Uşaq İncəsənət Festivalı bu dəfə Mərkəzi Aran regionundan olan uşaq və gəncləri Mingəçevirdə bir araya gətirdi.

Mərkəzi Aran Regional Mədəniyyət İdarəsinin təşkilatçılığı ilə 27 aprel 2025-ci il tarixində Mingəçevir şəhərində Uşaq İncəsənət Festivalının 1-ci seçim turunun başlanılması ilə bağlı tədbir keçirildi. İştirakçılara, həmçinin bölgədə yaşayan uşaq və gənclərə festival ruhunun ötürülməsi, mədəni bütünləşmənin təmin edilməsi məqsədilə həyata keçirilən tədbirdə bir-birindən maraqlı, rəngarəng və interaktiv proqramlar təşkil edildi.

Festival iştirakçıları ilk olaraq Mingəçevir Dövlət Dram Teatrında bir araya gələrək “Sehrli yaylıq” adlı teatr tamaşasına baxdılar.

Daha sonra iştirakçılar və qonaqlar mədəni proqramların hazırlandığı Kür çayının sahilinə üz tutdular.
Mədəni proqramların təşkil edildiyi “Sahil” parkında qonaqları 2023-cü ildə Ulu öndər Heydər Əliyevin 100 illik yubileyi münasibətilə keçirilən I Uşaq İncəsənət Festivalının qalibləri qarşıladı. Qonaqlar və şəhər sakinləri Kür çayının füsünkar mənzərəsində sənət nümunələrinin müxtəlif rənglərinin bir araya gəldiyi proqramlarla tanış oldular.
Sonda festival iştirakçıları tərəfindən Ümummilli lider Heydər Əliyevin anadan olmasının 102 illiyi ilə əlaqədar səmaya 102 ədəd şar buraxıldı.

Qeyd edək ki, Mərkəzi Aran Regional Mədəniyyət İdarəsinin əhatə etdiyi şəhər və rayonlarda 24 nominasiya üzrə 6-17 yaş arası 1600-ə yaxın iştirakçı qeydiyyatdan keçmişdir. Qeydiyyatdan keçən iştirakçılar 21 aprel 2025-ci il tarixindən etibarən start verilən 1-ci seçim mərhələsində öz bacarıqlarını nümayiş etdirirlər.

Uşaq İncəsənət Festivalı Azərbaycan Respublikası Mədəniyyət Nazirliyinin, Azərbaycan Respublikası Elm və Təhsil Nazirliyinin və Heydər Əliyev Mərkəzinin birgə təşkilatçılığı keçirilir.

Musavat.com