“Drujba” neft kəmərinin ikinci xəttində təzyiq aşağı düşüb.

Qəzanın səbəbləri hələlik məlum deyil və araşdırma aparılır. “Drujba” kəmərindəki neft sızıntının bir neçə saat davam edəcəyi açıqlanıb. Bildirilib ki, ötən gün Plotskdan 70 kilometr məsafədə yerləşən “Drujba” boru kəmərinin iki xəttindən birində sızıntı baş verib. Lakin bunun səbəbi məlum deyil. Kəmərin bu hissəsi vasitəsilə Almaniya neft nəql olunur. Serbiyanın energetika naziri Zoran Mixayloviç deyib ki, “Drujba” neft kəmərində baş verən insident və Rusiya neftinin tədarükü ilə bağlı digər problemlər “Şimal axını” təbii qaz kəmərlərində baş verən hadisələrin davamı kimi görünür.

Qeyd edək ki, bir müddət öncə “Şimal-axını 1” və “Şimal-axını 2” boru kəmərlərində də partlayışlar meydana gəlib. Bunun ardından qazın verilişi dayandırılıb.

Daha sonra baş verən partlayışla bağlı Rusiya və ABŞ bir-birini ittiham edib. Maraqlıdır, bunların ardıcıl baş verməsi təsadüfdür, yoxsa təxribat?

Ehtiyatda olan polkovnik, hərbi ekspert Üzeyir Cəfərov Cebhe.info-ya açıqlamasında bildirib ki, burada açıq təxribat elementləri var:

“Bu, açıq şəkildə görünür. Buna görə də tərəflər bir-birini ittiham edirlər. Amma yaxşı olardı ki, strateji əhəmiyyətli enerji xətləri etibarlı müdafiə olunardı. Niyə bir neçə ay bundan əvvələ qədər belə hallar baş vermirdi? İndiyə qədər hər hansısa problem olmayan borularda son zamanlarda sızıntılar baş verir. Məhz indiki məqamda bu partlayışların baş verməsinin səbəbi tərəflər arasında anlaşılmamazlıq olmasıdır. Ona görə də boru xətlərində partlayışlar və sızıntılar baş verir”.

Ekspert borulardakı sızıntıların arxasında insan faktorunun olduğuna əmindir:

“İstənilən halda bunu təsadüf adlandırmaq və ya texniki qəzadan danışmaq olmaz. Üstəlik, bütün bunlar çox peşəkar insanlar tərəfindən icra olunur. Hesab edirəm ki, bunlar diqqəti yayındırmaq üçün Rusiyanın xüsusi xidmət orqanları tərəfindən də həyata keçirilə bilər. Bununla yanaşı, Rusiyanı hədəfə gətirmək istəyən dövlətlər də bu addımları ata bilərlər”.