 |
|
|
Gədəbəy rayonu, Qari kənd sakini Qayıbov Natiq Siyaş oğlu tərəfindən “Hürriyyət” qəzetinin redaksiyasına şikayət məktubu daxil olub. Şikayətçi iddia edir ki, həyat yoldaşını aldadaraq, “DOST” İş Mərkəzindən çıxarıblar:
“Mən, Qayıbov Natiq Siyaş oğlu, yazaraq sizdən xahiş edirəm ki, səsimi lazımi yerlərə çatdırasınız.
1993-1996-cı illərdə Azərbaycanın bütövlüyü uğrunda gedən döyüşlərdə iştirak etmişəm. Ayaqlarımı həmin vaxt soyuq zədələyib, hazırda 1-ci qrup əlilliyim var. Aldığım təqaüd iynə-dərmanımı ödəmir.
Həyat yoldaşım Qayıbova Zərqələm Esnaf qızı “DOST” İş Mərkəzində abadlıq işinə baxırdı. Gərgər kənd icra nümayəndəsi ona deyib ki, iyun ayının 28-də sənin işinə xitam veriləcək. Beləliklə, öz ərizəsi ilə yoldaşım qanunsuz yerə işdən çıxarıldı.
3 qız övladım var, dolanmaq çox çətindir. Kənd icra nümayəndəsi bildirir ki, “DOST” İş Mərkəzi tezliklə bağlanacaq. Amma yalan deyir, bağlanmayacaq. Mənim yoldaşımı aldadıb, öz ərizəsi ilə işdən çıxardılar.
Mən, sizin sayt vasitəsilə “DOST” İş Mərkəzinin rəhbərliyindən xahiş edirəm, yoldaşım yenidən işə götürülsün”.