Bakıda tanınmış tibb müəssisələrindən biri olan “Yeni Klinika”nın qarşısında Azərbaycan bayrağı tərsinə asılıb.

KONKRET.az xəbər verir ki, milli dəyərlərimizə hörmətsizlik göstərən klinika rəhbərliyi Azərbaycanın dövlət bayrağına da sayğısızlıq nümayiş etdirib. Hələ dövlət rəmzinin hansı qaydada asılması barədə məlumatı olmayan “Yeni Klinka” rəhbərliyi bayrağı asmazdan qabaq onun rənglərinin necə sıralanmasına fikir verməliydi.


Bayraq xalqımızın qürur yeri, namusudur. Azərbaycanın Dövlət rəmzlərindən olan bayraq həm də and yerimizdir. Dalğalandıqca qürur duyduğumuz üçrəngli bayrağımızın hər rəngi özündə bir məna kəsb edir. Mavi, qırmızı və yaşıl rəngdən ibarət olan Azərbaycanın Dövlət bayrağına hörmət isə hər bir Azərbaycan vətəndaşının borcudur. Lakin rastlaşdığımız bu mənzərə bayrağımıza olan hörmətsizliyi özündə ehtiva edir.

Yeri gəlmişkən, qeyd edək ki, son günlər klinikada neqativ proseslər baş verir. Növbəti yazılarımızda bu barədə geniş məlumat verəcəyik.

Paytaxtın köhnə doqquz mərtəbəli binalarının əksəriyyətində lift sistemi nasazdır və həmin binalarda yaşayan sakinlər üçün ciddi həyati təhlükə mənbəyinə çevrilib. Belə ki, magistral və şəhər mərkəzində yerləşən bu köhnə, sovet dövründən qalma binalar müxtəlif üzlüklərlə sadəcə görüntü naminə "yenilənmiş" olsa da, binaların blokları və lift sistemləri bərbad haldadır - necə deyərlər, üstü bəzək, altı təzək.
Məsələn, Biləcəri qəsəbəsində yerləşən həmin doqquz mərtəbəli binalardan birinin lift sistemi "can üstədir". Blok sakinləri kiminsə nə zamansa o lift ucbatından həyatından olacağını çox yaxşı bilsələr də, əllərindən heçnə gəlmir. Sakinlərdən Bizimyol.info xəbər portalına verilən məlumata görə, binanın lift sisteminin yenilənməsi üçün yerli aidiyyəti qurum tərəfindən vəsait toplanılsa da, lift dəyişdirilməyib: "Binanın blokunda təqribi 30 ailə yaşayır, hər birindən ayda üç manatdan yığırlar. Bir ara dedilər ki, yeni liftlər gətiriləcək, bunun üçün pul toplayırlar, amma heç nə olmadı. Vəsaiti yığdılar, sonra da yox elədilər. İndi bu liftlərə minib, ən yuxarı mərtəbəyə qalxanda, dua edirsən ki, sağ-salamat çata bilim. Liftin düymələrinin çox hissəsi işləmir. Məsələn, 4-cü mərtəbəyə çıxmaq istəsən, gərək lifti 6-cı mərtəbəyə qaldırıb, ordan aşağı düşəsən, çünki 4-cü mərtəbəyə aparan düymə işləmir. Bəzi düymələr isə ümumiyyətlə yoxdur".

Qeyd edək ki, bu liftlər həm də anti-sanitar vəziyyətdədir. Onsuz da bir neçə aydan, hətta ildən bir təmizlənən bloklara yay fəslində üfunət qoxusundan girmək olmur, liftlər isə ondan betər.

QEYD: Videoda gördüyünüz bu lift təkcə bir nəfəri daşımaqda çətinlik çəkir - silkələnir, dayanır, çətinliklə qalxır və enir. Düşünün ki, buna iki və ya daha çox sakin minsə, nəticə nə olar. Kimlərinsə "lift pulu" adı altında bina sakinlərini aldatması, pulları mənimsəməsi gələcəkdə həmin binalarda baş verə biləcək bədbəxt hadisələrə qapı açır. Hadisə olduqdan sonra hər kəs "lift ustası", "ekspert" olub, qurumları qınayacaq. Olmazmı ki, bu problem hər hansı bir bədbəxt hadisə baş vermədən öncə dərhal aradan qaldırılsın? Bir hadisə olmamışdan onun səbəblərini aradan qaldırmaq, hadisə olduqdan sonra nəticələrini aradan qaldırmaqdan daha asandır. bizimyol.info//

Baş Prokuror yanında Korrupsiyaya qarşı Mübarizə Baş İdarəsinin Bakı Nəqliyyat Agentliyində (BNA) apardığı yoxlamalar FETÖ faktorunu yenidən diqqət mərkəzinə gətirib.

Teref.az bildirir ki, Yenicag.az-a daxil olan məlumata əsasən, BNA-da yoxlamaların aparılması və qurumun bir neçə məsul şəxsinin saxlanılmasından sonra növbənin agentliyin rəhbəri Vüsal Kərimliyə çatacağı bildirilir.

Qeyd olunur ki, BNA-nın fəaliyyətində ciddi nöqsanların olması və bu qurumdan vətəndaş şikayətlərinin ardı-arasının kəsilməməsi ilə yanaşı, yoxlamaları aktuallaşdıran başqa ciddi amil də mövcuddur. Söhbət FETÖ terror şəbəkəsinin BNA-da ciddi dayaqlarının olmasna dair şübhələrdən gedir.

Daha konkret ifadə olunsa, BNA İdarə Heyətinin sədri Vüsal Kərimlinin FETÖ ilə əlaqələrinin mövcudluğu haqda zaman-zaman media vasitəsilə ictimailəşən məlumatların Agentlikdə belə bir yoxlamanı şərtləndirməsi qətiyyən istisna edilmir.

Digər tərəfdən, vaxtilə Türkiyə mətbuatında da Vüsal Kərimlinin FETÖ ilə bağlılığı haqda xəbərlər yayımlanıb. Vaxtilə “Yeni Akit” qəzetində dərc olunan materialda terrorçubaşı Fətullah Gülənə bağlı Lənkəran Türk Kollecinin məzunu olan Kərimlinin şəbəkə ilə sıx əlaqələrindən bəhs edilmişdi.

“Yeni Akit”də yazılanlara görə, Vüsal Kərimli FETÖ və şəbəkənin “imam”ları ilə bağlı aktiv paylaşımlar etdiyi “Facebook” hesabını 2014-cü ildə bağlayıb. Bildirilir ki, təhsil dönəmində gülənçilərin himayəsində olan Kərimli şəbəkəyə sədaqətini isbatladığı üçün FETÖ-nün güvənli fiqurlarından birinə çevrilib.

O baxımdan, Azərbaycanda son günlər FETÖ əleyhinə əməliyyatların keçirildiyini nəzərə alsaq, BNA-da aparılan yoxlamalarda “FETÖ istiqaməti”nin olduğunu ehtimal etmək mümkündür.

Baş Prokuror yanında Korrupsiyaya Qarşı Mübarizə Baş İdarəsi Tərtər rayon İcra Hakimiyyətində əməliyyat keçirib.

APA xəbər verir ki, idarə əməkdaşlarının keçirdiyi əməliyyat-axtarış tədbirləri nəticəsində korrupsiya faktları ilə bağlı icra hakimiyyətinin vəzifəli şəxsi saxlanılıb.
Baş Prokurorluğun mətbuat xidmətindən APA-ya bildirib ki, əlavə məlumat veriləcək.

SABUNÇU RAYON İCRA ŞÖBƏSİNİN RƏİSİ FÜZULİ HÜSEYNOVUN VƏ İCRA MƏMURU DAŞQIN HƏSƏNƏLİYEVİN QANUNSUZ VƏ QƏRƏZLİ HƏRƏKTLƏRİ HAQQINDA

Əvvəlcə, ona nəzər yetirək ki, Bakı Apellyasiya Məhkəməsinin Mülki Kollegiyası nümayəndəsi olduğum vətəndaş Qarayev Kamil Fəxrəddin oğlunun cavabdeh qismində iştirak etdiyi 2(103)-5635/2022 nömrəli mülki iş üzrə 24 oktyabr 2022-cü il tarixli ədalətsiz, qanunsuz və əsassız qətnamə qəbul edib. Həmin qətnamə tərəflər(ər-arvad) arasında ümumi mülkiyyətə daxil olmayan əmlakın bölünməsini müəyyən edirdi. Baxmayaraq ki, iş üzrə iddiaçı Qarayeva Afət Qabil qızı məhkəmə baxışı iclasında verdiyi izahatda etiraf edərək qeyd etmişdi: ...birgə nikah dövründə cavabdehin atasının evi satıldı, onlara düşən pay kimi 20.000 ABŞ dolları verildi, onlar da həmin məbləğin üstünü düzəldib, 35.000 ABŞ dollarına bu evi almışlar...(Bakı Apellyasiya Məhkəməsinin 24.10.2022-ci il tarixli, 2(103)-5635/2022№-li qətnaməsi: Tərəflərin izahatları 12-ci abzas).

Həmin qətnamədən kassasiya şikayəti verilsə də, Ali Məhkəmənin Mülki Kollegiyası həmin şikayəti təmin etməmişdir.

Həmin qərardan hazırda əlavə kassasiya şikayəti verilmişdir. Qətnamə qanuni qüvvəyə mindiyindən icra olunması üçün Bakı şəhəri Sabunçu Rayon İcra Şöbəsinə icra vərəqəsi verilmiş, iş üzrə icraat həmin icra şöbəsinin məmuru Daşqın Səfərəliyevə həvalə edilmişdir.

Daşqın Həsənəliyev tərəfindən isə 12 iyul 2023-cü il tarixli borclu Qarayev Kamil barəsində “məcburi gətirilmə” haqqında qərar qəbul edilmişdir. Həmin qərarın sürəti isə mənim tərəfimdən 18 iyul 2023-cü il tarixdə sənədin kötüyünə imza edilməklə təhvil alınmışdır.

Qərar belə əsaslandırılmışdır ki, guya borclu icra məmurunun icraatında olan məlum icra işi üzrə icraatdan yayınmış, çoxsaylı xəbərdarlıqlara baxmayaraq icra şöbəsinə getməkdən boyun qaçırıb. Daha sonra məlum olmuşdur ki, həmin qərardan göstərilən müddət gözlənilmədən 17 iyul 2023-cü il tarixdə “məcburi gətirilmə haqqında” təqdimatla məhkəməyə müraciət edilmişdir.

Təqdimat belə əsaslandırılmışdır ki, guya borclu icra məmurunun icraatında olan məlum icra işi üzrə icraatdan yayınmış, dəfələrlə ona çoxsaylı çağırış vərəqəsi göndərilməsinə baxmayaraq icra şöbəsinə gəlməyib.

Təqdimatın əsası kimi həm də o göstərilmişdir ki, guya icraata başlamaq haqqında qərarın sürəti, habelə “məcburi gətirilmə haqqında qəbul edilmiş qərar” borclunun təqdimatda göstərilən faktiki yaşayış ünvanına göndərilmiş, lakin borclu həmin qərardan şikayət verməmişdir.

Aşağıda qeyd olunanlara əsasən icra məmurunun qeyd olunan hərəkətlərini qanunsuz və qərəzli hesab edirəm. Belə ki, icra məmuru tamamilə işin həqiqi hallarına uyğun olmayan qərar qəbul etmişdir.

Bu baxımdan ilk növbədə onu nəzərinizə çatdırmaq istəyirəm ki, sözügedən icra məmurunun icraatına daxil olmuş iş üzrə icraata başlamaq haqqında qərarın sürəti faktiki olaraq borclunun yaşadığı və icra məmuruna da məlum olan ünvana göndərilməmişdir.

Bundan başqa borclu barəsində qəbul edilmiş “məcburi gətirilmə” haqqında 12 iyul 2023-cü il tarixli qərarın sürəti, habelə təqdimatda qeyd olunan “çoxsaylı xəbərdarlıqlar” onun yaşadığı ünvana göndərilməmişdir. Bu halları təsdiq edən sübutlar mövcud deyil.

İşin həqiqi halları isə ondan ibarətdir ki, borclu icra işinin sözügedən icra məmuru Daşqın Həsənəliyevin icraatına verilməsi haqqında 07 iyul 2023-cü il tarixdə “sms bildiriş” vasitəsilə məlumat almış, bundan sonra nümayəndəsi kimi mənə məlumat vermişdir.

Mən isə öz növbəmdə növbəti işi günündə, yəni 10 iyul 2023-cü il tarixdə Sabunçu Rayon İcra Şöbəsinə getməklə icra məmuru Daşqın Həsənəliyev haqqında yazılı etirazı, həmçinin icra şöbəsinin rəisi cənab Füzuli Hüseynova ünvanlanmış ərizəni icra şöbəsinin dəftərxanasına təqdim etmişəm. Bu da ilk növbədə onu təsdiq edir ki, tərəf borclu kimi icraatdan yayınmamış və icra icraatında səlahiyyətli nümayəndəsi vasitəsilə vaxtında və qanuni şəkildə təmsil olunmaqla öz hüquqlarından istifadə etmişdir.

“İcra haqqında Azərbaycan Respublikasının Qanunu”nun 42.3-cü maddəsinə əsasən İcra məmuruna etiraz etmə haqqında məsələ icra qurumunun və ya icra xidmətinin rəhbəri tərəfindən on gün müddətində həll edilir. Həmin qanunun 42.6-cı maddəsinə əsasən icra məmuruna etiraz təmin edilmədikdə, tərəflər bu barədə qərarın sürətini aldıqdan sonra 10 gün müddətində müvafiq məhkəməyə şikayət edə bilərlər.

Lakin 18 iyul 2023-cü il tarixdə Sabunçu Rayon İcra Şöbəsində olarkən mənə məlum olmuşdur ki, icra məmuru D.Həsənəliyevə edilmiş etiraz təmin olunmasa da, bu barədə müvafiq qərar qəbul edilməmişdir. Onu da qeyd edim ki, həmin gün icra şöbəsinin nə rəisi, nə də müavini yerində olmamışdır ki, bu qanunsuz halın səbəbini aydınlaşdırmaq mümkün olsun. Barəsində etiraz edilmiş icra məmuru Daşqın Həsənəliyev isə bu halı onunla izah etmişdir ki, icra məmuruna edilmiş etirazlarla bağlı qərarın formasını Nazirlər Kabinenti təsdiq etməyib. Ona görə də belə qərarlar qəbul edilmir.

Əlbəttə ki, onun bu mövqeyi müvafiq qanunvericiliyin tələblərinə və həmin qanunvericiliklə icra icraatında təmsil olunan tərəflərin hüquqlarına zidd olduğundan tamamilə qanunsuz və qərəzlidir. Ümumiyyətlə icra işinin gedişatında yaranmış hallar onu təsdiq edir ki, həqiqətən də icra məmuru Daşqın Həsənəliyevə etiraz etməkdə haqlı olmuşam.

Məhz 18 iyul 2023-cü il tarixdə nümayəndə kimi mən Samir Zeynalov tələbin könüllü icrası haqqında bildirişi və həmçinin “məcburi gətirilmə haqqında” 12 iyul 2023-cü il tarixli qərarı şəxsən imza etməklə icra məmurundan təhvil almışam. Və elə həmin gün icra məmuru tərəfindən “məcburi gətirilmə haqqında” qərarda göstərilmiş 10 gün müddət gözlənilmədən məhkəməyə təqdimat verilmişdir. Təqdimatda guya həmin qərarın sürətini borclunun aldığı və şikayət vermədiyi göstərilmişdir. Hətta fərz etsək ki, həmin qərarın sürətini həqiqətən almışıq, bu yenə də icra məmuruna sözügedən təqdimatla məhkəməyə müraciət etmək hüququnu tanımırdı. Çünki qəbul edilmiş qərardan şikayət verilməsinin sonuncu günü 22 iyul 2023-cü il tarixə təsadüf edirdi.

Göründüyü kimi icra məmuru hətta bu müddəti belə gözləmədən məhkəməyə qərəzli sürətdə müraciət etmiş və açıq-aşkar mənimlə ünsiyyəti zamanı qərəzli olduğunu gizlədə bilməyərək qanunsuz olan bu hərəkətini özünün “operativliyi” ilə əlaqələndirmiş və nəticədə “yaxşı etdiyini” bildirimişdir.

Bundan başqa nümayəndə kimi iş üzrə izahat verməyi təklif etsəm də, izahatı yalnız borclunun özü verə biləcəyi mənə bildirilmişdir.

Halbuki, İcra haqqında Qanunun 34.1-ci maddəsinə əsasən icraatda iştirak edən nümayəndə təmsil etdiyi şəxsin adından icraatla bağlı bütün hərəkətləri etmək hüququna malikdir.

Beləliklə konkret olaraq onu qeyd etmək istəyirəm ki, barəsində etiraz edilmiş icra məmuru həmin etiraz məsələsi məhkəmə müstəvisində tam həllini tapmayana qədər, habelə boclunun icraatdan yayındığını göstərən hallar yaranmadığı təqdirdə belə qərar qəbul etmək hüququna sahib deyildi.

Diqqətçəkən və maraq doğuran başqa bir məqam isə odur ki, icra məmuru tərəfindən 04 iyul 2023-cü il tarixdə yazılı xəbərdarlıq tərtib olunur, amma “sms bildiriş” 07 iyul 2023-cü il tarixdə borcluya daxil olur. Hansı ki, həmin “sms bildiriş” alındıqdan sonra nümayəndə kimi mən Sabunçu Rayon İcra Şöbəsində olmaqla icra məmuruna əsaslandırılmış etiraz təqdim etmişəm. Bundan sonra isə etiraz məsələsi həll olunmadan icra məmuru tərəfindən borclu barəsində 12 iyul 2023-cü il tarixli “məcburi gətirilmə haqqında” qərar qəbul edib.

Bir daha qeyd etmək istəyirəm ki, istər tələbin könüllü icrası haqqında bildirişi, istər “yazılı xəbərdarlığı”, istərsə də 12 iyul 2023-cü il tarixli “məcburi gətirilmə haqqında” qərarı nümayəndə kimi mən Samir Zeynalov sənədlərin kötüyünə imza etməklə şəxsən 18 iyul 2023-ci il tarixdə təhvil almışam. Bütün bunlara baxmayaraq icra məmuru qanunsuz və son dərəcə qərəzli davranmaqla- işin faktiki hallarını özündən əks etdirməyən və tamamilə yalana söykənən qanunsuz və əsassız təqdimatla elə həmin gün məhkəməyə müraciət etmişdir.

Ona görə də yuxarıda qeyd olunanlara dayanaraq icra məmuru cənab D.Həsənəliyevin və həmçinin icra şöbəsinin rəisi cənab F.Hüseynovun hərəkətlərini qərəzli olmaqla qanunsuz edirəm. İstisna etmirəm ki, sözügedən icra məmuru tələbkar tərəflə hər hansısa formada sövdələşməklə ona təyinatına uyğun olmayan üstünlüklər verə bilər. Çünki tələbkar tərəfin qanunsuz maraqlarının təmini istiqamətində icra məmuru tərəfindən edilmiş qeyd olunan qanunsuz hərəkətlərin məcmusu, o cümlədən icra məmuruna vaxtında edilmiş etirazın həllinə dair qərarın qəbul edilməməsi və həmin qərarın sürətinin təqdim olunmaması halları başqa cür düşünməyə əsas vermir. Məhz göstərilən qanunsuz hərəkət və hərəkətsizliklərdir ki, icraat zamanı tərəf kimi borclunun hüquqlarının təmin olunması və həyata keçirilməsində süni maneələr yaratmışdır.

Azərbaycan Respublikasının “İcra məmurları haqqında Qanunu”nun 9-cu maddəsinə əsasən İcra məmurları onlara verilən hüquqlardan qanuna uyğun istifadə etməyə və öz fəaliyyətlərində fiziki və hüquqi şəxslərin hüquqlarının və qanuni mənafelərinin pozulmasına yol verməməyə borcludurlar.

Azərbaycan Respublikasının “Korrupsiyaya qarşı mübarizə haqqında Qanunu”nun 9.3.6 və 9.3.12-ci maddələrinə əsasən qərarların qəbul edilməsi zamanı fiziki və ya hüquqi şəxslərə onların təyinatına uyğun olmayan üstünlüklər vermək, həmçinin fiziki və ya hüquqi şəxslərə hüquqlarının və qanuni mənafelərinin həyata keçirilməsində süni maneələr yaratmaq korrupsiyaya şərait yaradan hüquqpozmalar sayılır.

Odur ki, qeyd edilənləri nəzərə alaraq Azərbaycan Respublikasının Ədliyyə Naziri cənab Fikrət Məmmədovdan və Məhkəmə Qərarlarının İcra Baş İdarəsinin rəisi cənab İlqar Cəfərovdan Sabunçu Rayon İcra Şöbəsinin icra məmuru Daşqın Həsənəliyevin, eləcə də həmin şöbənin rəisi Füzuli Hüseynovun qanunsuz hərəkətlərinə hüquqi qiymətin verilməsini və göstərilən neqativ halların aradan qaldırılmasının təmin olunmasını xahiş edirəm.

Samir ZEYNALOV,
Hüquq müdafiəçisi, səlahiyyətli nümayəndə
hurriyet.az

68 yaşlı Elmahir Rzayev: “Prezidentə, Mehriban xanıma müraciət edirəm”

Naxçıvan sakini Elmahir Rzayev deyir ki, Muxtar Respublika rəhbərliyində dəyişiklik olanda 20 il əvvəl zorla əlindən alınmış əmlakını geri qaytaracağına ümidi yaranmışdı. Elə ona görə də dəyişiklikdən sonra rəhbər vəzifələrə yeni təyin olunan şəxslərin bir çoxuna müraciət edib. Onun sözlərinə görə, bu müraciətlərdən sonra ümidləri azalmağa başlayıb.

“Atası Vasif Talıbovun müəllimi olub deyə…”

68 yaşlı Elmahir Rzayev Meydan TV-yə danışır ki, Naxçıvan şəhərində, Dəmiryol vağzalının yanında obyekti vardı. Həmin obyekti 2004-cü ildə razılığı alınmadan, məhkəmə qərarı olmadan, dəyərini də ödəmədən söküblər. Üstündən 20 ilə yaxın vaxt keçməsinə baxmayaraq, nə əmlakını bərpa elətdirə bilir, nə də pulunu ödəyirlər.

Elmahir Rzayevin əmlakı Əlincə məhəlləsində, Naxçıvan Dəmiryolu vağzalının sağ tərəfində yerləşirmiş. Bunu təsdiqləyən sənədlər də var.

Əmlak sahibinin sözlərinə görə, 1999-cu ildə alıb, 2002-ci ildə özəlləşdirdiyi bu obyekt Azər Zeynalov “Naxçıvan Dəmir Yolları”na rəis təyin olunandan az sonra sökülüb.

“Mən özüm də dəmiryolunda işləyirdim. Azər Zeynalov dedi ki, guya sədrin – Vasif Talıbovun göstərişidir, sökülməlidir. Dedim ki, bura mənim şəxsi mülkiyyətimdir. Azər Zeynalovun atası Şərurda Vasif Talıbovun müəllimi olub. Vasif Talıbov müəlliminin oğlunu əvvəl Ali Məclisə gətirmişdi, sonra da Dəmiryol idarəsinin rəhbəri təyin elədi. O da başımıza belə oyun açdı. Hətta ona da razılaşdım ki, sökülürsə, bir məktub verilsin ki, dövlət əhəmiyyətli iş görülür, ona görə eləyirlər.. Bundan da imtina elədilər. Aramızda böyük söz-söhbət oldu. Mən bu dərəcədə gözləmirdim. Əmlakımı sökəndə belə, xəbərim olmadı”.

“Günün birində bu bandanın dağılmasını gözləyirdim”

Elmahir Rzayev danışır ki, həmin obyekt dülgər sexi kimi fəaliyyət göstərirdi. Oradan özü də daxil olmaqla, xeyli adam evinə çörək pulu aparırdı. Onun sözlərinə görə, Vasif Talıbovun rəhbərliyi dövründə Naxçıvanda vəziyyət eləydi ki, insanların başına nə oyun açılsa da, adamlar səsini çıxara bilmirdi:
“Ona görə də səbr edib, günün birində bu bandanın dağılmasını gözləyirdim. Nəhayət, o gün gəlib çıxdı. 2022-ci il dekabrın 6-da Dövlət Təhlükəsizliyi Xidmətinin Naxçıvan şöbəsinə ərizə verdim. Oradan bir nəfər nümayəndə mənimlə görüşdü. Bütün sənədləri ona verdim. Uzun illər dəmiryolunda işləmişəm, bütün bildiklərimi danışdım. Hətta obyektimin yerinə də apardım. Gördü ki, obyektimi söküblər, yerində heç ağac da əkməyiblər. Üstündən uzun müddət keçəndən sonra – fevral ayında mənə dedi ki, o iş bizlik deyil. Prokurorluğa da getmişdim. Sonra Ali Məclisə müraciət elədim. Aprelin 4-də səlahiyyətli nümayəndəyə teleqram göndərdim. Xahiş elədim ki, məni qəbul eləsin. O da qəbul eləmədi…”.


“Düşünürəm ki, bu ölkənin yiyəsi var”

Naxçıvan MR-dakı yeni məmurlardan da ümidini üzdüyünü deyən Elmahir Rzayev vurğulayıb ki, ona qarşı bu cür davranış həm də qürurunu zədələyib. Onun sözlərinə görə, məmurların belə münasibəti qarşısında özünü alçalmış hiss edir:

“Onsuz da 20 ildir o əmlakı itirmişəm. Banda dağılandan sonra bir ümid yaranmışdı. Bu cür davranışla o ümidi öldürməklə yanaşı, həm də məni alçaltmış oldular. Mən düşünürəm ki, bu ölkənin yiyəsi var. Ona görə prezidentə, Mehriban xanıma müraciət etmək istəyirəm. Mən nə istəyirəm ki?! Özümün olanı, əlimdən zorla alınanı istəyirəm də. Çox təəssüf ki, vicdan deyilən şey hər adamda olmur. Mən bu yaşımda niyə bu vəziyyətə qalmalıyam?”.