İddiaya görə, məktəb rəhbərliyi ayrı-ayrı müəllimlər vasitəsilə hədə-qorxu ilə şagirdlərdən təmir işləri üçün vəsait toplayır

Orta məktəblərdə fond pulu biabırçılığına son qoyulması üçün tədbir görülməsinə baxmayaraq, Bakının bəzi məktəblərində müxtəlif səbəblərdən pul yığımı davam edir.

Məsələn, bu günlərdə AzToday.az-a ünvanlanan şikayət məktubundan məlum olur ki, Bakı şəhəri Suraxanı rayonunun 270 nömrəli tam orta məktəbində ayrı-ayrı siniflərdən ya valideynlər komitəsi, ya da sinif rəhbərləri vasitəsilə pul yığılır. İddiaya görə, hətta pul yığımı məsələsi bəzi siniflərdə valideynlər arasında ciddi narazılığa səbəb olub. Belə ki, pul yığımı məsələsindən məktəb rəhbərliyinin də xəbəri var, onun məlumatı ola-ola bəzi müəllimlər şagirdlərə hədə-qorxu gələrək vəsait toplayırlar, buna etiraz edən valideynləri də hədələyirlər.

Məlumatda qeyd edilir ki, bir neçə ilə bundan əvvələ qədər rayonun nümunəvi məktəblərindən olan 270 nömrəli məktəbdə direktor təyin edilməməsi bu cür neqativ halların (müəllimlərin dərsələrə etinasız yanaşması, yuxarı sinif şagirdlərinin kütləvi şəkildə siqaret çəkməyə meyllənməsi, özbaşınalıq etməsi və s.) baş alıb getməsinə gətirib çıxarır.

Güman edirik ki, Elm və Təhsil Nazirliyi orta məktəblərdə gedən bu prosesləri diqqətdə saxlayacaq, fond pulu və sinif üçün pul yığımının yenidən baş qaldırmasının qarşısını alacaq. Əks halda psixoloji təzyiq altında saxlanan şagirdlər təhsildən çox, pul gətirməsə, “halının necə olacağı” barədə fikirləşmək zorunda qalacaq.

Qarşı tərəfin də mövqeyini işıqlandırmağa hazırıq.