BMT TŞ-nin 15 üzvünün – 5 daimi, 10 qeyri-daimi - iştirakı ilə açıq rejimdə keçiriləcək iclası TŞ-yə hazırda rəhbərlik edən ABŞ aparacaq. Prosedura görə daimi və qeyri-daimi üzv ölkələrin hamısının nümayəndəsi çıxış edəcək, o cümlədən, Azərbaycan və Ermənistan nümayəndələri.
İclasda üç sənədin qəbulu mümkündür: qətnamə, bəyanat və ya mətbuata açıqlama.
Mətbuata açıqlama ən aşağı statuslu sənəd hesab edilir, o cümlədən, bəyanatın da praktiki icrası yoxdur. Bu baxımdan, İrəvan Bakıya qarşı qətnamənin qəbul edilməsinə çalışır, hərçənd, bu, siyasi və hüquqi baxımdan qeyri-mümkün görünür.
Siyasi: TŞ-nin qətnaməsi ya konsensus, ya da səs çoxluğu ilə qəbul edilir. Ən azı 9 səs lazımdır və 5 daimi üzvdən heç biri veto qoymamalıdır. 15 üzv ölkə arasında Azərbaycanın haqlı mövqeyini dəstəkləyən olacaq, eləcə də daimi üzvlərdən ən azı Rusiya bölgədəki maraqlarına görə veto hüqundan istifadə edə bilər.
Hüquqi: BMT Azərbaycanın ərazi bütövlüyünü tanıyır, bu baxımdan, Qarabağdakı proseslərə Azərbaycanın prizmasından yanaşma olacağı gözləntisi var, misal üçün, ərzaq təminatının Ağdam-Xankəndi marşrutu üzrə daşınmasının TŞ-nin iclasında da ön plana çıxacağı mümkündür.
Asif Nerimanli
Teref.az