Dəyərli dostlar, 1 sentyabr Milli Məclis seçkiləri ilə əlaqədar namizədlər öz dairələrdə seçicilərin problemlərini həll edəcəkləri ilə bağlı vəədlər verirlər. Doğrudur, deputat öz seçki ərazisində rəsmi məktib və müraciətlərlə icra hakimiyyəti institutlarına lokal problemlərin həlli ilə bağlı təsir göstərə bilərlər – amma, məmləkətin köklü problemlərinin həlli dairə səviyyəndə deyil, Respublika səviyyəsində həll yolları isə qanun dəyişikliklərindən keçir.
Siyasi partiyalar məhz məmləkət məsələlərinin həlli üçün təkliflər, qanun layihələri hazırlamalı, məsələlərə sistemli yanaşmalıdırlar. REAL Partiyasının elan etdiyi platforma məhz 10 mln. əhalini əhatə edən problemlərin, hər bir ölkə vətəndaşına toxunan məsələlərin həlli yolları haqqındadır.
Artıq bir neçə ildir ki, ölkədə ərazaq və dərman satışı zamanı pərakəndə ticarətdə ƏDV-nin 18%-dən 2%-ə endirilməsini təklif edirik. Təklifin publik əsaslandırılmasını dəfələrlə etmişik – bu gün Azərbaycanda dərman alarkən biz aptekə 18% ƏDV ödəyirik, yəni, məsələn, satış qiyməti 10 manat olan dərman üçün 11 manat 80 qəpik ödəmək məcburiyyətindəyik. Bizim təklif qəbul edilsə 10 manat 20 qəpik ödəmək lazım olacaq.
ƏDV-nin son ödəyicisi bizik – vətəndaşlardır. Dərmanı alan, gətirən, satan ƏDV-i öz aralarında əvəzləşdirirlər, sonda biz aptekə gəlib 18% vergi ödəyirik. 2023-cü ildə pərakənda satışda əhali əczaçılıq məhsulları və tibbi ləvazimatlara 1 mlrd. 312 mln. manat ödəyib. Yuvarlaq rəqəmlə ifadə etsək, bunun 250 mln. manatı ƏDV-dir, Dövlət büdcəsi 250 mln. manat az yığsa kasıblamaz, amma kasıb əhalinin, əsasən təqaüdcülərin dərman alarkən 250 mln. manat cibində qalsa başqa dərdlərinə, kommunal və s. sahələrə xərcləyə bilərlər.
Əziz seçicilər, Milli Məclis seçkilərində REAL Partiyasının namizədlərinin qalib gəlməsinə yardımçı olsanız, seçkilərdə aktiv iştirak etsəniz Parlamentdə ilk qaldıracağımız məsələlərdən biri məhz ƏDV-nin azadılması təklifi olacaq. Seçici aktivliyi qələbənin yarısıdır – yarısı sizdən, digər yarısı bizdən!

Natig Jafarli
TEREF