Putinin Qarabağa yolladığı uğursuz(?) milyarder “desant”ı Ruben Vardanyanı Xankəndindən “Laçın” sərhəd-məntəqəsinədək kimin müşayiət etməsi haqda informasiya meydana çıxıb.
DİA.AZ moderator.az-a istinadla xəbər verir ki, “Hraparak”ın yazdığına görə, Vardanyanı özü də dövlət sərhədini keçərkən Azərbaycan sərhədçiləri tərəfindən həbs edilən əski separatçı-terrorçu rejimin qondarma “müdafiə ordusu” komandanının keçmiş birinci müavini, general-mayor Davit Manukyan müşayiət etmək qərarına gəlib.
Məlumatda deyilir ki, Manukyan Ruben Vardanyanı aparan maşını şəxsən idarə edib və bununla da həyatını riskə ataraq Bakı zindanınının “hörmətli” məhbuslarından birinə çevrilib. Erməni nəşri iddia edir ki, Azərbaycan sərhədçiləri erməni generalın arvadını da özü ilə bərabər aparıb bir neçə saat saxlayıblar, sonra isə Manukyanın həyat yoldaşının sərhədi təkbaşına keçib Ermənistana getməsinə icazə veriblər...
Xatırladaq ki, sentyabrın 27-də, yəni Ruben Vardanyanın yaxalandığı gün Ermənistanda anadan olmuş və orada qeydiyyatda olan, həmin ölkənin vətəndaşı, Ermənistan Respublikasının silahlı qüvvələrinin hərbi qulluqçusu, general-mayor ali hərbi rütbəsində xidmət edən, Azərbaycanın Qarabağ ərazisində “Dağlıq Qarabağ Respublikası”nın müdafiə ordusu komandanının birinci müavini vəzifəsində işləmiş Davit Manukyan da ərazimizdə xalqımıza və dövlətimizə qarşı törətdiyi cinayət əməllərinə görə dövlət sərhədimizdə saxlanılaraq təqsirləndirilən şəxs qismində cinayət məsuliyyətinə cəlb edilib, məhkəmənin qərarı ilə barəsində həbs qətimkan tədbiri seçilib...