Azərbaycanda illik inflyasiya 1 %-dən aşağı enib.
Bu ilin yanvar-aprel aylarında istehlak qiymətləri indeksi 2023-cü ilin eyni dövrü ilə müqayisədə 100,7 %, o cümlədən qida məhsulları, içkilər və tütün məmulatları üzrə 99,3 %, qeyri-qida məhsulları üzrə 101,3 %, əhaliyə göstərilmiş ödənişli xidmətlər üzrə 102,4 % təşkil edib.
Bu barədə Dövlət Statistika Komitəsi (DSK) məlumat yayıb.
Bildirilib ki, bu ilin aprel ayında istehlak qiymətləri indeksi 2023-cü ilin eyni ayına nisbətən 100 %, o cümlədən qida məhsulları, içkilər və tütün məmulatları üzrə 98,2 %, qeyri-qida məhsulları üzrə 100,9 %, əhaliyə göstərilmiş ödənişli xidmətlər üzrə 102 % olub.
Bu ilin aprel ayında istehlak qiymətləri indeksi əvvəlki aya nisbətən 99,9 % təşkil edib.
Qida məhsulları, içkilər və tütün məmulatları üzrə istehlak qiymətləri indeksi əvvəlki aya nisbətən 99,6 % təşkil edib.
Cari ilin aprel ayında əvvəlki aya nisbətən ayrı-ayrı qida məhsullarından daha çox ucuzlaşma manna və qarabaşaq yarmalarının, makaronun, təzə balığın, südün, yumurtanın, marqarinin, günəbaxan və qarğıdalı yağlarının, qozun, fındığın, pomidorun, xiyarın, göyərtinin, badımcanın, kartofun, bahalaşma isə əsasən limonun, bananın, almanın, armudun, kivinin, şabalıdın, ağ kələmin, şirin bibərin, süfrə çuğundurunun, sarımsağın qiymətlərində müşahidə olunub.
Digər qida məhsullarının qiymətlərində ciddi dəyişikliklər baş verməyib. Qeyri-qida malları üzrə istehlak qiymətləri indeksi əvvəlki aya nisbətən 100,1 %.
Qeyri-qida mallarından daha çox bahalaşma zərgərlik məmulatlarının, sementin, kəsilmiş taxtanın qiymətlərində müşahidə olunub. Digər qeyri-qida mallarının qiymətlərində ciddi dəyişikliklər baş verməyib.
Əhaliyə göstərilmiş ödənişli xidmətlər üzrə istehlak qiymətləri indeksi əvvəlki aya nisbətən 100,1 %. Əhaliyə göstərilmiş ödənişli xidmətlərdən bahalaşma əsasən hava nəqliyyatı ilə MDB ölkələrinə beynəlxalq sərnişindaşıma xidmətlərinin, respublikadaxili istirahət turlarının, tibbi, stomatoloji, bərbərxana və kosmetoloji xidmətlərin, ödənişli məktəbəqədər təhsil müəssisələrinin xidmətlərinin qiymətlərində müşahidə olunub.
Digər ödənişli xidmətlərin qiymətlərində ciddi dəyişikliklər baş verməyib.
Qeyd edək ki, Dövlət Statistika Komitəsinin illik inflyasiyanın 1 faizdən aşağı enməsi ilə bağlı məlumat ictimaiyyət tərəfindən heç də birmənalı qarşılanmayıb.
Belə ki, bu istiqamətdə qeyd edilən rəqəm sosial şəbəkələrdə istehza ilə qarşılanıb. Ötən ilə nisbətən bu il inflyasiyada azalma olsa da, onun 1 faizdən aşağı olması şübhə doğurur.
Doğurdanmı inflyasiyada 1 faizdən aşağı rəqəm qeydə alınıb?
İqtisadçı-ekspert Əkrəm Həsənov “Cebhe.info”-ya bildirdi ki, ümumilikdə inflyasiya tempinin azalma var və bir-iki il əvvəl inflyasiyanı hamı hiss edirdi:
“Qiymətlər əvvəlki kimi sürətlə artmır. Ancaq inflyasiyanın 1 faizdən də aşağı olması mübahisəlidir. İnflyasiya göstəricisini Mərkəzi Bank bəyan edir, o da Dövlət Statistika Komitəsinin məlumatlarına əsaslanır.
Belə bir fikir var ki, DSK-nin məlumatları tam düzgün deyil. Ümumiyyətlə, Azərbaycanda DSK-yə etibar azdır, həmişə belə olub. Şəxsən mən də etibar etmirəm və çox ciddi əsasım da var.
Azərbaycanda sonuncu dəfə siyahıyaalma nəticəsi artıq 2 il bundan əvvəl açıqlanmalı idi, ancaq indiyədək açıqlanmayıb. 2019-cu ildə keçirilmişdi və 3 il ərzində bəyan olunmalı idi. İndiyədək DSK bunu etməyib.
Hamımız da bilirik ki, siyahıyaalmanı da real həyata keçirməyiblər. Belə DSK-ya heç kəs etibar etmir. Buna görə də belə suallar yaranır ki, açıqladığı rəqəmlər nə dərəcədə doğrudur. Mən də Mərkəzi Bankı qınamıram və DSK öz işini düzgün görmür.
İndi 1 faiz deyil, bir qədər çoxdur. Ancaq inflyasiya tempi əvvəlki illərlə müqayisədə azalıb”.