UEFA Çempionlar Liqasında qrup mərhələsinin II turunun oyunlarından sonra həftənin ən yaxşı qolu açıqlanıb.

Avropa futbol qurumunun rəsmi saytı verir ki, bu ada İngiltərənin “Mançester Siti” klubunun futbolçusu Erlinq Holannın Almaniyanın “Borussiya” (Dortmund) komandası ilə matçdakı dəqiq zərbəsi layiq görülüb.

22 yaşlı forvard 2:1 hesabı ilə qalib gəldikləri görüşdə qələbə qolunun müəllifi olub.

Qeyd edək ki, “şəhərlilər”in yay transfer dönəmində heyətinə qatdığı Erlinq Holann məhz Dortmund təmsilçisindən alınıb.

Türkiyə "Sivasspor"u Rumıniyada ÇFR komandasına qarşı keçirilən UEFA Konfrans Liqasının qrup mərhələsinin II tur oyunundan öncə kuryoz hadisə ilə üzləşib.

Qonaq komandanın əşyalarının olduğu çantalar Kluj aeroportunda itib. Nəticədə Sivas təmsilçisi meydana alternativ forma ilə çıxmalı olub.

Qeyd edək ki, hazırda ÇFR - "Sivasspor" görüşündə ikinci hissə oynanılır və Türkiyə təmsilçisi hesabda öndədir - 1:0.

Azərbaycan klublarının avrokuboklardakı bombardirlərinin siyahısında dəyişiklik olub.

“Qarabağ”ın futbolçusu Abdullah Zubir qol sayını 10-a çatdırıb.

Fransalı legioner öz ölkəsini təmsil edən “Nant”ın qapısına yol tapıb. Avropa Liqasının II turunun hazırda davam edən görüşündə hesabı 2:0-a çatdırıb.

Zubir bununla da Azərbaycan klublarının 2-ci bombardiri adını qazanıb. O, bunadək şərik olduğu komanda yoldaşları Filip Ozobiçlə və Kadi Borqesi arxada qoyub.

10 qola çatan Abdullah mütləq rekordçu Reynaldoya bir addım da yaxınlaşıb. Braziliyalının aktivində 11 top var.

Azərbaycan klublarında avrokuboklarda ən azı 8 qol vuranlar
1. Reynaldo Silva - 11
2. Abdullah Zubir - 10
3-4. Filip Ozobiç - 9
Kadi Borqes - 9
5-8. Dani Kintana - 8
Emin Mahmudov - 8
Rəşad Sadiqov - 8
Riçard Almeyda - 8

Daxili qoşunların kapitanı, atıcımız Ruslan Lunyov qızıl medal qazanaraq Avropa çempionu olub.

APA-nın xəbərinə görə, Beynəlxalq Atıcılıq İdman Federasiyasının “Avropa Çempionatı 2022” üzrə Polşanın Vrotslav şəhərində keçirilən yarışlarında Azərbaycan atleti Ruslan Lunyov yüksək göstərici əldə edib.

Atıcımız standart tapançadan 25 metr məsafəyə atəşaçmada 574 xal toplayaraq kişilər arasında birincilik qazanıb.

Qeyd edək ki, Ruslan Lunyov tanınmış olimpiya medalçımız İradə Aşumovanın oğludur.

“Neftçi”nin əfsanəvi futbolçusu Anatoli Benişevskinin həyat yoldaşı İnna Banişevskaya onunla bağlı xatirələrini bölüşüb.
“Report”un məlumatına görə, veteran hücumçu ilə 1960-cı illərin sonlarında bacısı vasitəsilə tanış olduğunu xatırladan İ.Banişevskaya əvvəlcə ondan xoşu gəlmədiyini etiraf edib.
Xanımı A.Banişevski ilə 1966-cı ilin dekabrında ailə həyatı qurduğunu bildirib: “Mədəniyyət Sarayında keçirilən toyda iki yüzə yaxın adam var idi. İnsanlar məclisdə iştirak etmək üçün saxta dəvətnamələr hazırlamışdılar. O, artıq məşhur idi. Toya təkcə futbolçular və qohumlar deyil, SSRİ-nin tanınmış mədəniyyət xadimləri, həmçinin, Polad Bülbüloğlu da qatılmışdı. O, bir çox “Neftçi” futbolçusu ilə dost olduğundan və komandaya azarkeşlik etdiyindən dəvəti məmnuniyyətlə qəbul etmişdi”.
İ.Banişevskayanın sözlərinə görə, toyun əsas məqamı Böyük Britaniya kraliçası II Elizabetin A.Banişevskini təbrik etməsi olub: “Federasiya rəsmilərindən biri teleqramı açıb oxudu. Harold Vilson (Böyük Britaniyanın o vaxtkı baş naziri) kraliça adından Anatolini təbrik etmişdi. Kraliça onunla dünya çempionatında tanış olmuşdu”.
Qeyd edək ki, 1946-cı ilin fevralın 23-də Bakıda anadan olmuş Anatoli Banişevski “Neftçi”nin heyətində (1964 – 1973, 1975 – 1978) SSRİ çempionatlarında 288 oyunda 121, SSRİ kuboklarında isə 30 oyunda 15 qol vurub. 1966-cı ildə “Neftçi” ilə SSRİ çempionatının, SSRİ yığması ilə dünya çempionatının bürünc, 1972-ci ildə isə Avropa çempionatının gümüş medalını qazanıb. SSRİ yığmasında ən çox oyun keçirmiş (49 oyun) və fərqlənmiş (19 qol) “Neftçi”ni mərhum forvardı “Marakana” stadionunda Braziliyanın qapısına qol vurmuş ilk sovet futbolçusudur.
SSRİ-nin əməkdar idman ustası və Qriqori Fedotov klubunun üzvü olan Banişevski daha sonra “Neftçi”də (1981-1982) məşqçi, Mingəçevirin “Avtomobilçi” klubunda (1984 – 1987), Burkina-Fasonun gənclər yığmasında (1987-1988) və “Kəpəz”də (1988) baş məşqçi kimi çalışıb. Afrika ölkəsində işlədiyi zamanı ağır xəstəliyə tutulan Banişevski 1997-ci il dekabrın 9-da 51 yaşında vəfat edib. O, ölümündən bir il əvvəl “Şöhrət” ordeni ilə təltif olunub.

Bakıda “Qarabağ” və Fransanın “Nant” komandalarının arasında keçirilən UEFA Avropa Liqasının qrup mərhələsinin II tur oyununda azarkeşlərin iştirakı ilə sükut olub.

Tofiq Bəhramov adına Respublika stadionunda fanatlar qarşılaşma başlamamışdan əvvəl Ermənistanla sərhəddə hərbi əməliyyatlar zamanı şəhid olan Azərbaycan hərbçilərinin xatirəsini yad ediblər.

“İmarət” azarkeş qrupunun üzvləri “Qəhrəmanlar can verir yurdu yaşatmaq üçün. İgid əsgər, möhkəm dayan” pankartı açıblar.

“Köhlən atlar” daha əvvəl bu təşəbbüslə UEFA-ya müraciət etsə də, rədd cavabı alıb.

Bakıda "Qarabağ" və Fransanın "Nant" komandaları arasında UEFA Avropa Liqasının qrup mərhələsinin II tur oyununda 2-ci hissədə hesab 2-0.
İkinci qolu Abdulla Zubir vurdu.
3 - cü qol vuruldu.
Yankoviç 3-cü qolu vurdu.
Oyun "Qarabağ"-ın qələbəsi ilə qurtardı!
Teref.az

Avropa Liqasının qrup mərhələsinin II turunun “Qarabağ” – “Nant” oyunu bir dəqiqəlik sükutla başlamayacaq.
TİA.AZ xəbər verir ki, bu barədə məlumatı Ağdam klubunun mətbuat xidməti yayıb.
Bildirilib ki, Azərbaycan – Ermənistan sərhədində dünyasını dəyişən şəhidlərin xatirəsini bir dəqiqəlik sükutla yad olunması üçün UEFA-ya göndərilən müraciətə cavab gəlib. Qitə futbol qurumu avrokubok görüşündə belə addım atılmasına icazə verməyib:
“Bizə UEFA-dan cavab gəldi ki, narahatlığınızı başa düşür, anlayışla qarşılayırıq. Lakin bu məsələ futbolla bağlı olmadığı üçün icazə verə bilmərik”.
Qeyd edək ki, “Qarabağ” – “Nant” matçı sabah Tofiq Bəhramov adına Respublika stadionunda keçiriləcək.