Gürcüstan prezidenti Salome Zurabişvili müxalifətə dəstək mitinqinə gəlib.

Tribunainfo.az rus mediasına istinadən xəbər verir ki, parlament binasına ölkənin müxalifət partiyalarının liderləri də gəlib.

Qeyd edək ki, Tbilisidə etirazçılar parlament binası yaxınlığındakı yola çıxıblar, nəqliyyatın hərəkəti mümkün deyil. Artıq yüzlərlə müxalifət tərəfdarı meydana toplaşıb. Şota Rustaveli küçəsi bağlanıb. İnsanların əllərində Gürcüstan, Avropa İttifaqı, Ukrayna, ABŞ və digər Qərb ölkələrinin bayraqları var. İnsanlar toplaşmağa davam edir.

Nəzərə çatdıraq ki, Gürcüstan prezidenti Salome Zurabişvili oktyabrın 27-də axşam ölkə üçün kritik əhəmiyyət kəsb edən parlament seçkilərinin bitməsindən bir gün sonra brifinq keçirərək “seçkilərin tamamilə saxtalaşdırıldığını” bəyan edib.

Prezident seçki nəticələrini tanımadığını bildirib və hər kəsi oktyabrın 28-də saat 19.00-da parlament binası qarşısına simvolik etiraz aksiyasına – yeni seçilmiş parlamentin qeyri-legitimliyini bütün dünyaya çatdırmaq üçün toplaşmağa çağırıb.