İsrail müdafiə ordusu HƏMAS-ın iki yaraqlısının söhbətini tutub və yayımlayıb. Onlar Qəzzada
xəstəxanaya düşən raketin fələstinlilər tərəfindən atıldığını müzakirə edirlər
Sosial şəbəkələrdə yayımlanan audio fraqmentdə HƏMAS-ın iki yaraqlısının söhbəti verilib.
Onlar ərəb dilində danışırlar, onların nitqi subtitr ilə ingilis dilinə tərcümə olunur.
— Sənə deyirəm, ilk dəfədir ki, belə raketin düşdüyünü görürük, ona görə də deyirik ki, bu,
Fələstinin “İslam cihadı” raketidir.
– Bu, bizdəndir?
– Elə görünür.
– Bunu kim deyir?
– Onlar deyirlər ki, raket mərmisi yerlidir və İsrail mərmisinə bənzəmir.
– Allahım, partlamağa başqa yer tapmadı?
– Onu xəstəxananın arxasındakı qəbiristanlıqdan atıblar. Çalışmayıb və xəstəxanaya düşüb.
– Orada qəbiristanlıq var?
– Hə, elə, bu ərazidə.
Bundan əlavə, İsrail müdafiə ordusu zərbədən əvvəl və sonra xəstəxananın ətrafındakı ərazinin
videosunu yayımlayıb. Kadrlarda xəstəxananın yanında avtomobillərin park yeri, orada isə
yanmış avtomobillər görünür. Videodakı yazıdan bəlli olur ki, bura raket düşdükdən sonra
partlayışın baş verdyi yerdir. Videoda xəstəxananın damındakı mərmi də qeyd olunub.
Növbəti kadrda müqayisə üçün raket zərbəsindən qalan krater göstərlir. Xəstəxana ərazisində
kraterin görünən izləri yoxdur. İsrail hərbçilərinin sözlərinə görə, raket birbaşa xəstəxanaya
düşməyib.
Qəzzada “Əl-Əhli” xəstəxanasına raket zərbəsi ötən gün axşam endirilib. Fələstin Muxtariyyəti
Səhiyyə Nazirliyi zərbədən dərhal sonra 500 nəfərin öldüyünü bildirib. Daha sonra Al Arabiya
telekanalı bildirib ki, ölənlərin sayı 800 nəfərə çatıb.
Çərşənbə günü brifinqdə SAXAL nümayəndəsi Daniel Haqari bildirib ki, ötən gün saat 18:59-a
yaxın xəstəxananın arxasındakı qəbiristanlıqdan “İslam cihadı” tərəfindən 10-a yaxın raket atılıb.
“HƏMAS əslində baş verənləri gizlətmək üçün qlobal media kampaniyası başlatmağa qərar
verib. İşi o dərəcəyə çatdırıblar ki, hətta qurbanların sayını şişirtməyə başlayıblar”, – Haqari
deyib.
Turan

İsrail Müdafiə Qüvvələrinin Hərbi Kəşfiyyat İdarəsinin rəhbəri general-mayor Aharon Xaliva HƏMAS-ın oktyabrın 7-də İsrailə qarşı hücuma keçməsinə imkan verən səhv hesablamalara görə məsuliyyəti öz üzərinə götürüb.

Gununsesi.info xarici KİV-ə istinadən xəbər verir ki, bu haqda o tabeliyində olanlara müraciətində deyib.

“Ən vacib tapşırığımızı yerinə yetirməmişik. Rəhbər kimi bu uğursuzluğa görə tam məsuliyyət daşıyıram. Son 11 gün ərzində hərbi kəşfiyyat bölmələrinə səfərlərim zamanı hər zaman müharibənin başlanmasının kəşfiyyat uğursuzluğu olduğunu vurğulamışam. Nəyi araşdırmağa ehtiyac var, biz dərindən və hərtərəfli araşdıracağıq. Amma indi yalnız bir vəzifə var – mübarizə aparmaq və qalib gəlmək”, – general-mayor bildirib.

Ukrayna Prezidenti Volodimir Zelenski ABŞ-dan ATACMS raketlərini aldıqlarını və artıq onlardan istifadə etdiklərini təsdiq edib.

"Ukrayna üçün çalışan və döyüşənlərə təşəkkür. Kömək edənlərin hamısına təşəkkür. Bu gün isə Amerika Birləşmiş Ştatlarına xüsusi təşəkkür. Prezident Baydenlə bizim bütün razılaşmalarımız həyata keçirilir. Çox dəqiqliklə həyata keçirilir - ATACMS-lar özlərini yaxşı göstərdilər", - Prezident ənənəvi axşam müraciətində deyib.

***

Rusiyalı təbliğatçılar Ukrayna Silahlı Qüvvələrinin guya müvəqqəti işğal olunmuş Berdyansk və Luqansk aerodromlarını Amerika ATACMS raketləri ilə vurması versiyasını təbliğ etməkdə davam edirlər.

“AzPolitika.info” bu barədə UNİAN-a istinadla xəbər verir.

Xüsusilə, «Vaqner» qrupu ilə əlaqəli olan "Grey Zone" sosial media səhifəsi Berdyansk aerodromuna hücumdan sonra tapılan parçaların fotosunu dərc edib.

"Mövcud məlumatlara əsaslanaraq, 99% əminliklə deyə bilərik ki, düşmən susrsatları faktiki olaraq ABŞ-dan alıb və MGM-140 ATACMS taktiki raket sistemindən istifadə edib. Bu halda, zərbə ATACMS versiyası ilə həyata keçirilib: Raketi özündə birləşdirən Blok-1A (M39A1) kompleksi 200-dən 300-ə qədər M74 sursatından ibarətdir və 300 km-ə qədər məsafədəki hədəfləri vurmaq qabiliyyətinə malikdir”, - deyə təbliğatçılar bildirir.

Ukrayna Müdafiə Qüvvələrinin güclü müqavimət göstərməsi səbəbindən Rusiya qoşunları Limansky istiqamətində hücumu dayandırıb.

Axar.az xəbər verir ki, bu barədə Ukrayna Silahlı Qüvvələrinin "Şərq" qoşun qrupunun mətbuat xidmətinin rəhbəri İlya Yevlaş bildirib.

Yevlaş bildirib ki, bu barədə rusların özləri dəfələrlə məlumat veriblər və onların irəliləyişinə sıx mina zonası böyük mane olur.

“Bizim bu istiqamətdə güclü möhkəmləndirilmiş ərazimiz var. Ukrayna Silahlı Qüvvələri bu susqunluğun uzun sürməyəcəyinə inanır. Çox güman ki, düşmən bu istiqamətdə hücum əməliyyatlarını bir neçə gündən sonra, bəlkə də daha tez bərpa edəcək. Ruslar indi yenidən qruplaşmaq və öz ordularını bərpa etmək üçün geri çəkilib”.

Xəbər verdiyimiz kimi, polis general-mayoru Sərdar Səfərov Xankəndiyə komendant təyin edilib.

Teleqraf.com xəbər verir ki, Sərdar Səfərov 1973-cü ildə Sumqayıtda anadan olub. Dövlət Bədən Tərbiyəsi İnstitutunu, Türkiyə Respublikasının Jandarma Zabitlər Məktəbini və DİN-in Polis Akademiyasını bitirib.

1996-2005-ci illərdə Daxili qoşunlarda xüsusi təyinatlı bölük komandiri, Xüsusi təyinatlı taborun qərargah rəisi kimi xidmət edib. 2019-2022-ci illərdə Bakı Şəhər Baş Polis İdarəsinin İctimai Təhlükəsizlik İdarəsinin rəis müavini və həmin İdarənin rəisi olub. 2022-ci ilin fevralnda BŞBPİ rəisinin xidmət üzrə müavini vəzifəsinə təyin olunub.

Bu ilin yanvarında isə o, nazir Vilayət Eyvazovun əmri ilə Daxili İşlər Nazirliyinin Baş İctimai Təhlükəsizlik İdarəsinin rəisi təyin edilib.

S.Səfərov 2022-ci ildə Prezidentin sərəncamı ilə general-mayir rütbəsinə layiq görülüb.

“Hərbi xidmətlərə görə”, "İgidliyə görə", “Vətən uğrunda” medalları ilə təltif edilib. Ailəlidir, üç övladı var.

Qəzzadan gələn raketləri müvəffəqiyyətlə dəf etmək üçün “Dəmir Şüa” lazer raketdən müdafiə sistemindən uğurla istifadə edilir.

Yenilik dünyada ilk dəfə İsraildə tətbiq olunub.

Qeyd edək ki, İsrailin qabaqcıl “Dəmir Şüa” sisteminin dünyada analoqu yoxdur.

Onun ilk uğurlu sınaqları 2022-ci ildə keçirilib.
Qeyd edək ki, lazerlə raketlərin dəf edilməsi 3-4 dollara, “Dəmir Günbəz” raketdən müdafiə sistemilə bir raketin vurulması isə 50 min dollara başa gəlir.
Video burda:
https://t.me/aznovost/62959
Voice of İsrael

İran hakimiyyəti İsrailin Qəzza zolağında hərbi əməliyyatları dayandırmayacağı təqdirdə HƏMAS-a dəstək verməyə hazır olduğunu açıqlayıb. “The Jerusalem Post” yazır ki, Tehranın bu xəbərdarlığı BMT vasitəçiliyi ilə İsrailə çatdırılıb. İsrail komandanlığı İranın müdaxiləsinin Livanın cənubunda və Suriyada Hizbullah radikal qruplaşması tərəfindən müharibənin “ikinci cəbhəsi”nin açılmasından ibarət olacağını güman edir.

Şənbə günü İranın xarici işlər naziri Hüseyn Abdullahiyan Beyrutda BMT-nin Yaxın Şərqdə sülh üzrə koordinatoru Thor Vennesland ilə görüş keçirib. Bundan sonra o, HƏMAS liderlərindən biri İsmayıl Haniyə ilə görüşüb. Nazir HƏMAS-ın hücumlarını “Fələstin torpaqlarının yenidən azad edilməsi istiqamətində tarixi qələbə” adlandırıb və bu qrupla əməkdaşlığı davam etdirəcəyini vəd edib.

İranın BMT-dəki nümayəndəsi X sosial şəbəkəsindəki hesabında yazıb: “İsrailin hərbi cinayətləri və soyqırımı dərhal dayandırılmasa, BMT Təhlükəsizlik Şurasının məsuliyyət daşıyacağı genişmiqyaslı nəticələrə gətirib çıxara bilər”.

İsrail isə Qəzza zolağında HƏMAS yaraqlılarını məhv etmək üçün genişmiqyaslı quru əməliyyatına hazırlaşmağa davam edir. Bölgədə yaşayan mülki şəxslərə cənuba, Misirlə sərhədə daha yaxın ərazilərə təxliyə edilmələri tövsiyə olunur. On minlərlə insan artıq evlərini tərk edib. Misirin Qəzza zolağı ilə sərhəddə humanitar yardım aparan yük maşınlarının karvanları var, lakin Misir hələ də yeganə keçid məntəqəsini açmayıb.

İsrail bu gün yerli vaxtla səhər saat 10:00-dan 13:00-a kimi Qəzza zolağının cənubuna humanitar dəhliz açacağını bildirib.

ABŞ İsrail sahillərinə ikinci təyyarədaşıyan qrupunu göndərib.

İraqın şimalında “Pəncə-Kilid” əməliyyatı bölgəsində daha 6 PKK terrorçusunun zərərsizləşdirildiyi bildirilib.

Bu barədə Türkiyənin Müdafiə Nazirliyindən açıqlama verilib.

Nazirliyin sosial media hesabında yayılan şərhdə terror təşkilatı PKK-ya qarşı əməliyyatların effektiv və qətiyyətlə davam etdiyi bildirilib.

HƏMAS döyüşçüləri İsrailin yüksək texnologiyalı "Dəmir divarını" keçərək, 1200-dən çox israillinin ölümünə səbəb olacaq hücuma başlamazdan bir aydan az bir müddət əvvəl çox açıq şəkildə məşqlər edib.

Sentyabrın 12-də HƏMAS-ın sosial mediada yayımladığı iki dəqiqəlik təbliğat məqsədli videoda döyüşçülərinin partlayıcıdan istifadə edərək, maket sərhəd qapısını partlatdıqları, sonra isə yük maşınları ilə genişmiqyaslı hücuma keçdikləri, İsrail şəhərini, insanların kağızdan düzəldilmiş siluetlərini avtomatik silahlardan atəşə tutduqları nümayiş etdirilib.

İslamçı silahlı qruplaşmanın "Möhkəm sütun" adlı canlı atəş təlimində həmçinin zirehli geyimdəki döyüşçülərin keçən şənbə günü real ölümcül hücumda olduğu kimi, beton qüllələrin maketlərini və rabitə antenalarını məhv etdikləri göstərilib.

ABŞ ordusunun keçmiş zabiti, hazırda Vaşinqtonda qərargahlanan tədqiqat institutu olan Demokratiyaların Müdafiəsi Fondunun Hərbi və Siyasi Qüvvələr Mərkəzinin baş direktoru Bredli Bouman "Açıq şəkildə nəzərə alınmalı olan xəbərdarlıqlar və görüntülər var idi. Bəlkə də onlar götürülüb, lakin bu dəhşətli terror aktlarının qarşısını almaq üçün lazımi hazırlıqlara səbəb olmayıb" deyib.


Associated Press agentliyi HƏMAS-ın, xüsusilə Telegram sosial media tətbiqi vasitəsilə son bir ildə yyımladığı onlarla videonun əsas detallarını araşdırıb və təsdiq edib.

Associated Press peyk görüntülərindən istifadə edərək, şəhərin maketinin Qəzza Zolağının cənub sahilində, fələstinlilərin Əl-Məvasi şəhəri yaxınlığındakı səhrada qurulduğunu müəyyən edib. Darvazada üzərində ivrit və ərəb dillərində "Horeş Yaron" yazılmış böyük bir lövhə olub ki, bu, işğal altındakı Fələstinin İordan çayının Qərb sahilindəki mübahisəli İsrail qəsəbəsinin adıdır.

Keçən il dekabrın 28-də keçirilən "Möhkəm sütun" təliminin Telegram kanalında yayımlanan başqa bir videosunda HƏMAS döyüşçülərinin qülləsindən İsrail bayrağı dalğalanan bir tankın tam ölçülü modeli ilə yanaşı, İsrail hərbi bazası kimi görünən obyektə hücumu nümayiş etdirilib. Videoda silahlıların binaların arasından keçərək, İsrail əsgərləri rolunu oynayan digər kişiləri girov götürdüyünü də görmək olub.

Beləliklə, şənbə günü səhər tezdən HƏMAS döyüşçüləri bir neçə dəqiqə ərzində Netanyahunun divarını aşa bilib. Onlar bunu nisbətən daha asan - partlayıcılardan istifadə edərək, divarda dəliklər açıb və sonra motosikletlər və yük maşınlarının keçməsi üçün həmin dəlikləri buldozerlərlə genişləndirib. Kameralar və rabitə vasitələri əl qumbaraları və mərmilərı atmaq üçün uyğunlaşdırılmış kommersiya pilotsuz təyyarələri tərəfindən bombardman edilib. Bu, birbaşa Ukraynanın döyüş meydanlarından götürülmüş bir taktikadır.