Məşhur müğənni Şakira altı vergi cinayətində şübhəli bilinərək İspaniyada mühakimə olunacaq.

Bu barədə Kataloniya Ali Məhkəməsindən məlumat verilib.

Məlumata görə, Şakira 2012-2014-cü illərdə vergidən yayınma ilə bağlı cinayətlərdə şübhəli bilinir.

İspaniya prokurorluğu Şakiranın 8 il 2 ay müddətinə azadlıqdan məhrum edilməsini, həmçinin vergiləri ödəmədiyi üçün müğənnidən 23 milyon avro məbləğində cərimə tələb edir.

İtaliya çempionu "Milan"ın 40 yaşlı isveçli hücumçusu Zlatan İbrahimoviç yeni "Asteriks və Obeliks" filmində rol alıb.

Bizim.Media xarici mətbuata istinadən xəbər verir ki, İbrahimoviç romalı legioner rolunda oynayıb.

Məngü xan 1253-cü ilin baharında qardaşı Hüləgü xanı Azərbaycan səfərinə yola saldı. Səfərin əsas hədəfləri Nizari İsmaililər və Abbasi Xilafəti idi. Hüləgünün Azərbaycana gəlib çatması tam 3 il zaman aldı.
1256-cı ildə Azərbaycana daxil olan Hüləgü ilk olaraq diqqətini hərbi fəaliyyətləri Kit Boğa tərəfindən başladılan ismaililər məsələsinə yönəltdi. Böyük ehtimalla, Hüləgü ismaililər haqqında geniş və ətraflı məlumata sahibdi. Belə ki, moğollarla ismaililər arasında yaxşı münasibətlər Göyük xan dövründə kəsilmiş və buna səbəb olaraq ismaililərin lideri III Məhəmmədin Abbasi xilafəti ilə Fransa-İngiltərə arasında moğollara qarşı yaratmaq istədiyi "Müsəlman-Xristian ittifaqı" göstərilmişdir.
Hüləgü hələ 1253-cü ildən ismaililərə qarşı kəşfiyyat xarakterli əməliyyatlara start vermişdi. Tərəflər arasında Kuhistan, Girdkuh, Kəmali, Mihrin, Tun və Turşizdə döyüşlər başlamışdı. 1255-ci ildə moğollar ismaili qalalarının alınmasına mancanaqları cəlb etməyə başladılar. Tusu bu yolla ələ keçirdilər. Moğol ordularına Kökə İlqay ilə Kit Boğa başçılıq edirdilər.
Hüləgü ismaililərin son şeyxi Rüknəddin Hürşahdan qalaları yıxdırıb, təslim olmasını tələb etmişdi. Lakin Hürşah müqaviməti davam etdirərək vaxt uzatmağı lazım bildi. 1256-cı ildə Yasavur Noyonun başçılığında moğol ordusu Rudbara gəldi. Moğol dəstələrinin dağa çıxmasını gözləyən ismaili fədailər ciddi müqavimət göstərdilər. Üzüyuxarı dağa çıxmağın çətinliyini anlayan Yasavur ordunu geri çəkməyə məcbur oldu.
Hüləgü dağlardakı yüzlərlə qalanı itkisiz ələ keçirə bilməyəcəyini yaxşı bilir, ismaili şeyxi də vaxtı uzadaraq vəziyyəti moğolların əleyhinə çevirəcəyini hesablayırdı. Artıq səbr, vaxtı uzatmaq, keçilməz dağ yollarında düşməni sıxışdırıb tələf etmək, ani basqın və hücumlarla qarşı tərəfin dirəncini qırmaq Həsən Səbbahdan etibarən ismaili hərbi taktikasının əsasını təşkil edirdi. İsmaililər bu yolla dəfələrlə Səlcuqlara qalib gəlmişdilər. Ancaq Hüləgü daha inadkar idi, üstəlik, bölgəyə yayılmış bütün hərbi dəstələri Alamut ətrafına cəmləşdirməyə davam edirdi. Çəmbər daralırdı.
Böyük bir sahəyə yayılan moğol ordusu hər qala, hər divar və hər dağ ətrafında ağır döyüşlər aparırdı. Çevrəni mükəmməl bilən nizari-ismaili dəstələri moğollara aman vermirdilər. Müharibə tam bir əsəb döyüşünə çevrilmişdi. Boğa Teymur ilə Kökə İlqay əmrindəki moğollar Ostandar yaxınlığından keçib Xəzər sahilinə çatmış və ismaili torpaqlarını tam mühasirəyə almışdılar.
8 Noyabr 1256-cı ildə Hüləgünün çadırı Meymendiz qalasının cənubunda ucaldıldı. Meymendiz ismaililərin Alamut və Lemsar adlanan böyük qalalarının dibində yerləşirdi. Beləliklə, moğollar Alamuta daha bir hücum gerçəkləşdirdi. Moğollar ətrafdakı ağacları kəsib mancanaqlarla yuxarıya atmağa başladılar. Dağ başında daş-kötük döyüşü cərəyan edirdi. Mazandaran və Təbəristan dağlarında tam bir qiyamət yaşanırdı. Döyüşlər səngiyib gecə düşdükdə bu dəfə meydanı vəhşi heyvanlar alırdı. Çaqqallar, canavarlar, vəhşi donuzlar və pələnglər dağa, vadiyə səpələnmiş leşləri qapışırdılar. Digər tərəfdən, Hüləgü moğollara aid bütün hərbi gücü Alamutun ətrafına toplayırdı. Gətirdiyi silahlardan biri Çində istehsal olunmuş mənzili 2500 addım olan mancanaq idi. İsmaili şeyxinin əlində nəinki canlı güc qalmış, hətta qalalarda ciddi aclıq yaşanırdı. Sonunda Hürşah təslim olduğunu açıqladı. Qardaşı İranşahı və Kiya adlı oğlunu Xacə Nəsirəddin Tusinin nəzarətində qaladan aşağıya göndərdi.
Hürşahın təslim qərarı ilə 100 ismaili qalası təslim oldu. Anacaq əmrə qarşı çıxıb döyüşən qalalar da vardı. Hürşahın qala komandiri 15 dekabra qədər silahı əlindən buraxmadı. 20 Dekabrda isə Hüləgü Alamuta qalxdı. Şəhərin əzəmətinə təəccüb etdi, hətta təəccübdən barmağını dişlədi. Bir qrup alimə kitabxanada işə yaramayan kitabların toplanmasını əmr etdi. Sonra şəhər ordunun ixtiyarına tərk edildi. Alamut bir daha özünə gəlməyəcək şəkildə talan edildi.
Hürşah və onunla birlikdə əsir alınan son ismaililər uzun yaşamadılar. Hürşah 9 adamı ilə birlikdə 9 mart 1257-ci ildə böyük xana göndərildi. Həqarət və təhqirlərə məruz buraxıldığı bir səfər yaşadı. Onu Məngünün hüzuruna çıxardılar. Böyük xan ona ağır sözlər dedi və sonra hüzurundan qovdu. Hürşah və adamlarını Moğolustandakı Hinqay dağı ətəklərində boğazladılar. Qəzvində qalan ismaili şeyxinin ailəsi beşikdəki uşağına qədər Hüləgünün əmrilə qılıncdan keçirildi. Ümumilikdə təslim olan 12 min ismaili qətl edildi. Məngünün fərmanı ilə heç bir ismaili sağ buraxılmadı. Ata-Məlik Cüveyni Alamutun son görüntüsünü belə ifadə edir: "Alamut boynu yerdə, diz çökmüş dəvəyə oxşayır".
Əkbər Nəcəf, Hüləgü xan
Teref.az

Rusiyanın “Pervıy kanal”ının keçmiş aparıcısı Janna Aqalakova ölkəsinin dövlət mükafatlarından imtina edib və onları Kremlə qaytarmaq qərarına gəlib.

O, bu barədə feysbukda bildirib.

Telejurnalist mükafatlarının, həmçinin üzərində “Vladimir Putinə, Kreml, Moskva” sözləri yazılmış poçt qəbzinin fotosunu paylaşıb.

Bundan başqa, o, bağlamaya əlavə etdiyi məktubda bu sözləri yazıb: “Cənab Prezident, sizin rəhbərliyiniz ölkəni uçuruma aparır. Sizin mükafatları qəbuledilməz hesab edirəm. Janna Aqalakova”.

Qeyd edək ki, Aqalakova “Pervıy kanal”da 20 il çalışıb. Aparıcı bu ilin martında Ukraynadakı müharibəyə etiraz əlaməti olaraq telekanaldan ayrılıb.

Sentyabrın 21-də Rusiya Prezidenti Vladimir Putin ölkədə qismən səfərbərlik elan edib.

Sentyabrın 24-də Mətbuat Şurasının növbəti qurultayı keçiriləcək. Qurumun nizamnaməsinə uyğun olaraq, İdarə Heyətinə 46 nəfərin namizədliyi irəli sürülüb.

Nəzərə alsaq ki, yeni sədr İdarə Heyətinin arasından seçiləcək, belə olan halda qızğın mübarizənin gedəcəyinə şübhə qalmır.

Lakin jurnalistlər arasında narazılıq var ki, köhnə tərkibin 90 faizi yenidən namizəddir.

DİA.AZ xəbər verir ki, mövzu ilə bağlı Yenisabah.az-a danışan Əməkdar jurnalist Qulu Məhərrəmli İdarə Heyətinin yenilənməsinin tərəfdarı olduğunu bildirib:

“İdarə Heyətində kimin olub, kimin olmamağının əlbəttə ki, əhəmiyyəti var. Adların içində bir-iki yeni ada rast gəldim, mənim də adım siyahıda var, səs veriblər. Mən çox arzulayardım ki. İdarə Heyətində olanların 50 faizi yenilənsin. Orada elə adamlar qalıb ki, onlar mətbuat üçün üz qarasıdırlar. Onlar vaxtilə Əli Həsənovun tapşırıqlarını yerinə yetirməklə məşğul olublar. İndi yenidən orada oturacaqlar, bulanıq suda işlərini görəcəklər. Əlbəttə ki, heyət yenilənmiş olsaydı daha yaxşı olardı. Hesab edirəm ki, çox adamın orada olmağa mənəvi haqqı yoxdur. Bunlar mənim subyektiv düşüncələrimdir”.

Onun sözlərinə görə, Mətbuat Şurasının fəaliyyəti ilə bağlı bir çox qaranlıq məqam var:

“Ümumiyyətlə, Mətbuat Şurasının özü indiki halında hansı statusda olacaq, necə fəaliyyət göstərəcək, bilmirəm. Media Agentliyi olduğu vaxtda mən Mətbuat Şurasının böyük funksiyalarını görmürəm. Sadəcə olaraq etik komissiya kimi fəaliyyət göstərə bilər. Onlar ictimai rəyə necə təsir edəcək, doğurdanmı azad mətbuatı inkişaf etdirə biləcəyik? Bunlarla bağlı çoxlu suallar qalır. Həll olunmayan çox məsələ var. Oradakı köhnə simalar, köhnə yanaşmalar, köhnə tərzlər Mətbuat Şurasının heç də yaxşı olmayan cəhətinin ifadəçiləridir, bu baxımdan heyət təzələnsə idi daha yaxşı olardı”.

Adı namzizədlər siyahısında olan BakiVaxti.az saytının baş redaktoru Qalib İbrahimoğlu da yenilənmənin tərəfdarı olduğunu deyib:

“İdarə Heyəti seçki vasitəsilə seçilir. Təbii ki, burada ədalətlilik prinsipi nəzərə alınmalıdır. Əgər köhnələrin içindən də layiq olanlar varsa, səsvermədə çox səs toplayırlarsa, əlbəttə ki, İdarə Heyətində olmağı məqbuldur. Bu gün hər şeydə yenilənmə gedir, mətbuatın özündə də yeniliyə cəhd olunur. Hesab edirəm ki, Mətbuat Şurasının İdarə Heyətində də yenilənmə olmalıdır və labüddür”.

Mədəniyyət Nazirliyinin Teatr sektorunun müdiri Könül Cəfərova: “Nazirlik bu məsələni nəzarətə götürüb və araşdırma aparılır”

Qarabağ müharibəsi veteranı, Nüsrət Kəsəmənlinin nəvəsi Cavidan Kəsəmənli Gənc Tamaşaçılar Teatrının rəhbərliyini ittiham edib. “Müharibədən qayıdandan sonra 4-5 ay psixologiyamı toparlamaq üçün çox əziyyətlər çəkdim. O dönəmdə də heç bir yerdə çalışmırdım. Nə öz sahəmdə, nə də digər sahələrdə. Yanvar ayından sonra qərara gəldim ki, öz sahəm üzrə fəaliyyətimi davam etdirim. Mənim ilk müraciət etmək istədiyim teatr Gənc Tamaşaçılar Teatrı oldu. Niyə görə?! Oranın kollektivində tanıdığım dostlarım var idi, onlarla birlikdə çalışmaq istəyirdim. Bu həm mənim psixologiyamın toparlanmağına kömək edəcəkdi, həm də öz işimlə, bitirdiyim ixtisasla məşğul olacaqdım. Gənc Tamaşaçılar Teatrının direktoru Naidə İsmayılzadə müharibədə iştirak etsəm də mənə iş verməyib, hərbidən yayınan iki aktyoru işə götürdü”, - deyə o, Maderator.az-a açıqlamasında bildirib.

O deyib ki, direktor onu bir neçə dəfə get-gələ salıb, sonra isə “biz istərdik sizinlə əməkdaşlıq edək, təəssüflər olsun ki, bizdə yer yoxdur, ştatımızda yer olanda özümüz sizə müraciət edəcəyik” deyib. “Onların işə götürdüyü həmin oğlanlar nə təhsil səviyyəsi üzrə məndən üstündürlər, nə də istedad cəhətdən. İkisi də bakalavr bitirmiş, hərbi xidmətdən yayınmış aktyor dostlarımızdır. Gənc Tamaşaçılar Teatrının direktoru Naidə İsmayılzadə onları işə götürüb, məni bir bəhanə ilə geri göndərdi. Gənc Tamaşaçılar Teatrı mənim çox qəlbimi qırdı! Mən bilirəm ki, onlar istəsəydilər, bunu edə bilərdilər. Mənim kifayət qədər o teatrda çalışmağa haqqım var axı! Niyə bəhanə edirsiniz?! Ən azından gedib Mədəniyyət Nazirliyinə müraciət edə bilərdiniz, yer olmasaydı belə bir nəfərlik ştat açıb, məni o ştata qəbul edə bilərdiniz! Əgər o müraciət olsaydı, bilirəm ki, məni işlə təmin edəcəkdilər. Yerin olmamağı, sadəcə olaraq, bir bəhanə idi”, - deyə o bildirib.


Naidə İsmayılzadə

Mədəniyyət və İncəsənət Universitetinin dram teatrı aktyoru fakültəsinin həm bakalavr, həm magistr pilləsini bitirmiş C.Kəsəmənlinin istəyi budur ki, bu məsələ aidiyyəti qurumlar tərəfindən araşdırılsın!

Məsələ ilə bağlı “Yeni Müsavat” olaraq barəsində ittihamlar səsləndirilən Gənc Tamaşaçılar Teatrının direktoru Naidə İsmayılzadənin mövqeyini öyrənməyə çalışdıq. Teatr direktoru artıq bu barədə mətbuata danışdığını, başqa bir əlavəsi olmadığını bildirdi. Qeyd edək ki, Naidə İslamzadə Mediapress.az saytına açıqlamasında deyib: “Teatrımızın baş rejissoru var - Mehriban xanım, ona deyərəm görüşər, söhbət edər. Burada heç bir problem yoxdur. Amma bu o demək deyil ki, Cavidan Kəsəmənli sabah hansısa işlə təmin olunacaq. İmkan var, Mehriban xanım yoxlasın, həqiqətənmi çox istedadlı bir uşaqdır və nəsə edə bilərikmi... Bu, teatrdaxili məsələdir. Teatrda direktor tam hökmran deyil, baş resjissorla, kadrlar şöbəsi ilə məsləhətləşir. Azərbaycanda Gənc Tamaşaçılar Teatrı ölkədə yeganə teatr deyil, 26 teatrımız var. Başqa teatrlara da müraciət etmək olar.”

Mədəniyyət Nazirliyinin Teatr sektorunun müdiri Könül Cəfərova isə məsələ ilə bağlı “Yeni Müsavat”a açıqlamasında bildirdi: “Aktyor Cavidan Kəsəmənli məsələ ilə bağlı bizə müraciət etməsə də, bildirim ki, artıq nazirlik bu məsələni nəzarətə götürüb və araşdırma aparılır. Çox böyük ehtimalla onu teatra işə götürəcəklər”.

Cavidan Kəsəmənli də məsələ ilə bağlı ayrıca olaraq “Yeni Müsavat”a danışıb: “Mən məsələni lap əvvəldən danışmaq istəyirəm. Vətən müharibəsindən döndükdən sonra bir müddət özümə gəlmək, psixoloji vəziyyətimi düzəltmək, tam sağlam şəkildə işə başlamaq üçün istirahət etdim. Daha sonra isə teatrda işləmək, sənətimlə məşğul olmaq qərarına gəldim, buna həm maddi, həm də mənəvi ehtiyacım var idi. Bildiyiniz kimi, mənim bu peşə üzrə magistratura təhsilim də var. Beləliklə, Gənc Tamaşaçılar Teatrına müraciət etdim. Bu teatrı seçməyimin səbəbi ona görə idi ki, teatrın kollektivini tanıyırdım, orada dostlarım, müəllimlərim var. Yəni özümə bu teatrı doğma hiss etdim. Bundan sonrası isə artıq hər kəsə məlumdur. Direktorla görüşdüm, mənə dedi ki, yer yoxdur və bildirdi ki, mənimlə əlaqə saxlayacaqlar. Amma digərlərini işə götürdülər. Halbuki mənim bu sahə üzrə yüksək təhsilim var, üstəlik, Vətən müharibəsi iştirakçısıyam. Əslində istəməzdim ki, bu məsələni ictimailəşdirim. Lakin Mədəniyyət Nazirliyinə də müraciət etmişəm və mənim müraciətimə baxılmadığı üçün ictimailəşdirmək məcburiyyətində qaldım, mənə heç bir variant qoymadılar. Yəni əlində magistr diplomu olan, qazi aktyor üçün bir teatrda yer olmadı? Səbəb nədir? Mənə olan bu münasibət haradan qaynaqlanır, bu məsələ mənim özümə də təəccüblüdür. Məni bir müddətlik pulsuz da olsa işə götürə bilərdilər, amma bunu etmədilər. Bildiyim qədər ölkə Prezidenti həm Mədəniyyət Nazirliyinə, həm də dövlət teatr rəhbərlərinə göstəriş verib ki, Vətən müharibəsi iştirakçıları və qazilərin işlə təmin olunması ilə bağlı köməklik göstərilsin. Yəni mənim üçün teatrda yer olmasa belə, əlavə ştat aça bilərdilər. Amma nədənsə bu cür münasibət bəslədilər”.

Tarixi görünüşü ilə fəxr etdiyimiz paytaxtın görkəmi yaxın illərdə tamamilə dəyişə bilər…

Paytaxtımızda yeni bir tendensiya müşahidə olunmaqdadır. Tarixi əhəmiyyətə malik binalara qanunsuz müdaxilələrin sayı günü-gündən artır.

Belə ki, Ağamusa Nağıyeva məxsus 28 May küçəsində yerləşən, polşalı memar tərəfindən layihələndirilən Azərbaycan memarlıq abidələrinin incilərindən hesab olunan binanın fasadına müdaxilə edilib. Daş fasad bərpa olunmaq əvəzinə, sadəcə boyanıb.

Memar Elçin Əliyev qeyd edib ki, bu kimi halların sayı artarsa, tarixi görünüşü ilə fəxr etdiyimiz paytaxtın görkəmi yaxın illərdə tamamilə dəyişə bilər.

Məsələ ilə bağlı Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidməti ilə əlaqə yaratsaq da, suallarımızı cavablandıran olmadı.

Ətraflı Baku TV-nin süjetini təqdim edirik:

“Ədliyyə Nazirliyinə müraciət! Xahiş edirəm, məni öz sevimli ölkəmdəki “xarici agent” siyahısına daxil edəsiniz. Çünki mən öz vicdanlı, ləyaqətli, səmimi insan, Rusiyanın gerçək və dönməz patriotu olan ərimlə həmrəyəm. Hansı ki, o, vətəninin çiçəklənməsini, azad sözü və gənclərin xəyali məqsədlər uğrunda ölməməsini arzulayır. Bu xəyali məqsədlər ölkəmizi qovulmuş vəziyyətə salır və vətəndaşlarımızın vəziyyətini ağırlşdırır”.

“AzPolitika.info” xəbər verir ki, bunu məşhur rusiyalı müğənni, SSRİ Xalq artisti və ümumiyyətlə, xüsusi təqdimata ehtiyacı olmayan Alla Borisovna Puqaçova Kremlə etiraz məktubunda bildirib.

Beləliklə də, Alla Puqaçova Ukrayna müharibəsinə qarşı olduğu üçün ittiham edilərək, barəsində “xarici agent” statusu təyin edilən həyat yoldaşı Maksim Qalkini dəstəkləyərək, rəsmi orqanlara “məni də xarici agent elan edin” deyib.


Xatırladaq ki, Qalkin rus əsgərlərinin törətdiyi müharibə cinayətlərini qınamış və Ukraynanın işğal edilməsinə heç bir şeylə bəraət qazandırılmayacağını demişdi.

Puqaçovanın bu müraciəti Kremldə şok effekti yaradıb. Xüsusilə də onun Ukraynadakı müharibəni nəzərdə tutaraq dediyi “gənclərin xəyali məqsədlər uğrunda ölməsi”, “ölkənin qovulmuş vəziyyətə salınması”, “vətəndaşların ağır vəziyyətə düşməsi” kimi ifadələr Putin hakimiyyəti üçün olduqca təhlükəlidir. Buna görə rəsmi Rusiya KİV-ləri Puqaçovanın müraciətinin yalnız ilk cümlələrini dərc edərək, onun “xarici agent” statusu almaq istədiyini yazıblar. Bunun hansı səbəbdən irəli gəldiyini isə şərh etməyiblər... Ümumiyyətlə, Puqaçova ilk dəfədir ki, bu cür siyasi açıqlama verir. Bunun nə demək olduğunu anlamaq o qədər də çətin deyil. Məsələ ondadır ki, Puqaçova barədə sadəcə, “müğənni” deyib keçmək qətiyyən doğru olmaz. O, təkcə Rusiyanın mədəniyyət tarixinə düşmüş şəxsiyyət, Rusiyada son 50 ilin ən böyük pop ulduzu deyil. Onun daşıdığı olduqca sanballı ictimai-siyasi, sosial, hətta siyasi bir yük də var.

Rusiyanın xüsusilə yaşı 40-dan yuxarı olan əhalisi üçün Puqaçova az qala müqəddəsdir və məsələ ondadır ki, Putinin əsas elektoratı da məhz həmin yaş qrupuna aid olan insanlardan ibarətdir. Bu insanlar Puqaçovanın çəkildiyi filmləri əzbər bilir, həmin filmlərdəki obrazlar, epizodlar, sitatlar və s. onların həyatının, dünyagörüşünün formalaşmasında əvəzsiz rol oynayıb. Elə bir toy, ad günü, bayram olmayıb ki, onun mahnıları oxunmasın. Onun konsertləri az qala tarixi hadisə kimi qarşılanıb və böyük meydanları, stadionları doldurub və s.

Hətta əzəmətli SSRİ “KQB”-si belə heç zaman ona toxunmayıb, o, rəhbərlərə yox, rəhbərlər ona biət ediblər. Bütün bunlara görə Puqaçova haqlı olaraq, bir növ qeyri-rəsmi toxunulmazlıq satatusu qazanıb.

Elə indi də Puqaçovanı bütün xalq tanıyır və bilir ki, o, ABŞ-a, Qərbə və digər “düşmənlərə” işləyə, satıla bilməz. Hər nə qədər saxta ittihamlar, “faktlar” və s. ortaya atılsa belə (hansı ki, bunlar Rusiya FTX-si üçün adi şeydir), heç kim buna inanmayacaq. Ona görə də Putin hakimiyyəti üçün onu ləkələmək, qorxutmaq, susdurmaq cəhdləri olduqca çətin və perspektivsiz davranış olardı.

Bu adam keçmiş Azərbaycan SSR də daxil olmaqla, bütün respublikalarda SSRİ mentalitetinin, düşüncəsinin, həyat tərzinin simvolu olub. O SSRİ-nin ki, indi Putin Rusiyası guya bərpa etməyə çalışır. Əslində isə daha çox məhz Puqaçova SSRİ-nin mənəvi və fiziki simvolu, hətta varisi sayıla bilər, nəinki Putin və onun ətrafı. Puqaçova orijinal formada, ideal SSRİ-nin simvoludursa, Putin və ətrafı daha çox saxta, korrupsiyalaşmış, cinayətlərə bulaşmış SSRİ-dir. Hazırda yaranmış durumdan isə belə nəticə çıxır: Puqaçovanın etirazı gerçək SSRİ-nin saxta SSRİ-yə qarşı üsyanıdır. Bu, həm də Rusiya eliatasının üsyanının əlaməti sayıla bilər. Çünki Puqaçova təkcə SSRİ deyil, yeni Rusiya elitasının da bir parçasıdır...

Təbii ki, bütün bunları Kremldə də anlayırlar. Məsələnin ciddiliyini göstərən amillərdən biri də odur ki, Putinin sözçüsü Dmitri Peskov Alla Puqaçovanın bəyanatı ilə bağlı verilən suala cavab verməkdən imtina edib və sadəcə deyib ki, buna dair heç bir şərh verə bilməz.

Artıq bəzi xəbərlərə görə Kreml əfsanəvi müğənni ilə anlaşmağa, vəziyyəti düzəltməyə çalışır. Lakin müşahidəçilər bildirirlər ki, Puqaçovanın etiraz açıqlamaları davam edə bilər. Belə ki, yaşı 70-i ötsə də, xarakteri onun geri çəkilməsini mümkünsüz edir və onun bu müraciətinin xüsusilə də “rus dərin xalqı”na ciddi təsir edəcəyi və Putinə, onun Ukraynada apardığı savaşa qarşı etirazları bir qədər də artıracağı şübhəsizdir. Bu isə zatən Ukrayna bataqlığında gündən günə daha da dərinə batan Putin hakimiyyətinə, onun ölkə daxilindəki olan-qalan nüfuzuna növbəti güclü zərbədir...

C.Məmmədov

“AzPolitika.info”