 |
|
|
İşğaldan azad edilmiş şəhər və kəndlərimizə qayıdış proqramı zaman-zaman müzakirəyə çıxarılır, ictimai müzakirələrin olması, sayının artırılması, keyfiyyətinin yüksəlməsi vacibdir. Bu gün də Füzulidə Şəhərsalma Məsələləri üzrə İşçi Qrupun iclası keçirilib, bəzi açıqlamalar var, məsələn, "Füzuli şəhəri işgüzar mərkəzə çevriləcək", “Füzuli şəhərinin əhalisi 50 000 nəfərə çatacaq”, “Yaxın 3 ildə Füzulidə 6 minə yaxın ev tikiləcək” və s.
Qulağa xoş gələn bəyanatlardır, vədlərdir, amma bir nəfər səlahiyyətli şəxs çıxıb demir ki, bu hədəflərə necə nail olmaq mümkün olacaq?! Yəni, yolu-yöntəmi necə olacaq, əhali orada nə işlə məşğul olacaq, bütün işlər ancaq büdcə hesabınamı görüləcək, iş yerləri ancaq dövlət-büdcə sektorundamı yaranacaq?!
Bu suallara cavab vermək üçün hökumət gərək papağını qabağına qoyub fikirləşsin ki, son 30 ildə işğal olunmamış ərazilərdən Bakı və Abşerona nədən 1 mln. insan köç edib (məcburi köçkünləri nəzərə almadan, digər regionlardan 1 mln. nəfər köç edib)?! Yəni, niyə camaat Kürdəmirdən, Qaxdan, Qubadan, Astaradan, Ağcəbədidən, Tovuzdan və s. rayonlardan köç etdi?! Əgər bunun səbəbləri təhlil edilib doğru qərarlar verilməyəcəksə, kim zamanət verir ki, məsələn, Füzuliyə 2025-də köçən 2027-də geri Bakıya qayıtmayacaq?! Yaxşı, nədən 30 ildə, məsələn, Zaqatala işgüzar mərkəzə çevrilməyib (orda da boş qalan hava limanı var), amma Füzuli çevriləcək?!
Uzun sözün qısası: Nə qədər ki, son 30 ildə aparılan yanlış regional, iqtisadi, sosial, təhsil və idarəetmə siyasətində köklü dəyişikliklər olmayıb, nə qədər ki, yerli özünüidarə insitutları yaradılmayıb, işğaldan azad edilən ərazilərə köçün orqanik və qalıcı olması mümkün deyil...
Natig Jafarli
Teref.az