Qax rayon sakini Mustafayev Alim Habil oğlu tərərfindən Hurriyyet.az saytının redaksiyasına şikayət məktubu daxil olub. Qax Rayon Məhkəməsinin hakimi Atabəy Kiçikbəyovdan şikayət edən A.Mustafayevin müraciətini olduğu kimi dərc edirik:

“Mən, Mustafayev Alim Habil oğlu, yazaraq xahiş edirəm ki, müraciətimi işıqlandırasınız.

Bildirim ki, illərlə adım ölü kimi sənədləşdirilib. Bundan gec xəbərim olub. Güc bəla ilə sənədlərimi qaydasına salmağa nail oldum.

Qax rayonunda məhkəmə hakimi Atabəy Kiçikbəyov tərəfindən barəmdə "ölüb" qərarı verilmişdi. Həmin qərarı aldım, yenidən məhkəməyə müraciət etdim. Beləliklə, Qax rayonuna yeni təyin olunmuş hakim Mirheydər Zeynalovun qərarı ilə nəhayət, sağ olduğum təsdiqini tapdı.

Mənim ruh olmadığımı, canlı-qanlı insan olduğumu təsdiqləyən Mirheydər Zeynalova təşəkkür edirəm.

Təəssüf ki, bəzi hakimlər günahsız insanlara cəza verə bilirlər. Məni "ölü insan" kimi göstərən hakimə Azərbaycan Respublikasında cəza verəcək qurum yoxdur. Hansı vəkilin yanına gedirəm, "bu işdə biz uduzacağıq", - deyib geri dururlar. Sağ insanı "ölü" kimi göstəən hakim cəzalandırılmayacaq?!

Respublika Prokurorluğuna, Məhkəmə Hüquq Şurasına da ərizə ilə müraciət etdim, ancaq hamısı başlarından etdilər. Çox heyif ki, bəzi məmurlar mənim kimi insanları Azərbaycanda yaşamaqdan diksindirir.

Hazırda Azərbaycanı qanun yox, qanunları məmurlar idarə edirlər. Bu ölkə niyə bu günə qaldı, axı?!

Mən başqa ölkələrin əsarəti altında yaşamaq istəməzdim. Amma belə çıxır ki, biz azadlığı özümüz üçün yox, məmurlar üçün qazanmışıq. Ona görə də bu qədər dəyərsiz olduq. Deyəsi, sözüm çoxdur, zərər görmüş insan kimi ürəyim doludur...

Təəssüflə qeyd edirəm ki, indi iqtidarda olan insanların 95 %-i rüşvətxordur. Onların gözləri doymur. Hakimlərin səhvinin sübutu olsa da, onlardan şikayət etmək olmur. Heç bir qurum sənin şikayətinə baxmır.

Hakim Atabəy Kiçikbəyovun oğlu Emin Kiçikbəyovun adını eşidən vəkillər geri çəkilir. Görünür, Emin Kiçikbəyov atasının müdafiəsiçi olmaq üçün vəkil olub. Həmin vəkili tanımıram, amma tanıyanlar belə deyir.

Məsələ ilə bağlı Amil Xəlilin efrinə də çıxmışam. Lakin söhbət hakimdən gedir deyə, şikayətə baxan yoxdur.

Jalə FAMİLQIZI

Redaksiyadan: Yazıda adları çəkilən şəxslərin mövqeyini dərc etməyə hazırıq.