“Rəqabət Məcəlləsinin işləməsi üçün aparılacaq yoxlamalar tədqiqat xarakteri daşıyacaq”.

Bu sözləri Liberal İqtisadçılar Mərkəzinin sədri Akif Nəsirli “Cebhe.info”-ya açıqlamasında deyib.

O bildirib ki, dünyada adətən bu yoxlamaların nəticələrinə görə cərimə və ya başqa tənbeh tədbiri görülmür:

“Sadəcə olaraq, nəticələr analtik mərkəzə ötürülür və orada təhlillər aparılır. Yəni hansısa addımların Rəqabət Məcəlləsi ilə ziddiyyət təşkil edib-etmədiyi yoxlanılacaq.

Məsələn, sahibkar maya dəyəri 10 manat olan hər hansısa bir məhsulu 9 manata satır. Deməli, onun imkanları olmasına rəğmən qarşı tərəfi çökdürmək üçün ziyanla işləyir. Belə olan halda isə qarşı tərəf də məhsulunun qiymətini 9 manata endirməyə məcbur qalır. O isə qiyməti 9 manata endirsə, zərərə düşəcək və müflis olacaq.

Burada məhsulunu maya dəyərindən aşağı satan sahibkar Rəqabət Məcəlləsini pozmuş olur. Soruşmaq lazımdır, o nə üçün məhsulunu maya dəyərindən aşağı qiymətə satır? Bazarda qiymətlər aşağı düşəndə zərərlə satmaq başqa məsələdir. Bu, situasiyadan asılı olan işdir. Amma məqsədyönlü şəkildə maya dəyərindən ucuz satmaq rəqiblərini çökdürmək hədəfi daşıyır”.

O qeyd edib ki, Rəqabət Məcəlləsinin tələb etdiyi çərçivədə yoxlamalar mütləq aparılmalıdır və aparılacaq:

“Amma Rəqabət Məcəlləsinə o qədər də ümid bəsləmirəm. Çünki Rəqabət Məcəlləsi rəqabət mühiti olan yerdə işləyə bilər. Azərbaycanda isə rəqabət mühiti minimum səviyyədədir.

İndiki şəraitdə İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidməti də yoxlamalar həyata keçirə bilir. Hazırda Rəqabət Məcəlləsinin qəbul edilməsi su olmayan hovuzda adamlara üzgüçülük öyrətməyə bənzəyir”.

Akif Nəsirli Rəqabət Məcəlləsinin ölkədə ucuzlaşamaya səbəb olacağına inanmadığını söyləyib:

“İlk növbədə inhisarçılıq aradan qalxmalı və rəqabət mühiti yaranmalıdır. Rəqabət mühiti yaransa, Rəqabət Məcəlləsi olmasa da, ucuzlaşma olacaq. Ona görə də mən ucuzlaşma gözləmirəm.

Sadəcə, kənd təsərrüfatı malları bol olarsa, müəyyən mənada ucuzlaşma qeydə alına bilər. Bunun isə Rəqabət Məcəlləsi ilə əlaqəsi yoxdur. İstənilən halda, bolluq ucuzlaşmaya gətirib çıxarır. Bu qanun sadəcə olaraq, sahibkarı qorumaq üçündür. Yəni sahibkarların ədalətli rəqabət aparması üçün Rəqabət Məcəlləsi qəbul olunub”.