Vaxtilə Bakını altını üstünə çevirən, düz 20 il şəhəri qarış-qarış satan keçmiş mer Hacıbala Abutalıbov indi yalan olub, əksinə, Dövlət Şəhərsalma və Arxitektura Komitəsi ona sağlığında rəhmət oxutmaqdadır. Abutalıbov heç olmasa bəzi hallarda paytaxtın abadlığı, nizam-intizamı, tikinti normativləri üçün müəyyən düzgün addımlar atırdısa, hazırda komitə şəhəri tamamilə bərbad vəziyyətə salmaqdadır. Komitənin sədri Anar Quliyevlə onun 1-ci müavini Namiq Hümmətov Bakıda eninə-uzununa bütün tikinti normativlərinin kobud şəkildə pozulmasına şərait yaradırlar, göz yumurlar. Bununla həm şəhərin arxitekturası, memarlıq quruluşu terror edilir, həm də qanunsuzluğa yol verilir.
Prezident İlham Əliyev bir neçə dəfə qanunsuz tikintilər haqda sərt danışıb, şəhərin arxitekturasına kobud müdaxilə ilə bağlı xəbərdarlıq edib. Lakin görünən budur ki, komitə sədri Anar Quliyev və müavini Namiq Hümmətov tandemi bu tapşırıqları qulaqardı edərək öz işindədirlər. Artıq Bakının rayonlarının icra başçıları və Meriya da bu prosesdə az qala səlahiyyətsiz qurumlara çevriliblər, çünki bütün tikinti məsələlərinə Şəhərsalma komitəsi nəzarət edir, sərəncam verir. Amma adından, fərqli olaraq, bu komitəni Şəhərsalma deyil, şəhərdağıtma kimi təqdim etmək daha məntiqli görünərdi. Buna dair çoxsaylı faktlar göstərmək olar
Bu yaxınlarda araşdırmaçı jurnalist Cavanşir Həsənli Dövlət Şəhərsalma və Arxitektura Komitəsi sədrinin birinci müavini Namiq Məhəmməd oğlu Hümmətovla bağlı geniş ictimai marağa səbəb olacaq məlumat paylaşmışşdı. “Namiq Məhəmməd oğlu Hümmətov 4 iyun 2020-ci ildən Dövlət Şəhərsalma və Arxitektura Komitəsi sədrinin birinci müavinidir. Bundan əvvəl sözügedən komitənin tabeliyində Bakı Şəhər Memarlıq və Şəhərsalma Baş İdarəsinin Şəhər Ərazisinin Tikinti Planlaşdırma İdarəsinin rəisi, daha sonra Bakı Şəhər Memarlıq və Şəhərsalma Baş İdarəsinin rəisi vəzifələrini icra edib. Namiq Hümmətovun qardaşı Natiq Hümmətov Məhəmməd oğlu 2015-ci ilin noyabrında HN (Hümmətov Namiq) GROUP MMC-ni qeydiyyatdan keçirib. Namiq Hümmətov sözügedən komitədə yüksək vəzifəyə təyin edildikdən sonra MMC Qapalı Səhmdar Cəmiyyətə çevrilib və nizamnamə kapitalı 2010 manata çatdırılıb. Şirkətin qanuni təmsilçisi Məmmədov Elşən Oqtay oğludur.Şirkətin ilk qeydiyyatda olduğu ünvanda – Yasamal rayonu Tbilisi prospekti ev 41, mənzil 47-də 2009-cu ildə “NN GROUP” MƏHDUD MƏSULİYYƏTLİ CƏMİYYƏTİ də (qanuni təmsilçisi Əfqan Tapdıq oğlu Əliyev) qeydiyyatdan keçib. “NN” böyük ehtimalla Namiq və Natiq qardaşlarının adlarının abbreviaturasından götürülüb. Sonradan hər iki şirkətin qeydiyyat ünvanıarı dəyişdirilib. Hər iki şirkət Mənzil İnşaatı Dövlət Agentliyinin son 4 il ərzində elan etdiyi tenderlərdə ümumilikdə 177 milyon manatdan artıq sifariş əldə edib və “tender çempionu” adı qazanıb. “NN GROUP” MMC iştirak etdiyi dövlət tenderlərindən 88 milyon 528 min 835 manatlıq sifariş “tutub”. Şirkət bu sifarişləri cəmi 7 tenderlə əldə edib – bir tenderin orta qiyməti 12 milyon manatdır. «HN Construction» MMC də tenderləri “MİDA” MMC-dən qazanıb. Şirkət 7 tenderlə bu qurumdan 88,5 milyon manatdan çox sifariş əldə edib.
Açıq tenderlərdə məlum nəticələr:
* MİDA-nın sifarii əsasında Hövsan qəsəbəsində 7 mərtəbəli yaşayış binasının tikintisi üzrə tender – NN GROUP MMC (13655137.22 manat);
* MİDA-nın sifarii əsasında Sumqayıtda 9 mərtəbəli 2 yaşayış binasının tikintisi – NN GROUP MMC “Amal Group” MMC ilə birlikdə (7499824,8 manat);
* MİDA-nın sifarii əsasında Hövsanda 1920 şagird yerlik məktəb binasının tikintisi və avadanlıqlarla tam təchiz edilməsi işləri – “HN Construction” MMC (9281713.27 manat)
* MİDA-nın sifarii əsasında Gəncə şəhərində yeni yaşayış kompleksinin tikintisi (“Amal Group” və “NN Group” MMC-lərin konsorsiumu) – ümumi məbləği 15 milyon 179 min 898 manat olan 2 müqavilə (5 nömrəli 9 mərtəbəli 2 bloklu, 6 və 7 nömrəli 12 mərtəbəli 1 bloklu yaşayış binalarının tikintisi – 8 milyon 858 min 274 manat; 3 və 4 nömrəli 9 mərtəbəli 2 bloklu digər yaşayış binalarının tikintisi – 6 milyon 321 min 624 manat)
* MİDA-nın sifarişi əsasında Yasamal rayonu, Xarici dairəvi yolu, 8 ünvanında yerləşən Yasamal Yaşayış Kompleksində 1200 şagird yerlik tam orta məktəb binasının tikintisi və avadanlıqlarla təchiz edilməsi – NN Group MMC (7247166 manat)
* MİDA-nın sifarii əsasında Yasamal rayonu, Xarici dairəvi yolu, 8 ünvanında yerləşən Yasamal Yaşayış Kompleksində 12 mərtəbəli 1 bloklu 5 yaşayış binasının və 100 yerlik uşaq bağçasının tikintisi – HN Construction MMC (13281645.01 manat)
* MİDA-nın sifarii əsasında Yasamalda daha bir yaşayış binasının tikintisi – “NN GROUP” MMC (16171000 manat).
Adı çəkilən hər iki şirkət hazırda işğaldan azad olunmuş ərazilərdə, o cümlədən Şuşada bərpa və tikinti layihələrində də iştirak edir. Namiq Hümmətovun oğlu Toğrul Hümmətov Nyu-Yorkda təhsil alıb, 2018-2020-ci illərdə “NN GROUP”-da maliyyəçi (şirkətin sahibindən və direktorundan sonra ikinci şəxs) kimi fəaliyyət göstərib, 2020-ilin avqustundan ABŞ-da yaşayır, korporasiyalara, hökumətlərə və digər təşkilatlara peşəkar xidmətlər təklif edən McKinsey & Company qlobal idarəetmə konsaltinq şirkətində çalışır. 2014-cü ildə ABŞ-ın Men Ştatında “Thornton Academy” məktəbini qızıl medalla bitirdiyi üçün ABŞ-ın o zamankı prezidenti Barak Obama tərəfindən fəxri diplomla mükafatlandırılıb”.
Göründüyü kimi Namiq Hümmətov dövlətdən oğurladığı pullar hesabına oliqarxa çevrilməyi bacarıb. Aktualxeber.az-ın redaksiyasına daxil olan məlumata görə son günlər onun başı dərddədir. Belə ki, bəzi tikintilərə aldığı milyonlarla rüşvətin müqabilində qanunsuz olaraq verdiyi icazələrə görə onu təftiş etməyə başlayıblar. Bu yoxlamalar nəticəsində onun bir çox əməlləri və qazandığı çirkli pullar aşkar edilibdi. Aparılan yoxlamalar yekunlaşmadığından biz bəzi məsələləri açıqlamağı sonraya saxlayırıq. Bir onu deyə bilərik ki, bu yoxlamalardan sonra təkcə vəzifəsini deyil, azadlığını da itirə bilər.
Mövzuya qayıdacağıq və qarşı tərəfi də dinləməyə hazırıq. //TEZEXEBER//