Ukraynanın Müstəqillik Günü münasibətilə ABŞ-ın “The Washington Post” qəzetində maraqlı və geniş məqalə dərc edilib.

“AzPolitika.info” xəbər verir ki, yazıda Rusiyanın Ukraynaya qarşı işğalının ilk günlərində baş verənlərə dair bəzi məlumatlar yer alıb. Belə ki, qəzetin yazdığına görə, ilk olaraq fevralın 24-də Putinin ən yaxın adamlarından biri və onun “xüsusi tapşırıqları”nın icraçısı sayılan,

Rusiya Prezident Administrasiyası rəhbərinin müavini Dmitri Kozak Ukrayna Prezident Ofisinin başçısı Andrey Yermaka zəng edib və Putinin adından “təslim olun” tələbini çatdırıb. Qəzet yazır ki, əvəzində, Yermak ona ağır söyüşlərlə cavab verərək, dəstəyi asıb.

Həmin günlərdə daha bir maraqlı dialoq Ukraynanın Müdafiə naziri Aleksey Reznikovla Belarusun Müdafiə naziri Viktor Xrenin arasında olub. Hələ fevralın 22-də Xrenin Reznikova “zabit sözü” verib ki, Belarus ərazisindən Ukraynaya hücum olmayacaq.

“Artıq fevralın 26-da baş tutan növbəti söhbətdə isə Xrenin titrəyən səslə Reznikova Şoyqunun tələbini çatdırıb: “Əgər Ukrayna kapitulyasiya aktını imzalasa, işğal dayandırılacaq”.

Reznikovsa cavabında deyib: “Mən Rusiyanın kapitulyasiyasını qəbul etməyə hazıram”".

Xatırladaq ki, bu günlərdə “The Washington Post” Ukrayna müharibəsilə bağlı daha bir məqaləsində Putinin “ildırım sürətli” işğal planının bəzi detallarını yayımlamışdı. Orada qeyd edilirdi ki, Rusiya başçısı ordudan qısa müddətdə Ukraynanın böyük hissəsinin işğalını, Kiyevi 3 günə ələ keçirməyi və “lazım gələrsə” Volodimir Zelenskini qətlə yetirməyi tələb edibmiş.