"Biz özümüz XXI əsrin ən dəhşətli müharibəsini törədən tiranı hakimiyyətə buraxmışıq"

ABŞ Zelenskini dinləməyib, "yaxşı ruslara" çıxış yolunu saxlayıb?

"ABŞ Rusiya vətəndaşlarına vizalar verilməsinin tamamilə qadağan edilməsini dəstəkləmir"

"Biz Kremlin məsuliyyətə cəlb olunması üçün bütün vasitələrdən istifadə edəcəyik"

Amerika Birləşmiş Ştatları Rusiya vətəndaşlarına vizalar verilməsinin tamamilə qadağan edilməsini dəstəkləmir.

Moderator.az xəbər verir ki, bu barədə Dövlət Departamentinin nümayəndəsi bəyan edib, məlumatı Amerikanın CNN telekanalı yayıb.

"ABŞ rusiyalı dissidentlər və ya Rusiya Federasiyasında insan haqlarının pozulması qarşısında həssas şəxslər üçün sığınacaq və təhlükəsizlik yollarını bağlamaq istəməzdi. Rusiya hökumətinin hərəkətləri və Ukraynada siyasəti ilə Rusiya xalqı arasında fərq qoyulmalıdır", - adı çəkilməyən rəsmi nümayəndənin bəyanatında belə deyilir.

ABŞ Dövlət Departamentinin nümayəndəsi əlavə edib ki, ABŞ "müttəfiqləri və tərəfdaşları ilə o cümlədən Kreml məmurları və onların yardımçıları üçün sanksiyaların tətbiq edilməsində əməkdaşlıq edib".

"24 fevral 2022-ci ildə Birləşmiş Ştatlar Rusiyanın Ukraynaya hərbi müdaxiləsinə cavab olaraq təxminən 5 min nəfər üçün viza məhdudiyyətlərinin tətbiq edilməsi üzrə addımlar atıb. Biz rusiyanın müdaxiləsində əli olanların aşkar edilməsini davam etdirəcək və onların hərəkətlərinə görə məsuliyyətə çağırış edəcəyik. Biz Kremlin məsuliyyətə cəlb olunması üçün bütün alətlərdən istifadə edəcəyik", - amerikalı məmur sözlərinə yekun vurub.

CNN Avropa İttifaqının xarici işlər və təhlükəsizlik üzrə ali nümayəndəsi Jozef Borrelin sözlərindən iqtibas gətirib, o da həmçinin Rusiya vətəndaşları üçün vizalar verilməsinin tamamilə qadağan edilməsinin əleyhinə çıxış edib və bəyan edib ki, "bütün rusiyalılara girişin qadağan edilməsi pis ideyadır".

Xatırladaq ki, avqustun əvvəlində Ukrayna prezidenti Qərb ölkələrinə Rusiya vətəndaşlarına vizalar verilməməsinə çağırış edib.

Onun bu çağırışı artıq Çexiya, Estoniya, Latviya, Litva və Polşa tərəfindən dəstəklənib.

Tanınmış rusiyalı qadın jurnalist Kseniya Larina öz versiyasını səsləndirib və qeyd edib ki, nədənsə, bir çox Qərb ölkələri Rusiya vətəndaşlarından "çəkinir": "Bütün dünya üçün yaxşı rus olmur. Biz özümüz XXI əsrin birinci yarısında ən dəhşətli müharibəni törədən tiranı hakimiyyətə buraxmışıq".