Türkiyənin uğurlarından narahat olan, deputat türk xalqını aşağılamağa çalışıb. Portuqaliya parlamentində türklərə qarşı irqçi ifadələr işlədən ifrat sağçı “Çeqa” Partiyasının liderinə ilk reaksiya öz ölkəsindən gəlib. İrqçi siyasətçiyə Portuqaliya parlamentində bu sözlərlə dərs verilib: “Hər millət dəyərlidir, hər millət hörmətə layiqdir”.
Bizimyol.info "trthaber"ə istinadən xəbər verir ki, Portuqaliyada ifrat sağçı “Çeqa” Partiyasının lideri Andre Ventura parlamentdə həddini aşdı və özünəməxsus şəkildə Türkiyənin uğurlarını və türkləri aşağılamaq istəyib.

O, ümumiləşdirmədə bütün "türklərin tənbəl" olduğunu iddia edib. Ventura bir çox aviasiya mütəxəssisi və turistin təriflədiyi İstanbul hava limanını da aşağılamağa cəhd edib. Lakin sağlam düşüncəli deputatlar onun çirkin sözlərinə dərhal cavab veriblər. Millət vəkilləri bu sözlərin irqçi olduğu, nəinki siyasətçiyə, həmçinin insanlığa yaraşmayan hərəkət olduğunu diqqətə çatdırıblar.

Portuqaliyalı irqçi siyasətçinin türklər haqqında ümumiləşdirməsi Portuqaliya parlamentində çaşqınlıq yaradıb. İfrat sağçı şəxsə ilk reaksiya Portuqaliya Parlamentində verilib və hər bir xalqın hörmətə layiq olduğu vurğulanıb. Onlar həmçinin Assambleyanın sədri Xose Pedro Aguiar-Brankodan bu irqçi deputatı qınamağı xahiş ediblər.

Sol ittifaqın deputatı Fabian Figueiredo Venturanın sözlərinə görə Türkiyənin Lissabondakı səfirindən ölkəsi adından üzr istəyib: "Parlamentin çətiri altında bu cür ümumiləşdirmələr aparıla bilməz. Türk xalqı da digər xalqlar, xüsusilə də Portuqaliya xalqı kimi eyni hörmət və ehtirama layiqdir", - deyə o üzrxahlıq edib.

Bu, “Çeqa” Partiyasının lideri Venturanın parlamentdə ilk qalmaqallı bəyanatı deyil. Ventura əvvəllər qaradərili deputat haqqında söylədiyi iyrənc fikirlərə görə məzəmmət olunub. 2020-ci ildə o, qaraçılara qarşı ayrı-seçkilik xarakterli ifadələrinə görə cərimələnib.

Qadir, Bizimyol.info