DİA.AZ: - Qarabağdakı ermənilərə gəlincə, onlar qondarma liderlərinin arxasınca getməməlidirlər. Bu liderlər onlara daim yalan danışıblar.

DİA.AZ xəbər verir ki, bunu Azərbaycan Respublikasının Prezidenti İlham Əliyev “Euronews” telekanalına müsahibəsində deyib.

"Qarabağ erməniləri başa düşməlidirlər ki, təhlükəsizlik təminatları, hüquqlarının, o cümlədən təhsil, mədəniyyət, dini, bələdiyyə hüquqlarının təmin edilməsi ilə Azərbaycan cəmiyyətinin bir hissəsi olaraq onlar normal həyat yaşayacaqlar. Onlar daha manipulyasiyanın girovu olmayacaqlar. Düşünürəm ki, onlar dinləsələr, məni anlayacaqlar. Onlar bilirlər ki, mən öz sözümə əməl edirəm", - Prezident İlham Əliyev bildirib.

"Əliyevin “Euronews” telekanalına müsahibəsində Qarabağdakı erməni əhalisinə müraciəti Bakının rəsmi proqramı hesab edilə bilər". DİA.AZ bildirir ki, bunu isə açıqlamasında siyasi şərhçi Asif Nərimanlı qeyd edib.

Ekspert daha sonra deyib: "Azərbaycan vətəndaşlığını qəbul edəcək ermənilərə təhsil, mədəniyyət, dini hüquqlar veriləcək, təhlükəsizlikləri təmin olunacaq.

Və yerli idarəetmə kimi də bələdiyyələri ola bilər. Azərbaycanda bələdiyyələrin hansı funksiyanı yerinə yetirdiyi məlumdur".