Avqustun 14-də Əmək və Əhalinin Sosial Müdafiəsi Nazirliyinin Protez-Ortopedik İstehsalat və Reabilitasiya Mərkəzi "ZN Trade” şirkəti ilə 365 gün müddətində daxili və xarici istifadə üçün mexaniki və sanitar əlil arabalarının alınmasına dair müqavilə imzalayıb.

Dövlət satınalmalarının vahid elekton portalının məlumatına görə, müqavilənin dəyəri 7 milyon 762,8 min manat və ya 4 milyon 576 min dollardır.

Eyni zamanda, qanunvericiliyə zidd olaraq portalda alınan malların miqdarı və xüsusiyyətləri barədə məlumat yoxdur.

Maraqlıdır ki, ötən ilin sentyabrında təsis edilən "ZN Trade” MMC (VÖEN: 2007592551) bir neçə gün sonra Əmək və Əhalinin Sosial Müdafiəsi Nazirliyinin strukturunun 1795 ədəd əlil arabasının-təkərli arabaların (mexaniki və elektriklə) alınması üzrə tenderinin qalibi olub.

Həmin müqavilənin dəyəri 3 milyon 758,8 min manat (2 milyon 211 min dollar) olub. Sifariş 1 mart 2023-cü il tarixinədək yerinə yerinə yetirilməli idi.

Dövlət Gömrük Komitəsinin məlumatına görə, 2022-ci ildə Azərbaycana ümumi dəyəri 1 milyon 590,6 min dollar olan 3 671 ədəd motor mexanizmi ilə təmin olunmayan əlil arabası və 889,5 min dollar dəyərində 1 537 ədəd digər əlil arabaları gətirilib.

Həmin mənbənin məlumatına əsasən, bu ilin birinci yarısında müvafiq olaraq 1291 (ümumi bəyan edilmiş dəyəri 222 180 dollar) və 109 (16 260 dollar) əlil arabası idxal edilib.

Qeyd edək ki, "ZN Trade” MMC barədə yalnız Əmək və Əhalinin Sosial Müdafiəsi Nazirliyinin strukturları olmaqla, 9 dövlət satınalmasında qalib olmasından başqa heç bir açıq məlumat yoxdur.

Şirkətin qanuni nümayəndəsi 1985-ci il təvəllüdlü Nüsrəddin Yolçu oğlu Kərimovdur.

"ZN Trade” şirkəti Bakıdakı mənzillərdən birində qeydiyyatdadır, onun atası və üç böyük qardaşı da (Kərim, Murad və Müzəffər) burada qeydiyyatdadır. /"Turan"

“Yuxarı Qarabağ kanalı 65 ildir ki, dayanmadan istismar olunur. Bu da o deməkdir kanal öz istismar müddətini artıq başa vurub. Artıq bu kanalın yenidən inşası zərurəti yaranıb. Kanal torpaq əsaslı kanaldır. Bu da həm su itkisinə, həm də müəyyən sızmalara səbəb olur. Ümumilkdə kanalda sızma, buxarlanma və texniki itkilər var. Bu 3 səbəb üzündə ötürülən suyun 22 faizi itkiyə gedir. Sızmalar əsasən Yevlax və Bərdə rayonları ərazisində baş verir. Bu sızmalar da torpaqların şoranlaşmasına səbəb olur”.

DİA.AZ bildirir ki, bunu Bizim.Media-ya müsahibəsində Yuxarı Qarabağ kanalı İİ-nin rəisi Şakir İmanov deyib. O bildirib ki, kanal altında 23 ədəd selötürücü qurğu var:

“Bunlar da öz istismar müddətlərini başa vurub. Məhz bunun nəticəsidir ki, avqustun 2-də Bərdə rayonu ərazisində bənd dağıldı. Çünki, yığılan sel sularını selötürücü qurğu çatdırıb ötürə bilmədi. Nəticədə, kanalın bəndi sel sularından zədə gördü. Doğrudur, qəzanın nəticələri qısa zamanda aradan qaldırıldı. Lakin, gələcəkdə daha bir qəzanın baş verməsinə təminat yoxdur. Çünki, qurğuların istismar müddəti çoxdan başa çatıb”.

Şakir İmanov onu da bildirdi ki, kanal üzərində çoxlu sayda körpülər, keçidlər, səviyyə qaldıran qurğular, akviduktor və digər hidroqurğular var:

“Bu qurğular 70 ilə yaxındır ki, istismar edilir. Halbuki, beton kanalların istismar müddəti 50 ildir. Di gəl ki, bu torpaq kanalı 70 ildir ki, istismar edilir. Ümumilikdə Yuxarı Qarabağ kanalı torpaq əsaslı kanaldır. Bu da həm su itkisinə, həm də müəyyən sızmalara səbəb olur. Ümumilkdə kanalda sızma, buxarlanma və texniki itkilər var. Bu 3 səbəb üzündən ötürülən suyun 22 faizi itkiyə gedir. Sızmalar əsasən Yevlax və Bərdə rayonları ərazisində baş verir. Bu sızmalar həm kanalın keçib getdiyi ərazilərdə torpaqların şoranlaşmasına səbəb olur ki, bu da başqa bir problemdir”.

İdarə rəisi daha bir ciddi məsələ barədə SOS verdi:

“Qarabağ kanalı həm də Mingəçevir İES-in soyutma sisteminə də xidmət edir. Bu soyutma sisteminə görə biz bir anda olsun suyu dayandırmırıq. 1981-ci ildən bu yana kanalda heç bir fasilə olmayıb.Baxmayaraq ki, kanal altındakı hidrotexniki qurğulara ən azı ildə bir dəfə qulluq göstərilməlidir. Bunun üçün kanalda suyun ötürülməsinə bir ay fasilə verilməlidir. Tunellərdə davamlı müayinələr aparılmalıdır ki, harda çatlar və digər təhlükəli fəsadlar var.

Bundan sonra da o nöqsanlar aradan qaldırılmalıdır. Təəssüflər olsun ki, bu günə qədər Mingəçevir İES-in soyutma sisteminə görə biz bu cür vacib tədbirləri həyata keçirə bilmirik. Əslinə baxsan İES-in özünün soyutma sistemi olmalıdır. Bu qurğu tikilib istifadəyə verilmədiyindən bütün yük Qarabağ kanalının üstündə qalıb”.

Müsahibimiz vəziyyətin çox təhlükəli olmasına rəğmən çıxış yolunun olduğunu da bildirib:

“Yuxarı Qarabağ kanalı yenidən qurulmalıdır. Bunun üçün mövcud kanala paralel müvəqqəti kanallar tikilməlidir. Bundan sonra sular o kanala ötürülməli və mərhələli şəkildə kanal yenidən tikilməlidir. Vəziyyəti dərindən təhlil edən Melorasiya və Su Təsərrüfatı ASC artıq layihələndirmə işlərinə başlayıb. Layihə İnstitutunun əməkdaşları yerlərdə hesabatlar hazırlayır. Amma kanalın yenidən qurulması üçün külli miqdarda vəsait lazımdır. Buna görə məsələyə hökümət müdaxilə etməlidir”.

Qeyd edək ki, Yuxarı Qarabağ kanalının tikintisinə 1953-cü ildə başlanılıb. 1958-ci ildə kanal istismara verilib. Öz mənbəyini Mingəçevir su anbarından götürən kanal respublikamızın 6 rayonun ərazisindən keçməklə 11 rayonunun 130 min hektar əkinə yararlı torpaqlarını suvarır.

Bərdə şəhərində Ulu öndər Heydər Əliyevin adını daşıyan park-bulvar baxımsız vəziyyətdədir.

AzFakt.com xəbər verir ki, park-bulvarın ərazisində olan hovuzlar aylarla təmizlənmir. Asudə vaxtlarını səmərəli keçirmək üçün parka gələn insanları aylarla təmizlənməyən hovuzdan iylənmiş su qoxusu vurur.

Parkda skamyalardan bəziləri də sınıq-salxaqdır.

Qeyd edək ki, Bərdə şəhərində Ulu öndər Heydər Əliyevin adını daşıyan park-bulvar 2015-ci ilin mart ayında istifadəyə verilib.

Azərbaycan Qida Təhlükəsizliyi Agentliyi “Volt Azərbaycan” MMC-nin fəaliyyətinin dayandırıb.
Səbəb kimi göstərilir ki, şirkət qanunvericiliyin tələblərini pozub.

Qanunun tələblərini açıq şəkildə pozanların biri elə AQTA-nın özüdür…

Deməli, son 3 ildə AQTA-nın keçirdiyi və ümumi dəyəri 600 min manata yaxın olan 6 tenderin qalibi “Duohıve” MMC (VÖEN – 1503672811) adlı şirkət olub.

Şirkət təsis olunan zaman (2017-ci il) rəhbəri Rəşad Xalıqov adlı şəxs olub. Bu şəxs 2020-ci ilin yanvar ayından 2021-ci ilin aprel ayına kimi AQTA-nın İnformasiya texnologiyaları və innovativ həllər sektorunun müdiri olub. Sektor müdiri olan kimi “Duohıve” MMC AQTA-nın informasiya texnologiyaları ilə bağlı keçirdiyi 3 tender müsabiqəsinin qalibi olub.

Bəs qanun nə deyir?

“Dövlət Satınalmaları haqqında” Qanunun 13-cü maddəsində açıq şəkildə yazılır ki, satınalma prosedurlarından əvvəlki üç il ərzində satınalma prosedurlarında iştirak edən iddiaçının əməkdaşı və ya vəzifəli şəxsi olanlar satınalma prosedurları zamanı satınalan təşkilatın təmsilçisi, məsləhətçisi və satınalmalarla əlaqədar digər vəzifələrin icraçısı ola bilməzlər.

Qanunun tələbindən də göründüyü kimi, tender keçirilən zaman (2020-ci ildə) satınalan təşkilatın, yəni AQTA -nın təmsilçisi (İnformasiya texnologiyaları və innovativ həllər sektorunun müdiri) 3 il əvvəl – 2017-ci ildə iddiaçının, yəni “Duohıve” MMC -nin vəzifəli şəxsi (qanuni təmsilçisi) olub.

İndi əsas sual budur, qanunun tələblərini açıq şəkildə pozan AQTA-nın fəaliyyətini kim dayandıracaq?

Gununsesi.info

Lənkəran rayonunun Təngivan kənd sakinləri deyir ki, son 1-2 gündür gecələr havadan üfunət iyi çəkilib, amma çayda hələ də lillənmə müşahidə edilir.

Təngivanlılar uzun illərdir Lerikin Piran kəndində yerləşən “Lerik Broyler MMC”yə məxsus “Lebro” quşçuluq təsərrüfatının havanı və Lənkəran çayı çirkləndirdiyindən şikayətlənirlər. Sakinlər bir neçə dəfə etiraz aksiyası keçirməyə də cəhd ediblər. Onların sözlərinə görə, hazırda Ekologiya və Təbii Sərvətlər Nazirliyinin monitorinq qrupu kənddədir. Şikayətçi tərəf kimi kənd sakinləri də monitorinqdə iştirak edirlər.

Kənd sakini Vüqar Əliyev Meydan TV-yə bildirib ki, əvvəlki illərdə də şirkət cərimələnib. Amma cəriməni ödəməyib və işini davam etdirib.

“Əvvəllər də belə olub. Məsələ ictimailəşəndən sonra toyuq tullantılarını yandırmağı dayandırıblar. Prezidentin ekoloji məsələləri diqqətdə saxlamasından sonra çox ümidliyik. Yəqin ki, uzun müddət ətraf mühitin çirkləndirilməsi dayandırılacaq”,- sakinlər bildiriblər.

Vüqar Əliyev isə deyib ki, bir neçə gün bundan əvvəl çay yenidən lilli olub:

“Broyler şirkəti deputat İqbal Məmmədovundur, yaxınları tərəfindən işlədilir. Bundan başqa, deputatın Lerikdə karxanası da var. Çay 3 mənbədən broyler təsərrüfatı, deputatın karxanası və Təngivandakı tanınmış rəssamlardan birinin karxanası tərəfindən çirkləndirilir. Nazirlik hazırda əsasən broyler təsərrüfatı ilə məşğuldur”,- sakinlər deyib.

Onlar bildiriblər ki, uzun aylardan bəri ilk dəfədir üfunətsiz gecə keçirirlər.

“Lerik Broyler MMC”-dən məsələ ilə bağlı məlumat verə bilməyəcəklərini deyiblər və “şirkətimiz ölkənin ən iri broyler şirkətidir” deyə suala aidiyyatı olmayan açıqlama verməklə kifayətləniblər.

Lerikin Piran Kənd Bələdiyyəsindən isə deyiblər ki, onlar sakinlərin narazılığından xəbərdar deyillər.

Ekologiya və Təbii Sərvətlər Nazirliyindən isə monitorinq aparıldığını, nəticələrlə bağlı açıqlama verəcəklərini deyiblər. //Meydan TV//