 |
|
|
Milli Məclisin İqtisadi siyasət, sənaye və sahibkarlıq komitəsində keçirilən ictimai dinləmədə Azərbaycan Yerüstü Nəqliyyat Agentliyi İdarə Heyətinin sədri Anar Rzayev deyib ki, parklanma həm də şəhər mərkəzinə ediləcək nəqliyyat səfərlərinin sayının azalmasına yönəlib: “Parklanma tətbiq etdiyimiz küçələr daha səliqəli olub”.
Ümumiyyətlə, bugünkü reallıqda parklanma tətbiq edilən küçələrdə tam səliqə-sahman yaratmaq mümkündürmü?
Məsələ ilə bağlı TNS-ə danışan nəqliyyat üzrə ekspert Eldəniz Cəfərov bildirib ki, parklanma məsələsi əvvəl-axır həll olunmalı idi və artıq proses paşlayıb: “Yaxşıdır ki, artıq proses gedir, “AzParking” MMC yaradılıb. Parklanma ilə bağlı yeni layihənin tətbiqindən sonra həqiqətən şəhərdə səliqə-sahman yaranıb. Bu da onu göstərir ki, parklanma ilə şəhərdə səliqə-sahman yaratmaq praktik cəhətdən mümkündür və yəqin ki, proses daha da sürətlənər”.
Ekspert bu sahədə olan problemdən və vətəndaşları narazı salan vəziyyətdən də danışıb: “Parklanma özü yaxşı mobil tətbiq olsa da, vətəndaşların müəyyən şikayətləri var. Onların əsas şikayətləri odur ki, yaşadıqları ərazidə avtomobil saxlayarkən onlara güzəşt tətbiq edilmir, qeydiyyat tələb olunur. Bu, qeyri-qanunidir. Qanuna əsasən, vətəndaşlar yaşayış yerinə görə güzəşt talonları əldə etməlidirlər. Yəni, qanunda güzəşt qeydiyyat yerinə yox, yaşayış yerinə görə yazılıb. Amma “AzParking”də müəyyən məsul şəxslər var ki, qanunu pozaraq, bunun yaşayışa görə yox, qeydiyyata görə olduğunu deyirlər və vətəndaşların hüquqlarını pozurlar. Ümid edirəm ki, bu məsələ yaxın vaxtlarda həll edilər və vətəndaşlar incidilməz”.