Azərbaycanlı atlet atıcılıq idmanı tariximizə düşəcək qələbə əldə edib.
Atıcımız Nigar Nəsirova Misirin Qahirə şəhərində keçirilən Atıcılıq üzrə Dünya Çempionatında bürünc medal qazanıb.
Nigar Nəsirova 5.6 kalibrli tapançadan 50 metr məsafəyə atəş üzrə 3-cü yerə çıxıb. Qadınlar arasında fərdi yarış növündə azərbaycanlı atlet 539 xal toplayıb.
Qeyd edək ki, Dünya Çempionatında bu idman növündə son qələbəmiz 2002-ci ildə olmuşdu.

Xəbər verdiyimiz kimi, “Titled Tuesday” turnirində Maqnus Karlsenlə qarşılaşan Rauf Məmmədov cəmisi bir gediş etdikdən sonra təslim olub. Raufun e4 gedişinə Maqnus şahmatda qeyri-peşəkar gediş hesab edilən g5-lə cavab verib. Rauf bunu özünə qarşı hörmətsizlik hesab edərək, nümayişkaranə surətdə təslim olub. Şahmat dünyasının ünlü ismləri bu olaya biganə qalmayıblar. Aut.az xəbər verir ki, şahmat üzrə 12-ci dünya çempionu Anatoli Karpov Rauf Məmmədovu tənqid edib:

“Məmmədovun niyə əsəbiləşdiyini başa düşə bilmirəm. Bu oyunda qalib gəlməklə istehzaya cavab vermək lazım idi. Maqnus istədiyi kimi oynamaqda sərbəstdir. Bu vəziyyətdə oyunda tez qalib gəlmək və bununla da belə davranışın axmaqlıq olduğunu göstərmək daha yaxşı olardı. Karlsenin bu hərəkətində çağırış var idi? Nə çağırış? Davam etmək lazım idi, imtina üçün heç bir səbəb görmürəm. Adamı müalicə etmək lazımdır, mən Karlseni nəzərdə tutmuram. Demək ki, belə oynayır və uduzmaqdan qorxmur, afərin”.

Başqa bir rusiyalı qrossmeyster Sergey Karyakin isə olaya belə münasibət bildirib:

“Məncə, Rauf Maqnusun bu hərəkətini çox emosional qəbul etdi. Əslində bundan istifadə edərək qələbə qazansaydı, yaxşı olardı. Üstəlik, həmin vaxt turnirdə birinci yerdə idi. Məncə, həyəcanlandı. Razıyam ki, bu, Karlsen tərəfindən yaxşı davranış deyil. Amma o, idman üslubunda cəzalandırılmalı idi. Karlsenin bu hərəkəti o deməkdir ki, boksçu rinqə çıxıb, sadəcə əllərini aşağı sallayaraq rəqibinə gülür”.

Portuqaliya millisinin və “Mançester Yunayted”in futbolçusu Kriştiano Ronaldonun “Qızıl top” üçün səsvermədə neçənci yeri tutduğu məlum olub.

Qol.az mükafatın sosial səbəkələrdəki rəsmi səhifəsinə istinadən yaydığı xəbərə görə, 37 yaşlı oyunçu səsvermədə 20-ci olub.

Xatırladaq ki, Ronaldo bu mükafatı 5 dəfə – 2008, 2013, 2014, 2016 və 2017-ci illərdə qazanıb. 6 dəfə səsvermədə 2-ci (2007, 2009, 2011, 2012, 2015, 2018), 2019-cu ildə isə 3-cü yeri tutub.

“Qızıl top”un builki mükafatlandırma mərasimi Bakı vaxtı ilə saat 22:30-da başlayacaq.

"Qızıl top"un təltifetmə mərasimində ilin ən yaxşı gənc futbolçusu bəlli olub.

"Report"un məlumatına görə, mükafata İspaniya millisinin və "Barselona"nın yarımmüdafiəçisi Qavi layiq görülüb.

18 yaşlı oyunçu səsvermədə Kərim Adeyemi, Cud Bellingem (hər ikisi "Borussiya" Dortmund, Almaniya), Eduardo Kamavinqa ("Real Madrid", ispaniya), Rayan Qravenberx, Camal Musiala (hər ikisi "Bavariya", Almaniya), Yoşko Qvardiol ("Leyptsiq", Almaniya), Nunu Mendeş (PSJ, Fransa), Bukayo Saka ("Arsenal", İngiltərə) və Florian Vitsi ("Bayer", Almaniya) geridə qoyub.

"Qızıl top"un təltifetmə mərasimində ən yaxşı qadın futbolçunun adı açıqlanıb. "Report"un məlumatına görə, mükafata İspaniya millisinin və "Barselona"nın yarımmüdafiəçisi Aleksiya Putelyas layiq görülüb.

Tədbirdə yeni təsis edilmiş "Sokrates kuboku"nun da qalibi müəyyənləşib. Mükafatın ilk sahibi Almaniya "Bavariya"sından Sadio Mane olub.

Bu mükafat ictimai və xeyriyyə layihələrində iştirak edən futbolçular üçün nəzərdə tutulub.

“Mən necə işlədiyimi bilirsiniz. Liderlərin üzərinə düşən qərarlar yalnız onlara aiddir. Ancaq çətinliklə işləyirəm, adamlarıma və işimə inanıram. Mənim vəziyyətim önəmli deyil. Bu gün biz klubu xilas etməliyik. Turnir cədvəlində yüksəlsək belə, klubu saxlamaq daimi mübarizədir. 16-cı yeri hədəfləyirik. 16-cı olsaq, liqada qalacağıq”.

Qol.az Fransa mətbuatına istinadən xəbər verir ki, bu sözləri “Nant”ın baş məşqçisi Antuan Kombuare Fransa çempionatının 11-ci turunda “Brest”ə 4:1 hesabı ilə qalib gəldikləri oyunu şərh edərkən deyib. Bu qələbə ilə xalını 10-a çatdıran “Nant” turnir cədvəlində 19-cü pillədən 14-cü pilləyə yüksəlib.

O bildirib ki, hazırda çətinliklər əsasən görüşlərin ardıcıllığı ilə bağlıdır: “Bu gün bizim üçün çətindir, çünki biz kifayət qədər az işçi qüvvəsi ilə oyunları davam etdiririk. Bu qrupda keyfiyyət var, çox yaxşı oyunçular var. Anncaq üç gündən matça çıxmaq lazımdır. Hər şeydən əvvəl bir sıra məğlubiyyətlərimiz var və bu, daha da ağırdır. Qələbə təbəssümləri bərpa edəcək, oyunçuları bir az rahatlaşdıracaq. Ancaq yenə ehtiyatlıyam”.

Xatırladaq ki, “Nant” və “Qarabağ” arasında Avroliqanın 5-ci tur qarşılaşması oktyabrın 27-də Fransada olacaq. Bu komandalar arasında Bakıdakı ilk matçda Ağdam təmsilçisi 3:0 hesabı ilə qalib gəlib.

Ukraynalı peşəkar tennisçi Elina Svitolina ana olub.

Bu barədə onun əri, fransalı tennisçi Qael Monfis məlumat verib.

“Bu xüsusi an üçün həyat yoldaşıma və Allaha nə qədər minnətdar olsam azdır. Dünyaya xoş gəldin mənim kiçik şahzadəm” – fransız tennisçi sosial şəbəkələrdə yazıb.

Mənbə: Championat

“Barselona”nın prezidenti Xoan Laporta Lionel Messi haqqında yüksək fikirlər söyləyib.

O, argentinalı hücumçunu “Barselona” tarixinin ən yaxşısı hesab edir.

“Biz “Barsa” tarixinin ən yaxşı oyunçusunun klub qarşısındakı xidmətlərinin təsdiqi üçün mütləq nə isə edəcəyik. Messi bizim kollektiv yaddaşımızda qalıb. Bu bazar onun debütünün 18-ci ildönümünü qeyd edirik və xüsusi bir şey etməyi planlaşdırırıq. Onun uğurlu karyerası haqqında hər şeyi bilirik”, - deyə klub rəhbəri bildirib.

Laporta futbolçunu Parisdə, “Qızıl Top” mərasimində görməyə ümid etdiyini deyib.

“Hələ də Leonun formasını geyinən çoxlu “Barsa” azarkeşləri var. Lakin Messi PSJ-nin oyunçusudur və buna hörmət etmək lazımdır”, - o vurğulayıb.

Azərbaycan qrossmeysteri Şəhriyar Məmmədyarov "Meltwater Champions Chess Tour" onlayn şahmat seriyasının səkkizinci mərhələsi olan “Aimchess Rapid” turnirində mübarizəyə start verib.

"Unikal" xəbər verir ki, Məmmədyarov ilk görüşündə yarışın təşkilatçısı Maqnus Karlsenlə qarşılaşıb.


Ağ fiqurlarla oynayan “Şah” 45-ci gedişdə rəqibini təslim olmağa məcbur edib.

Bu gün ümumilikdə 4 oyun keçirəcək Məmmədyarovun növbəti rəqibləri polşalı Yan Kşiştof-Duda, niderlandlı Aniş Qiri və kanadalı Erik Hansen olacaq.

Qeyd edək ki, ümumi mükafat fondu 150 min dollar olan turnirin qrup oyunlarından sonra ilk səkkiz yeri tutacaq şahmatçılar pley-offa vəsiqə qazanacaqlar.

Şahzadə Uilyam özünü boksda sınayıb.

O, Keyt Middltonla birlikdə idman məşqçilərinə dəstək verən xeyriyyə təşkilatının işini izləmək üçün Londonun şərqindəki Olimpiya Parkına baş çəkib.

Səfər zamanı şahzadə Uilyam əlcək taxaraq boks bacarığını nümayiş etdirib.

Qeyd edək ki, kral cütlüyünün ziyarət etdikləri xeyriyyə təşkilatı 2012-ci ildə London Olimpiadası ərəfəsində yaradılıb.

Mənbə: gazeta.ru