NATO-nun baş katibi vəzifəsindən getməyə hazırlaşan Yens Stoltenberq hesab edir ki, ABŞ qarşıdakı prezident seçkilərində kimin qalib gəlməsindən asılı olmayaraq, Şimali Atlantika Alyansının güclü müttəfiqi olaraq qalacaq.
“Report” xəbər verir ki, o, bu fikri “Yomiuri Shimbun” qəzetinə müsahibəsində bildirib.
"ABŞ-də hər iki partiyanın Ukraynaya güclü dəstəyi var. Kimin prezident seçilməsindən asılı olmayaraq, ABŞ NATO-nun güclü müttəfiqi olaraq qalacaq", - o deyib.
Bundan əvvəl Atlantik Şurasının ekspertləri qeyd edirdilər ki, Donald Tramp qarşıdan gələn prezident seçkilərində qalib gəlsə, ABŞ alyansdan çıxmasa belə, NATO-nu zəiflədə bilər. Yenidən ən yüksək dövlət vəzifəsi uğrunda mübarizə aparan Tramp özü NATO-nun fəaliyyətindən narazılığını bildirib. O, noyabrda keçiriləcək seçkilərdə qalib gələcəyi təqdirdə, Avropa tərəfdaşlarının öz təhlükəsizliyi üçün daha çox maliyyə məsuliyyəti daşımayacaqları təqdirdə ABŞ-nin Şimali Atlantika Alyansından çıxması ilə təhdid edib.