Türkiyənin Konya şəhərində V İslam Həmrəyliyi Oyunlarının rəsmi açılış mərasimi başlayıb.

"Report"un Konyaya ezam olunmuş əməkdaşı xəbər verir ki, tədbir başlamamışdan əvvəl türk qırıcıları Konya Böyükşəhər Bələdiyyəsi Stadionunun üzərində nümunəvi uçuşlar həyata keçirərək, məharətlərini göstəriblər.

Tədbir isə Livan əsilli isveçli müğənni Maher Zeynin konsert proqramı ilə başlayıb.

Daha sonra Qurani Kərimdən ayələr oxunub.

Stadionda açılış mərasiminə Türkiyə Prezidenti Rəcəb Tayyib Ərdoğan, Azərbaycan Prezidenti İlham Əliyev, eləcə də digər ölkələrin rəhbər şəxslərinin qatıldıqları elan olunub.

Rəqqaslar V İslam Həmrəyliyi Oyunlarının loqosunu canlandıracaqlar. Oyunlar üçün xüsusi olaraq lalə formasında hazırlanmış loqo özündə 21 rəqəmini simvolizə edir. Loqoda, eyni zamanda, ərəb dilində “qardaş” sözünü bildirən “ أ خ” sözü də yer alıb.

Gerisayımın ardından Anadolunun tarixi, gəzməli-görməli yerlərinin görüntüləri rəqqasların müşayiəti ilə nümayiş etdirilib.

Fəxri qarovul dəstəsinin müşayiəti ilə Türkiyənin dövlət bayrağı stadiona gətirilib və qardaş ölkənin İstiqlal marşı səsləndirilib.
Ətraflı

Könüllülər stadiona dəvət olunub və onlar iştirakçı ölkələr üçün dəhliz açıblar. Azərbaycan nümayəndə heyətinin gəlişi stadionda böyük alqışlarla qarşılanıb. Bayraqdar funksiyasını yunan-Roma güləşçisi Rafiq Hüseynov və voleybolçu Ayşən Abduləzimova yerinə yetirib.

Bütün iştirakçı ölkələrin keçidindən sonra sürəkli alqış sədaları ilə Türkiyə nümayəndə heyəti stadiona daxil olub. Türkiyə İslamiadada 461, Azərbaycan isə 281 idmançı ilə təmsil olunur və onlar ən geniş heyətə malik iki ölkədir.

Türkiyənin tanınmış idmançılarından 8-i İslam Həmrəyliyi İdman Federasiyasının (ISSF) bayrağını gətirərək, qaldırıblar.

Daha sonra idmançılar və hakimlər adından paralimpiyaçı kamandan oxatan Öznur Cüre ilə velosiped üzrə referi Serkan Karademir ədalətli olacaqlarına and içiblər.

Türkiyənin gənclər və idman naziri, İslamiadanın Təşkilat Komitəsinin sədri Mehmet Muharrem Kasapoğlu çıxış edərək, bütün iştirakçıları salamlayıb. O, Türkiyəyə və İslam dünyasına yaraşan Oyunlar keçirəcəklərini bildirib. Nazir İslamiadanın Həzrəti Mevlananın vətəni Konyada təşkilinin xüsusi önəm kəsb etdiyini vurğulayıb. Kasapoğlu hər il 200-dək beynəlxalq yarışa ev sahibliyi edən Türkiyə üçün V İslam Həmrəyliyi Oyunlarının fərqli anlam daşıdığını dilə gətirib.

Nazir 2 000-dək könüllünün də Oyunlarda iştirak edəcəyini söyləyərək, onlara təşəkkürünü bildirib.

ISSF-in baş katibi Hüseyin İbrahim Taha da çıxış edərək, yarış iştirakçılarına uğurlar arzulayıb.

Türkiyə Prezidenti Rəcəb Tayyib Ərdoğan Oyunları açıq elan edib. Stadionda atəşfəşanlıq olub.

Qeyd edək ki, V İslam Həmrəyliyi Oyunlarında 56 ölkədən 4 200 idmançı yarışır. Avqustun 18-dək davam edəcək İslamiadada Azərbaycanın ümumilikdə 281 idmançısı qüvvəsini sınayacaq.

.
"Qarabağ" UEFA Çempionlar Liqasının III təsnifat mərhələsində cavab oyununa çıxıb.

"Report”un məlumatına görə, "köhlən atlar" Macarıstanda "Ferentsvaroş" klubunun qonağı olub. "Groupama Arena"da keçirilən və ispaniyalı FIFA referisi Karlos del Serronun idarə etdiyi görüş Azərbaycan çempionunun 3:1 hesablı qələbəsi ilə başa çatıb.

Matça sürətli başlayan Ağdam klubu 2-ci dəqiqədə Ramil Şeydayevlə qola yaxın olub. Lakin 26 yaşlı hücumçunun zərbəsi qapının üstündən keçib. Buna baxmayaraq, "Qarabağ” 5 dəqiqə sonra istəyinə çatıb. Rəqibi əks-hücumda yaxalayan qonaqlar Abdullah Zubirin qolu ilə hesabı açıblar. Fransalı yarımmüdafiəçi Kadi Borgesin məhsuldar ötürməsini dəqiq zərbə ilə tamamlayıb. Buraxılan qoldan sonra təzyiqi artıran meydan sahibləri 9-cu dəqiqədə hesabı bərabərləşdirə bilərdi. Amma Eldar Çiviçin başla vurduğu topu Şahruddin Məhəmmədəliyev tutub. Ardınca isə qolkiper təqribən eyni epizodda bu dəfə Kristofer Zakariasenin fərqlənməsinə mane olub. 30-cu dəqiqədə Azərbaycan millisinin qapıçısı növbəti dəfə diqqət mərkəzinə düşüb. O, Tokmak Nquenlə üzbəüz epizodda komandasını qoldan xilas edib. 32-ci dəqiqədə Zubir yaxın küncü dəqiq nişan alsa da, Deneş Dibus qola mane olub. 44-cü dəqiqədə əvvəlcə Zubir, ardınca isə Borges qapıçı səddini keçə bilməyib və ilk hissə "Qarabağ”ın minimal hesablı üstünlüyü ilə yekunlaşıb.

İkinci yarıya da əla start verən "köhlən atlar” 49-cu dəqiqədə rəqibə təhlükə yaşadıb. Amma Kadi Borgesin zərbəsində azacıq dəqiqlik çatmayıb. 55-ci dəqiqədə isə Qurban Qurbanovun baş məşqçi olduğu komanda 2-ci qolu "Ferentsvaroş”un qapısından keçirib. Bu dəfə Borgesin məhsuldar ötürməsini İbrahima Vadji tora göndərib. 59-cu dəqiqədə Məhəmmədəliyev Nquenin hesab arasındakı fərqi azaltmasına imkan verməyib. 65-ci dəqiqədə Riçard Almeydanın zərbəsi rəqib müdafiəçiyə dəyib istiqamətini dəyişsə də, Dibus barmaqlarının ucu ilə topu küncə çıxarıb. Hücumun davamında künc nöqtəsindən ötürülən topa Vadji başla zərbə endirib. Lakin top qapı dirindən meydanı tərk edib. 75-ci dəqiqədə Vadjinin dubl etməsinin qarşısını müdafiəçilər alıblar. Buna baxmayaraq, seneqallı forvard 3 dəqiqə baxımlı hücumu məntiqi sonluqla başa çatdırıb. 27 yaşlı hücumçu Şeydayevin ötürməsini qapıdan keçirib. 83-cü dəqiqədə meydanda insident baş verib.
"Köhlən atlar"ın hücumu zamanı Abdullah Zubir rəqibin cərimə meydançasında yerə yıxılıb. Həmin vaxt Budapeşt təmsiçisinin müdafiəçisi Endre Botka fransalı yarımmüdafiəçiyə yaxınlaşaraq, ondan kobud formada ayağa qalxmasını tələb edib. Ramil Şeydayev isə Botkaya yaxınlaşaraq, onu itələyib. Nəticədə baş hakim hər iki futbolçuya sarı vərəqə göstərib. 86-cı dəqiqədə görüşdə 4-cü qol vurulub. Adama Traore hesab arasındakı fərqi azaldıb.

Beləliklə, Bakıdakı matçda rəqibi ilə 1:1 hesablı heç-heçə edən "Qarabağ” səfər qələbəsindən sonra adını pley-offa yazdırıb. Ağdam təmsilçisi bu raundda Çexiyanın "Viktoriya” (Plzen) klubu ilə qarşılaşacaq.

“Futbolçularımı təbrik edirəm. Çox əziyyət çəkdilər. Hesab bizi aldada bilər. Asan qələbə olmadı. Çox yaxşı komandaya qarşı oynadıq. Onların da qol imkanları oldu. Rəqibə uğurlar arzu edirəm. Futbolçularımı isə qucaqlayıram”.

“Report” xəbər verir ki, bunu “Qarabağ”ın baş məşqçisi Qurban Qurbanov Macarıstanda “Ferentsvaroş”a 3:1 hesabı ilə qalib gəldikləri UEFA Çempionlar Liqasının III təsnifat mərhələsinin cavab oyunundan sonra mətbuat konfransında deyib.

50 yaşlı mütəxəssis bildirib ki, nə qədər imkanları varsa, bir o qədər irəliyə getmək istəyirlər: “Avropa Liqasının qrupunu təmin etdiyimiz üçün rahatlaşmaq olmaz. Hər oyunda belə qələbələr olmur. Çünki klubların səviyyələri fərqlidir. Əlimizdəki şansdan maksimum yararlanmağa çalışmalıyıq”.
Ətraflı

O, pley-off mərhələsində Çexiyanın “Viktoriya” (Plzen) komandasına qarşı keçirəcəkləri ev oyununun Bakı Olimpiya Stadionuna salınmasının mümkünlüyünə də toxunub: “Öz oyunlarımızı Tofiq Bəhramov adına Respublika stadionunda oynamışıq. Bu məsələni Bakıda müzakirə edərik. İndi nəsə demək çox çətindir”.

Qurbanov rəqib komandanın baş məşqçisi Stanislav Çerçesova böyük hörmətinin olduğunu söyləyib: “Çox bacarıqlı mütəxəssisdir. Futbolçu və məşqçi karyerası məndən daha üstündür. Ona taktiki planda qalib gəldiyimi deyə bilmərəm. Sabah bu, mənim də başıma gələ bilər. Ona görə bu cür düşünmək istəmirəm. Çerçesov çox yaxşı komanda formalaşdırıb. Heyətdə səviyyəli futbolçular var. İdmanda hər zaman güclü qələbə qazanmır. Bu gün biz bu qələbəni haqq edirdik, çox istəyirdik”.

Qurbanovun sözlərinə görə, futbolçuların hamısının sağlam olması baş məşqçi üçün üstünlükdür: “Hər komandada lider futbolçu olur. Amma hər oyunçunun üzərinə bir tapşırıq düşür. Kadi Borges bu gün çox yaxşı oyun göstərdi və mübarizə apardı. Əslində heç kimi fərqləndirmək istəmirəm. Hamısı bu qələbəyə layiq idi”.

Qeyd edək ki, “Qarabağ” pley-off mərhələsində Çexiyanın “Viktoriya” (Plzen) klubu ilə qarşılaşacaq. Ağdam təmsilçisi ilk oyununu 16 avqustda evdə, cavab görüşünü isə 23 avqustda səfərdə keçirəcək.

Futbol üzrə Ukrayna Premyer Liqasında 2022/2023 mövsümünün oyunları gizli keçirilə bilər.

Publika.az xəbər verir ki, buna səbəb hazırda ölkədə Rusiya ilə davam edən müharibədir.

Fövqəladə Hallar Nazirliyi mümkün terror təhlükəsi ilə əlaqədar matçların start tarixini və harada oynanılacağını açıqlamamağı xahiş edib.

"Suallar çoxdur. İndi biz liqa təqvimini tələb edirik, amma tanımaya bilərik. Ola bilsin ki, biz onu son anda tanıyaq", - məlumatda deyilir.

Qeyd edək ki, Ukrayna çempionatı avqustun 23-də başlayacaq. Ötən mövsüm Premyer Liqa ölkədəki hərbi vəziyyətlə bağlı vaxtından əvvəl başa çatdırılıb və həmin vaxt turnir cədvəlinin ilk pilləsində yer alan Donetsk "Şaxtyor"u çempion elan olunub.

Almaniya Bundesliqasında mövsümə start verilib.

Oxu.Az xəbər verir ki, mövsümün ilk matçında “Bavariya” Frankfurtda “Ayntraxt”ın qonağı olub.

Qarşılaşma münhenlilərin 6:1 hesablı qələbəsi ilə yekunlaşıb.

Matçın qollarını təqdim edirik:

FIFA-nın futbol üzrə Azərbaycan Premyer Liqası və ölkə kubokunda VAR sisteminin tətbiqi üçün ayırdığı vəsaitin məbləği bəlli olub.

"Report" ali futbol qurumun rəsmi saytına istinadən xəbər verir ki, bu məqsədlə AFFA-ya FIFA Forward Layihəsindən ümumilikdə 497 173 ABŞ dolları ödəniş edilib.

Milli assosiasiyanın inzibati binasında üç VAR otağı və bir səyyar VAR mərkəzi fəaliyyət göstərəcək. Bu, videotəkrar sistemindən eyni vaxtda dörd matçda istifadə etməyə imkan verəcək.

Qeyd edək ki, Azərbaycan futbolunda VAR sistemi cari mövsümdən tətbiq olunmağa başlayıb.

Kişilərdən ibarət Azərbaycan millisi Hindistanın Çennay şəhərində təşkil olunan Ümumdünya Şahmat Olimpiadasında növbəti görüşünü keçirib.

VII turda İsrail seçməsi ilə qarşılaşan yığma 3:1 hesablı qələbə qazanıb.

Qədir Hüseynov və Vasif Durarbəyli rəqiblərinə qalib gəlib, Şəhriyar Məmməmdyarov və Nicat Abbasov isə sülhə razılaşıb.

Qadınlardan ibarət yığma isə Hindistanla bacarmayıb.

Şahmat Olimpiadası

VII tur

Kişilər

Azərbaycan – İsrail – 3:1

Şəhriyar Məmmədyarov – Avital Boruçovski – 0,5:0,5

Qədir Hüseynov – İlya Smirin – 1:0

Vasif Durarbəyli – Maksim Rodşteyn – 1:0

Nicat Abbasov – Yevgeni Postnı – 0,5:0,5

Qadınlar

Azərbaycan – Hindistan – 1,5:2,5

Günay Məmmədzadə – Hampi Koneru – 1:0

Xanım Balacayeva – Harika Dronavali – 0,5:0,5

Gövhər Beydullayeva – R Vaişali – 0:1

Ülviyyə Fətəliyeva – Tania Sadçev – 0:1

Qeyd edək ki, Ümumdünya Şahmat Olimpiadası avqustun 10-da başa çatacaq.

Bu gün UEFA Avropa Liqasında 2022/2023 mövsümünə start verilib.

Turnir III təsnifat mərhələsininin ilk oyunları ilə başlayıb. Bu raundda 14 komandanın iştirakı ilə 7 görüş keçirilir ki, onlardan bəziləri artıq başa çatıb.

Açılış matçında AEK “Partizan”dan üstün olun 2:1.

Gecənin maraqla gözlənilən matçlarından biri isə Türkiyədə baş tutub. “Fənərbağça” Çexiyanın “Slovaçko” komandasını sınağa çəkib. İstanbul klubu rəqibinin qapısından üç cavabsız top keçirib - 3:0.

Başa çatan “Malmö” – “Düdelanj” matçında da eyni hesab qeydə alınıb - 3:0.
Ətraflı

UEFA Avropa Liqası

III təsnifat mərhələsi, ilk oyunlar

AEK (Larnaka, Kipr) – “Partizan” (Serbiya) 2:1

“Malmö” (İsveç) – “Düdelanj” (Lüksemburq) 3:0

“Fənərbağça” (Türkiyə) – “Slovaçko” (Çexiya) 3:0