Avtomobilimi, bağ evimi, yarım milyon manatımı qaytarın… – Vüqar Səfərlinin oğlundan kassasiya ŞİKAYƏTİ
Ləğv edilmiş Kütləvi İnformasiya Vasitələrinin İnkişafına Dövlət Dəstəyi Fondunun (KİVDF) sabiq icraçı direktoru Vüqar Səfərlinin oğlu Samir Səfərli bir həftə əvvəl – 23 sentyabr 2022-ci ildə Ali Məhkəmənin Cinayət Kollegiyasına Bakı Apelyasiya Məhkəməsinin 29 mart 2022-ci il tarixli qərarından kassasiya şikayəti verib.

Heftelik.az-ın məlumatına görə, Samir Səfərli kassasiya şikayətində qeyd edib ki, Vüqar Səfərli barəsində aparılan cinayət işi üzrə Bakı Ağır Cinayətlər Məhkəməsinin 21 dekabr 2021-ci il tarixi hökmü ilə ona məxsus olan olan Bakı şəhəri, Binəqədi rayonu, Novxanı kəndində yerləşən 0,10055 ha torpaq sahəsində 291,4 kv.m bağ evi “Kia Optima” markalı minik avtomobili və ona məxsus “Rabitəbank” ASC-də olan 550 min manat məbləğində pul vəsaiti məcburi qaydada və əvəzsiz olaraq dövlət nəfinə alınmaqla xüsusi müsadirə edilib.

Bildirilib ki, Bakı Apelyasiya Məhkəməsinin 29 mar tarixli qərarı ilə apelyasiya şikayəti təmin edilməyib, hökm dəyişdirilmədən qüvvədə saxlanılıb. Samir Səfərli Bakı Apelyasiya Məhkəməsinin hökmünün çıxarılmasından onun xəbəri olmadığını, məhkəmə hökmünün ona göndərilmədiyini nəzərə çatdırıb. Yalnız rəsmi müraciətindən sonra məhkəmə hökmünün rəsmən ona verildiyi qeyd olunub.

Samir Səfərli şikayətində qeyd edib ki, Bakı şəhəri, Binəqədi rayonu, Novxanı kəndində yerləşən 0,10055 ha torpaq sahəsində 291,4 kv.m bağ evi “Kia Optima” markalı minik avtomobili onun xüsusi mülkiyyətindədir, atası barəsində gedən cinayət işi üzrə işlə heç bir əlaqəsi olmayan ona məxsus xüsusi mülkiyyətindəki əmlakların xüsusi müsadirəsi yolverilməzdir, qanunvericilikdə övladın xüsusi mülkiyyətində olan əmlakların dövlət nəfinə alınması kimi norma mövcud deyil.

Bütün bunların nəzərə alaraq Samir Səfərli kassasiya şikayətində Bakı Apelyasiya Məhkəməsinin qərarının ləğv edilməsini xüsusi mülkiyyətində olan əmlaklara - akı şəhəri, Binəqədi rayonu, Novxanı kəndində yerləşən 0,10055 ha torpaq sahəsində 291,4 kv.m bağ evi “Kia Optima” markalı minik avtomobili və ona məxsus “Rabitəbank” ASC-də olan 550 min manat məbləğində pul vəsaitinə dair xüsusi müsadirə cinayət-hüquqi tədbirinin ləğv edilməsi barədə qərar çıxarılmasını xahiş edib.

Qeyd edək ki, Bakı Ağır Cinayətlər Məhkəməsinin hökmü ilə Vüqar Səfərli 10 il 6 ay azadlıqdan məhrum edilib.