Redaksiyamıza göndərilən şikayət məktubu: “Evimizi əlimizdən aldılar, yoldaşım həyəcandan xərçəng xəstəliyinə tutuldu”
Bəri başdan qeyd edim ki, redaksiyamıza Naxçıvandan minlərlə məktub gəlir. Həmin məktublarda müxtəlif yerli məmurlar barədə ən müxtəlif və maraqlı ittihamlar yer alır. Amma biz onlar içərisindən seçib bəlkə də çoxlarınıza maraqsız görünə biləcək bu məktubu yayımlayırıq. Bilirsinizmi niyə?
Əvvəla, ona görə ki, məktub müəllifi kimliyini gizlətmir və bizdən adının anonym qalmasını da tələb etmir. Bizə göndərilən əksər məktublarda isə kimlərsə barədə ağır ittihamlar yer alsa da, onların anonym şəkildə yayımlanması xahiş edilir. Nəticədə biz ilan tutan “Seyid Əhməd əli” yerinə qoyuluruq. Bu zamanadək “xan” rejiminin represiya ehtimalını nəzərə alıb həmin anonym məktubları dərc edirdik. İndi isə Allaha çox şükür, “xan” həzrətləri Bakıda qeybə çəkilib, dolayısıyla onun adamyeyən dişi də qırılıb. Bundan sonra belə, kimlərsə cəsarət edib öz sözünü öz diliylə demək istəmirsə, bizim də həmin iddialara etibarımız azalır. Təcrübələrimiz də onu göstərir ki, bir çox hallarda həmin anonym məktublarda faktlar şişirdilir və kimdənsə qisas almağa çalışılır. Bizim davamız davamız isə məişət mübahisələrini dilə gətirmək deyil, Naxçıvanda siyasi dəyişikliklərə nail olmaqdır.
İkinci ona görə ki, şikayət məktubu qrammatik qaydalara uyğun yazılıb. Səhifəmizin yetkili şəxslər tərəfindən ciddi şəkildə izlənildiyini nəzərə alıb qrammatik qaydalara uyğun yazılmayan məktubları dərc etməməyə qərar vermişik.
Üçüncü ona görə ki, bu məktubda Naxçıvan dərəbəyliyinin qaraltdığı bir talenin haykırışları gizlənib. Biz də o gizli haykırışları və lənətləri ünvanına çatdırmaq istəyirik.
İndi isə şikayət məktubu ilə tanış olun:
Hörmətli Heydər Bəy,
Sizə müraciət etməkdə məqsədim odur ki, mən Məmmədov Vüqar Məmmədhüseyn oğlu 1994-cü ildə Daxili işlər orqanlarında işə qəbul olmuşam. İşlədiyim dövrdə yəni, 1996-cı ildə Daxili işlər Nazirliyinin nəzdində olan yataqxana binasında mənə ailəmlə yaşamaq üçün mənzil verilib. Buna baxmayaraq, xidmətimlə bağlı müəyyən rayonlarda işləyirdim.
2015-ci ildə təqaüdə çıxdım. Təqaüdə çıxmaqda məqsədim övladım olmadığından müəyyən müalicələr almaq üçün Bakı şəhərinə köçdük və Bakı şəhərində kirayə ev tutub qaldıq. Müalicəni davam etdirdik və bir övladımız dünyaya gəldi. Uşaq xəstə olduğu üçün, məcburən Bakı şəhərində qaldıq. Hərdən Naxçıvana gedərkən həmən yataqxanada qalırdıq və uşağın müalicəsi üçün Bakı şəhərinə gəlib gedirdik.
1996-cı ildən 2022 -ci ilin aprel ayınadək həmin mənzildə qeydiyyatdaydıq (yəni 28 ildir). 23.04.2022-ci il tarixdə DIN-nin müavini Zahid Gözəlov əl telefonuma zəng edərək bildirdi: “Fövqaladə Hallar Nazirliyindən bizə məktub gəlib”. Soruşdum “nə məktubdur?”, dedi: - “göstəriş verilib evdən çıxasınız”. Soruşdum, bu nə məsələdir. Bildirdi ki, FHN-nin müavini general-mayor Kərimov Hikmət Kərim oğlunun göndərdiyi məktub əsasında evdən çıxmağınız tələb olunur. Mən də 3 gün ondan sonra getdim FHN -nin müavini general-mayor Hikmət Kərimovla görüşdüm. O təkidlə bildirdi ki, evi boşalt. Mən dedim ki, mənim evim yoxdur, məni evlə təmin edin çıxım. Həmin mənzildə 28 ildir qeydiyyatdayam və yaşayıram. O isə mənə bildirdi ki, 3 günə vaxt verirəm, çıxmasan göstəriş verəcəyəm, əşyalarını töksünlər çölə. Özün də şikayət üçün hara gedirsən get. Başladı vəzifəsindən sui-istifadə edib məni hədələməyə. Yenə təkrarən bildirdi ki,özünə məxsus olan əşyaları götürməsən göstəriş verəcəm qapını qırıb çölə töksünlər. Mən də məcbur olub evdən çıxdım. Evimdəki əşyalarımı hara aparacağımı bilmədiyim üçün dəyər-dəyməzinə satdım. Sonra Bakıda kiraya yaşadığım evə qayıtdım. Başıma gələnləri həyat yoldaşıma bildirdim. Yoldaşım çox həyacan keçirtdi, dedi: “Mən 22 il o evdə övladsız yaşamışam, indi 5 yaşında övladımız var, biz harda qalacayıq?
Yoldaşım bu həyacandan xərçəng xəstəliyinə düçar oldu. Hal -hazırda vəziyyəti orta kafidir. Bakı şəhəri Milli onkologiya xəstəxanasında qeydiyyatdadır və müalicə olunur. Ayda bir dəfə kimya-terapiya qəbul edir.
Bildirirəm ki, düzgünlüyü ilə araşdırılsın. Aprel ayı evi təhvil verdim, iyul ayı yoldaşım xərçəng xəstəliyi tutdu.
Düzgünlüyü ilə qeyd edim ki, 17.05.2010 - cu ildən Azərtürk bankından kredit götürmüşəm müalicələrə görə, övladım olmadığı üçün. Həmin gündən kredit borcum davam edir. Yoldaşımın xərçəng xəstəliyi ilə bağlı isə 21.07.2022-ci ildə 9000 manat götürərək müalicəsini davam etdirirəm. Ehtiyac varsa araşdırılsın. Xahiş edirəm mənim məsələmi işiqlandırasız.
Hörmətlə: Vüqar Məmmədov
İmza:
Teref.az