Kanal S rəhbərliyi maaşını ala bilmədiyi üçün şikayət edən qardaşımın əmək haqqını ödəmədi, məni də işdən çıxardı.

Sozcu.info xəbər verir ki, bunu Axar.az-a açıqlamasında Kanal S-in keçmiş əməkdaşı Rəşad Mikayılov deyib.

Onun sözlərinə görə, kanalda işçi problemi olduğu üçün qardaşını operator kimi işə dəvət edib:

“Kanal-S-də qardaşım Sərdar Mikayılovun işini bəyəndilər və işə götürmək istədilərini dedilər. May ayında qardaşım Kanal S-də fəaliyyətə başladı. 5 gün işlədikdən sonra kanal rəhbərliyi qardaşımın sentyabr ayında rəsmi işə götürüləcəyini bildirdi. Bu müddət ərzində aylıq məvacibini alacağı ilə bağlı razılaşdılar. 3 ay işlədikdən sonra isə qardaşımı nə işə götürdülər, nə də bu müddət ərzində əmək haqqını verdilər. Qardaşım da əvvəlcə Əmək Müfəttişliyinə, daha sonra Şəki Şəhər Məhkəməsinə şikayət etdi. Şikayətdən sonra qardaşıma cəmi 1000 manat pul verdilər. Bu da 3 aylıq zəhmətinin qarşılığı deyildi”.

Rəşad Mikayılov əlavə olaraq bildirib ki, qardaşı ilə problemdən sonra kanal onun da işdən çıxmasını tələb edib:

“8 avqustda mənə rəsmi formada xitam məktubu göndərib, işdən çıxmağımı və qardaşımın şikyətini geri götürməyini istədilər. Əmək Müfəttişliyi 3000, Şəki Şəhər Məhkəməsi kanalı 20 000 manat məbləğində cərimələdi. Şikayət edən şəxs ailə üzvüm olduğuna görə də dekabrın 3-ü mənim işimə xitam verildi”.

Məsələ ilə bağlı Kanal S-dən açıqlama almaq istəyimizə cavab verilməyib.