“Heç vaxt belə danışmamışdı” – Ərdoğanın sözləri şok effekti yaratdı

Dünən Samsunda keçirilən TEKNOFEST festivalındakı çıxışında Yunanıstanı Türkiyəyə qarşı təxribatçı addımlarına görə tənqid edən Prezident Rəcəb Tayyib Ərdoğanın sözləri İngiltərədə müzakirələrə səbəb olub.

Paralel.az xəbər verir ki, “Daily Mail” Türkiyə liderinin sözlərini “Ərdoğan Aralıq dənizində Yunanıstanla müharibə planlaşdırırmı?” başlığı ilə oxucularına təqdim edib.

Ərdoğan çıxışında Egey və Aralıq dənizlərində Türkiyə qarşı təhrikedici və təxribatçı addımlar atan Yunanıstana sərt mesaj göndərib:

“Adaların işğalı önümüzü kəsə bilməz, vaxtı, saatı gələndə nə lazımdırsa, edəcəyik. Dediyimiz kimi, bir gecə qəfil gələ bilərik”.

“Daily Mail” qəzeti Türkiyə prezidentinin bu açıqlamasını “müharibə mesajı” kimi şərh edib.

İngilis nəşrinə görə, Ərdoğanın “lazım olanı edəcəyik” sözləri təhdiddir:

“İki ölkə Kipr və dənizlərdə qarşı-qarşıyadır. Amma Ərdoğan ilk dəfə Yunanıstanı Egey adalarını işğal etməkdə ittiham etdi”.

Məqalədə qeyd olunur ki, Ankara əvvəllər Afinanı Egeydəki adalarını silahlandırmaqda ittiham etsə də, Ərdoğan indiyədək Yunanıstanı işğalda ittiham etməyib.

Prezident Ərdoğanın açıqlaması Yunanıstanda da təşviş yaradıb. Açıqlamadan dərhal sonra Yunanıstan Xarici İşlər Nazirliyi etiraz bəyanatı ilə çıxış edib.

Qeyd edək ki, avqustun 24-də Yunanıstanın Krit adasında yerləşdirdiyi S-300 sistemləri tərəfindən Aralıq dənizində NATO missiyasını yerinə yetirən Türkiyənin F-16 qırıcısına radar kilidi qoyub. Türkiyə Yunanıstanın bu təxribatçı addımına dərhal reaksiya verib və baş verənlərlə bağlı NATO-nu məlumatlandırıb.

Dünya Azərbaycanın gündəmi ilə barışıb. Və ilk növbədə Rusiya bununla barışıb. Məhz o, son 200 ildə Qafqazda ən böyük məğlubiyyətə uğradı. İndi hər şeyi Türkiyə-Azərbaycan tandemi həll edir.

Ovqat.com-un məlumatına görə, bu fikirləri erməni yazar Romella Mnatsakanyan Prezident İlham Əliyevin Brüssel və İtaliya səfərini şərh edən məqaləsində bildirib.

“Ermənistanın itkilərini necə minimuma endirmək olar?” sərlövhəli məqaləsində müəllif ermənilərin indiyədək Azərbaycanın potensialını düzgün qiymətləndirmədikləri üçün hazırkı ağır vəziyyətə düşdüklərini etiraf edərək yazıb:

“İstənilən idmançı təsdiq edər ki, rəqibi qiymətləndirməməkdən daha səhv və təhlükəli bir şey yoxdur. Böyük siyasətdə də vəziyyət tam olaraq belədir. Təəssüf ki, biz Azərbaycanı sadəcə olaraq düzgün qiymətləndirməmişik. Bu, bizim özümüzün dünya üçün əhəmiyyətimizə və düşmənin isə faydasızlığına hədsiz inamımızdan irəli gəlirdi və Ermənistanın indiki həsəd aparmaz mövqeyinin əsas səbəbidir.

Avropa Şurasının prezidenti Şarl Mişelin vasitəçiliyi ilə Ermənistanın baş naziri Nikol Paşinyanla Azərbaycan prezidenti İlham Əliyev arasında dördüncü Brüssel görüşünün nəticələrini dəyərləndirək. Qısa desək, rəsmi Bakının bu görüşdə də yenidən öz maraqlarını reallaşdıra bildiyinin şahidi olduq. Sülh prosesi, əgər belə adlandırmaq mümkünsə, Azərbaycanın ssenarisi üzrə gedir.

Əgər əvvəllər bu kimi görüşlərdə subyektivizm xətrinə “Dağlıq Qarabağ” ifadəsi işlədilirdisə və onlar “Qarabağın erməni əhalisindən”, onların hüquqlarından, təhlükəsizlik təminatlarından danışırdılarsa, indi artıq bu da yoxdur. Bəli, hər şeyi öz liderlərinizin xəyanəti və ya axmaqlığı üzərində ata bilərik. Amma bu, manipulyasiya və yalan olar.

Həqiqət isə budur ki, bu qədər zəifləyən biz deyilik, sadəcə olaraq Azərbaycan bu qədər güclənib. Levon Ter-Petrosyan istisna olmaqla, Ermənistanın bütün prezidentlərinin və baş nazirlərinin yeganə və əsas səhvi bu prosesləri əvvəlcədən görə və adekvat qərarlar qəbul edə bilməmələridir. Hamısı rəsmi Bakının blef etdiyi, gözümüzə kül üfürdüyü barədə çıxışlarla həm özünü, həm də cəmiyyətimizi aldadırdı.

Belə yanlış təsəvvürlərimizin cəzası çox ağır oldu. Biz artıq “Artsax”ın (müəllifin üslubuna toxunmamaq üçün Qarabağın ermənicə adını olduğu kimi saxladıq – H.O) 80%-ni itirmişik və dünya üçün maraq kəsb etməkdən çıxmışıq. Bəli, belədir. Dünya Azərbaycanın gündəmi ilə barışıb. Və ilk növbədə isə Rusiya bununla barışıb. Məhz o, son 200 ildə Qafqazda ən böyük məğlubiyyətə uğradı. İndi hər şeyi Türkiyə-Azərbaycan tandemi həll edir.

Rusiya “Artsax”a hücum etməyə icazə verdi. Azərbaycan isə Rusiyanın strateji və tarixi müttəfiqini məğlub etdi. O, darmadağın olmuş rus hərbi texnikasını Bakının mərkəzi meydanına sürüyərək bu qənimətləri bütün dünyaya nümayiş etdirdi. Rusiya isə buna heç cür qarşı çıxa bilmədi. İndi isə o, daha da zəifləyib, Ukrayna bataqlığında batıb.

Azərbaycan prezidenti isə artıq bu haqda açıq danışır! O, İtaliyada keçirilən 48-ci Cernobbio Beynəlxalq Forumunda sualları cavablandırarkən "Dünya heç vaxt fevraldan əvvəlki kimi olmayacaq", - dedi.

Burada kiçik bir təxribatçı fikir səsləndirməyə cəsarət edəcəyəm: Azərbaycan Prezidenti bu foruma xüsusi qonaq qismində şəxsən İtaliya Prezidenti Sercio Mattarella və İtaliyanın Baş naziri Mario Draqi tərəfindən dəvət olunmuşdu. Bu, baş verənləri daha aydın başa düşməyə imkan verən mühüm əlavədir və onu göstərir ki, Azərbaycan Qərb üçün mühüm tərəfdaş kimi öz yerini çoxdan müəyyənləşdirib. Bütün bu fürsətləri isə təkcə Ermənistan yox, Rusiya da əldən verib. Nəticədə Azərbaycan Rusiyanı Avropa təbii qaz bazarında sıxışdırır...

İndi isə qayıdaq Əliyevin çıxışına. Düşmən dövlət başçısı onu da vurğulayıb ki, bu gün “biz beynəlxalq hüququn tamamilə pozulmasının şahidi oluruq”. Bu, yenə təkcə bizim deyil, Rusiyanın da bostanına atılan daşdır! “İndi biz bir çox başqa regionlarda beynəlxalq hüququn pozulmasının şahidi oluruq. Biz görürük ki, bəzi ölkələr buna məhəl qoymayacaqlarını düşünürlər və bu, onların vecinə deyil”, - deyə Azərbaycan Prezidenti vurğulayıb.

Yəni o, Rusiyanın hərəkətlərini açıq-aşkar pisləyib. "Biz heç vaxt böyük qonşularımızın siyasətinə uyğunlaşmamışıq", - Əliyev əlavə edib. Bax belə. Bəli, Əliyev bunu dilə gətirməzdən əvvəl Türkiyənin hərbi-siyasi dəstəyini almışdı və bu, işə yaradı!

İndi isə yeni reallıqları qiymətləndirərməli, gələcək problemlərimizi minimuma endirmək üçün necə hərəkət etmək barədə düşünməliyik. Təəssüf ki, vəziyyətin dəyişdirilməsindən söhbət gedə bilməz. Düşməni kiçik hesab edərək vaxt itirdik və son dərəcə əlverişsiz olan indiki vəziyyətə düşdük”.

Tərcümə etdi: Heydər Oğuz,

Təhlükəsizlik Şurasının katibi Rusiyanın imperiya olduğunu etiraf etdi

Ukraynada işğalçı müharibə başlayan ilk günlərdən özündən razı bəyanatlar verən Rusiyanın sabiq prezidenti, Təhlükəsizlik Şurası(TŞ) katibinin müavini Dmitri Medvedev zaman keçdikcə, aqressivləşir və tez-tez nəinki Qərbi, hətta bütün dünyanı məhv etməklə hədələyir.

“AzPolitika.info” xəbər verir ki, Dmitri Medvedev öz sosial şəbəkə səhifəsində Mixail Qorbaçovun dəfn olunduğu gün etdiyi paylaşımda SSRİ-nin dağılmasında Qərblə yanaşı, Qorbaçovun başında durduğu o vaxtkı ölkə rəhbərliyini günahlandırıb: “Olduqca aşkar və hər bir dövlətin taleyi üçün olduqca təhlükəli situasiya barədə danışmaq istərdim. Dövlət institutlarının bir anda çökməsindən. Hansı ki, bu, Sovet hakimiyyətinin tənəzzülü ərəfəsində baş verirdi. Məhz bu cür deqradasiya dövlətin qarşısıalınmaz şəkildə dağılması prosesini işə salır. Yaxşı yadımdadır, 1991-ci ildə mərkəzi hakimiyyətin aktları yerlərdə praktiki olaraq həyata keçirilmirdi...

Dövlət maşınının orqan və strukturlarından sanki bütün hakimiyyət iradəsini, inzibati idarəçiliyin səmərəliliyi və qəbul edilmiş qərarlara nəzarət gücünü çəkib çıxarmışdılar. İttifaq mərkəzinin bütün əmrləri sanki vakkuma, dedi-qodu bataqlığına və sakit sabotaja düçar olurdu...”

Medvedev bu xatırlatmasının təsadüfi olmadığını və Qərbin eyni ssenarini indi də Rusiyaya qarşı gerçəkləşdirməyə çalışdığını bildirib və Ukraynada baş verənləri də bununla əlaqələndirib: “Onlar hər şey edirlər ki, Rusiyanın dövlət institutlarının işləməməsinə nail olsunlar. Çalışırlar ki, 1991-ci ildə olduğu kimi, ölkəni effektiv idarəetmədən məhrum etsinlər və nəticədə Rusiyanı siyasi səhnədən uzaqlaşdırsınlar...

Bir çox Qərb siyasətbazları uca səslə deyirlər ki, ispan imperiyası dağıldı, ingilis imperiyası və digər imperiyalar dağıldı, Rusiya imperiyası isə yox. Hətta SSRİ-nin dağılmasına baxmayaraq. Guya bu, pisdir...”.
Ətraflı

Medvedev bununla Rusiyanın imperiya olduğunu və Kremlin məqsədinin bu imperiyanı nə yolla olursa-olsun, saxlamaq olduğunu etiraf edib. Ancaq əslində, Medvedev həm də bu müqayisəsində dolayısı ilə hazırkı Rusiyanın SSRİ-nin aqibətini yaşamaq ərəfəsində olduğunu etiraf etmiş olub.

Ardınca, TŞ katibinin müavini növbəti dəfə Qərbi və bütünlükdə bəşəriyyəti nüvə silahı ilə təhdid edib: “Bu xəyalpərəstlər bilərəkdən sadə aksiomanı inkar edirlər – nüvə dövlətinin zorla dağıdılması hər zaman ölümlə şahmat oynamaq deməkdir. Bu oyunda dəqiqliklə hər bir gediş məlumdur, nə zaman şah, nə zaman mat olacaq. Bəşəriyyətin qiyamət günü!”

Medvedev sonda bildirib ki, “böyük Rusiyanın varlığının ən yaxşı təminatçısı strateji nüvə silahı arsenalıdır”. Göründüyü kimi, bununla Medvedev həm də dolayısı ilə rus ordusunun adi savaşda gücsüzlüyünü, Ukraynada biabırçı uğursuzluqla qarşılaşdığını və Rusiyanın yeganə ümid yerinin nüvə silahı olduğunu etiraf etmiş olub.

Onu da qeyd edək ki, Kremlə yaxın çevrələrin mətbuata sızdırdığı məlumatlarda son dövrlərdə Medvedevin spirtli içkilərə həddindən artıq aludə olduğu, məcburən alkoqolizmdən müalicəyə cəlb olunsa da, bundan imtina etdiyi və Putinin xoşuna gəlmək üçün aqressiv, radikal paylaşımlar, çıxışlar etdiyi bildirilir. Hətta bəzən bu paylaşımların “dozası” həddən artıq yüksək olduğundan Kremlin onları sildirdiyi də məlumdur...

C.Məmmədov

Amerikanın ən qədim yerli qəbilələrindən olan Navaxo hinduları ABŞ-ın dövlət və hökumət başçılarını məhkəməyə vermək niyyətindədir.

Bu barədə qəbilə başçısı Conatan Nez bildirib.

Torpaqlarında 500-dən çox uran şaxtasının olduğunu deyən Conatan əlavə edib ki, ABŞ hökuməti çıxardıqları urana görə onlara heç bir kompensasiya ödəməyib.

Xatırladaq ki, 2005-ci ildə qəbilə uran şaxtalarının onlara pis təsir etdiyini əsas gətirərək, işlərin dayandırılmasını tələb edib.

Navaxo ABŞ-da yerləşən ən böyük qəbilədir.Onlar Arizonada 70 min kvadrat kilometr ərazidə məskunlaşıblar, sayları 400 min nəfərdir.

Hindistanın hüquq-mühafizə orqanları pəncablı müğənni Sidhu Musevalanın qətlinin təşkilində şübhəli bilinərək saxlanılan şəxslərin Azərbaycan və Keniyadan ekstradisiyası ilə bağlı danışıqlar aparır.

“Report” Hindistan mətbuatına istinadən xəbər verir ki, bu barədə Hindistanın Xarici İşlər Nazirliyinin (XİN) rəsmisi Arindam Baqçi bildirib.

“Azərbaycanda və Keniyada şübhəli şəxs yerli hakimiyyət orqanları tərəfindən saxlanılıb. Növbəti addımlar üçün aidiyyəti orqanlarla əlaqə saxlayırıq”, - XİN sözçüsü deyib.

O, qeyd edib ki, Saçin Bişnoy kimi tanınan Saçin Txapan Azərbaycanda aşkarlanaraq saxlanılıb. Anmol Bişnoy isə Keniyada yaxalanıb. Saçin və Anmol mayın 29-da Pəncabın Mansa rayonundakı Cavaharke kəndində Musevala qarşı sui-qəsdin planlaşdırılmasında iştirak ediblər.

Hindistan polisin məlumatına görə, onlar Musevalın qətlindən bir neçə gün əvvəl Hindistandan qaçıblar, lakin 28 yaşlı pəncablı müğənnini öldürən silahlı şəxslərlə əlaqədə olublar.

Qeyd edilir ki, Hindistan və Azərbaycan 2013-cü ildə ekstradisiya haqqında saziş imzalayıblar. Müqavilə Saçin Txapanın Azərbaycandan ekstradisiyasını asanlaşdıracaq.

ABŞ Rusiyanın daxili işlər naziri Vladimir Kolokoltsevin BMT daxili işlər nazirlərinin sammitində iştirakının qarşısını alıb.

"Report” Rusiya KİV-ə istinadən xəbər verir ki, bunu Rusiyanın BMT-dəki daimi nümayəndəsi Vasili Nebenzya deyib.

Onun sözlərinə görə, Rusiya nümayəndə heyətinə viza verilməyib.

"Bununla bağlı bir daha qeyd etmək istərdik ki, nümayəndələr üçün vizaların verilməsi ABŞ-ın imtiyazı deyil, beynəlxalq hüquqi öhdəliyidir”, - Nebenzya əlavə edib.

Ermənistanın məğlubedilməz ordusuna dair mifi İkinci Qarabağ müharibəsi zamanı yerlə-yeksan olundu. Ermənistan ordusunun İkinci Vətən müharibəsində darmadağın olunması, ermənilərin XXI əsrin müharibəsinə hazır olmamasının açıq-aşkar sübutu, Azərbaycan Ordusunun isə böyük hərbi potensiala və yüksək döyüş qabiliyyətinə malik olmasının isbatı idi. Ermənistan ordusuna Koçaryanın və Sarkisyanın dövründən qalmış - köhnəlik qalığı hesab olunan generalların rəhbərlik etməsi, o cümlədən Paşinyanın erməni xalqını uçuruma doğru aparan siyasəti erməni ordusunun da deqradasiyasını sürətləndirdi. Digər bir tərəfdən məlumdur ki, Ermənistanda həm də korrupsiyanın səviyyəsi getdikcə artır. Şübhəsiz ki belə bir hal Ermənistanın ordusundan da yan keçmir. Ermənistanın müharibədə istifadə etdiyi silahlar onun döyüş səviyyəsinə və hazırlığına görə siyahıda ən axırıncı yerdə olduğunu göstərdi. Erməni millətçilərinin revanşist ideyaları, onların xəyallarından başqa bir şey deyildir. Reallıqda isə bu cür ideyalar fəlakətlə nəticələnə bilər.
Ermənistanın mətbuatında erməni ordusunun rüsvayedici vəziyyətə düşməsinə dair məqalələr yayımlanıb. Bu baxımdan misal olaraq, “Ermənistanın səsi” informasiya agentliyinin saytında erməni müəllifi Aşot Aramyanın dərc etdirdiyi “Silkələnən ordu” adlı [1] məqaləni göstərmək olar. Həmin məqaləyə əsasən aşağıdakı nəticələrə gəlmək olar:
1. Ermənistanın milli təhlükəsizliyi qeyri-sabit vəziyyətdədir,
2. Ermənistanda özbaşnalıq və ayrı-seçkilik hökm sürür,
3. Erməni millətçilərinin “millət - ordu” birləşdirici konsepsiyası Ermənistan üçün eksiztensial təhlükə mənbəyidir.
4. Ermənistanın daxilində parçalanma müşahidə olunur.
Mövcud vəziyyəti tədqiq etdiyimiz zaman belə bir qənaətə gəlirik ki, Ermənistanın sülhə razılıq verməkdən başqa bir heç bir çıxış yolu qalmır. Ermənistan da öz-özlüyündə yaxşı başa düşür ki, bu gün Azərbaycan artıq olduqca böyük siyasi təcrübəyə və güclü hərbi potensiala malik bir dövlətdir. Ermənistan isə hər sahədə geridə qalmış zəif bir dövlətdir. Ona görə də, Ermənistan ordusu hazırkı bərbad vəziyyəti ilə daha bir müharibəyə tab gətirə biləcək halda deyildir. Belə bir sual yaranır ki, müharibə olarsa bu səfər Ermənistanın ordusunda kimlər vuruşacaq? Zənnimizcə heç kəs rüsvay olunmuş məğlub bir ordunun tərkibində vuruşmaq istəməz. Digər bir tərəfdən isə o da məlumdur ki, Ermənistanın ordusunun daxilində cinayət, fərarilik və intihar halları baş alıb gedir. Heç bir erməni gənci bu gün könüllü şəkildə Ermənistan ordusunda xidmət etmək istəmir, təzyiqlə məcburi şəkildə onlar orduya göndərilirlər. Müstəqil hüquq müdafiə təşkilatlarından alınan məlumata əsasən İkinci Qarabağ müharibəsində həlak olan erməni hərbçilərinin sayı 5 min [2] nəfərdən çox olub ki, bu da 2 milyonluq bir erməni xalqı üçün çox böyük bir rəqəmdir.
2020-ci ilin noyabr ayının 10-da üçtərəfli bəyanatın imzalanması Ermənistanın məğlub dövlət olmasının təsdiqi idi. Bu qələbə Ali Baş Komandanın qətiyyətinin, dəmir yumruğunun sayəsində reallaşdı. İkinci Vətən müharibəsində düşmən hərtərəfli şəkildə böyük itkilər verdi. Azərbaycanın torpaqları işğaldan azad olundu.
Hadisələrin məntiqi davamı olaraq, 2022-ci ilin avqust ayının 31-də Brüsseldə Avropa İttifaqı Şurasının Prezidenti Şarl Mişel ilə [3] Azərbaycan Respublikasının Prezidenti İlham Əliyevin və Ermənistanın baş naziri Nikol Paşinyanın üçtərəfli görüşünün keçirilməsi daha bir əlamətdar hadisə idi. Bu görüş dövlətlərarası münasibətlərin tənzimlənməsi və sülh müqaviləsinin imzalanmasına dair danışıqların aparılması baxımından önəmli bir addımdır. Qeyd etmək lazımdır ki, bu görüşdə sözügedən ərazilərin minalardan təmizlənməsi, eləcə də itkin düşən insanların həyatına dair məsələlər diqqət mərkəzində olub. Qeyd etmək lazımdır ki, Brüssel görüşündə də, Azərbaycan diplomatik üstünlüyə nail olub. Diqqət çəkən məqamlardan digər biri isə ondan ibarətdir ki, həmin görüşdə “Qarabağ”, “Minsk qrupu” və “status” kəlimələri istifdə olunmayıb. Belə bir hal isə rəsmi Bakının maraqlarının təmin olunmasının təsdiqidir. Qeyd edək ki, möhtərəm Prezident İlham Əliyev cənablarının da vurğuladığı kimi, Azərbaycanla Ermənistan arasında gedən normallaşma prosesində Qarabağ mövzusu olmayıb. Sözügedən Brüssel görüşü isə bunun təsdiqi olub.

Ədəbiyyat siyahısı:
1. Армия трясогузки /26.08.22/ https://www.golosarmenii.am/article/156800/armiya-tryasoguzki
2. Большая часть армян не хочет служить в армии: причина – позорное поражение /07.06.22/ https://aze.az/bolshaja-chast-armjan-ne-hochet-sluzhit-v-armii-prichina-pozornoe-porazhenie.html
3. Prezident İlham Əliyev və baş nazir Nikol Paşinyanla görüşdən sonra Avropa İttifaqı Şurasının Prezidenti Şarl Mişel mətbuata bəyanat verib / 31.08.2022 / https://azertag.az/xeber/2273297
Kamal Salayev
AMEA-nın Qafqazşünaslıq İnstitutunun
Ermənişünaslıq şöbəsinin Baş Mütəxəssisi
Teref.az

Amerika Birləşmiş Ştatlarında onun adına 1098, xaricdə isə 3 min patent mövcuddur. O teleqrafı, telefonu, kino aparatını təkmilləşdirmiş, elektrik lampasının sənaye üsulu ilə istehsalını təşkil etmişdir. O həmçinin elektrovoz istehsalına başlamış, fonoqraf kəşf etmişdir. Onun təklifi ilə telefon danışığının əvvəlində "alo" deyilməyə başlanmışdır.
Tomas Edison orta məktəbdə cəmi 3 ay oxumuşdur. İlk 3 aylıq təlimdə ciddi irəliləyiş göstərə bilmədiyinə görə, müəlliməsi Toması "kütbeyin" adlandırmış və bundan sonra o, evdə anası tərəfindən təhsil almalı olmuşdu. Edison yazırdı: "Anam mənə o qədər inandı, o qədər əmin oldu ki, onun ümidlərini qırmamaq üçün nəsə etməli olduğumu anladım".O bir Autizmli idi.
Tomas Alva Edison 1876-cı ildə Amerika Birləşmiş Ştatlarında tədqiqat xarakterli ilk laboratoriya açmışdır.
Dünyada sənaye və ictimai məqsədlər üçün işlədiləcək ilk elektrik stansiyası məhz Edisonun rəhbərliyi altında 1882-ci ildə qurulmuşdur.
Heç bir insan həyatında Edison qədər patent almamışdır.
85 yaşında axır saatlarında o öz həyat yoldaşına demişdi: "Əgər ölümdən sonra nəsə varsa, bu yaxşıdır. Yox yoxdursa, bu da yaxşıdır. Mən yaşadığım həyatda mümkün qədər yaxşı işlər görməyə çalışdım..."
Teref.az

Avropa İttifaqının 27 ölkəsinin xarici işlər nazirləri Rusiya ilə viza rejiminin sadələşdirilməsi sazişini tamamilə dondurmaq üçün siyasi qərar qəbul ediblər.

Bunu Aİ-nin Xarici siyasət və Təhlükəsizlik məsələləri üzrə Ali Nümayəndəsi Josep Borrel mətbuat konfransında bəyan edib.

Onun sözlərinə görə, beləliklə, verilən vizaların sayı azalacaq və proses çətinləşəcək.

Borrel Aİ-nin iyulun ortalarından Rusiya vətəndaşlarının qonşu ölkələrə ciddi axınını müşahidə etdiyini bildirərək, bunu sözügedən dövlətlərin təhlükəsizliyinə təhdid adlandırıb.

“Aİ ölkələri rusiyalıların spesifik qruplarına vizaların verilməsi zərurəti barədə razılığa gəliblər”, – deyə o, sözlərini yekunlaşdırıb.

Mənbə: TASS