Vətəndaş və İnkişaf Partiyasının (VİP) sədri Əli Əliyevin azadlığa çıxması üçün əfv ərizəsi yazması birmənalı qarşılanmadı. Bu addımına görə onu qınayanlar, tənqid edənlər var. Partiya sədri bəziləri tərəfindən “sınmaqda”, “iqtidara təslim olmaq”da suçlanır.

Əli Əliyev azadlığa çıxdığı gün mətbuat konfransında bu məsələyə aydınlıq gətirib. Əfv ərizəsi yazsa da barəsindəki ittihamları əsassız saydığını deyib. O, jurnalistlərə deyib ki, mübarizəsini davam etdirəcək. Bərait almaq üçün lazımı hüquqi prosedurlara baş vuracaq.
Siyasətçilərdən Ə.Əliyevin əfv ərizəsi yazaraq azadlığa çıxmasına münasibət bildirənlər var.

Bütöv Azərbaycan Xalq Cəbhəsi Partiyasının sədri, deputat Qüdrət Həsənquliyev də Ə.Əliyevin əfv ərizəsi yazması ilə bağlı tənqidlərə münasibət bildirib:

“Əli Əliyevin əfv olunmaq üçün müraciət etməsini, Prezidentin də onun partiya sədri olmasını və müraciətini nəzərə alaraq bağışlamasını düzgün hesab edirəm. Bəzi adamlara iqtidarı ittiham etmək üçün “qurbanlar” lazımdır. Onları həbs olunan şəxslərin və ailə üzvlərinin üzləşdiyi məhrumiyyətlər düşündürmür. Belələrinin nə dediyinə əhəmiyyət vermək lazım deyil”.

Bəs bir partiya sədrinin əfv üçün ərizə yazmasının bu kimi reaksiyalara səbəb olmasının səbəbi nədir? Niyə onun azadlığa çıxması bu qədər müzakirələrə səbəb oldu?

Mövzu ilə bağlı Globalinfo.az-a danışan AĞ Partiyanın başqanı Tural Abbaslı bu mövzunun müzakirəsinin ümumiyyətlə doğru olmadığını söyləyib:

“Ümumilikdə əfv sərəncamını müsbət qiymətləndirirəm. Könül istərdi ki, bunun nəticəsində azadlığa çıxanların sayı daha çox olsun. 801 məhkumu əhatə edib, bu say 1500-2000 olsa lap gözəl olardı. İstənilən halda əfv fərmanları humanist addımdır və müsbət qarşılanır. Səhv etmirəmsə, adı siyasi məhbuslar siyahısında olan 2-3 nəfər şəxslər də bunun nəticəsində azadlığa buraxıldılar.

Təbii ki, Əli Əliyevin azadlığa çıxması müsbət haldır, sevindiricidir. Heç bir siyasətçi, partiya sədri öz fikirləri və siyasi fəaliyyətinə görə həbsdə olmamalıdır. Ə.Əliyevin əfv ərizəsi ilə müraciət edib-etməməsi onun şəxsi işidir və kimsə buna müdaxilə edə bilməz. Öz siyasi fəaliyyətini, şəxsi həyatını, karyerasını ölçüb-biçib və belə bir addım atıb.

O baxımdan bu məsələ ilə bağlı partiyaların, siyasi kəsimlərin nə isə deməsini etik hesab etmirəm. Seçicilər, vətəndaşlar isə necə reaksiya verəcəklərini özləri bilərlər. Hər halda bunun Əli bəyin şəxsi seçimi olduğunu düşünürəm və rəqiblərinin də bunu kənardan mənfi, yaxud müsbət qiymətləndirməsi doğru deyil. O, ailəsindən, partiyasından uzaqda həbsdə qalsaydı yaxşı olardı? İndi ən azından azadlıqdadır, fəaliyyətini ölçüb-biçəcək. Ailəsi ilə birlikdə olacaq, nəticədə bir insan azaddır. Ona görə də bu məsələni ümumiyyətlə media və siyasi kəsimdə müzakirə etmək belə yanlışdır. Bu, onun hüququdur”.

“Elə Əli Əliyev başda olmaqla azadlığa çıxan bütün məhkumları ailələrinə qovuşmaları münasibətilə təbrik edirəm. Həbsdə olan digər məhkumlara da tezliklə azadlığa çıxmağı arzulayıram” – deyə, o bildirib.

Qeyd edək ki, Prezident İlham Əliyev məhkum edilmiş bir sıra şəxslərin Azərbaycan xalqının Ümummilli Lideri Heydər Əliyevin 100 illik yubileyi münasibətilə əfv olunması haqqında Sərəncam imzalayıb.