Xətai rayonu, Əhmədli qəsəbəsi, Şahin Səmədov küçəsi 11 ünvanında yaşayan Məmmədov Məzun Hümbət oğlu tərəfindən Hurriyyet.az saytının redaksiyasına növbəti şikayət məktubu daxil olub. Şikayətçi müraciətinə müvafiq qurumların heç bir reaksiya verməməsinə etiraz edir. Odur ki, rəsmi qurumlardan əlini üzən Məzun Məmmədov saytımız vasitəsilə bu dəfə Prezidenti İlham Əliyevə müraciət edir. Onun müraciətini olduğu kimi dərc edirik:

“Cənab Prezident!

Rəsmi qurumlara etdiyim müraciətlər cavabsız qaldığl üçün, məcbur qalıb Sizə müraciət edirəm!

Bildirim ki, 2006-cı ildə Xətai rayonu, Kənd Əhmədli qəsəbəsi, Şahin Səmədov küçəsi 11 ünvanında yerləşən hazır tikilmiş və müvafiq sənədləri qaydasında olan evi almışam. Evin müvafiq sənədləri tam qaydasında olduğundan, Sizin çıxarışsız həyət evlərinin çıxaşlarının verilməsi barədə verdiyiniz sərəncama əsasən, mənə də torpağa və evə çıxarış verilmişdir.

Oktyabr ayının 13-də, səhər tezdən yaşadığım evdə çökmə baş verdi. Mən bu barədə dərhal aidiyyəti qurumlara məlumat verdim. Ailə üzvülərimi isə arxa pəncərədən, qonşunun həyətindən təxliyə etdim.

Bəzi qurumların əməkdaşları gəlib baxış keçirdilər və evin yaşayış üçün tam yararsız olduğu haqda qərar verildi.

Məlumat verim ki, 7 nəfər ailə üzvümlə bərabər artıq 46 gündür evimizi tərk etmişik. Hazırda çox çətin vəziyyətə düşmüşük, pensiya ilə dolandığım üçün evimi təmir etdirmək imkanım yoxdur.

Mənim bu vəziyyətimi demək olar ki, bütün televiziyalar saytlar çəkib, saytlar bu haqda məqalələr dərc edib. Lakin indiyədək biə kömək edən yoxdur.

Cənab Prezident!

Onu da bildirim ki, Sizə məktub və teleqramla da müraciətim etmişəm. Sizdən evimin kompensasiyasının verilməsi üçün bizə yardım etməyinizi xahiş edirəm. Heç bir qurum bizimlə maraqlanmır, kiimsə məsuliyyəti öz üzərinə götürmək istəmir.

Havanın soyuq vaxtında evsiz qalmışıq, necə edəcəyimizi bilmirik. Bir ailənin həyatı təhlükədədir, amma bu, səlahiyyətli qurumların heç vecinə də deyil. Biz, vətəndaş olaraq, hər bir problemin həll edilməsi ilə bağlı Prezidentə müraciət etməliyik?! Üstəlik, mən uşaq deyiləm ki, hansısa bir qurum kobud cavab versin.

Bildirim ki, bu işlə təkcə “Azərsu”nun əməkdaşları məşğuldurlar. Rayon İcra Hakimiyyəti qəti bu hadisə ilə maraqlanmır.

Cənab Prezident!

Sizdən həm özümün, həm də ailəmin adından xahiş edirəm, tapşırıq verin, səlahiyyətli qurumlar bu məsələ ilə maraqlansınlar.

Jalə FAMİLQIZI

Hurriyyet.az

Redaksiyadan: Mövzunu diqqətdə saxlayacağıq. Yazıda adları çəkilən qurumların mövqeyini də dərc etməyə hazırıq.