Dolandirici şirkətlərin əl işləri

Paytaxtın Suraxanı rayon icra başçısı Əziz Əzizov, müavini Fuad Cəbrayılov və şöbə müdirləri ilə birgə Vətən müharibəsi qazisi Qurbanov Əbülfət Tanverdi oğlunu ziyarət edib. İlk baxışda burada adi bir məlumat keçir. Amma informasiya İH-nin rəsmi saytında elə təqdim olunub ki, böyük hadisə baş verib. Qazi ilə birgə çəkilmiş fotoda başçı Əzizov və müavini Cəbrayılov var. Və əlavə məlumat verilmir ki, qazi hansı arzusunu, hansı problemini dilə gətirib, başçı ziyarət zamanı ailəyə nə kimi köməklik göstərib. Digər tərəfdən, axı burada hansı informasiya yükü var? Bir məmurun vəzifə borcu elə vətəndaşla maraqlanmaq, görüşmək, problemini dinləməkdir. Xüsusən də bu qazidirsə…

Tribunainfo.az xəbər verir ki, Əziz Əzizov isə qazi ilə görüşü reklam xarakterli təqdim edib. Əgər belə olmasaydı, adi bir ziyarəti gözə soxmazdı. Sanki qeyri-adi əməli olub. Hər bir məmur, icra başçısı qazilərimiz, şəhid ailələrimizlə görüşməlidir və bunun piarını aparmağa ehtiyac yoxdur. Çünki hər bir dövlət məmurun fəaliyyəti, mənəvi borcu torpaqlarımızın azadlığı üçün qəhrəmanlıq edənlərə diqqət göstərmək olmalıdır. Lakin Suraxanı icra başçısı Əzizov və müavini Cəbrayılov yuxarıların gözünə girmək üçün qazi ilə olan fotonu yayıb bunu xüsusi fəaliyyət kimi qələmə verməyə çalışıblar. Üstəlik, İH-lərdə Vətən müharibəsi qaziləri və şəhid ailələri ilə işin təşkili şöbəsi var. Suraxanı İH-də həmin şöbəyə Elmar Hüseynov sədrlik edir. Yəni şöbə müdirinin qazimizlə görüşü kifayət edir, amma yox, Əziz Əzizov özünü göstərmək üçün müavini ilə birgə foto çəkdirib xəbərini tirajlayıb. Üstəlik, başçının müavini kifayət qədər gündəmdə olmuş məmurdur. Fuad Cəbrayılov daha əvvəl Abşeron rayonunda fəaliyyəti ilə medianın diqqət mərkəzində olub. KİV-də yayılmış məlumatlara görə, Fuad Cəbrayılov vaxtilə BTİ ( Bakı Texniki İnventarizasiya ) idarəsində, Dövlət Reyster Xidmətinin Abşeron şöbəsində “kupça” satmaqla, rayonunun kənd təsərrüfatı təyinatlı torpaqlarının böyük əksəriyyətinə çıxarışlar verməklə külli miqdarda pul qazanıb və Abşeronda xeyli sayda obyektə sahib olub. Xəbər portalları yazır ki, indi də Suraxanıda kim qanunsuz ev tikmək, hasar çəkmək, mansar artırmaq istəyirsə, ilk növbədə Fuad Cəbrayılovun cibinə əl uzadır və ondan xeyir-dua alır. Məlumat üçün bildirək ki, F.Cəbrayılov Abşeron rayon icra hakimiyyətində Başçının müavini – İctimai-siyasi və humanitar məsələlər şöbəsinin müdiri vəzifəsində çalışıb. Sabiq başçı İradə Gülməmmədova dövründə əsas güc sahibi imiş. Mediada gedən məlumatlara görə, Abşeronda tikinti, təhsil və bağça sektorunu tam nəzarətdə saxlayıb. O dönəm həbslər olanda, baş memar Akif Əliyev həbs ediləndə Cəbrayılov bu prosesdən yaxasını qurtara bilib. Amma Abdin Fərzəliyev Abşerona başçı təyin olunanda onunla işləmədi və Suraxanıya müavin gəldi. Onu da bildirək ki, F.Cəbrayılovla Ə.Əzizov arasındakı əlaqədə ölkənin vaxtilə məşhur “əmlak kralları” olmuş Arif Qaraşov-Kərəm Həsənov faktoru bağlayır. İndisə başçı və müavini Suraxanıda tandem qurublar, arada qazilərlə foto da çəkdirməyi unutmurlar. Bütün bu tənqid, iradlara, iddialara baxmayaraq, müstəqil media orqanı olaraq hər iki hörmətli məmurun mövqeyini işıqlandırmağa hazırıq.
Teref. Xocanın Blogu
Səhifəmiz hamnın üzünə açıqdır

Sabunçu Rayon Məhkəməsində hakim Mirheydər Zeynalovun sədrliyi bu ilin yayında “Sea Breeze”də baş vermiş kütləvi davada tərəf olmuş şəxslərin işi üzrə araşdırmalar davam edir.

Müttəhimlər kürsüsünə Elmir İsmayılov, Peyman Vəlizadə, Məhəmməd Həsənzadə və Murad Əhmədli çıxarılıblar. Bu şəxslər xuliqanlıqda ittiham olunurlar. İş üzrə iki zərərçəkən var – Cavad Muradov və Elnur Məmmədov. “Sea Breeze”dəki kütləvi dava ilə bağlı Bakı Şəhər Baş Polis İdarəsinin İstintaq İdarəsində məhkəmə araşdırmasında olan bu işdən əlavə daha iki cinayət işi araşdırılıb. Həmin işlərdən biri də məhkəməyə göndərilib. Elmir İsmayılov və digərilərinin cinayət işi üzrə zərərçəkən olan Cavad Muradov həmin iş üzrə təqsirləndirilən şəxsdir. Buna görə o da həbsdədir, məhkəməyə də istintaq təcridxanasından gətirilir. Onunla birgə zərərçəkən skamyasını bölüşən Elnur Məmmədov isə azadlıqdadır və o, bu gün keçirilən prosesə qatılmayıb. Təqsirləndirilən şəxslərdən Peyman Vəlizadə, Elmir İsmayılov və Məhəmməd Həsənzadə də həbsdədirlər, Murad Əhmədli isə azyaşlı olduğundan barəsində həbslə əlaqəli olmayan qəti-imkan tədbiri seçilib.

Dekabrın 19-da keçirilən prosesdə Məhəmməd Həsənzadənin vəkili Vüsal Orucov məhkəməyə arayış təqdim edib. Vəkil bildirib ki, prokuror ötən prosesdə işdə olan və Məhəmməd Həsənzadənin istifadəsindəki telefon nömrəsi ilə bağlı şübhələri dilə gətirib.

Vəkil deyib ki, mobil operatora sorğu verib, alınan cavabda qeyd olunur ki, telefon nömrəsi Məmmədov Rza Elçin oğlunun adınadır. Rza Məmmədov da notarial qaydada təsdiqlənmiş ərizəsində bildirib ki, nömrə onun adına alınsa da, faktiki olaraq Məhəmməd Həsənzadə işlədir.

Vəkil hər iki sənədi məhkəməyə təqdim edib, bildirib ki, Rza Məmmədov da məhkəməyə gəlib, zərurət bilinərsə, dindirilməsi də baş tutsun.

Hakim bildirib ki, indiki mərhlədə Rza Məmmədovun dindirilməsi zərurəti yoxdur.

Bundan sonra hakim iş materiallarına əlavə edilmiş videoların tədqiqinə başlanıldığını elan etdi.

İlk video “Sea Breeze”dəki “White villa 10” kamerasından götürülən, 11 iyun 2023-cü ildə, saat 03:40-da çəkilib. 40 dəqiqəlik videoda ilk olaraq 11-12 nəfərin yığışdığı, kənardan onların yanına 5-6 nəfərin gəldiyi görünür.

Vəkil Vüsal Orucov 40 dəqiqəlik videoya tam baxılmasına etiraz etdi. Dedi ki, görünən odur ki, iş üzrə bir nəfər qurşağa qədər soyunub və başına toplaşanlar da onu sakitləşdirməyə çalışırlar. Orada təqsirləndirilən şəxslərdən kimsə yoxdur və bu videoya baxış keçirilməsi mənasızdır. Məhkəməyə hər hansı bir nəticəyə gəlməyə də imkan verməyəcək.

Prokuror bildirdi ki, Peyman Vəlizadə dava zaman orada olmadığını deyir, amma videodan görünür ki, orada olub.

Peyman Vəlizadə isə bildirdi ki, o, heç vaxt dava zamanı orada olmasını inkar etməyib: “Mən deməmişəm ki, orada olmamışam. Demişəm ki, ora sonradan gəlmişəm”.

Hakim Peyman Vəlizadəyə yerindən danışmasını irad tutdu.
Digər video “Sea Breeze”dəki “White villa 36” kamerasından götürülüb və 11 iyun 2023-cü ildə, saat 03:50-də çəkilib. Bu videoda da nə zərərçəkənlər, nə də ki, təqsirləndirilənlər görünmür.

Videolar tədqiq edilərkən vəkillər hakimin diqqətinə çatdırdılar ki, əsas video iş materialalrına əlavə edilməyib.

Həmin videoda Elnur Məmmədov və digər şəxslər Elmir İsmayılovu döyüb, maşınını əziblər.

Vəkil Vüsal Orucov hakimdən xahiş edib ki, ittihamın başlanğıcında yazılanlara uyğun video təqdim edilsin:

“Görünsün ki, ümumiyyətlə bu dava necə başlayıb, təşəbbüsçü kim olub? Təşəbbüsçü görünməsə, kiminsə əməlinə xuliqanlıq qiymətini necə verə bilərik? Kimsə kiminləsə davam edirsə, dava kimin təşəbbüsü ilə başlayırsa, xuliqanlıq onun əməlində var.

Daha bir video tədqiq olunarkən sensasion təfərrat meydana çıxdı. Aydın oldu ki, Elnur Məmmədov və ətrafındakı şəxslər Elmir İsmayılovu döyüb maşınını əziblər. Bundan sonra ərazidən keçən daha bir minik maşınında olan şəxslərlə mübahisə edblər. Mübahisə minik maşınında olan şəxslərin Elnur Məmmədov və ətrafındakı şəxlərlə döymələri ilə sonuclanıb. ən diqqət çəkən məqam isə budur ki, bu dava ilə bağlı hər hansı bir araşdırma aparılmayıb. Aparılıbsa belə, həmin davada döyülən şəxslərin kimlikləri açıqlanmayıb.

Məhkəmədə belə anlaşıldı ki, bu video səhvən iş materiallarına əlavə olunub və daha bir dava epizodunu əhatə edir. Bu videoda Elmir İsmayılov, o döyüləndən saatlar sonra “Sea Breeze”yə gələn onun qardaşı Elgün İsmayılov, Məhəmməd Həsənzadə, Peyman Vəlizadə və Murad Əhmədli yoxdur.

Sensasion videodan görünür ki, “Sea Breeze”də minik maşını Elnur Məmmədov, Cavad Muradov və digər şəxslərin yanında saxlayır. Maşından düşən şəxslə Elnur Məmmədov arasında dava düşür. Video tədqiq olunarkən zalda “bu Elnurdur, o da Cavaddır” sözləri eşidilir.

Bu zaman prokuror Amin Şəkərəliyev “Cavad deyir ki, mən heç kimi vurmamışam” deyir. Videodan da görünür ki, vurub yıxır” sözlərini deməsi Cavad Muradovun etirazına səbəb oldu: “Mən deməmişəm ki, heç kimi vurmamışam. Bu dava ümumiyyətlə ittihamda yoxdur. İttihamı hamımız oxumuşuq. İttihamda Elmirdən söhbət gedir. Bu videoda isə Elmir yoxdur. Belə çıxır ki, mənim rinqdə olan videolarımı da ittihama əlavə etmək lazımdır? Bu videoda ittihama aid olmayan şəxslərdir. Bu video düzgün olaraq işə əlavə edilməyib. Bu videoda Elmir İsmayılov yoxdur axı!”

Hakim: “Təqdim olunan videolar tədqiq olunmalıdır”.

Cavad Muradov: “Möhtərəm hakim, ittiham çərçivəsində tədqiq olunmalıdır. Bu videoda göstərilən dava ittihamda yoxdur axı. Bu video səhv olaraq əlavə edilib”.

Vəkil Vüsal Orucov Cavad Muradova dəqiqləşdirici sual verir: “O videoda kimlər var?”

Cavad Muradovun sözlərinə görə həmin vaxt maşında olanlar yanlarından keçərkən söyüş söyüblər, buna görə də aralarında mübahisə başlayıb: “O məsələnin bu işə heç bir aidiyyatı yoxdur”.
İş üzrə videolar tədqiq olunarkən prokuror “Peyman burada görünür” deməsi vəkillərin etirazına səbəb oldu. Prokurordan tələb etdilər ki, qarşısındakı monitorda videoya baxıb fikir söyləməsin.

Hakim də vəkillərin etirazını haqlı saydı: “Dövlət ittihamçısı, çox xahiş edirəm fikirlərinizi deyəndə konkret deyin, vəkillər də bilsin ki, söhbət nədən gedir. Şəkilə baxıb “bu Cavaddır, bu Peymandır” deyirsiz, belə olmur axı. Fikirlərinizi çatdırın və izah verin”.

Dövlət ittihamçısının “özləri görürlər” deməsinə vəkillər yenə də etiraz etdilər: “Biz görmürük. İttihamda yazılıb ki, 23 radələrində bu dava olub. Videodan da görünür ki, gecə 4-ə qalıb”.

Vəkil Abbas Kərimbəyli bildirdi ki, ittihamda yazılıb ki, Elmir İsmayılovu Elnur Məmmədov və digər şəxslər 23 radələrində döyüblər, maşınını əziblər.İtthamda yazılır ki, guya Elmir İsmayılovun qardaşı Elgün İsmayılov, Məhəmməd Həsənzadə, Peyman Vəlizadə və Murad Əhmədli həmin vaxt onun yanında olublar.

Şahid ifadələri ilə, zərərçəkənlərin sözləri ilə, digər dəlillərlə də sübut olundu ki, Elmir İsmayılov tək olub. O, döyüləndən xeyli sonra qardaşı Elgün İsmayılova zəng edib, xahiş edib ki, gəlib onu xəstəxanaya aparsın. Elgün İsmayılov da ona dostları Məhəmməd Həsənzadə, Peyman Vəlizadə və Murad Əhmədli həmin vaxt olduqları Mərdəkan qəsəbəsindən gəliblər. Onlar “Sea Breeze”yə gecə 4-ün yarısı gəliblər. Onlar da gəlib təzədən düşüblər davaya. Onlar gələnə qədər də Elnur Məmmədov və digəriləri minik maşınından söyüş söyən şəxsləri döyüblər. Yəni o adamlar işdə ümumiyyətlə yoxdur. O adamların da kimliklərini müəyyən edib ittihama salaq. Burada zərərçəkən deyir ki, mən urdum yıxıldı, prokuror isə reaksiya vermir. Burada qərəzli mövqedən çıxış etməyək, insan taleyi həll olunur, bu hadisə hər birimizin başına gələ bilər. Məsələyə ədalətlə yanaşaq, kim orada olubsa, kameraya düşüb, saatı var. Əgər varsa, qoyulsun ortaya.
Vəkil Vüsal Orucov da bildirdi ki, ittihama görə Məhəmməd Orucov hadisə baş verən gün 23 radələrində “Sea Breeze”də restoranda olub, araq içib. İttiham bu qədər əmin idisə ki, Məhəmməd orada olub, oradakı videoları işə əlavə etməli idi. Sübut etməlidi idilər ki, Məhəmməd əlində araq rumkası araq içir və ya Elmirin mühafizəçisi olaraq yanında harasa gedir. Əgər ittiham tərəfi iddia edirsə ki, mübahisə bizim təşəbbüsümüzlə başlayıb, həmin videonu işə əlavə edib bizə göstərməli idilər. Bunun əvəzinə bizə dəxli olmayan videoları işə əlavə ediblər, orada kimsə dava edir. Videogörüntünün tədqiq olunmasının məqsədi var. Biz bu videogörüntülərə baxıb nə müəyyən etdik? Bilirlər ki, bu gün təqsirləndirilən kimi təqdim olunan şəxslər dava zamanı videolarda yoxdur, təqdim etsələr belə nəyi sübut edəcəklər? Sadəcə bizim vaxtımızı boşuna alırlar.

Amin Şəkərəliyev vəsatət qaldıraraq şahid Vüqar Tağıyevin prosesə dəvət olunmasını, onun iştirakı ilə videoya baxış keçirilməsini istəyib.
Hakim isə aydınlaşdırıb ki, Elmir İsmayılov iş üzrə qismən təqsirli bilib: “Elmir İsmayılov demir ki, mən orda olmamışam, deyir olmuşam, mən kiməsə xəsarət yetirməmişəm, əksinə mənə xəsarət yetirilib, mənim maşınım əzilib. O biri mübahisədə isə deyir ki, mən orada olmamışam, mən artıq orada yox idim. İlk mübahisə olduğunu, başına xəsarət yetirildiyini, maşınının əzildiyini Elmir İsmayılov deyir. Özünü də qismn təqsirli bilir”.

Vəkil Ülvi Məmmədov dedi ki, istintaq davalar məsələsində səhv edib: “Orada üç dava olub. Birinci davada Elmir İsmayılovu döyüb maşınını əziblər. Bir neçə saat sonra daha bir mübahisə olub. Elgün döyülüb, Peyman, Məhəmməd vurulub. 3-cü epizodun isə ümumiyyətlə cinayət işinə aidiyyatı yoxdur, bunu da Cavad Muradov izah etdi, dedi ki, biz gedirdik, tanımadığımız şəxslər maşından söydü, mübahisə oldu. 1-ci və 2-ci epizodu, belə deyək, saat 11 – 3 arası baş verən epizod üzrə Elmirə qrup halında xuliqanlıq ittihamı vermək düzgün deyil. Orada Elmir olub, Elnur olub. Elmirə nə əsasla qrup halında xuliqanlıq ittihamı verilib? Belə çıxır ki, bu mübahisədən 3-5 saat sonra başqa şəxslər mübahisə edib dalaşıblarsa, buna görə Elmirə qrup halında xuliqanlıq ittihamı verilməlidir? Belə ittiham vermək olmaz”.
Vəkil təqsirləndirilən Murad Əhmədli ilə bağlı vəsatət verəcəyini, bundan əvvəl isə ona söz verilməsini xahiş etdi.

Hakim tədqiq olunan videolarla bağlı tərəflərin fikirlərini soruşdu. Peyman Vəlizadə bildirdi ki, o, Məhəmməd Həsənzadə, Elgün İsmayılov və Murad Əhmədli ilə birgə “Sea Breeze”yə gecə 4-ə 10 dəqiqə qalmış gəliblər. Elnur Məmmədov orada söyüş söyüb, mən də orada Elmiri aparmağa gəlmişdim. Bizim əvvəlcədən niyyətimiz orada davada iştirak niyyətimiz olmayıb. Nə də ki, əvvəldən Elmirin masasında olmamışıq. Yazırlar ki, Peyman orada olub, araq içib. Olmamışam axı. Ora gəlməmişəm. Mən ora gələndə dava oldu, vurdular.

Elmir İsmayılov da bildirdi ki, tədqiq olunan heç bir videoda o, yoxdur.

Murad Əhmədlinin videolara münaisbət bildirərkən dedi ki, məktəblidir, heç bir videoda yoxdur, heç bri davada da olmayıb: “İttihamda yazılanların hamısı yalandır. Məni orada 2 gün saxladılar. Atam da buna görə insult keçirdi. Boş-boşuna məhkəməyə gəlib-gedirəm, imtahanlara hazırlaşa bilmirəm”.

Murad Əhmədlinin vəkili Ülvi Məmmədov vəsatət qaldıraraq hadisə baş verən gün və saatlarda müvəkkilinin harada olması ilə bağlı telefon-anten məlumatlarının alınması üçün mobil operatorlara sorğu verilməsini istədi. Peyman Vəlizadənin vəkili də eyni vəsatətlə çıxış etdi. Hakim hər iki vəsatəti təmin elədi. Proses 26 dekabrda davam etdiriləcək.(Qaynarinfo)

Dənizkənarı Bulvar İdarəsinin qanunsuz qazıntı apardığı iddia olunur.

Belə ki, Su İdman Sarayına gedən yolun idarənin əməkdaşları tərəfindən qazıldığı və ərazidə şlaqbaum qoyulacağı deyilir.

Məsələ ilə bağlı Dənizkənarı Bulvar İdarəsindən bildirilib ki, görülən işlər qanunidir, bulvar ərazisindən kənarda iş görülməyib.

Avtomobil Yollarının Mühafizə Xidmətinin rəsmisi isə Baku TV-yə açıqlamasında bildirib ki, sözügedən ərazidə qazıntı işlərinin aparılması qeyri-qanunidir.

“Su İdman Sarayı ərazisində hazırda 1000 “parkovka” yeri müştərilərimiz üçün təmənnasızdır. Bu ərazidə qoyulacaq “parkovka” o deməkdir ki, Su İdman Sarayına gələn hər bir şəxs ödəniş etməlidir. Halbuki, biz heç bir müştəridən “parkovka” üçün ödəniş tələb etmirik”, – Su İdman Sarayının rəsmisi Novruz Novruzov bildirib.

Avtomobil Yolları Dövlət Agentliyi sözügedən ərazinin ümumi istifadədə olan yol olduğunu və bununla bağlı olaraq həmin yolda hər hansı işin aparılması ilə bağlı mütləq şəkildə rəsmi qaydada müraciət edilməsinin vacibliyini qeyd edib.

Binəqədi qəsəbəsinin bir qrup sakini tərəfindən Hurriyyet.az saytının redaksiyasına şikayət məktubu daxil olub. Şikayətçilər deyirlər ki, 2 ildir evlərində qaz, su, işıq yoxdur:

“Biz, “Binəqədi Park” şirkətinin bizə satdığı mənzillərdə yaşayırıq. Bizdən evin dəyərindən əlavə, sakinlərdən 1000 manat pul aldılar ki, 3 növ sayğac quraşdırılacaq. Amma bu günə kimi sayğaclardan xəbər yoxdur.

Qışın günü soyuqdan donuruq. Mənzillərə qaz verilməyib, işıq tez-tez kəsilir. Evlərə gələn su da çirklidir, dəhşət qoxu var.

Sanki bir vaxtlar bu evləri bizə pulsuz veriblər. İndi də yenidən şirkət bizdən 1000 manat pul istəyir ki, qaz çəkilsin. Bilmirik, doğrudan çəkəcəklər, yoxsa yenə bizi aldadırlar?!

Həyətdə yaşıllıq yoxdur, ancaq çirkab, qum, toz dumanın içində yaşayırıq. 2 qışdır zülm çəkirik.

Sizdən xahiş edirik, problemimizi işıqlandırın, bəlkə bir tədbir görülə”.

Şikayətçilərin redaksiyamıza göndərdiyi videoları olduğu kimi təqdim edirik:

Zəruri haşıyə: Karvansara darvazası, yoxsa məktəb foyesi?

Naxçıvandakı bəzi tikililərin təhvil götürülməməsinin və nəticədə inşaat obyektlərində işləyən fəhlələlərin maaşlarının verilməməsinin yaratdığı gərginliyin səbəbindən bəhs edən yazımızın ilk hissəsi dərc olunduqdan dərhal sonra həmin layihələrin icraçısı “Arkoz” şirkəti iddialara aydınlıq gətirən rəsmi açıqlama yaydı. Dost nəşrlərdən olan TNS-də yayımlanan açıqlamada 14 saylı məktəbdəki nöqsanlar barədə bildirilir:

“Arkoz İnşaat Şirkəti tərəfindən inşa edilmiş 14 saylı ümumtəhsil məktəbi 2007-ci ildə Azərbaycan Prezidenti cənab İlham Əliyevin iştirakı ilə istifadəyə verilib. 16 il ərzində heç bir cari təmirə dayandırılmamış məktəb binası statik baxımdan ən sağlam tikililər sırasındadır. 1600 yerlik məktəb binası tikilərkən sifarişçi tərəfindən şagirdlərin sıxlığı nəzərə alınaraq giriş foyelərinin geniş götürülməsi layihələndirilib, statik hesablamalar aparılaraq buna uyğun dəmir-beton konstruksiya işləri icra edilib. Giriş foyesində daşıyıcı aşırımın uzunluğu 12 metrdir. Binanın daşıyıcı divarlarında və konstruksiyalarında, aşırımlarda və döşəmələrdə hər hansı çat və ya digər qüsur yoxdur. Giriş foyesindəki daşıyıcı aşırımın vibrasiyası ilə bağlı valideyn müraciəti əsasında sifarişçi tərəfindən mütəxəssis dəvət edilib və vibrasiyanın normativ həddə olduğu müəyyən edilərək daha da azaldılması üçün əlavə sütunların qoyulması barədə təklif verilib”.

Göründüyü kimi, “Arkoz” şirkətinin bu arqumenti məşhur atalar sözünü yada salır: “Dəvəçi ilə dost olanın darvazası gen gərək”. Açıqlamadan belə anlaşılır ki, məktəbdə çox uşaq oxuyacağından foyedə daşıyıcı aşırım 12 metr uzunluğunda layihələndirilmiş, bu da binanın arada bir uşaq səs-küyündən “lərzəyə gəlib əsməcəyə düşməsinə” yol açmışdır. Amma həmin titrəşimlər normadan kənara çıxmamışdır. Bununla belə, tam normasında olan əsməcələrin qarşısının alınması üçün məktəb binasının 1-ci və 2-ci mərtəbələrinə 16 ildən sonra əlavə sütunlar qoyulmuşdur. Heç bir ehtiyac olmadığı halda, “köhnə hamama təzə tas qoyulması”nın hansı zərurətdən qaynaqlandığına aydınlıq gətirməyi FHN-nin Naxçıvan bürosunun ixtiyarına buraxır və aşağıdakı suallarımıza müvafiq rəsmi cavablar gözləyirik: Məktəb binasında titrəşim həqiqətən də normativə uyğun idisə, onda niyə FHN-nin Tikintidə Təhlükəsizliyə Nəzarət Dövlət Agentliyi ona mənfi rəy verərək Naxçıvanın seysmik vəziyyətinə uyğun hesab etməmişdir? Niyə onun zəlzələyə dözümsüzlüyü barədə qərar məktəbin təhvil alınması zamanı yox, istifadəyə verilməsindən 16 il sonra qəbul olunmuşdur? “Arkoz” şirkəti və Naxçıvanın ozamankı rəhbərliyi 16 il əvvəl karvansara yox, məktəb tikdiklərini bilmirdilərmi? Olmaya, 14 saylı məktəbdə dəvələrin yox, uşaqların təhsil alacağı həqiqəti Vasif Talıbovun istefaya göndərilməsindən sonra anlaşılmış və “gen darvaza”nın daraldılması məsləhət bilinmişdir?

Bu və buna bənzər xeyli sayda suallar cavabsız qalır və biz araşdırma yazımızda “Arkozi” şirkətinin təkzibindəki arqumentlərindən də istifadə edəcəyik.

II Hissə

Naxçıvanın üçüncü xaruqəsi: 50 ildən sonra NDU-ya “yamanan” rektoluq binası

Muxtar Respublikaya səfərimizdə növbəti “ziyarətgahımız” NDU-nun rektorluq binası oldu. Maraqlıdır ki, rektorluq binası universitetin özündən nə az, nə çox, düz 50 il qoca imiş. Yox, yox, səhv başa düşməyin, onu demək istəmirəm ki, əvvəl rektorluq binası tikilib, 50 il keçdikdən sonra universitetin korpusları yağışdan sonra çıxan göbələklər kimi cücərməyə başlayıb. Bu xaruqəladə hadisənin çox qısa izahı var: rektorluq binası 50 ildən sonra universitetə “yamanıb”. Nəticədə videosunu sizə təqdim etdiyimiz bu ücubə ortaya çıxıb.

(Video bu linkdə)

Məlumata görə, 105 il əvvəl təməlləri atılan bu bina əvvəl hərbi hospital kimi fəaliyyət göstərib. Görünür, Naxçıvanda yeni və müasir hərbi hospitalın tikilməsini nəzərə alan yerli hakimiyyət onun əvvəlki binasını da boş qoymaq istəməyib, həmin binanı NDU-ya bağışlayıb. NDU-nun rektoru Elbrus İsayev də “bəy verən atın dişinə baxmayıb”, onu məmnuniyyətlə qəbul edib. Necə də etməsin, axı həmin dövrlərdə sözügedən ali məktəbin prorektoru “xanzadə” həzrətləri Seymur Talıbov idi və heç kim onun sözünün üstünə söz deyə bilməzdi.

Xan həzrətlərinin “aldanmış kəvakibləri”

Xüsusi olaraq vurğulamağı vacib hesab edirik ki, NDU-nun özündən qoca olan rektorluq binasının inşaatının “Arkoz” şirkətinə heç bir dəxli yoxdur. Binanın ilk iki mərtəbəsi Çar Rusiyası, son mərtəbəsi isə “Xan” Naxçıvanı dövründə inşa olunub. İlk mərtəbələrə nə qədər pul xərcləndiyini deyə bilmərik, amma son mərtəbəsinə çəkilən xərclər barədə rəsmi məlumatlar var. Sənədlərə görə, birmərtəbəli “yamağ”a 2 milyon manat sərf olunub. Tikintinin həm sifarişçisi, həm də icraçısı Naxçıvan Muxtar Respublikası Şəhərsalma və Arxitektura Komitəsi olub. Komitənin sədri Hicran Yaqub oğlu Rüstəmov məhz bu cür qüsurlu tikintilər ucbatından 2022-ci ildə həbs edilib və o, 212 milyon 361 min manat dövlət vəsaitini mənimsənməkdə günahlandırılır.

Naxçıvanda olarkən söhbətləşdiyim bəzi mühəndislər Hicran Rüstəmovun bu qədər pulu təkbaşına mənimsədiyinə inanmadıqlarını bildirdilər. Onların fikrincə, Hicran müəllim Talıbovlar hakimiyyətinin “aldanmış kəvakib”lərindən sadəcə biri idi. Vasif Talıbov hakimiyyətinin bir çox yeyintilərinin məsuliyyətini boynuna götürsün deyə Hicran Rüstəmov 2017-ci ildə Vasif Talıbovun imzaladığı Sərəncamla Naxçıvan Muxtar Respublikası Dövlət Şəhərsalma və Arxitektura Komitəsinin sədri vəzifəsinə gətirilir, vəzifədə olduğu 5 il müddətində aparılan bir çox qanunsuz tikililərlə bağlı sənədlərin altına imza atır. Vasif Talıbov istefaya gedəndən sonra “bildirçinin bəyliyi” də bitir və Hicran Rüstəmov dəmir barmaqlıqlar arxasına uzun müddətli “istirahət”ə göndərilir.

Naxçıvanın dördüncü xaruqəsi: Çatısız Texno-park

Rektorluq binasına baxış keçirərkən qulağımıza bir xəbər dəydi. İddia olunurdu “Arkoz” şirkətinin fəhlə və mühəndis heyəti NDU-nun inşaatı dayandırılmış Texno-parkına toplaşıb bizi gözləyir. Biz də onları çox gözlətməmək üçün həmin obyektə yollandıq. Həqiqətən də obyektın ərazisində xeyli insan vardı. Əksəriyyəti fəhlə olan bu insanların ən mühüm tələbi 3-4 aydır ala bilmədikləri maaşlarının ödənilməsi idi. Gündəlik çörək pullarını daşdan çıxaran bu adamların aylarla maaşsız qalması həqiqətən də ürəkağrıdıcıdır. Onlar məndən xahiş edirdilər ki, üzləşdikləri çətinlikləri dövlət yetkililərinə çatdırım və haqlarının bərpa olunması üçün əlimdən gələni əsirgəməyim. Mən də üzümü dövlət orqanlarına tutub “Arkozi” şirkətində çalışanların maaşlarının verilməsini vacibliyini vurğulayıram. İcraatçı şirkətlə dövlət qurumları arasında yaşanan mübahisələrin məğduru alın təriylə çörək pulu qazanan sadə insanlar olmamalıdır. Nəyin bahasına olursa olsun fəhlələrin haqları verilməli, daha sonra sifarişçininmi, icraçı şirkətinmi haqlı, yoxsa haqsız olduğu müəyyənləşdirilməlidir. Bu məsələdə Məhəmməd peyğəmbərin məşhur hədisi əsas götürülməlidir: “Əməkçinin alacağını alın təri qurumadan ödəyin”. Şikayətə gələn fəhlələrin alın tərləri aylardır quruyub, amma onlar hələ də haqlarını ala bilmirlər. Evdə isə onları bir külfət ailələri gözləyir, ailə başçılarının ev qapısını əlidolu açacaqlarına ümid edirlər. Bir çoxlarının banklara borcları, ödənməmiş kommunal xərcləri də var. Borclarını ödəməyəcəkləri təqdirdə işıqları, qazları, suları kəsilə, daha ağır məişət prolemləri ilə üzləşə bilərlər. Bu isə Naxçıvanın addım-addım sosial partlayışa sürüklənməsi deməkdir.

“Arkoz” şirkəti ilə Naxçıvan hakimiyyəti arasındakı mübahisələr isə yaxınlarda bitənə oxşamır. Etirazçılar adından bizimlə danışan şirkətin səlahiyyətli nümayəndəsi Asəf Məmmədovun iddiasına görə, gördükləri işin müqabilində sifarişçi tərəfdən pul ala, nəticədə fəhlələrin maaşını da ödəyə bilmirlər. “Tikilməkdə olan layihələrin idarə edilməsi” Məhdud Məsuliyyətli Cəmiyyətinin sədri İsmayıl Əhmədov isə bu iddia ilə razılaşmır. Bildirir ki, bu zamanadək tikintiyə 2 milyon manata yaxın vəsait ayrılıb: “Bu isə onun smeta dəyərinin hardasa 80%-i deməkdir. İndiyədək görülən işlər isə ümumi işin heç 30%-i belə deyil. Üstəlik, indiyə qədərki işlər də tam keyfiyyətsiz həyata keçirilib. Binanın dam örtüyü olmadığından yağan qar, yağış tikiliyə ciddi ziyan vurub. Yağışa davamsız materiallar sıradan çıxıb, binanın inşasında istifadə olunan armaturlar, dəmir konstruksiyalar korroziyaya uğrayıb. Bu tikilinin təhvil alınması mümkün deyil”.

Asəf Məmmədov İsmayıl Əhmədovun iddialarına cavabsız qalmır. Onun fikrincə, binanın çatısının olmamasının günahkarı “Arkoz” şirkəti yox, Naxçıvan hakimiyyətidir. Çünki onlar layihəni sonradan dəyişdiriblər. Bu da çatı qatının qurulmaması, tikilinin bəzi hissələrinin sökülməsi ilə nəticələnib və indiki vəziyyətin ortaya çıxmasına yol açıb. Sorğu-suallarımız nəticəsində bəlli oldu ki, “Tikilməkdə olan layihələrin idarə edilməsi” Məhdud Məsuliyyətli Cəmiyyət” bu il Naxçıvandakı xidmətinə başlayıb. Bina isə inşa olunduğu gündən indiyədək çatı üzü görməyib.

Şikayətçilərin digər iddiasına görə, “Tikilməkdə olan layihələrin idarə edilməsi” Məhdud Məsuliyyətli Cəmiyyət” adlı qurum onların fəaliyyətini yoxlaya və işlərini dayandıra bilməz. Çünki o, dövlət qurumu deyil. İsmayıl Əhmədov bu iddianı da yaxına buraxmır. Onun fikrincə, indiyədək dövlət qurumlarının bu fəaliyyəti yerinə yetirməsi effektli nəticə vermədiyindən Azərbaycanın bir sıra rayonlarında işlərin yürüdülməsi qeyri-dövlət qurumlarına tapşırılır: “Məsələn, səhiyyə sisteminin idarə olunması ictimai birlik olan “TƏBİB”ə, məmur süründürməçiliyinə son qoymaq üçün bir sıra inzibati-sənədləşdirmə funksiyası “ASAN Xidmət”ə həvalə edilib. Yəni dünya get-gedə dəyişilir. Artıq bir çox sahələrə ictimai nəzarət funksiyası qeyri-dövlət qurumlarına keçir. Biz də bir cəmiyyət olaraq tikinti şirkətlərinin fəaliyyətini optimallaşdırmaq və ətrafımıza topladığımız mühəndislər vasitəsilə onlara tövsiyələr veririk. Necə ki, bir çox dövlət şirkətlərində maliyyə hesabatlarının aparılması bəzi nüfuzlu audit şirkətlər tərəfindən həyata keçirilir. Bizim şirkət də bənzər fəaliyyətlə uğraşır. Əvvəldən bizim kimi özəl şirkətlər tikinti müəssisələrinə bu xidməti göstərsəydilər, Naxçıvan MR Şəhərsalma və Arxitektura Komitəsinin sədri Hicran Rüstəmov kimi insanlar içəridə oturmazdı”.

İsmayıl Əhmədov vurğuladı ki, rəhbərlik etdiyi “Tikilməkdə olan layihələrin idarə edilməsi” MMC ilə “Arkoz” arasında bağlanmış müqavilə var: “Bu müqaviləyə əsasən, bizim şirkət “Arkoz”un fəaliyyətini incələyə bilər və həmin sənədə Emin Uçarın özü qol çəkib”.

(Ardı var)

Heydər Oğuz,

Ovqat.com

Naxçıvanın 7 "xaruqəsi" haqqında esse

Məni Naxçıvana aparan “dua”

Hər dəfə Naxçıvandan mənə telefon açıb Vasif Talıbovun atasına rəhmət oxuyanların “dua”larını eşidəndə özümü söyülmüş kimi hiss edirdim. Çünki bu diyarın insanlarının təsəvvürünə görə, Vasif Talıbov xanədanının yıxılışının əsl səbəbkarı mənim Facebookdakı paylaşımlarım olub. Sözsüz ki, bu qənaət kökündən yanlış idi. Vasif Talıbov Naxçıvandakı mübahisəli fəaliyyətinin qurbanı olmuşdu, sadəcə həmin dövrlərdə mən də adətim üzrə onu tənqid edirdim. Bu cür yanlış düşüncələrə qapılan və Vasif xanın xiffətini çəkən insanların dualarını mənim üzümə oxumalarını, yumşaq desək, şəxsimə ünvanlanmış qarğış kimi alqılayır və bundan xeyli mütəəssir olurdum. Və 30 ilə yaxın Naxçıvan camaatına zülm etmiş bir insanın birdən-birə aranan qənimət birinə çevrilməsinin sirrinə vaqif olmaq, bunun səbəbini araşdırmaq mənim ən böyük istəyim halına gəlmişdi. Allah belə bir fürsəti, nəhayət, öz sevimli bəndəsinə nəsib etdi. Naxçıvandan gələn “buyur, gəl, vəziyyəti yerində obyektiv araşdır” təklifini böyük məmnuniyyətlə qəbul etdim.

Naxçıvan səfərimizin ilk günündə bu diyarda fəaliyyət göstərən bir sıra müəssisələrə baş çəkdik. Məqsədimiz Vasif Talıbovun atasına rəhmət oxunuşunun altında yatan hikməti anlamaq və ictimaiyyətə çatdırmaqdı. Hələlik onu deyə bilərəm ki, səfərimiz çərçivəsində cavabını axtardığım bir çox sualların ipuclarını yaxalamaq imkanım oldu və təəssüratlarımı ayrıntılı şəkildə sizinlə paylaşacağam.

Etiraf edim ki, Naxçıvan rəhbərliyi bizim sərbəst fəaliyyətimizə nəinki mane olmadı, hətta bəzi məqamlarda texniki dəstəyini belə əsirgəmədi. Hiss onurdu ki, Vasif Talıbovun atasına rəhmət oxunmasının sirrinin çözülməsində onlar da mənim qədər maraqlı idilər.

Aşsüzən – hospital

Bizə hətta hərbi obyekt sayılan Naxçıvan hərbi hospitalının içərisinə girib otaqlarını bir-bir “təftiş” etmək imkanı yaradıldı. Baxmayaraq ki, “təftiş”imizin sonunda Naxçıvan rəhbərliyinin “ricası” da qarşımıza ciddi şərt kimi qoyuldu: “mümkün qədər bu müəssisənin hərbi obyekt olduğunu nəzərə alıb gördükləri nöqsanlara korrektəli yanaşsınlar. Dost var, düşmən var, hər eybimizi faş etmək “qaş düzəldərkən göz çıxarmaq” effekti də verə bilər”.

Təbii ki, bu narahatlığın haqlı əsasları vardı və onunla razılaşmamaq mümkün deyildi. Üstəlik, biz Naxçıvandaydıq və bu diyara ta qədimdən “gülüm Naxçıvan” deyiblər. Qışda Sibir qədər soyuq, yayda cəhənnəm quyularından biri sayılan qəbir qədər isti olan bu diyarda təbəssümlü gülüşlərin anidən buzlu qəzəblə əvəzlənməməsi ehtimalı da yox deyildi. Odur ki, Naxçıvan rəhbərliyinin incə xahişini eyni nəzakətlə qəbul etdik.

Naxçıvan rəhbərliyinin xətrinə, təkcə Azərbaycanın yox, eləcə də Cənubi Qafqazın ən böyük hərbi hospitalı olan bu müəssisə barədə çox danışmaq fikrim yoxdur, sadəcə onu demək istəyirəm ki, 2 il əvvəl Prezident İlham Əliyev tərəfindən böyük təmtəraqla açılan bu müəssisə indiyədək təhvil alınmayıb. Baxmayaraq ki, müəssisədə sıdırğı iş gedir və bəzi əsgərlər orada müalicə olunurlar.

Hospitalın kordiologiya şöbəsində təsadüfən qarşılaşdığım 3 əsgərdən onlara necə baxıldığı ilə maraqlandım. Gileylənmədilər, əksinə, həkimlərin onlarla xoş rəftarından, hospitalın şəraitindən ağız dolusu danışdılar. Biz isə ətrafa göz gəzdirdikcə bu “möhtəşəm” xəstəxanın divarlarında xeyli sayda “yamaq”lar görürdük. “Yamaq”ların səbəbləri ilə maraqlandıq. Məlum oldu ki, hospitalın indiyədək təhvil verilməməsi elə bu “yamaq”ların altında gizlidir. Zira bu “yamaq”lar divarlarda əmələ gələn çatları tutmaq üçün vurulmuşdu. Çatların fundamental səbəblərdən, yoxsa adi şkatur nöqsanından qaynaqlanıb-qaynaqlanmadığı isə bilinmir. Məhz bu səbəbdən də Naxçıvanın yeni rəhbərliyi hospitalı təhvil götürmür, podratçı şirkətdən (Emin Uçarın “Arkoz” şirkətindən) nöqsanları aradan qaldırılması tələb olunur. Podratçı şirkət isə “əlavə iş” müqabilində əlavə də ödənişlər istəyir. Beləcə, sifarişçi ilə podratçı arasında bitib tükənməyən mübahisələr Prezident İlham Əliyevin 2 il əvvəl böyük təmtəraqla açılışını etdiyi və yəqin ki, 10 milyonlarla manata başa gələn bu hərbi müəssisənin taleyini havadan asılı vəziyyətdə qoyur.

Hospitalın bundan əlavə, başqa problemləri də var. Məsələn, hospitalın divarları, tualetinin tavanı, döşəməsi su buraxır. Müəssisəyə baş çəkdiyimiz gün, bilmirəm, xoşbəxtlikdənmi, ya bədbəxtçilikdənmi, Naxçıvana yağış yağırdı və biz sözügedən iddiaların canlı şahidi olduq. Xüsusilə hospitalın “-1-ci mərtəbə” adlanan zirzəmisində bir çox otaqlar deşilmiş çən kimi su buraxırdı. Zirzəmi deyib keçməyin, müəssisənin kordiologiya, morq və digər önəmli şöbələri bu mərtəbədə yerləşirdi. Maraqlı idi ki, tibb müəssisəsinin morqunda havalandırma sistemi belə düzgün qurulmamış, Bakıdan gələn yoxlama komissiyası ona istifadəyə yararsız rəyi vermişdi.

Diqqətimi çəkən digər xüsus zirzəmi qatında yerləşən iki otaqda pəncərələrin olmaması idi. Həmin pəncərəsiz otaqlardan biri də tibb bacılarına məxsus idi. Tibb bacılarından pəncərəsiz otaqda işləməyin necə olduğunu soruşdum. “Xan” xofu hələ də canlarından çıxmayan tibb bacıları nəzakətlə mənə müsahibə verə bilməyəcəklərini bildirdilər. Yerli rəhbərliyin xahişini nəzərə alıb mən də onların üstünə çox getmədim. Necə olsa, mən çıxıb gedəcəkdim, bu zəhmətkeş xanımlar isə Naxçıvanda qalacaqdılar və yeri gələndə onları heç kim yerli məmurların qəzəbindən xilas edə bilməyəcəkdi.

Hospitalın döşəmələri kafeldən imiş

Tualetin sızması barədə iddiaları yoxlamaq üçün zirzəmidəki və 1-ci mərtəbədəki tualetlərə baxmaq istədim. Qapıları bağlı idi. Belə anladım ki, müəssisənin rəhbərliyi çox istifadə olunmasın deyə onları bağlı saxlayırdı. İsrarlı xahişimdən sonra 1-ci mərtəbənin tualetini açdılar. İçəri girəndə tualetin tavanındakı örtüyün tamamilə çökdüyünün şahidi oldum. Müəssisənin hərbi formalı mütəxəssisi iti addımlarla özünü bizə yetirdi və çöküşün səbəbinə belə aydınlıq gətirdi:

-Zirzəmi qatı, 1-ci, 2-cı və 3-cü mərtəbənin tualetinin döşəməsinə metlax əvəzinə kafel vurulub, ona görə də bu materiallar su saxlamır və sızmalar nəticəsində tavanın örtüyü çöküb.

-Bəs digər mərtəbələrdə vəziyyət necədir?

-Yuxarı mərtəbələrdə döşəməyə əslində metlax vurulub, amma onlar da su saxlamır.

Bir sözlə, “Qul xətasız olmaz, ağa kərəmsiz” atalar sözünə inandığımdan və Naxçıvan rəhbərliyinin nəcib kərəminə sığınaraq deyərdim ki, Naxçıvanda Prezident İlham Əliyevin 2 il əvvəl böyük təmtəraqla açdığı hərbi hospital əslində tibb müəssisəsi yox, nəhəng aşsüzən imiş. Naxçıvanın yeni rəhbərliyi isə “ağa kərəminə” malik olmadığından hospitalı təhvil götürmək istəmir.

Naxçıvanın 2-ci “xaruqəsi” - Səs-küydən əsim-əsim əsən və yeriyən məktəb

Yeri gəlmişkən, Naxçıvanda “Vasif Talıbovun atasına rəhmət oxunuşunun, haqqında danışdığımız sifarişçi – podratçı çəkişməsinə də birbaşa dəxli var. Belə mübahisə predmetlərindən biri Naxçıvanın Çənlibel məhəlləsində yerləşən 14 saylı məktəbdir. 1404 şagirdin təhsil aldığı bu məktəb Naxçıvanın ən iri təhsil ocaqlarındandır. Məktəb 2007-ci ildə inşa olunub. Bu təhsil ocağı da hərbi hospital kimi “Arkoz” (əvvəlki “Gəmiqaya”) inşaat şirkəti tərəfindən tikilib və təhvil verilib. Üzərindən az keçməmiş məktəb binasının məktəbli uşaqların səs-küyündən “lərzəyə gələrək titrədiyi” məlum olub. Vasif Talıbovun dövründə “xan” həzrətlərinin xofu uşaq səs-küyünü basdığından məktəbin əsim-əsim əsməsinə göz yumulub. Əlbəttə ki, bu “təmkinli” davranış səbəbsiz olmayıb. Axı, “Arkoz” şirkəti vaxtilə “xanzadə” Rza əfəndi ilə türkiyəli iş adamı Emin Uçarın ortaq müəssisəsi idi. Naxçıvanda kimin həddi nə idi, “xanzadə”lərin himayəsində olan tikinti şirkətinin məktəb əvəzinə nəhəng yellənəcək inşa etməsinə “mız qoya”? Məhz bu səbəbdən də məktəbə “mız qoyuluşu” da “xan” həzrətlərinin istefaya göndərilməsindən sonraya təsadüf edir. Yeni hökumət faktiki qəzalı vəziyyətdə olan məktəbin qüsurlarının aradan qaldırılmasına qərar verib. Nöqsanların müəyyənləşdirilməsi məqsədi ilə Azərbaycan FHN-nə müraciət edilib. FHN-nin araşdırması zamanı bir çox qüsurlar ortaya çıxıb. Nazirliyin yanında fəaliyyət göstərən Tikintidə Təhlükəsizliyə Nəzarət Dövlət Agentliyinin verdiyi rəyə inansaq, məktəb Naxçıvanın seysmik tələbatına cavab vermir:


“"AzDTN 2.3-1" normativ sənədin tələblərinə görə Naxçıvan Muxtar Respublikası 9 ballıq seysmik rayonuna aiddir.

Müayinə nəticələri əsasında qeyd etmək olar ki, binanın yükdaşıyan konstruksiyaları

"AzDTN 2.3-1 seysmik rayonlarında tikinti normativ sənədlərin tələblərinə cavab vermir”.

Məktəb direktoru ilə söhbətimiz (Bu linkdə)





Məktəbin istifadəyə yararsızlığı binanın arxa tərəfindəki pilləkəndə də özünü açıq şəkildə büruzə verirdi. Pilləkənin 16 il ərzində 3-4 sm. çökməsi, hardasa 10 sm. qabağa “sıçraması” hər halından bəlli idi. Pilləkənin qabağa və aşağıya hərəkət prosesi divarlarda da iz buraxmışdı. Yəni Naxçıvanın “7 xaruqə”sindən biri hesab etdiyimiz 14 saylı məktəb təkcə şagirdlərin səsindən lərzəyə gəlmir, həm də irəli-geri yeriməyi də bacarırmış. Məktəb binasının bu “nümunəvi məharəti”nin sirrinin nədən qaynaqlandığını soruşduğumuz podratçı şirkətin tikinti şöbəsinin rəhbəri Asəf Məmmədov isə burada qeyri-adi heç nə görmədi. Onun sözlərinə görə, Naxçıvanın yer quruluşu elədir ki, burada çökmələr və türklər demiş “yan cizmələr” baş verə bilər. Üstəlik, bütün bu hərəkətlər pilləkəndə baş verdiyindən ciddiyə almağa ehtiyac yoxdur. Əsas odur ki, məktəb binası hələ də öz yerindədir və o, “sağlam təməllər” üzərində inşa olunub. Mühəndis olmadığımızdan Asəf müəllimlə mübahisəyə girmədik və bunu işin ərbablarının öhdəsinə buraxdıq.

Ardı II hissədə

Heydər Oğuz,

Ovqat.com