 |
|
|
Lənkəran rayonunda özünü asaraq intihar edən, 33 yaşlı həkim-stomatoloq Müşfiq Bağırovun ailə üzvləri onun ölümünə səbəb olanların məsuliyyətdən kənarda saxlandığını düşünür. Mərhum həkimin atası Zaman Bağırov bundan narazıdır.
DİA.AZ Bizimyol.info-ya istinadla xəbər verir ki, Müşfiq Bağırovun ölümüylə bağlı cinayət işi hazırda Baş Prokurorluğun İstintaq İdarəsində araşdırılır. 2022-ci il avqustun 21-də baş vermiş bu intihar hadisəsindən dərhal sonra Lənkəran rayon Prokurorluğunda Cinayət Məcəlləsinin 125-ci (özünü öldürmə həddinə çatdırma) maddəsilə cinayət işi başlansa da, 5 ay keçib və bu işə xitam verilib. Prokurorluq bu nəticəyə gəlib ki, onun ölümündə heç kimin təqsiri yoxdur.
Lakin Müşfiq Bağırovun ailəsi prokurorluğun xitam qərarından məhkəməyə şikayət verərək, 2023-cü ilin fevralında həmin qərarı ləğv elətdirib. Məhkəmə prokurorluğun xitam qərarının əsassız olduğu nəticəsinə gəlib.
Mərhum həkimin atası məhkəmə ilə yanaşı, Baş prokuror Kamran Əliyevə və başqa dövlət orqanlarına çoxsaylı şikayət məktubları göndərib.
Məhkəmənin qərarından sonra bu hadisə ilə bağlı istintaq Lənkəran rayon Prokurorluğunda yox, Baş Prokurorluğun İstintaq İdarəsində aparılmağa başladı.
Zaman Bağırov deyir ki, üstündən aylar keçməsinə baxmayaraq, yenə də heç bir nəticə yoxdur. Onun sözlərinə görə, istintaqa iş üçün əhəmiyyətli olan kifayət qədər sübutlar təqdim ediblər. Hesab edir ki, təqsirkarları cəzalandırmaq niyyəti olsa, həmin sübutlar yetərlidir: “Aylardır nə qədər şikayətlər yazmışam ki, oğlumun qanı batmasın. Üç azyaşlı uşaq atası, gənc, ali təhsilli bir adam niyə ölməliydi? Onu ölümə göndərənləri cəzalandırmaq üçün otağından tapılan məktub kifayət edirdi. Niyə cəzalandırmırlar, onu daha deyə bilmirəm...”
Hadisədən sonra Müşfiq Bağırovun iş otağından məktub tapılıb. Həmin məktubda yazılıb:
“Məni İbrahim bu günə qoydu. Hesab bilmirdi. Məni qorxudurdu ki, banditizmlə səni tutduraram, arxanda heç kim qalmaz. Camaat Rusiyadan pul vurub, burada pulu vermirdi. Mən də qalmışam camaatın əlində. Başqa yolum yox idi...”
Atası bildirir ki, Müşfiq Bağırov həkim olmaqla yanaşı, həm də biznes fəaliyyətilə məşğul idi, gənc yaşında uğur qazanmışdı. Son üç ayda isə Rusiyadan Azərbaycana göndərilən pulların çatdırılmasıyla məşğul olan şəxslərlə birlikdə çalışırdı. Yaxınlarının fikrincə, onu intihar həddinə çatdıran da elə bu işdəki şəxslər olub.
Zaman Bağırov iddia edir ki, oğlu İbrahim Teymurov adlı qohumunun təklifi ilə bu işə qoşulub:
“Müşfiqin kifayət qədər vəsaiti, imkanı vardı. İbrahim qohum idi. Müşfiq riyaziyyatı yaxşı bilirdi. Ona təklif elədi, oğlum da razılaşdı. Rusiyadan göndərilirdi. İbrahim bilirdi ki, nə qədərdi, kimə çatacaq. Axşam o, həmin məbləği gətirib oğluma verirdi. Oğlum da səhər aparıb Aqşin Abdullayevə çatdırırdı ki, o da pul sahiblərinə çatdırsın. Axır vaxtlarda İbrahim pulları gətirib çatdırmırdı. Bu biri tərəfdən də Aqşin tələb edirdi. Hətta oğlumu hədələyirdi. Oğluma gərək İbrahim pulu versin ki, o da Aqşinə çatdırsın da. Nə o verir, nə də bu, başa düşmək istəyir... Oğlum da qalmışdı arada...”
Atasının dediyinə görə, hadisə ərəfəsində Aqşin Abdullayevin bir gündə Müşfiq Bağırova 22 dəfə zəngi olub. Ata deyir ki, bütün bunları istintaqa ifadəsində də deyib. Lakin tədbir görülmür.
Mərhum Müşfiq Bağırovun yaxınlarının ittiham etdiyi şəxslər - İbrahim Teymurov, Aqşin Abdullayev onların ünvanına səslənən ittihamların əsassız olduğunu bildirib. İstintaq araşdırmaları çərçivəsində onların evində axtarış-götürmə hərəkətləri də həyata keçirilib.
Müşfiq Bağırovun intiharıyla bağlı cinayət işinin araşdırılması Baş Prokurorluğun İstintaq İdarəsində müstəntiq Pərviz Cəlilova həvalə olunub.