonası yaratmağa başladıq. Biz məcburi köçkünlərin tezliklə bu torpaqlara qayıtması üçün hər şeyi edirik. Bu, o cümlədən turizm üçün çox vacibdir".
Qeyd edək ki, 2022-ci ilin yanvar-sentyabr aylarında Azərbaycana dünyanın 176 ölkəsindən 1162,7 min və ya əvvəlki ilin müvafiq dövrü ilə müqayisədə 2,2 dəfə çox əcnəbi və vətəndaşlığı olmayan şəxs gəlib. gələnlərin 26,6 faizi Rusiya Federasiyası, 19,6 faizi Türkiyə, 11,0 faizi İran, 7,4 faizi Səudiyyə Ərəbistanı, 4,8 faizi Gürcüstan, 3,2 faizi Pakistan, 3,1 faizi Hindistan, 2,3 faizi Birləşmiş Ərəb Əmirlikləri, 1,9 faizi Qazaxıstan, 1,8 faizi Ukrayna, 1,7 faizi İsrail, 1,6 faizi Küveyt, 1,5 faizi Özbəkistan, 1,4 faizi Oman, 1,1 faizi Böyük Britaniya, 11,0 faizi digər ölkələrin vətəndaşları olub.
Gələnlərin 74,4 faizini kişilər, 25,6 faizini qadınlar təşkil edib. Onu da qeyd edək ki, son illər vətəndaşlar quru yollarının bağlı olması və qiymət artımı ilə bağlı daxili turizmə daha çox üstünlük verir. Daxili turizmə tələbat artsa da, bölgələrdə turizm obyektlərində qiymətlərdə azalma müşahidə edilmir. Nəinki daxili turistləri, xarici ölkələrdən gələn turistləri də qiymət bahalığı ilə bağlı itirməli oluruq.
Qarabağa turist səfərləri zamanı onlara da digər bölgələrdəki kimi baha qiymətlər tədqim olunacaqsa, turizmi necə inkişaf etdirəcəyik?
DİA.AZ-ın məlumatına görə, “Skal Bakı” klubunun sədri Ceyhun Aşurov Cebhe.info-ya bildirib ki, Qarabağın gələcəkdə turizm potensialından geniş istifadə olunacağı gözləniləndir:
“Bunun üçün ilk növbədə oradakı təhlükəsizlik məsələlərinin tam şəkildə həllini tapması lazımdır. Orada bəzi ərazilərdə hələ də minalanmış ərazilər var, bu, insan həyatı üçün təhlükəlidir. Lakin azad edilmiş ərazilərə bəzi marşrutlar hazırlanır ki, həmin ərazilər tam təhlükəsiz zonadır. Yəqin ki, müəyyən marşrutlar çərçivəsində, yəni istər bizim vətəndaşlar, istərsə də xaricdən gələn turistlər üçün müəyyən turizm marşrutları Qarabağ ərazisinə salına bilər. O əraziləri turistlərin görməsi, keçmələri üçün şərait yaradıla bilər ki, bunun üçün də müəyyən zaman lazımdır”.
Ekspert deyir ki, bu il ümumiyyətlə, ÜTT tərəfindən dünyada turizmin 2019-cu illə müqayisədə 70 faiz bərpa olunduğu qeyd olunur:
“Azərbaycanda da 60 faizdən yuxarı turizm sənayesinin bərpa olunduğunu görə bilirik. Bununla əlaqədar turizmdə müəyyən qədər canlanma var. Bütün müsbət tendensiyalar dünyada və Azərbaycanda turizm aktivliyinin bərpası ilə əlaqədardır. Ölkəyə turistlər gəldikdə yalnız bir məkanda qalmırlar, Azərbaycanda böyük regionlar arasında məsafə o qədər də çox deyil. Kifayət qədər yaxşı infrastruktur, yollarımız var. Bu imkan verir ki, ölkəmizə gələn turistlər qaldığı müddət ərzində müxtəlif bölgələrə də səfər etsinlər. Təbii ki, turistlərin sayı çox olarsa, mütləq Qarabağa olan turizm marşrut səfərlər ilə uzlaşdırıla bilər və həmin təhlükəsiz ərazilərə də turistlər səfər edə biləcəklər. Mövcud şərtlərdə, müxtəlif geosiyasi və iqtisadi proseslər fonunda, eləcə də Azərbaycanın quru sərhədlərinin hələ də bağlı olması ilə bağlı müəyyən məhdudiyyətlər qalmaqdadır. Lakin gələcəkdə sabit şərtlərdə turistlərin sayının artacağı gözləniləndir”.
C.Aşurov bildirdi ki, yay mövsümündə sərhədlərin bağlı olması və dünyada qiymət artımı ilə əlaqədar olaraq daxili bazara daha böyük tələbat olub:
“Vətəndaşlar öz istirahətlərinin təşkili məqsədilə daha çox bölgələrə səfər edirlər. Bu da tələbatı yüksək tutur və qiymətlərin yuxarı olmasının səbəbi də tələbatın yükək olmasıdır. Əgər bizim regionlarda qalma yerləri, otellərin, restoranları sayı daha çox olarsa, rəqabət nəticəsində daha uyğun qiymətlər əldə edə bilərik. Yay mövsümündə xüsusilə doluluq müşahidə olunur və gələn turistlərin sayı artır. Məktəblərin bağlı, tətil olması ilə insanların həm xaricə, həm də ölkə daxilində turizm səfərlərini sayını artırır. Bu baxımdan istirahətlərini daha çox yay mövsümünə salırlar ki, bu da qiymətlərə də öz təsiriin göstərir. Gələcəkdə bu cür obyektlərin sayı artarsa, biz daha əlverişli qiymətlər və daha yaxşı rəqabətli xidmətlər əldə edə bilərik. Biz hər il bazara yeni otellərin, qalmaq üçün kənd evləri, tikililərin daxil olduğunu görürük. Gələcəkdə də bunun artırılması üçün dövlət tərəfindən də təşviqlərin olması lazımdır ki, bu cür obyektlərin sayı daha çox olsun. Rəqabət mühiti artdıqca, insanlar büdcələrinə uyğun həm qalma, servis xidmətləri əldə etmiş olacaqlar”.