Göyçay şəhər sakini, müəyyən səbəblərdən adının çəkilməsini istəməyən qadın sahibkar tərəfindən Hurriyyet.az saytının redaksiyasına şikayət məktubu daxil olub. Saytımız vasitəsilə aidiyyəti orqanlara müraciət edən şikayətçinin məktubunu olduğu kimi dərc edirik:
“Hörmətli cənablar!
Mən, bir qadın sahibkar kimi, sizlərdən xahiş və tələb edirəm ki, problemimə ciddi yanaşasız.
Bu yazını oxuyan səlahiyyətli nümayəndələrdən kömək istəyirəm. Göyçay şəhərində qanunsuzluq baş alıb gedir. Belə ki, bir qrup şəxs əlbir olaraq, gübrə və kənd təsərrüfatı təyinatlı dərmanlara ayrılmış vəsaitləri qanunsuz olaraq nəğdləşdirirərək, cinayət əməli törədirlər. Hansı ki, dövlət büdcəsindən hər il kənd təsərrüfatı məhsullarının əkilməsi üçün küllü miqdara vəsait ayrılır. Həmin pulun 25 faizi supsidiya kartlarına nəğd şəkildə vurulur. Qalan 75 faizi isə kənd təsərrüfatı təyinatlı dərmanların, gübrələrin, toxumların alınmasına ayrıldığı üçün həmin məbləğin kartlardan nəğd şəkildə çıxarılması qanunla qadağandır. Həmin vəsaitdən yalnız satış mərkəzlərindən kənd təsərrüfatı təyinatlı dərmanların, gübrələrin, toxumların alınması üçün alış-veriş etmək məqsədilə və kartlardan həmin satış mərkəzlərinin hesablarına köçürülməsi yolu ilə istifadə edilməlidir.
Göyşayda bir qrup şəxs həmin vəsaiti qanunsuz yolla 75 faizlə (100 manata 75 manat ödəməklə - müəl.) nəğdləşdirirlər. Yəni nəğdləşdirilmiş pulun 75 faizi fermerlərə verilir. Qalan 25 faizini isə həmin şəxslər tərəfindən mənimsənilir. Bu isə Azərbaycan Respublikasının Kənd Təsərrüfatına küllü miqdarda ziyan vurur. Gübrə və dərmanlar kağız üzərində “torpağa verildiyi” üçün əkin sahələri dərmansız və gübrəsiz qalır ki, bu da ölkədə kənd təsərrüfatının inkişafına böyük ziyan vurur. Ona görə də, bu korrupsiya şəbəkəsinin törətdiyi ağır cinayətin obyektiv araşdırılıb, təcili tədbirlər görülməsinə zərurət vardır.
Göyçay və İsmayıllı rayonlarında bu cinayətkar şəbəkəni vəzifəli şəxslər himayə edirlər. Çünki bu cür qanunsuz yollarla külli miqdara vəsait əldə edirlər. İtirən isə Azərbaycan dövləti olur ki, nəticədə də kənd təsərrüfatına ciddi ziyanlar dəyir.
İsmayıllı rayonunda bu işə Sədyar adlı şəxs və iki oğlu, Göyçay rayonunda isə Baş Pasport, Qeydiyyat və Miqrasiya İdarəsinin Göyçay şöbəsinin rəis müavini Rafael Əliyevin ailə üzvü Abid Əliyev baxır. Abid Əliyev bir neçə il əvvəl özünə “2-ci qrup müharibə əlili” dərəcəsi təyin etdirə bilib. Hansı ki, Abid Əliyev yaralanmayıb, onda heç bir əlillik əlaməti yoxdur.
Belə şəxslər əlbir olub, Azərbaycan dövlətinə külli miqdarda ziyanlar vursalar da, onların barəsində heç bir tədbir görülmür.
Şikayətimdə qeyd etdiyim cinayət əməllərini təsdiq edən konkret və mötəbər subutlarım da var(videoçəklişlər).
Cənab Prezident!
Mən mətbuat vasitəsi ilə Sizdən xahiş edirəm ki, bu şəxslərin cinayət əməllərinə hüquqi qiymət verilməsinə və qanuni tədbir görülməsinə köməklik edəsiniz”.