Deputat: “Prezidentin Çinə səfərində əsas müzakirə bu qlobal logistika layihəsi olacaq”

Çin Kommunist Partiyası Mərkəzi Komitəsinin üzvü, beynəlxalq əlaqələr şöbəsinin müdiri Lü Tzyançaon Bakıya səfərində dövlət başçısı İlham Əliyevlə görüşüb. Prezident ölkələr arasında münasibətlərin yaxşı inkişaf dinamikasının olduğunu və bir çox sahələri əhatə etdiyini deyib. Dövlət başçısı vurğulayıb ki, ötən il Çin lideri Si Cinpinlə görüşünün nəticələrinə əsasən qəbul edilən “Azərbaycan Respublikası ilə Çin Xalq Respublikası arasında strateji tərəfdaşlığın qurulması haqqında Birgə Bəyannamə” dostluq, tərəfdaşlıq və əməkdaşlığımızın nümayişi olmaqla, qarşılıqlı fəaliyyətimizin səviyyəsini yüksəldib.

Baş nazir Əli Əsədovla görüşdə isə Orta Dəhlizin bütövlükdə Avrasiya, o cümlədən Cənubi Qafqaz ölkələri üçün əhəmiyyəti qeyd edilib, Zəngəzur dəhlizinin açılmasının Orta Dəhlizin inkişafına təkan verəcəyi vurğulanıb. “Azərbaycan-Çin strateji tərəfdaşlığı: Qlobal Cənubda konsolidasiya və əməkdaşlığın təşviqi” mövzusunda konfransda Lyu Cyançao Prezident İlham Əliyevin aprel ayında Çinə səfər edəcəyini bildirib.

Bəllidir ki, Zəngəzur dəhlizinin açılması Çinin Avropa bazarına çıxması üçün yeni vasitədir. Çünki Rusiya ilə olan problemlərə görə, Şimal Dəhlizi effektivliyini itirib.

Aydın Hüseynov 

Milli Məclisin İqtisadi siyasət, sənaye və sahibkarlıq komitəsinin üzvü Aydın Hüseynov “Yeni Müsavat”a bildirdi ki, Azərbaycan və Çin arasında dostluğun kökü tarixi İpək Yolundan başlayır: “Azərbaycan Çinin müəllifi olduğu ”Bir kəmər, bir yol" təşəbbüsünü dəstəkləyən ilk ölkələrdən biridir, Prezident İlham Əliyevin 2015-ci ildə Çinə səfəri zamanı Azərbaycan və Çin arasında “İpək Yolu İqtisadi Kəməri”nin reallaşdırılmasına dair Anlaşma Memorandumu imzalanıb. Hazırda Azərbaycan Cənubi Qafqaz regionunda söz sahibi olan lider dövlət, Çin isə Asiyanın və dünyanın iqtisadi güc mərkəzlərindən biridir. Siyasi-iqtisadi amillər, nəqliyyat-tranzit qovşaqları, geosiyasi amillər və digər mühüm faktorlar hər iki ölkəni bir sıra ortaq baxış və strateji maraqlar bucağında tamamlayır. Prezident İlham Əliyevin ötən illərdə Çinə səfərləri ölkələr arasında dostluq və əməkdaşlıq münasibətlərinin daha da inkişaf etdirilməsi və dərinləşdirilməsinə səbəb olub".

A.Hüseynov qeyd etdi ki, BMT-nin beş daimi üzvündən biri olan Çin Xalq Respublikası hər zaman Azərbaycanın ərazi bütövlüyünü və sərhəd toxunulmazlığını dəstəkləyib, hazırda azad olunmuş torpaqlarda ən çox fəallıq edən investorlar arasında bu ölkənin şirkətləri xüsusi yer tutur. Deputat onu da bildirdi ki, siyasi təmasların möhkəmlənməsində hakim partiyaların da rolu xüsusi əhəmiyyət kəsb edir: “Yeni Azərbaycan Partiyası Çin Kommunist Partiyası ilə dostluq münasibətləri saxlayır. Çin Kommunist Partiyası Mərkəzi Komitəsinin üzvü, beynəlxalq əlaqələr şöbəsinin müdiri Lü Tzyançaonun ölkəmizə səfəri və Prezidenti İlham Əliyev tərəfindən qəbul ediıməsi, habelə YAP-da geniş görüşlərin keçirilməsi ölkələrimiz arasında dostluq münasibətlərinin gələcəkdə də möhkəmlənməsi işinə xidmət edəcək”. A.Hüseynov əlavə etdi ki, Çin Zəngəzur dəhlizini dəstəkləyir və bu dəhlizi Mərkəzi Asiya ölkələri ilə Avropa ölkələri arasında nəqliyyat əlaqələrinin şaxələndirilməsini təmin edəcək ən qısa magistral hesab edir".

Cavanşir ABBASLI,
“Yeni Müsavat”